Maitrayani Samhita · Chapter 4.13

yājyānuvākyāḥ
4.13.1 anuvākaḥ

pra devaṃ devyā dhiyetyaṣṭau //
añjanti tvāmadhvare devayanto vanaspate madhunā daivyena /
yad ūrdhvastiṣṭhā draviṇeha dhattādyadvā kṣayo māturasyā upasthe //
uc śrayasva vanaspate varṣman pṛthivyā adhi /
sumitī mīyamāno varco dhā yajñavāhase //
samiddhasya śrayamāṇaḥ purastād brahma vanvāno ajaraṃ suvīraṃ /
āre asmadamatiṃ bādhamānā uc śrayasva mahate saubhagāya //
ūrdhva ū ṣu ṇa ūtaye //
ūrdhvo naḥ pāhyaṃhaso ni ketunā viśvaṃ samatriṇaṃ daha /
kṛdhī na ūrdhvāñ carathāya jīvase vidā deveṣu no duvaḥ //
jāto jāyate sudinatve ahnāṃ samarya ā vidathe vardhamānaḥ /
punanti dhīrā apaso manīṣā devayā viprā udiyarti vācaṃ //
yuvā suvāsāḥ parivītā āgāt sa u śreyān bhavati jāyamānaḥ /
taṃ dhīrāsaḥ kavayā unnayanti svādhyo manasā devayantaḥ //
abhi tvā deva savita, riti trayodaśa
4.13.2 anuvākaḥ

hotā yakṣadagniṃ samidhā suṣamidhā samiddhaṃ nābhā pṛthivyāḥ saṃgathe vāmasya varṣman diva iḍaspade, vetv ājyasya, hotaryaja, hotā yakṣattanūnapātaṃ aditergarbhaṃ bhuvanasya gopām , madhvādya devo devebhyo devayānān patho anaktu, vetv ājyasya, hotaryaja, hotā yakṣan narāśaṃsaṃ nṛśastaṃ nṝm̐ṣpraṇetraṃ , gobhirvapāvānsyā dvīraiḥ śaktīvān rathaiḥ prathamayāvā hiraṇyaiścandrī, vetv ājyasya, hotaryaja, hotā yakṣadagni, miḍa īḍito devo devaṃ ā ca vakṣat , dūto havyavāḍ amūrā, upemaṃ yajñaṃ upemāṃ devo devahūtimavatu, vetv ājyasya, hotaryaja, hotā yakṣad barhiḥ suṣṭarīmorṇamradā , asmin yajñe vi ca pra ca prathatāṃ svāsasthaṃ devebhyo , emenadadya vasavo rudrā ādityāḥ svadantu, priyamindrasyāstu , vetv ājyasya, hotaryaja, hotā yakṣaddura ṛṣvāḥ kavaṣyo kośadhāvanī , rudātābhir jihatāṃ, vi pakṣobhiḥ śrayantām , suprāyaṇā asmin yajñe viśrayantāmṛtāvṛdho , vyanv ājyasya, hotaryaja, hotā yakṣaduṣāsānaktā bṛhatī supeśasā nṝm̐ṣpatibhyo yoniṃ kṛṇvāne, saṃsmayamāne indreṇa devairedaṃ barhiḥ sīdatām , vītāmājyasya, hotaryaja, hotā yakṣad daivyā hotārā mandrā potārā kavī pracetasā, sviṣṭamadyānyaḥ karadiṣā svabhigūrtamanya ūrjā, satavasemaṃ yajñaṃ divi deveṣu dhattāṃ , vītāmājyasya, hotaryaja, hotā yakṣat tisro devīrapasāmapastamā , achidramadyedamapastanvatām , devebhyo devīrdevamapo , vyanvde ājyasya, hotaryaja, hotā yakṣat tvaṣṭāraṃ aciṣṭumapākaṃ retodhāṃ viśravasaṃ yaśodhāṃ pururūpamakāmakarśanaṃ , supoṣaḥ poṣaiḥ syāt suvīro vīrai , rvetv ājyasya hotaryaja,hotā yakṣadvanaspatim upāvasrakṣaddhiyo joṣṭāraṃ , śaśaman naraḥ, svadāt svadhiti , rṛtuthādya devo devebhyo havyāvāṭ ,vetv ājyasya, hotaryaja //
4.13.3 anuvākaḥ

samiddho adya manuṣo duroṇe devo devān yajasi jātavedaḥ /
ā ca vaha mitramahaścikitvān tvaṃ dūtaḥ kavirasi pracetāḥ //
tanūnapāt patha ṛtasya yānānmadhvā samañjansveśadayā sujihva /
manmāni dhībhiruta yajñamṛndhan devatrā ca kṛṇuhyadhvaraṃ naḥ //
narāśam̐sasya mahimānaṃ eṣāmupastoṣāma yajatasya yajñaḥ /
ye sukratavaḥ śucayo dhiyaṃdhāḥ svadantu devā ubhayāni havyā //
ājuhvānā īḍyo vandyaścāyāhyagne vasubhiḥ sajoṣāḥ /
tvaṃ devānāmasi yahva hotā sa enān yakṣīṣito yajīyān //
prācīnaṃ barhiḥ pradiśā pṛthivyā vastorasyā vṛjyate agre ahnāṃ /
vyuu prathate vitaraṃ varīyo devebhyo aditaye syonaṃ //
vyacasvatīrurviyā viśrayantāṃ patibhyo na janayaḥ śumbhamānāḥ /
devīr dvāro bṛhatīrviśvaminvā devebhyo bhavata suprāyaṇāḥ //
ā suṣvayantī yajate upāke uṣāsānaktā sadatāṃ ni yonau /
divye yoṣaṇe bṛhatī surukme adhi śriyaṃ śukrapiśaṃ dadhāne //
daivyā hotārā prathamā suvācā mimānā yajñaṃ manuṣo yajadhyai /
pracodayantā vidatheṣu kārū prācīnaṃ jyotiḥ pradiśā diśantā //
ā no yajñaṃ bhāratī tūyametv iḍā manuṣvadiha cetayantī /
tisro devīr barhiredaṃ syonaṃ sarasvatī svapasaḥ sadantu //
ya ime dyāvāpṛthivī janitrī rūpairapim̐śad bhuvanāni viśvā /
tamadya hotariṣito yajīyān devaṃ tvaṣṭāraṃ iha yakṣi vidvān //
upāvasṛja tmanyā samañjan devānāṃ pātha ṛtuthā havīṃṣi /
vanaspatiḥ śamitā devo agniḥ svadantu havyaṃ madhunā ghṛtena //
4.13.4 anuvākaḥ

agnir hotā no adhvare vājī san pariṇīyate /
devo deveṣu yajñiyaḥ //
pari triviṣṭyadhvaraṃ yātyagnī rathīriva /
ā deveṣu prayo dadhat //
pari vājapatiḥ kaviḥ // ajaidagnirasanadvājaṃ , ni devo devebhyo havyāvāṭ, prāñjobhir hinvāno dhenābhiḥ kalpamāno yajñasyāyuḥ pratiran upapreṣya hotarhavyā devebhyo , daivyāḥ śamitāra uta manuṣyā ārabhadhvaṃ, upanayata medhyā dura āśāsānā medhapataye medham , prāsmā agniṃ bharata, stṛṇīta barhi , ranvenaṃ mātā manyatām anu pitānu bhrātā saṃgarbhyo , anu sakhā sayūthya , udīcīnāṃ asya pado nidhattāt, sūryaṃ cakṣurgamayatāt, vātaṃ prāṇamanvavasṛjatāt , antarikṣamasum , pṛthivīṃ śarīraṃ, ekadhāsya tvacaṃ āchyatāt , purā nābhyā apiśaso vapāmutkhidatāt , antarevoṣmāṇaṃ vārayatāt , śyenaṃ asya vakṣaḥ kṛṇutāt , praśasā bāhū, śalā doṣaṇī, kaśyapevāṃsā , achidre śroṇī, kavaṣorūsre, kaparṇāṣṭhīvantā, ṣaḍviṃśatirasya vaṅkraya, stā anuṣṭuyoccyāvayatāt , gātraṃ gātraṃ asyānūnaṃ kṛṇutāt , ūvadhyagohaṃ pārthivaṃ khanatāt , asnā rakṣaḥ saṃsṛjatāt , vaniṣṭumasya mā rāviṣṭa , urūkaṃ manyamānā , nedvastoke tanaye ravitā ravat , adhrigo śamīdhvaṃ , suśami śamīdhvaṃ , śamīdhvamadhrigo //
adhriguśca vipāpaśca devānāṃ śamitārā /
tā enaṃ pravidvāṃsau śrapayataṃ yathāsya śrapaṇaṃ tathā //
4.13.5 anuvākaḥ

juṣasva saprathastamaṃ //
imaṃ no yajñamamṛteṣu dhehīmā havyā jātavedo juṣasva /
stokānāmagne medaso ghṛtasya hotaḥ prāśāna prathamo niṣadya //
ghṛtavantaḥ pāvaka te stokāḥ ścotanti medasaḥ /
svadharman devavītaye śreṣṭhaṃ no dhehi vāryam //
tubhyam̐ stokā ghṛtaścuto'gne viprāya santya /
ṛṣiḥ śreṣṭhaḥ samidhyase yajñasya prāvitā bhava //
tubhyam̐ ścotantyadhrigo śacīvaḥ stokāso agne medaso ghṛtasya /
kaviśasto bṛhatā bhānunāgā havyā juṣasva medhira //
ojiṣṭhaṃ te madhyato medā udbhṛtaṃ pra te vayaṃ dadāmahe /
ścotanti te vaso stokā adhi tvaci prati tān devaśo vihi //
hotā yakṣadagniṃ svāhā , ājyasya svāhā, medasaḥ svāhā, stokānāṃ svāhā, svāhākṛtīnāṃ svāhā, havyasūktīnāṃ svāhā, devā ājyapā juṣāṇā agnā ājyasya vyantu, hotaryaja //
sadyo jāto vyamimīta yajñamagnirdevānāmabhavat purogāḥ /
asya hotuḥ pradiśy ṛtasya vāci svāhākṛtaṃ haviradantu devāḥ //
agnir vṛtrāṇi jaṅghanat // hotā yakṣadagnimājyasya, juṣatāṃ havi , rhotaryaja //
tvaṃ somāsi satpatiḥ // hotā yakṣat somaṃ ājyasya, juṣatāṃ havi , rhotaryaja //
śuciṃ nu stomaṃ // hotā yakṣadindrāgnī chāgasya vapāyā medaso, juṣetāṃ havi , rhotaryaja // śnathad vṛtram , ubhā vāṃ indrāgnī // hotā yakṣadindrāgnī puroḍāśasya,
juṣetāṃ havi , rhotaryaja // pra carṣaṇibhyo , iḍāmagne, hotā yakṣadagniṃ puroḍāśasya, juṣatāṃ havi , rhotaryaja //
agniṃ sudītiṃ sudṛśaṃ gṛṇanto namasyāmastveḍyaṃ jātavedaḥ /
tvāṃ dūtamaratiṃ havyavāhaṃ devā akṛṇvannamṛtasya nābhim //
iḍopahūtā , upahūteḍā , upāsmaṃ iḍā hvayatām, iḍopahūtā mānavī ghṛtapadī maitrāvaruṇī // brahma devakṛtaṃ upahūtaṃ , daivyā adhvaryavā upahūtā, upahūtā manuṣyā ya imaṃ yajñamavān ye ca yajñapatiṃ vardhān , upahūte dyāvāpṛthivī pūrvaje ṛtāvarī devī devaputre, upahūto'yaṃ yajamānā uttarasyāṃ devayajyāyāṃ, upahūto bhūyasi haviḥkaraṇe , divye dhāmannupahūto , devā ma idaṃ havirjuṣantāmiti, tasminnupahūtaḥ //
4.13.6 anuvākaḥ

tvaṃ hyagne prathamo manotāsyā dhiyo abhavo dasma hotā /
tvaṃ sīm̐ vṛṣannakṛṇor duṣṭarītu saho viśvasmai sahase sahadhyai //
adhā hotā nyasīdo yajīyān iḍaspada iṣayann īḍyaḥ san /
tvaṃ tvā naraḥ prathamaṃ devayanto maho rāye citayanto anugman //
vṛteva yantaṃ bahubhirvasavyaistve rayiṃ jāgṛvāṃso anugman /
ruśantamagniṃ darśataṃ bṛhantaṃ vapāvantaṃ viśvahā dīdivāṃsaṃ //
padaṃ devasya namasā vyantaḥ śravasyavaḥ śrava āpannamṛktaṃ /
nāmāni cid dadhire yajñiyāni bhadrāyāṃ te raṇayanta saṃdṛṣṭau //
tvām̐ vardhanti kṣitayaḥ pṛthivyāṃ tvām̐ rāya ubhayāso janānāṃ /
tvaṃ trātā taraṇe cetyo bhūḥ pitā mātā sadaminmānuṣāṇāṃ //
saparyeṇyaḥ sa priyo vikṣvagnir hotā mandro niṣasādā yajīyān /
taṃ tvā vayaṃ damā ā dīdivāṃsaṃ upa jñubādho namasā sadema //
taṃ tvā vayaṃ sudhyo navyamagne sumnāyava īmahe devayantaḥ /
tvaṃ viśo anayo dīdyāno divo agne bṛhatā rocanena //
viśāṃ kaviṃ viśpatiṃ śaśvatīnāṃ nitośanaṃ vṛṣabhaṃ carṣaṇīnāṃ /
pretīṣaṇimiṣayantaṃ pāvakaṃ rājantamagniṃ yajataṃ rayīṇāṃ //
so agna īje śaśame ca marto yastā ānaṭ samidhā havyadātim /
ya āhutiṃ pari vedā namobhirviśvetsa vāmā dadhate tvotaḥ //
asmā u te mahi mahe vidhema namobhiragne samidhota havyaiḥ /
vedī sūno sahaso gīrbhirukthairā te bhadrāyāṃ sumatau yatema //
ā yastatantha rodasī vi bhāsā śravobhiśca śravasyastarutraḥ /
bṛhadbhirvājaiḥ sthavirebhirasme revadbhiragne vitaraṃ vibhāhi //
nṛvadvaso sadamid dhehyasme bhūri tokāya tanayāya paśvaḥ /
pūrvīriṣo bṛhatīrāreaghā asme bhadrā sauśravasāni santu //
purūṇyagne purudhā tvāyā vasūni rājanvasutā te aśyām /
purūṇi hi tve puruvāra santyagne vasu vidhate rājani tve //
4.13.7 anuvākaḥ

ā vṛtrahaṇā vṛtrahabhiḥ śuṣmairindra yātaṃ namobhiragne arvāk /
yuvaṃ rādhobhirakavebhirindrāgne asme bhavataṃ uttamebhiḥ //
hotā yakṣadindrāgnī chāgasya haviṣā āttāmadya madhyato medā udbhṛtaṃ purā dveṣobhyaḥ purā pauruṣeyyā gṛbho ghastāṃ nūnaṃ ghāseajrāṇāṃ yavasaprathamānāṃ sumatkṣarāṇāṃ śatarudriyāṇāmagniṣvāttānāṃ pīvopavasanānāṃ pārśvataḥ śroṇitaḥ śitāmata utsādato'ṅgādaṅgād avattānāṃ karata evendrāgnī juṣetāṃ havirhotaryaja //
gīrbhirvipraḥ pramatimichamānā īṭṭe rayim̐ yaśasaṃ pūrvabhājaṃ /
indrāgnī vṛtrahaṇā suvajrā pra no navyebhistirataṃ deṣṇaiḥ //
devebhyo vanaspate havīṃṣi hiraṇyaparṇa pradivaste artham /
pradakṣiṇidraśanayā niyūya ṛtasya vakṣi pathibhī rajiṣṭhaiḥ //
hotā yakṣadvanaspatim , abhi hi piṣṭatamayā rabhiṣṭhayā raśanayādhita yatrāgnerājyasya priyā dhāmāni yatra somasyājyasya haviṣaḥ priyā dhāmāni
yatrendrāgnyośchāgasya haviṣaḥ priyā dhāmāni yatra vanaspateḥ priyā pāthāṃsi yatra devānāmājyapānāṃ priyā dhāmāni yatrāgner hotuḥ priyā dhāmāni tatraitaṃ prastutyevopastutyevopāvasrakṣat rabhīyāṃsamiva kṛtvī karadevaṃ devo vanaspati, rjuṣatāṃ havi , rhotaryaja //
vanaspate raśanayā niyūya piṣṭatamayā vayunāni vidvān /
vahā devatrā dadhiṣo havīṃṣi pra ca dātāraṃ amṛteṣu vocaḥ //
piprīhi devān // hotā yakṣadagniṃ sviṣṭakṛtaṃ, ayāḍagniragneḥ priyā dhāmāni , ayāṭ somasyājyasya haviṣaḥ priyā dhāmāni , ayāḍ indrāgnyośchāgasya haviṣaḥ priyā dhāmāni , ayāḍ vanaspateḥ priyā pāthāṃsi , ayāḍ devānāmājyapānāṃ priyā dhāmāni, yakṣadagner hotuḥ priyā dhāmāni, yakṣat svaṃ mahimānaṃ, āyajatāmejyā iṣaḥ, kṛṇotu so adhvarāñ jātavedā , juṣatāṃ havi , rhotaryaja // agne yadadya , iḍopahūtā //
4.13.8 anuvākaḥ

devaṃ barhiḥ sudevaṃ devaiḥ syāt , suvīraṃ vīrai , rvastor vṛjyetā , aktoḥ prabhriyetā , atyanyān rāyā barhiṣmato madema, vasuvane vasudheyasya vetu, yaja, devaṃ barhir
vasuvane vasudheyasya vetu, devīr dvāraḥ saṃghāte vīḍvīryāmañ śithirā dhruvā devahūtau, vatsa īmenāstaruṇā āmimīyāt kumāro vā navajāto , mainā arvā reṇukakāṭaḥ praṇak , vasuvane vasudheyasya vyantu, yaja, devīr dvāro, vasuvane vasudheyasya vyantu, devī uṣāsānaktādyāsmin yajñe prayatyahvetām , api nūnaṃ daivīrviśaḥ prāyāsiṣṭām̐ suprīte sudhite, vasuvane vasudheyasya vītām , yaja, devī uṣāsānaktā, vasuvane vasudheyasya vītām , devī joṣṭrī vasudhitī yayoranyāghā dveṣāṃsi yūyavadānyā vakṣadvasu vāryāṇi yajamānāya, vasuvane vasudheyasya vītām , yaja, devī joṣṭrī, vasuvane vasudheyasya vītām , devī ūrjāhutī iṣaṃ ūrjamanyā vakṣatsagdhim̐ sapītim anyā, navena pūrvaṃ dayamānāḥ syāma purāṇena navaṃ , tām ūrjaṃ ūrjāhutī ūrjayamāne adhātām , vasuvane vasudheyasya vītām , yaja, devī ūrjāhutī, vasuvane vasudheyasya vītām , devā daivyā hotārā potārā neṣṭārā hatāghaśam̐sā ābharadvasuvane vasudheyasya vītām , yaja, devā daivyā hotārā, vasuvane vasudheyasya vītām , devīstisrastisro devīriḍā sarasvatī bhāratī, dyāṃ bhāratyādityairaspṛkṣat sarasvatīmaṃ rudrairyajñamāvīt , ihaiveḍayā vasumatyā sadhamādaṃ madema, vasuvane vasudheyasya vyantu, yaja, devīstisrastisro devī , rvasuvane vasudheyasya vyantu, devo narāśaṃsastriśīrṣā ṣaḍakṣaḥ, śataṃ idenaṃ śitipṛṣṭhā ādadhati, sahasramīṃ pravahanti, mitrāvaruṇedasya hotramarhato , bṛhaspatiḥ stotram, aśvinādhvaryavaṃ , vasuvane vasudheyasya vetu, yaja, devo narāśaṃso vasuvane vasudheyasya vetu, devo vanaspatirvarṣaprāvā ghṛtanirṇig dyāmagreṇāspṛkṣat , āntarikṣaṃ madhyenāprāḥ, pṛthivīṃ upareṇādṛṃhīt , vasuvane vasudheyasya vetu, yaja, devo vanaspatir vasuvane vasudheyasya vetu, devaṃ barhirvāritīnāṃ nidhedhāsi pracyutīnāmapracyutaṃ nikāmadharaṇaṃ puruṣaspārhaṃ yaśasvat , enā barhiṣānyā barhīm̐ṣyabhiṣyāma, vasuvane vasudheyasya vetu, yaja, devaṃ barhirvāritīnāṃ vasuvane vasudheyasya vetu, devo agniḥ sviṣṭakṛt , yaja, devo agniḥ sviṣṭakṛt //
4.13.9 anuvākaḥ

agnimadya hotāraṃ avṛṇītāyaṃ yajamānaḥ pacan paktīḥ pacan puroḍāśaṃ gṛhṇannagnayā ājyaṃ gṛhṇant somāyājyaṃ badhnannindrāgnibhyāṃ chāgam , sūpasthā adya devo vanaspatirabhavadagnayā ājyena somāyājyenendrāgnibhyāṃ chāgena , aghastāṃ taṃ , medastaḥ pratipacata , agrabhīṣṭām, avīvṛdhetāṃ puroḍāśena, tvāmadya ṛṣa ārṣeya ṛṣīṇāṃ napādavṛṇītāyaṃ yajamāno , bahubhyā ā saṃgatebhya eṣa me deveṣu vasu vāryāyakṣyatā iti, tā yā devā devadānāni adustāni asmā ā ca śāsvā ca gurasva , iṣitaśca hotarasi bhadravācyāya preṣito , mānuṣaḥ sūktavākāya, sūktā brūhi , idaṃ dyāvāpṛthivī bhadramabhūt , ārmda sūktavākamuta namovākaṃ, ṛdhyāsma sūktocyaṃ, agne tvaṃ sūktavāg asy upaśruti divo pṛthivyo , romanvatī te'smin yajñe yajamāna dyāvāpṛthivī stām̐ śaṃgavī jīradānū atrasnū apravede asaṃbādhe urugavyūtī abhayaṃkṛtau vṛṣṭidyāvā rītyāpā śaṃbhuvau mayobhuvā ūrjasvatī ca payasvatī ca sūpacaraṇā ca svadhicaraṇā ca, tayorāvidyagniridaṃ havirajuṣata , avīvṛdhata, maho jyāyo'kṛta, soma idaṃ havirajuṣatā , avīvṛdhata, maho jyāyo'kṛta , indrāgnī idaṃ havirajuṣetām , avīvṛdhetām , maho jyāyo'krātām , vanaspatiridaṃ havirajuṣatā , avīvṛdhata, maho jyāyo'kṛta, devā ājyapā ājyamajuṣantā , avīvṛdhanta, maho jyāyo'kratā, agnir hotreṇedaṃ havirajuṣatā , avīvṛdhata, maho jyāyo'kṛtā , asyāṃ ṛdhaddhotrāyāṃ devaṃgamāyāṃ āśāste'yaṃ yajamānā , āyurāśāste, suprajāstvamāśāste, viśvaṃ priyamāśāste, yadanena haviṣāśāste tadaśyāt , tad ṛdhyāt , tadasmai devā rāsantām , tadagnirdevo devebhyo vanutām , vayam agnermānuṣā iṣṭaṃ ca vītaṃ ca , ubhe ca no dyāvāpṛthivī aṃhasaspātām , eha gatirvāmasya , idaṃ namo devebhyaḥ //
4.13.10 anuvākaḥ

taṃ śaṃyorāvṛṇīmahe gātuṃ yajñāya gātuṃ yajñapataye daivī svastirastu naḥ svastirmānuṣebhyaḥ /
ūrdhvaṃ jigātu bheṣajaṃ śaṃ no astu dvipade śaṃ catuṣpade //
āpyāyasva, saṃ te payāṃsi //
iha tvaṣṭāraṃ agriyaṃ viśvarūpamupahvaye /
asmākamastu kevalaḥ //
tan nasturīpamadha poṣayitnu deva tvaṣṭarvi rarāṇaḥ syasva /
yato vīraḥ karmaṇyaḥ sudakṣo yuktagrāvā jāyate devakāmaḥ //
devānāṃ patnīruśatīravantu naḥ prāvantu nastujaye vājasātaye /
yāḥ pārthivāso yā apāmapi vrate tā no devīḥ suhavāḥ śarma yacchata //
uta gnā vyantu devapatnīrindrāṇyagnāyyaśvinī rāṭ /
ā rodasī varuṇānī śṛṇotu vyantu devīrya ṛturjanīnāṃ //
rākāmahaṃ , yāste rāke, sinīvāli, yā supāṇiḥ, kuhūmahaṃ , kuhūrdevānāṃ //
agnir hotā gṛhapatiḥ sa rājā viśvā veda janimā jātavedāḥ /
devānāṃ uta yo martyānāṃ yajiṣṭhaḥ sa prayajatāmṛtāvā //
havyavāḍagni , riḍopahūtā //
iti khilakāṇḍe trayodaśaḥ prapāṭhakaḥ