Mahabharata · Chapter 9.54

prajāpateruttaravedirucyate sanātanaṃ rāma samantapañcakam /
samījire yatra purā divaukaso vareṇa satreṇa mahāvarapradāḥ //

purā ca rājarṣivareṇa dhīmatā bahūni varṣāṇyamitena tejasā /
prakṛṣṭametatkuruṇā mahātmanā tataḥ kurukṣetramitīha paprathe //
rāma uvāca /

kimarthaṃ kuruṇā kṛṣṭaṃ kṣetrametanmahātmanā /
etadicchāmyahaṃ śrotuṃ kathyamānaṃ tapodhanāḥ //
ṛṣaya ūcuḥ /

purā kila kuruṃ rāma karṣantaṃ satatotthitam /
abhyetya śakrastridivātparyapṛcchata kāraṇam //
indra uvāca /

kimidaṃ vartate karma prayatnena pareṇa ca /
rājarṣe kimabhipretya yeneyaṃ kṛṣyate kṣitiḥ //
kururuvāca /

iha ye puruṣāḥ kṣetre janiṣyanti śatakrato /
te gamiṣyanti sukṛtāṃ lokānpāpavivarjitān //

apahāsya tu taṃ śakro jagāma tridivaṃ punaḥ /
rājarṣirapyanirviṇṇaḥ karṣatyeva vasundharām //

āgamyāgamya caivainaṃ bhūyobhūyo'pahāsya ca /
śatrakraturanirviṇṇaṃ pṛṣṭvāpṛṣṭvā jagāma ha //

yadā tu tapasogreṇa cakarṣa vasudhāṃ nṛpaḥ /
tataḥ śakro'bravīddevānrājarṣeryaccikīrṣitam //

etacchrutvā'bruvandevāḥ sahasrākṣamidaṃ vacaḥ /
vareṇa cchandyatāṃ śakra rājarṣiryadi śakyate //

yadi hyatra prasūtā vai svargaṃ gacchanti mānavāḥ /
asmānaniṣṭvā kratubhirbhāgo no na bhaviṣyati //

āgamya ca tataḥ śakrastadā rājarṣimabravīt /
alaṃ khedena bhavataḥ kriyatāṃ vacanaṃ mama //

mānavā ye nirāhārā dehaṃ tyakṣyantyatandritāḥ /
yudhi vā nihatāḥ samyagapi tiryaggatā nṛpa //

te svargabhājo rājendra bhavantviha hatāstu ye /
tathāstviti tato rājā kuruḥ śakramuvāca ha //

tatastamabhyanujñāpya prahṛṣṭenāntarātmanā /
jagāma tridivaṃ bhūyaḥ kṣipraṃ balaniṣūdanaḥ //

evametadyaduśreṣṭha kṛṣṭaṃ rājarṣiṇā purā /
śakreṇa cābhyanujñātaḥ puṇye prāṇānmumoca ha //

[śakreṇa cābhyanujñātaṃ brāhmadyaiśca suraistathā /
nātaḥ parataraṃ puṇyaṃ bhūmeḥ sthānaṃ bhaviṣyati //

iha tapsyanti ye kecittapaḥ paramakaṃ narāḥ /
dehatyāgena te sarve yāsyanti brahmaṇaḥ kṣayam //

ye punaḥ puṇyabhājo vai dānaṃ dāsyanti mānavāḥ /
teṣāṃ sahasraguṇitaṃ bhaviṣyatyacireṇa vai //

ye ceha nityaṃ manujā nivatsyanti śubhaiṣiṇaḥ /
yamasya viṣayaṃ te tu na drakṣyanti kadācana //

yakṣyanti ye ca kratubhirmahadbhirmanujeśvarāḥ / teṣāṃ triviṣṭape vāso yāvadbhūmirdhariṣyati // ]

api cātra svayaṃ śakro jagau gāthāṃ surādhipaḥ /
kurukṣetranibaddhāṃ vai tāṃ śṛṇuṣva halāyudha //

pāṃsavo'pi kurukṣetrādvāyunā samudīritāḥ /
api duṣkṛtakarmāṇaṃ nayanti paramāṃ gatim //

kurukṣetraṃ gamiṣyāmi kurukṣetre vasāmyaham /
ityevaṃ niścito bhūtvā tena svargaṃ gamiṣyati //

kurukṣetraṃ gamiṣyāmi kurukṣetre vasāmyaham /
tathā sthānaṃ ca maunaṃ ca vīrāsanamupāsmahe //

evaṃ pralapamāno'pi cintayaṃśca muhurmuhuḥ /
dūrastho yadi vā tiṣṭham̐llabhetsvargaṃ suniścitam //

surarṣabhā brāhmaṇasattamāśca tathā nṛgādyā naradevamukhyāḥ /
iṣṭvā mahārhaiḥ kratubhirnṛsiṃha santyajya dehānsugatiṃ prapannāḥ //

taṃrantukārantukayoryadantaraṃ rāmahadānāṃ ca macakrukasya ca /
etatkurukṣetrasamantapañcakaṃ prajāpateruttaravedirucyate //

śivaṃ mahāpuṇyamidaṃ divaukasāṃ susammataṃ svargaguṇaiḥ samanvitam /
ataśca sarve nihatā nṛpā raṇe yāsyanti puṇyāṃ gatimakṣayāṃ sadā //

[ityuvāca svayaṃ śakraḥ saha brahmādibhistadā /
taccānumoditaṃ sarvaṃ brahmaviṣṇumaheṣvaraiḥ] //