Mahāsubhāṣitasaṃgraha 1-9979 · Verses 9875-9894

kālena yāti krimitāṃ mahendro mahendrabhāvaṃ krimirapyupaiti /
ayaṃ prathīyānayamapratiṣṭha ityeṣa niṣṭhānucito'bhimānaḥ //

kālena ripuṇā saṃdhiḥ kāle mitreṇa vigrahaḥ /
kāryakāraṇamāśritya kālaṃ kṣipati paṇḍitaḥ //

kālena śīghrāḥ pravivānti vātāḥ kālena vṛṣṭirjaladānupaiti /
kālena padmotpalavajjalaṃ ca kālena puṣpanti nagā vaneṣu //

kāle nīlabalāhake sataḍiti prītiprade barhiṇā āścaryaṃ kathayāmi vaḥ śṛṇuta bho yad vṛttamasmin gṛhe /
saubhāgyavyayaśaṅkayaikaśayane kāntāpriyābhyāmaho mānibhyāṃ bata rātrimeva sakalāṃ cīrṇaṃ pravāsivratam //

kāle'nnasya kṣudhamavahito ditsamāno vidhṛtya no bhoktavyaṃ prathamamatitheryaḥ sadā tiṣṭhatīti /
tasyāprāptāvapi gatamalaṃ puṇyarāśiṃ śrayantaṃ taṃ dātāraṃ jinapatimate mukhyamāhurjinedrāḥ //

kāle mahatyanavadhāvapatan kadāpi kvāpyantime januṣi ko'pi gatiṃ labheta /
itthaṃ samarthanavidhiḥ paramāgamānāṃ paryāyasūktividhayā nayanaṃ nañarthe //

kāle mṛduryo bhavati kāle bhavati dāruṇaḥ /
rājā lokadvayāpekṣī tasya lokadvayaṃ bhavet //

kāle mṛduryo bhavati kāle bhavati dāruṇaḥ /
sa vai sukhamavāpnoti loke'muṣminnihaiva ca //

kāle mṛduryo bhavati kāle bhavati dāruṇaḥ /
sa sādhayati kṛtyāni śatrūṃścaivādhitiṣṭhati //

kāle bhṛduśca tīkṣṇaśca nṛpaḥ syād yadi sūryavat /
udayaḥ kriyate tasya maṇḍalenānurāgiṇā //

kāle yathāvadhigata- narapatikopādyaśeṣavṛttāntaḥ /
nṛpabhavane natamūrtiḥ saṃyatavastraḥ śanaiḥ praviśet //

kāle vāpyathavākāle saṃdhyāvandanatatparaḥ /
avidyo vā savidyo vā brāhmaṇo māmakī tanuḥ //

kāle vāridharāṇām apatitayā naiva śakyate sthātum /
utkaṇṭhitāsi tarale na hi na hi sakhi picchilaḥ panthāḥ //

kāle vidyutprabhājāle śikhitāṇḍavamaṇḍite /
kāntaḥ sarvajanābhīṣṭo bālenduḥ khe na labhyate //

kāle saṃtatavarṣiṇo jalamucaḥ sasyaiḥ samṛddhā dharā bhūpālā nijadharmapālanaparā viprāstrayīnirbharāḥ /
svādukṣīranatodhasaḥ pratidinaṃ gāvo nirastāpadaḥ santaḥ śāntiparā bhavantu kṛtinaḥ saujanyabhājo janāḥ //

kāle sahiṣṇurgirivad asahiṣṇuśca vahnivat /
skandhenāpi vahecchatrūn priyāṇi samudāharan //

kāle hitaṃ mitaṃ brūyād avisaṃvādi peśalam /
pūrvābhibhāṣī sumukhaḥ suśīlaḥ karuṇo mṛduḥ //

kāle hitamitāhāravihārī vidhasāśanaḥ /
adīnātmā ca susvapnaḥ śuciḥ syāt sarvadā naraḥ //

kā lokamātā kimu dehamukhyaṃ rate kimādau kurute manuṣyaḥ /
ko daityahantā vada vai krameṇa gaurīmukhaṃ cumbati vāsudevaḥ //

kālo deśaḥ kriyā kartā karaṇaṃ kāryamāgamaḥ /
dravyaṃ phalamiti brahman navadhokto'jayā hariḥ //