Mahabharata · Chapter 9.60

taṃ pātitaṃ tato dṛṣṭvā mahāsālamivodgatam /
prahṛṣṭamanasaḥ sarve babhūvustatra pāṇḍavāḥ //

unmattamiva mātaṅgaṃ siṃhena vinipātitam /
dadṛśurhṛṣṭaromāṇaḥ sarve te cāpi somakāḥ //

tato duryodhanaṃ hatvā bhīmasenaḥ pratāpavān /
pātitaṃ kauravendraṃ tamupagamyedamabravīt //

gaurgauriti purā manda draupadīmekavāsasam / yatsabhāyāṃ hasannasmāṃstadā vadasi durmate /
tasyāvahāsasya phalamadya tvaṃ samavāpnuhi //

evamuktvā sa vāmena padā maulimupāspṛśat /
śiraśca rājasiṃhasya pādena samaloḍayat //

tathaiva krodhasaṃrakto bhīmaḥ parabalārdanaḥ /
punarevābravīdvākyaṃ yattacchṛṇu narādhipa //

ye'smānpurā pranṛtyanti mūḍhā gauriti gauriti /
tānvayaṃ pratinṛtyāmaḥ punargauriti gauriti //

nāsmākaṃ nikṛtirvahnirnākṣadyūtaṃ na vañcanā /
svabāhubalamāśritya prabādhāmo vayaṃ ripūn //

so'vāpya vairasya cirasya pāraṃ vṛkodaraḥ prāha śanaiḥ prahasya /
yudhiṣṭhiraṃ keśavasṛñjayāṃśca dhanañjayaṃ mādravatīsutau ca //

rajasvalā draupadīmānayante ye cāpyakurvanta sadasyavastrām / 9-60-10ctānpaśyadhvaṃ pāṇḍavairdhārtarāṣṭrān raṇe hatāṃstapasā yājñasenyāḥ //

ye naḥ purā ṣaṇḍhatilānavocan krūrā rājño dhṛtarāṣṭrasya putrāḥ /
te no hatāḥ sagaṇāḥ sānubandhāḥ kāmaṃ svargaṃ narakaṃ vā vrajāmaḥ //

punaśca rājñaḥ patitasya bhūmau sa tāṃ gadāṃ skandhagatāṃ pragṛhya /
vāmena pādena śiraḥ pramṛdya duryodhanaṃ naikṛtiketyavocat //

hṛṣṭena rājankurupārthivasya kṣudrātmanā bhīmasenena pādam /
dṛṣṭvā kṛtaṃ mūrdhani nābhyanandan dharmātmānaḥ somakānāṃ prabarhāḥ //

tava putraṃ tathā hatvā katthamānaṃ vṛkodaram /
nṛtyamānaṃ ca bahuśo dharmarājo'bravīdidam //

gato'si vairasyānṛṇyaṃ pratijñā pūritā tvayā /
śubhenāthāśubhenaiva karmaṇā viramādhunā //

mā śiro'sya padā'mardīrmā dharmaste'tigo bhavet /
rājā jñātirhataścāyaṃ naitannyāyyaṃ tavānagha //

ekādaśacamūnāthaṃ kurūṇāmadhipaṃ tathā /
māsprākṣīrbhīma pādena rājānaṃ jñātimeva ca //

hatabandhurhatāmātyo bhraṣṭasainyo hato mṛdhe /
sarvākāreṇa śocyo'yaṃ nāvahāsyo'yamīśvaraḥ //

vidhvasto'yaṃ hatāmātyo hatabandhurhatātmajaḥ /
utsannapiṇḍo bhrātā ca naitannyāyyaṃ kṛtaṃ tvayā //

dhārmiko bhīmaseno'sāvityāhustvāṃ purā janāḥ /
sa kasmādbhīmasena tvaṃ rājānamadhitiṣṭhasi //

ityuktvā bhīmasenaṃ tu sāśrukaṇṭho yudhiṣṭhiraḥ /
upasṛtyābravīddīno duryodhanamarindamam //

tāta manyurna te kāryo nātmā śocyastvayā tathā /
nūnaṃ pūrvakṛtaṃ karma sughoramanubhūyate //

dhātropadiṣṭaṃ viṣamaṃ nūnaṃ phalamasaṃskṛtam /
yadvayaṃ tvāṃ jighāṃsāmastvaṃ cāsmānkurusattama //

ātmano hyaparādhena mahadvyasanamīhaśam /
prāptavānasi yallobhānmadādbālyācca bhārata //

ghātayitvā vayasyāṃśca bhrātṝnatha pitṝṃstathā /
putrānpautrāṃstathā cānyāṃstatosi nidhanaṃ gataḥ //

tavāparādhādasmābhirbhrātaraste nipātitāḥ /
nihatā jñātayaścāpi diṣṭaṃ manye duratyayam //

[ātmā na śocanīyaste ślāghyo mṛtyustavānagha /
vayamevādhunā śocyāḥ sarvāvasthāsu kaurava //

kṛpaṇaṃ vartayiṣyāmastairhīnā bandhubhiḥ priyaiḥ /
bhrātṝṇāṃ caiva putrāṇāṃ tathā vai śokavihvalāḥ //

kathaṃ drakṣyāmi vidhavā vadhūḥ śokapariplutāḥ / tvamekaḥ susthito rājansvarge te nilayo dhruvaḥ /
vayaṃ narakasañjñaṃ vai duḥkhaṃ prāpsyāma dāruṇam // ]

snuṣāśca prasnuṣāścaiva dhṛtarāṣṭrasya vihvalāḥ /
garhayiṣyanti no nūnaṃ vidhavāḥ śokakarśitāḥ //
sañjaya uvāca /

evamuktvā suduḥkhārto niśaśvāsa sa pārthivaḥ /
vilalāpa ciraṃ cāpi dharmaputro yudhiṣṭhiraḥ //