Maitrayani Samhita · Chapter 4.12

yājyānuvākyāḥ
4.12.1 anuvākaḥ

idaṃ vāṃ āsye haviḥ priyamindrābṛhaspatī /
ukthaṃ madaśca śasyate //
asme indrābṛhaspatī rayiṃ dhattaṃ śatagvinaṃ /
aśvāvantaṃ sahasriṇaṃ //
ehy u ṣu bravāṇi te'gne itthetarā giraḥ /
ebhirvardhāsā indubhiḥ //
imaṃ yajñaṃ idaṃ vacaḥ //
tyānnu kṣatriyaṃ ava ādityān yāciṣāmahe /
sumṛḍīkaṃ abhiṣṭaye //
yebhyo mātā madhumat pinvate payaḥ pīyūṣaṃ dyaur aditiradribarhāḥ /
ukthaśuṣmān vṛṣabharānsvithapnasastamādityaṃ anumadāt svastaye //
dhārayanta ādityāso jagat sthā devā viśvasya bhuvanasya gopāḥ /
dīrghādhiyo rakṣamāṇā asuryam ṛtāvānaścayamānā ṛṇāni //
trī rocanā divyā dhārayanta hiraṇyayā śucayo dhārapūtāḥ /
avṛjinā anavadyā adabdhā uruśaṃsā ṛjave martyāya //
tat sūryasya, bhadrā aśvā , hiraṇyagarbho , yaḥ prāṇataḥ //
bṛhaspatiḥ prathamaṃ jāyamāno maho jyotikṣaḥ parame vyoman /
saptāsyastuvijāto raveṇa vi saptaraśmiradhamattamāṃsi //
yadā vājamasanadviśvarūpamā dyāmarukṣaduttarāṇi sadma /
bṛhaspatiṃ vṛṣaṇaṃ vardhayanto nānā santo bibhrato jyotirāsāṃ //
bṛhaspatiṃ havāmahe viśvataḥ sagaṇaṃ vayam /
upa no yajñamāgamat //
sa suṣṭubhā sa ṛkvatā gaṇena valaṃ ruroja phaligaṃ raveṇa /
bṛhaspatirusriyā havyasūdaḥ kanikradadvāvaśatīrudājat //
brahmaṇaspate tvamasya yantā sūktasya bodhi tanayaṃ ca jinva /
viśvaṃ tad bhadraṃ yadavanti devā bṛhadvadema vidathe suvīrāḥ //
brahmaṇaspate sūyamasya viśvahā rāyaḥ syāma rathyo vayasvataḥ /
vīreṣu vīraṃ upapṛṅdhi nastvaṃ yadīśāno brahmaṇā veṣi me havaṃ //
uttiṣṭha brahmaṇaspate devayantastvemahe /
upa prayantu marutaḥ sudānavā indra prāśūrbhavā sacā //
agnirukthe purohito grāvāṇo barhiradhvare /
ṛcā yāmi maruto brahmaṇaspatiṃ devaṃ avo vareṇyam //
namaste rudra manyave , imā rudrāya //
ko addhā veda ka iha pravocat kutā ājātā kuta iyaṃ visṛṣṭiḥ /
arvāg devā asya visarjanenāthā ko veda yata ābabhūva //
iyaṃ visṛṣṭiryata ābabhūva yadi vā dadhe yadi vā na /
yo asyādhyakṣaḥ parame vyomantso aṅga veda yadi vā na veda //
idaṃ viṣṇurvicakrame //
tadasya priyamabhi pātho aśyāṃ naro yatra devayavo madanti /
urukramasya sa hi bandhuritthā viṣṇoḥ pade parame madhvā utsaḥ //
viśve devā ṛtāvṛdhaḥ //
viśve devāḥ śṛṇutemaṃ havaṃ me ye antarikṣe ya upa dyavi ṣṭha /
ye agnijihvā uta vā yajatrā āsadyāsmin barhiṣi mādayadhvaṃ //
indrāṇī patyā sujitaṃ jigāya senā ha nāma pṛthivī dhanaṃjayā viśvavyacā aditiḥ sūryatvak /
indrāṇī prāsahā saṃjayantī tasyai ta enā haviṣā vidhema //
upaprehi vācaspate devena manasā saha /
vasupate viramaya mayyeva tanvaṃ mama //
ye trisaptāḥ pariyanti viśvā rūpāṇi bibhrataḥ /
vācaspatir balā teṣāṃ tanvo'dya dadhātu me //
4.12.2 anuvākaḥ

agniḥ prathamo vasubhirno avyāt somo rudrairabhirakṣatu tmanā /
indro marudbhir ṛtuthā kṛṇotv ādityair no varuṇaḥ śarma yaṃsat //
samagnirvasubhir no avyāt saṃ somo rudriyābhistanūbhiḥ /
samindro rātahavyo marudbhiḥ samādityairvaruṇo viśvavedāḥ //
agne dā dāśuṣe rayim̐ vīravantaṃ parīṇasaṃ /
śiśīhi naḥ sūnumataḥ //
dā no agne śatino dāḥ sahasriṇo duro na vājaṃ śrutyā apāvṛdhi /
prācī dyāvāpṛthivī brahmaṇā kṛdhi svarṇa śukramuṣaso vididyutuḥ //
hiraṇyapāṇimūtaye savitāraṃ upahvaye /
sa cettā devatā padaṃ //
vāmaṃ adya savitarvāmaṃ u śvo divedive vāmamasmabhyam̐ sāvīḥ //
vāmasya hi kṣayasya deva bhūrerayā dhiyā vāmabhājaḥ syāma //
pra vāyum , pra yābhiḥ //
syonā pṛthivi bhavānṛkṣarā niveśanī /
yachā naḥ śarma saprathaḥ //
baḍitthā parvatānāṃ khidraṃ bibharṣi pṛthivi /
pra yā bhūmiṃ pravatvati mahnā hinoṣi mahini //
pūrvāparaṃ carato māyayaitau śiśū krīḍantau pariyāto adhvaram /
viśvāni anyo bhuvanā vicaṣṭa ṛtūm̐ranyo vidadhajjāyate punaḥ //
navo navo bhavati jāyamāno'hnāṃ keturuṣasāṃ etyagram /
bhāgaṃ devebhyo vidadhātyāyan pra candramāstirate dīrgham āyuḥ //
yathādityā aṃśumāpyāyayanti yathākṣitim akṣitayaḥ pibanti /
evāsmān indro varuṇo bṛhaspatir āpyāyayantu bhuvanasya gopāḥ //
prācyāṃ diśi tvamindrāsi rājotodīcyāṃ vṛtrahan vṛtrahāsi /
yatra yanti srotyāstajjitaṃ te dakṣiṇato vṛṣabho havya edhi //
asyedeva praririce mahitvaṃ divo pṛthivyāḥ paryantarikṣāt /
svarāḍ indro damā ā viśvagūrtaḥ svariramatro vavakṣe raṇāya //
tvamindrāsyadhirājastvaṃ bhavādhipatirjanānāṃ /
daivīrviśastvamutā virājaujasvat kṣatramajaraṃ te astu //
ā yasmintsapta vāsavā rohanti pūrvyā ruhaḥ /
ṛṣirha dīrghaśruttamā indrasya gharmo atithiḥ //
mado na yaḥ somyo bodhicakṣā vātaśca nu cyavana induvikṣāḥ /
sa tapnuḥ śucase na sūraḥ sa svedayuḥ śuśucāno na gharmaḥ //
indriyāṇi śatakrato yā te janeṣu pañcasu /
indra tāni tā āvṛṇe //
anu te dāyi maha indriyāya satrā te viśvamanu vṛtrahatye /
anu kṣatramanu saho yajatrendra devebhiranu te nṛṣahye //
anavaste rathamaśvāya takṣan tvaṣṭā vajraṃ puruhūta dyumantam /
brahmāṇā indraṃ mahayanto arkairavardhayannahaye hantavā u //
vṛṣṇe yatte vṛṣaṇo arkamarcānindra grāvāṇo aditiḥ sajoṣāḥ /
anaśvāso ye pavayo'rathā indreṣitā abhyavartanta dasyūn //
4.12.3 anuvākaḥ

viveṣa yanmā dhiṣaṇā jajāna stavai purā pāryādindramahnaḥ /
aṃhaso yatra pīparadyathā no nāveva yāntam ubhaye havante //
aṃhomuce prabharemā manīṣāṃ bhūyiṣṭhadāvne sumatimāvṛṇānaḥ /
idamindra prati havyaṃ juṣasva satyāḥ santu yajamānasya kāmāḥ //
trātāraṃ indramavitāraṃ indraṃ havehave suhavaṃ śūramindram /
huve nu śakraṃ puruhūtamindraṃ svasti no maghavā dhātvindraḥ //
mā te asyāṃ sahasāvan pariṣṭā aghāya bhūma harivaḥ parādaiḥ /
trāyasva no'vṛkebhirvarūthaistava priyāsaḥ sūriṣu syāma //
anu tvāhighne adha deva devā madan viśve kavitamaṃ kavīnāṃ /
karo yatra varivo bādhitāya dive janāya tanve gṛṇānaḥ //
anu dyāvāpṛthivī tattā ojo'martyā jihata indra devāḥ /
kṛṣvā kṛtno akṛtaṃ yatte asty ukthaṃ navīyo janayasva yajñaiḥ //
abhi prabhara dhṛṣatā dhṛṣanmanaḥ śravaścitte asad bṛhat /
arṣanvbhā āpo javasā vi mātaro hano vṛtraṃ jayā svaḥ //
asmā idu prabharā tūtujāno vṛtrāya vajraṃ īśānaḥ kiyedhāḥ /
gorna parva viradā tiraśceṣyannarṇāṃsyapāṃ caradhyai //
vi na indra mṛdho jahi nīcā yaccha pṛtanyataḥ /
adhaspadaṃ tamīṃ kṛdhi yo asmaṃ abhidāsati //
mṛgo na bhīmaḥ kucaro giriṣṭhāḥ parāvatā ājaganthā parasyāḥ /
sṛkaṃ saṃśāya pavimindra tigmaṃ vi śatrūn tāḍhi vi mṛdho nudasva //
ākare vasorjaritā panasyate'nehasaḥ stubhā indro duvasyati /
vivasvataḥ sadanā ā hi pipriye satrāsāhamabhimātihanaṃ stuhi //
tvaṃ sapatnān pṛtanāsu jiṣṇurindrābhiṣāḍabhimātīrapaghnan /
pibā somaṃ vajrabāho viṣahyāsmabhyaṃ paṇīm̐rarvasvāmukhāya //
puruṣṭutasya nāmabhiḥ śatena mahayāmasi /
indrasya carṣaṇīsahaḥ //
nāmāni te śatakrato viśvābhir gīrbhirīmahe /
indrābhimātiṣāhye //
arvāvato nā āgahi parāvataśca vṛtrahan /
imā juṣasva no giraḥ //
yadantarā parāvatamarvāvataṃ ca hūyase /
indreha tatā āgahi //
endra sānasim̐ rayim̐ sajitvānaṃ sadāsahaṃ /
varṣiṣṭham ūtaye bhara //
prasasāhiṣe puruhūta śatrūn jyeṣṭhaste śuṣma iha rātirastu /
indrābhara dakṣiṇenā vasūni patiḥ sindhūnāmasi revatīnāṃ //
indraṃ naro nemadhitā havante yatpāryā yunajate dhiyastāḥ /
śūro nṛṣātā śravasaścakāna ā gomati vraje bhajā tvaṃ naḥ //
hṛdaṃ na hi tvā nayṛṣanycaka ūrmayo brahmāṇīndra tava yāni vardhanā /
tvaṣṭā citte yujyaṃ vāvṛdhe śavastatakṣa vajraṃ abhibhūtyojasaṃ //
abhi svavṛṣṭiṃ made asya yudhyato raghvīriva pravaṇe sasrurūtayaḥ /
indro yadvajrī dhṛṣamāṇo andhasā bhinadvalasya paridhīm̐riva tritaḥ //
tamindraṃ vājayāmasi, yuje rathaṃ //
vṛtraturaṃ maghavānaṃ śacīpatim indraṃ giro bṛhatīrabhyanūṣata /
vāvṛdhānaṃ puruhūtaṃ suvṛktibhiramartyaṃ jaramāṇaṃ divedive //
ahan vṛtraṃ vṛtrataraṃ vyaṃsamindro vajreṇa mahatā vadhena /
skandhāṃsīva kuliśenā vivṛkṇāhiḥ śayata upapṛk pṛthivyāḥ //
abhitiṣṭha pṛtanyato'dhare santu śatravaḥ /
indra iva dasyuhā bhavāpaḥ kṣetrāṇi saṃjaya //
āśīrnā ūrjamuta suprajāstvamiṣaṃ dadhātu draviṇaṃ savarcasaṃ /
saṃjayan kṣetrāṇi sahasāhamindra kṛṇvāno anyaṃ adharāntsapatnān //
tvamindrāsyadhirājaḥ //
indro jayati na parājayate adhirājo rājasu rājayate /
viśvā abhiṣṭiḥ pṛtanā jayaty upasadyo namasyo yathāsat //
ā te maha indrotyugra samanyavo yatsamaranta senāḥ /
patāti didyun naryasya bāhvormā te mano viṣvadryag vicārīt //
yo jāta eva prathamo manasvān devo devān kratunā paryabhūṣat /
yasya śuṣmād rodasī abhyasetāṃ nṛmṇasya mahnā sa janāsā indraḥ //
manyurindro manyurevāsa devo manyurhotā varuṇo viśvavedāḥ /
manyum̐ viśa īḍate mānuṣīryā avā no manyo tapasā sajoṣāḥ //
tvaṃ hi manyo abhibhūtyojāḥ svayaṃjo bhāmo abhimātiṣāhaḥ /
viśvacarṣaṇiḥ sahuriḥ sahāvāntsa hūyamāno amṛtāya gacchat //
iḍāmagne, tvaṃ no agne, kimitte viṣṇo, pra tatte adya //
dīrghaste astvaṅkuśo yenā vasu prayacchasi /
yajamānāya sunvate //
bhadrā te hastā sukṛtota pāṇī prayantārā stuvate rādha indra /
kā te niṣattiḥ (niśatriḥ) kimu no mamatsi kiṃ nodudu harṣase dātavā u //
4.12.4 anuvākaḥ

indrāvaruṇā yuvamadhvarāya no viśe janāya mahi śarma yacchataṃ /
dīrghaprayajyumati yo vanuṣyati vayaṃ jayema pṛtanāsu dūḍhyaḥ //
samrāḍ anyaḥ svarāḍanya ucyate vāṃ mahāntā indrāvaruṇā mahāvasū /
viśve devāsaḥ parame vyomani saṃ vāmojo vṛṣaṇā saṃ balaṃ dadhuḥ //
viśvāhenrovā adhivaktā no astvaparihṛtāḥ sanuyāma vājaṃ /
tan no mitro varuṇo māmahantām aditiḥ sindhuḥ pṛthivī uta dyauḥ //
enāṃ mukhena vāyumindravanto'ciṣyāma vṛjane viśva ūtī /
tan no mitro varuṇo māmahantām aditiḥ sindhuḥ pṛthivī uta dyauḥ //
kutrā cidyasya samṛtau raṇvā naro nṛṣadane /
arhantaścidyamindhate saṃjanayanti jantavaḥ //
saṃ yadiṣo vanāmahe saṃ havyā mānuṣāṇāṃ /
uta dyumnasya śavasa ṛtasya raśmim ādade //
yadadya sūrya bravo'nāgā udyan mitrāya varuṇāya satyaṃ /
vayaṃ devatrādite syāma tava priyāso aryaman gṛṇantaḥ //
ud vāṃ pṛkṣāso madhumanto asthurā sūryo aruhac śukramarṇaḥ /
yasmā ādityā adhvano radanti mitro aryamā varuṇaḥ sajoṣāḥ //
upemasṛkṣi vājayurvacasyāṃ cano dadhīta nādyo giro me /
apāṃ napādāśuhemā kuvitsa supeśasaskarati joṣiṣaddhi //
samanyā yanti //
apāṃ napādā hyasthādupasthaṃ jihmānāṃ ūrdhvo vidyutaṃ vasānaḥ /
tasya jyeṣṭhaṃ mahimānaṃ vahantīr hiraṇyavarṇāḥ pariyanti yahvīḥ //
tamasmerā yuvatayo yuvānaṃ marmṛjyamānāḥ pariyanyā opaḥ /
sa śukrebhiḥ śikvabhī revadagnir dīdāyānidhmāṃ ghṛtanirṇigapsu //
agnā āyūṃṣi pavase //
āyurdā deva jarasaṃ vṛṇāno ghṛtapratīko ghṛtapṛṣṭho agne /
ghṛtaṃ pibannamṛtaṃ cāru gavyaṃ piteva putraṃ jarase ma emam //
gayasphāno amīvahā //
yā te dhāmāni haviṣā yajanti tā te viśvā paribhūrastu yajñaṃ /
gayasphānaḥ prataraṇaḥ suvīro'vīrahā pracarā soma duryān //
sutrāmāṇaṃ, mahīm ū ṣu , imaṃ me varuṇa, tat tvā yāmi, vaiśvānaro na ūtyā, pṛṣṭo divi , abhi tvā śūra nonuma, stvāmiddhi havāmahe //
āpaprātha mahinā vṛṣyārā vṛṣan viśvā śaviṣṭha śavasā /
asmam̐ ava maghavan gomati vraje vajriñ citrābhirūtibhiḥ //
bodhā su me maghavan vācaṃ emāṃ yāṃ te vasiṣṭho arcati praśastim /
imā brahma sadhamāde juṣasva //
revatīr naḥ sadhamādā indre santu tuvivājāḥ /
kṣumanto yābhirmadema //
pro ṣv asmai purorathamindrāya śūṣamarcata /
abhīke cidu lokakṛtsaṅge samatsu vṛtrahā /
asmākaṃ bodhi coditā nabhantāmanyakeṣām jyākā adhi dhanvasu //
ā no agne sucetunā //
ā no agne rayiṃ bhara satrāsāhaṃ vareṇyam /
viśvāsu pṛtsu duṣṭaraṃ //
indro madāya vāvṛdhe śavase vṛtrahā nṛbhiḥ /
taṃ inmahatsv ājiṣūtemarbhe havāmahe sa vājeṣu pra no'viṣat //
made made hi no dadir yūthā gavāṃ ṛjukratuḥ /
saṃgṛbhāya purū śatobhayāhastyā vasu śiśīhi rāya ābhara //
tā asya namasā sahaḥ saparyanti pracetasaḥ /
vratāni asya saścire purūṇi pūrvacittaye vasvīranu svarājyaṃ //
tā asya pṛśanāyuvaḥ somaṃ śrīṇanti pṛśnayaḥ /
priyā indrasya dhenavo vajraṃ hinvanti sāyakaṃ vasvīranu svarājyaṃ //
ghṛtaṃ na pūtaṃ tanūrarepāḥ śuci hiraṇyam /
tatte rukmo na rocata svadhāvaḥ //
obhe suścandra viśpate //
āryamā yāti vṛṣabhasturāṣāḍ dātā vasūni vidadhe tanūpāḥ /
sahasrākṣo gotrabhidvajrabāhurasmāsu devo draviṇaṃ dadhātu //
ye te'ryaman bahavo devayānāḥ panthāno rājan diva ācaranti /
tebhir no deva mahi śarma yaccha śaṃ no bhava dvipade śaṃ catuṣpade //
udagne śucayastava , ayamagnir vīratama, stat sūryasya, bhadrā aśvāḥ, sapta tvā harito rathe, taraṇirviśvadarśataḥ //
cakṣur no dhehi cakṣuṣe cakṣurvikhyai tanūbhyaḥ /
saṃ cedaṃ vi ca paśyema //
susaṃdṛśaṃ tvā vayaṃ prati paśyema sūrya /
vi paśyema nṛcakṣasaḥ //
4.12.5 anuvākaḥ

yuvaṃ surāmaṃ aśvinā //
hotā yakṣadaśvinau sarasvatīmindraṃ surāmṇāṃ somānāṃ pibatu madantāṃ vyantu
hotaryaja /
putramiva pitarau //
indraḥ sutrāmā svavaṃ avobhiḥ sumṛḍīko bhavatu viśvavedāḥ /
bādhatāṃ dveṣo abhayaṃ kṛṇotu suvīryasya patayaḥ syāma //
tasya vayaṃ sumatau yajñiyasyāpi bhadre saumanase syāma /
sa sutrāmā svavaṃ indro asmadārāccid dveṣaḥ sanutar yuyotu //
agne vājasya gomataḥ //
bhadro no agnirāhuto bhadrā rātiḥ subhaga bhadro adhvaraḥ /
bhadrā uta praśastayaḥ //
saṃ samit , enā vo agnim , ā te agnā idhīmahi , agne trī te vājinā trī ṣadhasthā //
triragnir balabhid balaṃ bhittvā sahasramairayat /
śūro jetāparājitaḥ //
trirahnaḥ pavate vṛṣā somaḥ śukrābhir ūtibhiḥ /
vājī sahasrasātamaḥ //
saṃ vāṃ karmaṇā samiṣā hinomīndrāviṣṇū apasaspāre asya /
juṣethāṃ yajñaṃ draviṇaṃ ca dhattamariṣṭair naḥ pathibhiḥ pārayantā //
ubhā jigyathuḥ //
indrāviṣṇū dṛṃhitāḥ śambarasya nava puro navatiṃ ca śnathiṣṭaṃ /
śataṃ varcinaḥ sahasraṃ ca sākaṃ hatho apratyasurasya vīrān //
uta mātā mahiṣamanvavenadamī tvā jahati putra devāḥ /
athābravīd vṛtramindro haniṣyantsakhe viṣṇo vitaraṃ vikramasva //
trīṇyāyūṃṣi tava jātavedaḥ //
agnirasmi janmanā jātavedā ghṛtaṃ me cakṣuramṛtaṃ ma āsan /
arkastridhātū rajaso vimāno'jasro gharmo havirasmi nāma //
vidmā te agne tredhā trayāṇi //
vṛṣaṇaṃ tvā trikakubhaṃ trimūrdhānaṃ trisaṃdṛśam /
varṣman pṛthivyā īmahe agne havyāya voḍhave //
atividdhā , asyedevā //
parjanyāya pragāyata divasputrāya mīḍhuṣe /
sa no yavasamicchatu //
pra vātā vānti patayanti vidyutā udoṣadhīr jihate pinvate svaḥ /
irā viśvasmai bhuvanāya jāyate yat parjanyaḥ pṛthivīṃ retasāvati //
yastastambha sahasā vi jmo antān bṛhaspatistriṣadhastho raveṇa /
taṃ pratnāsā ṛṣayo dīdhyānāḥ puro viprā dadhire mandrajihvam //
vibhidyā puraṃ śayathemapācīṃ niḥ trīṇi sākamudadherakṛntat /
bṛhaspatiruṣasaṃ sūryaṃ gāmarkaṃ viveda stanayanniva dyauḥ //
kṛṣṇam̐ niyānaṃ harayaḥ suparṇā apo vasānā divamutpatanti /
ta āvavṛtrantsadanād ṛtasyādid ghṛtena pṛthivī vyudyate //
ā te suparṇā aminanta evaiḥ kṛṣṇo nonāva vṛṣabho yadīdaṃ /
śivābhirna smayamānābhir āgāt patanti mihaḥ stanayantyabhrām //
vāśreva vidyun mimāti vatsaṃ na mātā siṣakti /
yadeṣāṃ vṛṣṭirasarji //
parvataścinmahi vṛddho bibhāya divaścit sānu rejata svane vaḥ /
yat krīḍatha maruta ṛṣṭimantā āpa iva sadhryañco dhavadhve //
sṛjanti raśmim ojasā panthām̐ sūryāya yātave /
te bhānubhirvitasthire //
bahiṣṭhebhirviharan yāsi tantumavavyayannasitaṃ deva vasma /
davidhvato raśmayaḥ sūryasya carmevāvādhustamo apsvantaḥ sūryo apo vigāhate raśmibhirvājasātamaḥ /
bodhāt stomairvayo dadhat //
4.12.6 anuvākaḥ

arvāñco adyā bhavatā yajatrā ā vo hārdi bhayamāno vyayeyam /
trādhvaṃ no devā nijuro vṛkasya trādhvaṃ kartādavapado yajatrāḥ //
pra vā eko mimaya bhūryāgo yanmā piteva kitavaṃ śaśāsa /
āre pāśā āre aghāni devā mā mādhi putre vimiva grabhīṣṭa //
ā ghā ye agnimindhate stṛṇanti barhirānuṣak /
yeṣāmindro yuvā sakhā //
yābhyāṃ svarajanannagra eva yā ātasthatur bhuvanāni viśvā /
pra carṣaṇī vṛṣaṇā vajrabāhumagnimindraṃ vṛtrahaṇaṃ huvema //
agnā indraśca dāśuṣo duroṇe sutāvato yajñaṃ ihopayātam /
amardhantā somapeyāya devā //
anv adya no anumati, ranvidanumate tvaṃ //
rākāmahaṃ suhavāṃ suṣṭutī huve śṛṇotu naḥ subhagā bodhatu tmanā /
sīvyatvapaḥ sūcyāchidyamānayā dadātu vīraṃ śatadāyam ukybam //
yāste rāke sumatayaḥ supeśaso yābhirdadāsi dāśuṣe vasūni /
tābhir no adya sumanā upāgahi sahasrapoṣaṃ subhage rarāṇā (rarāṇa) //
sinīvāli pṛthuṣṭuke yā devānāmasi svasā /
juṣasva havyamāhutaṃ prajāṃ devi didiḍḍhi naḥ //
yā supāṇiḥ svaṅguriḥ suṣūmā bahusūvarī /
tasyai viśpatyais haviḥ sinīvālyai juhotana //
kuhūmahaṃ sukṛtaṃ vidmanāpasaṃ asmin yajñe suhavāṃ johavīmi /
sā no dadātu śravaṇaṃ pitṝṇāṃ tasyai te devi haviṣā vidhema //
kuhūrdevānāmamṛtasya patnī havyā no asya haviṣaḥ śṛṇotu /
sa dāśuṣe kiratu bhūri vāmaṃ rāyaspoṣaṃ cikituṣe dadhātu //
dhātā dadhātu no rayiṃ prācīṃ jīvātumakṣitām /
vayaṃ devasya dhīmahi sumatiṃ satyadharmaṇaḥ //
dhātā dadātu dāśuṣe vasūni prajākāmāya mīḍhuṣe duroṇe /
tasmai devā amṛtāḥ saṃvyayantāṃ viśve devāso aditiḥ sajoṣāḥ //
prātaryajadhvaṃ aśvinā hinota na sāyamasti devayā ajuṣṭaṃ /
utānyo asmadyajate vi cāvaḥ pūrvaḥ pūrvo yajamāno vanīyān //
prātaryāvāṇā prathamā yajadhvaṃ purā gṛdhrādararuṣaḥ pibātaḥ /
prātar hi yajñamaśvinā dadhāte praśam̐santi kavayaḥ pūrvabhājaḥ //
indrā nu pūṣaṇā vayaṃ sakhyāya svastaye /
huvema vājasātaye //
yan nirṇijā //
tvamagne bṛhadvayo dadhāsi deva dāśuṣe /
kavirgṛhapatir yuvā //
havyavāḍagnirajaraḥ pitā no vibhurvibhāvā sudṛśīko asme /
sugārhapatyāḥ samiṣo didīhyasmadryak saṃmimīhi śravāṃsi //
tvaṃ ca soma no vaśo jīvātuṃ na marāmahe /
priyastotro vanaspatiḥ //
brahmā devānāṃ padavīḥ kavīnāṃ kavirviprāṇāṃ mahiṣo mṛgāṇāṃ /
śyeno gṛdhrāṇāṃ svadhitirvanānāṃ somaḥ pavitraṃ atyeti rebhan //
ā viśvadevaṃ satpatiṃ sūktairadyā vṛṇīmahe /
satyasavaṃ savitāraṃ //
ā kṛṣṇena rajasā vartamāno niveśayannamṛtaṃ martyaṃ ca /
hiraṇyayena savitā rathenā devo yāti bhuvanā vipaśyan //
udapruto na vayo rakṣamāṇā vāvadato abhriyasyeva ghoṣāḥ /
giribhrajo normayo madanto bṛhaspatim abhyarkā anāvan //
haṃsairiva sakhibhirvāvadadbhiraśmanmayāni nahanā vyasyan /
bṛhaspatirabhikanikradad gā uta prāstauducca vidvaṃ agāyat //
tvaṃ sutasya pītaye sadyo vṛddho ajāyathāḥ /
indra jyaiṣṭhyāya sukrato //
bhuvastvamindra brahmaṇo mahān bhuvo viśveṣu savaneṣu yajñiyaḥ /
bhuvo nṝm̐ścyautno viśvasmin bhare jyeṣṭhaśca mantro viśvacarṣaṇe //
pra sa mitrānamīvāsaḥ //
yac ciddhi te viśo yathā pra deva varuṇa vrataṃ /
minīmasi dyavidyavi //
yat kiṃcedaṃ varuṇa daivye jane'bhidrohaṃ manuṣyāścarāmasi /
acittī yattava dharmā yuyopima mā nastasmādenaso deva rīriṣaḥ //
yathā no aditiḥ karat paśve nṛbhyo yathā gave /
yathā tokāya rudriyam //
mā nastoke tanaye mā nā āyuṣi mā no goṣu mā no aśveṣu rīriṣaḥ /
vīrānmā no rudra bhāmito vadhīrhaviṣmanto namasā vidhema te //
ya imā viśvā jātāni āśrāvayati ślokena /
pra ca suvāti savitā //
viśvā rūpāṇi //
aśvinā yajñamāgataṃ dāśuṣaḥ purudaṃsasā /
pūṣā rakṣatu no rayim //
imaṃ yajñamaśvinā vardhayantemau vīryaṃ yajamānāya dhattāṃ /
imau paśūn rakṣatāṃ viśvato naḥ pūṣā naḥ pātu sadamaprayucchan //
pra te mahe sarasvati subhage vājinīvati /
satyavāce bhare matim //
idaṃ te havyaṃ ghṛtavatsarasvati satyavāce prayatemā havīṃṣi /
imāni ta uditā śaṃtamāni tebhirvayaṃ subhagāsaḥ syāma //
iti khilakāṇḍe dvādaśaḥ prapāṭhakaḥ//