Mahāsubhāṣitasaṃgraha 1-9979 · Verses 4504-4523

ājñāpayiṣyasi padaṃ dāsyasi dayitasya śirasi kiṃ tvarase /
asamayamānini mugdhe mā kuru bhagnāṅkuraṃ prema //

ājñābhaṅgakarān rājā na kṣameta sutānapi /
viśeṣaḥ ko nu rājñaśca rājñaścitragatasya ca //

ājñābhaṅgo narendrāṇāṃ brāhmaṇānāmanādaraḥ /
pṛthak śayyā ca nārīṇām aśastravihito vadhaḥ //

ājñāmavāpya mahatīṃ dviṣatāṃ nikhātān- nirvartya tāṃ sapadi labdhamukhaprasādaḥ /
uccaiḥ pramodamanumoditadarśanaḥ san dhanyo namasyati padāmburuhaṃ prabhūṇām //

ājñāmātraphalaṃ rājyaṃ brahmacaryaphalaṃ tapaḥ /
jñānamātraphalā vidyā dattabhuktaphalaṃ dhanam //

ājñāmeva muner nidhāya śirasā vindhyācala sthīyatām atyuccaiḥ padamicchatā punariyaṃ no laṅghanīyā tvayā /
mainākādimahīdhralabdhavasatiṃ yaḥ pītavānambudhiṃ tasya tvāṃ gilataḥ kapolamilanakleśo'pi kiṃ jāyate //

ājñā mauliṣu bhūbhujāṃ bhayarujā citteṣu durmedhasāṃ prītiḥ satsu diśāsu kīrtiratulā yenārpitā sarvataḥ /
sarvaṃ rājyamakaṇṭakaṃ ca vihitaṃ dhvastā dviṣāṃ saṃpadaḥ so'sau saṃmatavaibhavo vijayate śrīrājanārāyaṇaḥ //

ājñārūpeṇa yā śaktiḥ sarveṣāṃ mūrdhani sthitā /
prabhuśaktir hi sā jñeyā prabhāvamahitodayā //

ājñā śakraśikhāmaṇipraṇayinī śāstrāṇi cakṣurnavaṃ bhaktirbhūtapatau pinākini padaṃ laṅketi divyā purī /
utpattirdruhiṇānvaye ca tadaho nedṛg varo labhyate syāccedeṣa na rāvaṇaḥ kva nu punaḥ sarvatra sarve guṇāḥ //

ājñāsaṃpādinīṃ dakṣāṃ vīrasūṃ priyavādinīm /
yo'dṛṣṭadoṣāṃ tyajati so'kṣayaṃ narakaṃ vrajet //

ājñeva śambarariporavalaṅghanīyā vāñcheva vigrahavatī vaśagā dṛśor me /
anyārthameva kimutāpaṇamabhyupaiti saṃdeśamānayati sā kimu sārasākṣyāḥ //

āñjasyaṃ vyavahārāṇām ārjavaṃ paramaṃ dhiyām /
svātantryamapi tantreṣu sūte kāvyapariśramaḥ //

āṭīkase'ṅgakarighoṭīpadātijuṣi vāṭībhuvi kṣitibhujāṃ ceṭī bhavaṃstadapi śāṭīnate vapuṣi vīṭīnavādhivadanaṃ /
koṭīraratnaparipāṭī bhṛśāruṇitajūṭīvidhuntanulasan pāṭīraliptimibhadhāṭījuṣaṃ suravadhūṭīnutāṃ bhaja śivam //

āṭopena paṭīyasā yadapi sā vāṇī kaverāmukhe khelantī prathate tathāpi kurute no sanmanorañjanam /
na syād yāvadamandasundaraguṇālaṃkārajhaṃkāritaḥ saprasyandilasadrasāyanarasāsārānusārī rasaḥ //

āḍhyarājakṛtotsāhair hṛdayasthaiḥ smṛtairapi /
jihvāntaḥkṛṣyamāṇeva na kavitve pravartate //

āḍhyasya kiṃ ca dānena suhitasyāśanena kim /
kiṃ śaśāṅkena śītāloḥ kiṃ ghanena himāgame //

āḍhyānāṃ māṃsaparamaṃ madhyānāṃ gorasottaram /
tailaprāyaṃ daridrāṇāṃ bhojanaṃ bharatarṣabha //

āḍhyānnivāpalambho niketagāmī ca picchilaḥ panthāḥ /
dvayamākulayati cetaḥ skandhāvāradvijātīnām //

āḍhyo vāpi daridro vā duḥkhitaḥ sukhito'pi vā /
nirdoṣo vā sadoṣo vā vayasyaḥ paramā gatiḥ //

ātatāyinamāyāntaṃ hanyādevāvicārayan /
hananādeva nistāro narakāt tasya duṣkṛteḥ //