Mānavagṛhyasūtra · Chapter 2.12

iti dvitīya ekādaśaḥ khaṇḍaḥ //11//
dvādaśaḥ khaṇḍaḥ
vaiśvadevasya siddhasya sāyaṃ prātarbaliṃ haret

agnīṣomau dhanvantariṃ viśvāndevānprajāpatimagniṃ sviṣṭakṛtamityevaṃ homo vidhīyate

atha baliṃ haratyagnaye namaḥ somāya dhanvantaraye viśvebhyo devebhyaḥ prajāpataye agnaye sviṣṭakṛta ityagnyāgāra uttarāmuttarām

abhdya ityudakumbhasakāśe

oṣadhibhya ityoṣadhibhyo vanaspatibhya iti gṛhamadhyamāyāṃ sthūṇāyām

gṛhyābhyo devatābhya iti gṛhamadhye

dharmāyādharmāyeti dvāre

mṛtyava ākāśāyetyākāśe

antargoṣṭhāyetyantargoṣṭhe

barhivaiśravaṇāyeti bahiḥ prācīm

viśvebhyo devebhya iti veśmani

indrāyendrapuruṣebhya iti purastāt

yamāya yamapuruṣebhya iti dakṣiṇataḥ

varuṇāya varuṇapuruṣebhya iti paścāt

somāya somapuruṣebhya ityuttarataḥ

brahmaṇe brahmapuruṣebhya iti madhye

prācīmāpātikebhyaḥ sampātikebhya ṛkṣebhyo yakṣebhyaḥ pipīlikābhyaḥ piśācebhyo 'psarobhyo gandharvebhyo guhyakebhyaḥ śailebhyaḥ pannagebhyaḥ

divācāribhyo bhūtebhya iti divā naktaṃ cāribhyo bhūtebhya iti naktam

dhanvantaraye dhanvantaritarpaṇam

adbhiḥ saṃsṛjya pitṛbhyaḥ svadheti śeṣaṃ dakṣiṇā bhūmau ninayet

pāṇī prakṣālyācamyātithiṃ bhojayitvāvaśiṣṭasyāśnīyāt