Mahāsubhāṣitasaṃgraha 1-9979 · Verses 7734-7753

eko'pyamātyo medhāvī śūro dakṣo vicakṣaṇaḥ /
rājānaṃ rājamātraṃ vā prāpayen mahatīṃ śriyam //

eko baṭurdarbhakuśāgrapāṇir vane vanaiḥ siñcati bālacūtān /
āmrāśca siktāḥ pitaraśca tṛptā ekā kriyā dvyarthakarī prasiddhā //

eko bahūnāṃ mūrkhāṇāṃ madhye nipatito budhaḥ /
padmaḥ pāthastaraṅgāṇāṃ iva viplavate dhruvam //

eko bāṇaḥ sphurati valitālokanaṃ kāminīnāṃ kāmasyānyo malayapavanaḥ kāmināṃ marmabhedī /
vīṇāveṇukvaṇitamaparaścūtapuṣpaṃ turīyaḥ sarvotkaṇṭhaprathamasacivaḥ pañcamaḥ pañcamo'pi //

eko bhavān mama samaṃ daśa vā namanti jyāghoṣapūritaviyanti śarāsanāni /
tallokapālasahitaḥ saha lakṣmaṇena cāpaṃ gṛhāṇa sadṛśaṃ kṣaṇamastu yuddham //

eko bhāvaḥ sadā śasto yatīnāṃ bhāvitātmanām /
śrīlubdhānāṃ na lokānāṃ viśeṣeṇa mahībhujām //

eko'bhūt pulināt tatastu nalināccānyo'pi nākorabhūt prācyāste traya eva divyakavayo dīvyantu devyā girā /
arvāñco yadi gadyapadyaracanācāturyavāguddhatās tān sarvānatiśayya khelatitarāṃ śākallamallaḥ kaviḥ //

eko'bhūnnalināt tataśca pulinād valmīkataścāparas te sarve kavayo bhavanti guravas tebhyo namaskurmahe /
arvāñco yadi gadyapadyaracanaiś cetaś camatkurvate teṣāṃ mūrdhni dadāmi vāmacaraṇaṃ karṇāṭarājapriyā //

eko bhekaḥ paramamuditaḥ prāpya goṣpādanīraṃ ko me ko me raṭati satataṃ sparddhayā vākyamuccaiḥ /
gaṅgādīnāṃ sakalasaritāṃ prāpya toyaṃ samudraḥ kiṃcid garvaṃ na vahati mahān prāyaśo bhūri ratnaiḥ //

eko me śāśvatātmā sukhamasukhabhujo jñānadṛṣṭisvabhāvo nānyat kiṃcinnijaṃ me tanudhanakaraṇabhrātṛbhāryāsukhādi /
karmodbhūtaṃ samastaṃ capalamasukhadaṃ tatra moho mudhā me paryālocyeti jīva svahitamavitathaṃ muktimārgaṃ śraya tvam //

eko'mbudhirjagati jīvati yena tāni tāvanti hanta salilāni samuccitāni /
yebhyaḥ kathaṃcidapi kiṃcidamī payodāḥ pītvā cirāya dharaṇīmapi tarpayanti //

eko raviratitejā atiśūraḥ kesarī vane vāsī /
ativipulaṃ khaṃ śūnyaṃ hyatigambhīro'mbudhiḥ kṣāraḥ //

eko rasaḥ karuṇa eva nimitta bhedād bhinnaḥ pṛthak pṛthagivāśrayate vivartān /
āvartabudbudataraṅgamayān vikārān ambho yathā salilameva hi tat samastam //

eko rāgiṣu rājate priyatamādehārdhahārī haro nīrāgeṣu jino vimuktalalanāsaṅgo na yasmāt paraḥ /
durvārasmarabāṇapannagaviṣavyāsaṅgamugdho janaḥ śeṣaḥ kāmaviḍambito hi viṣayān bhoktuṃ na moktuṃ kṣamaḥ //

eko'rthaṃ vimṛśedeko dharme prakurute manaḥ /
ekaḥ kāryāṇi kurute tamāhur madhyamaṃ naram //

eko lalāṭe dvau mūrdhni dvau dvau pārśvopapārśvayoḥ /
dvau ca vakṣasi vijñeyau prayāṇe caika eva tu //

eko lobho mahāgrāho lobhāt pāpaṃ pravartate /
tataḥ pāpādadharmāptis tato duḥkhaṃ pravartate //

eko vittavataḥ sūnuḥ pitṛhīnaḥ suyauvane /
mugdhe bhūbhuji kāyasthaḥ kāmispardhī vaṇiksutaḥ //

nityāturāmātyavaidyaprasiddhasya guroḥ sutaḥ /
... ... pracchannakāmo jaṭādharaḥ //

napuṃsakapravādasya praśamārthī phalāśanaḥ /
matto dhūrtasahāyaśca rājasūnurniraṅkuśaḥ //