Mahāsubhāṣitasaṃgraha 1-9979 · Verses 9415-9434

kāntaprakarṣaṃ daśanacchadena sandhyāghane baddhapadaṃ harantyāḥ /
tasyā gṛhodyānasarogatasya hastasya evāmburuhasya rāgaḥ //

kāntarmūrdhni dadhatī vidhitsayā tanmaṇeḥ śravaṇapūramutpalam /
rantumarcanamivācarat puraḥ sā svavallabhatano manobhuvaḥ //

kāntayā kāntasaṃyoge kimakāri navoḍhayā /
atrāpi cottaraṃ vaktum avadhirbrahmaṇo vayaḥ //

kāntayānugataḥ ko'yaṃ pīnaskandho madoddhataḥ /
mṛgāṇāṃ pṛṣṭhato yāti śambaro rūḍhayauvanaḥ //

kāntayā sapadi ko'pyupagūḍhaḥ prauḍhapāṇirapanetumiyeṣa /
saṃhatastanatiraskṛtadṛṣṭir bhraṣṭameva na dukūlamapaśyat //

kāntaveśma bahu saṃdiśatībhir yātameva rataye ramaṇībhiḥ /
manmathena pariluptamatīnāṃ prāyaśaḥ skhalitamapyupakāri //

kāntasaṃgamaparājitamanyau vāruṇīrasanaśāntavivāde /
māninījana upāhitasaṃdhau saṃdadhe dhanuṣi neṣumanaṅgaḥ //

kāntaste kamalābhirāmanayane kalpe hi deśāntaraṃ ganteti śrutamadya lokavacanāt tathyaṃ kimetad vacaḥ /
pṛṣṭā seti mayā dayādhananidhe provāca dīnānanā yat tad vaktumapi kṣamā na rasanā me jāyate sāmpratam //

kāntāṃ kāmapi kāmayatyanudinaṃ dhyānāpadeśādayaṃ yenāmuṃ munayo'pyanādinidhanaṃ dhyāyanti dhautaspṛhāḥ /
ityaṅkāt svakare hṛte girijayā pāde ca padmāsanād viśvaṃ pātu purandhrinaddhavapuṣaḥ śambhoḥ samādhivyayaḥ //

kāntāṃ kvāpi vilambinīṃ kalarutairāhūya bhūyas tato digbhāgānavalokya raṅgavasudhāmutsṛjya padbhyāṃ tataḥ /
eṣa sphāramṛdaṅganādamadhurairambhomucāmāravair barhaśreṇikṛtātapatraracano hṛṣṭaḥ śikhī nṛtyati //

kāntāṃ dṛṣṭvā caraṇayugalakṣālanāya pravṛttām asmin rāṣṭre śriyamiti vacaḥ pāpaṭhīti prayatnāt /
devasya tveti ca punarasau vīṭikāyāḥ pradāne jāmātā te jaḍamatirayaṃ chāndasaḥ kiṃ karomi //

kāntāṃ hitvā virahavidhurārambhakhedālasāṅgīṃ māmullaṅghya vrajatu pathikaḥ ko'pi yadyasti śaktiḥ /
ityāśokī jagati sakale vallarī corikeva prāptāramme kusumasamaye kāmadevena dattā //

kāntāḥ kiṃ na śaśāṅkakāntidhavalāḥ saudhālayāḥ kasyacit kāñcīdāmavirājitorujaghanā sevyā na kiṃ kāminī /
kiṃ vā śrotrarasāyanaṃ sukhakaraṃ śravyaṃ na gītādikaṃ viśvaṃ kintu vilokya mārutacalaṃ santastapaḥ kurvate //
kāntākaṭākṣavapuṣe namaḥ kusumadhanvane /
jāyate yena sacchāyo viraso'pi bhavadrumaḥ //

kāntākaṭākṣaviśikhā na khananti yasya cittaṃ na nirdahati kopakṛśānutāpaḥ /
karṣanti bhūriviṣayāśca na lobhapāśā lokatrayaṃ jayati kṛtsnamidaṃ sa dhīraḥ //

kāntā karṣaṇalolakeralavadhūdhammillamallīrajaś- caurāścoḍanitambinīstanataṭe niṣpandatāmāgatāḥ /
revāśīkaradhāriṇo'ndhramuralastrīmānamudrābhi do vātā vānti navīnakokilavaghūhūṃkāravācālitāḥ //

kāntākeliṃ kalayatu taruḥ ko'pi kaścit prabhūṇām atyānandaṃ janayatu phalaiḥ ko'pi lokān dhinotu /
dhanyaṃ manye malayajamaho yaḥ prabhūtopatāpaṃ saṃsārasya drutamapanayatyātmadehavyayena //

kāntākelimayopi bhūtakaruṇāśānto'pyasau saṃyamī krīḍārūḍhasamādhibhaṅgavikaṭabhrūbhaṅgabhīmānanaḥ /
dṛṣṭvākṛṣṭaśarāsanaṃ yadakarot kruddhaḥ pinākī smaraṃ tvāmapyadya dṛśā tadeva kurute krodhādayaṃ kauśikaḥ //

kāntā candrodayo vīṇāpañcamadhvanirityamī /
ye nandayanti sukhitān duḥkhitān vyathayanti te //

kāntājanaṃ suratakhedanimīlitākṣaṃ saṃvāhituṃ samupayāniva mandamandam /
harmyeṣu mālyamadirāparibhogagandhān āviścakāra rajanīparivṛttivāyuḥ //

kāntājanena rahasi prasabhaṃ gṛhīta- keśe rate smarasahāsavatoṣitena /
premṇā manassu rajanīṣvapi haimanīṣu ke śerate sma rasahāsavatoṣitena //