Mahabharata · Chapter 9.53

kathaṃ kumārī bhagavaṃstapoyuktā hyabhūtpurā /
kimarthaṃ ca tapastepe ko vā'syā niyamo'bhavat //

suduṣkaramidaṃ brahmaṃstvattaḥ śrutamanuttamam /
ākhyāhi tattvamakhilaṃ yathā tapasi sā sthitā //
vaiśampāyana uvāca /

ṛṣirāsīnmahāvīryaḥ kuṇirgārgyo mahāyaśāḥ / sa taptvā vipulaṃ rājaṃstapo vai tapatāṃ varaḥ /
tapasā'tha sutāṃ subhrūṃ samutpāditavānvibhuḥ //

tāṃ ca dṛṣṭvā muniḥ prītaḥ kuṇirgārgyo mahāyaśāḥ /
jagāma tridivaṃ rājansantyajyeha kalevaram //

subhrūḥ sā hyatha kalyāṇī puṇḍarīkanibhekṣaṇā /
mahatā tapasogreṇa kṛtvāśramamaninditā //

upavāsaiḥ pūjayantī pitṝndevāṃśca sā purā /
tasyāstu tapasogreṇa mahānkālo'tyagānnṛpa //

sā pitrā dīyamānāpi patiṃ naicchadaninditā /
ātmanaḥ sadṛśaṃ sā tu bhartāraṃ nānvapaśyata //

tataḥ sā tapasogreṇa pīḍayitvā'tmanastanum /
pitṛdevārcanaratā babhūva vijane vane //

sā'tmānaṃ manyamānā tu kṛtakṛtyaṃ śramānvitā /
jagāma vṛddhabhāvaṃ tu kaumārabrahmacāriṇī //

vārdhakena ca rājendra tapasā caiva karśitā /
sā nāśakadyadā gantuṃ padātpadamapi svayam //

cakāra gamane buddhiṃ paralokāya vai tadā /
moktukāmāṃ tu tāṃ dṛṣṭvā śarīraṃ nārado'bravīt //

asaṃskṛtāyāḥ kanyāyāḥ kuto lokāstavānaghe /
evaṃ tu śrutamasmābhirdevaloke mahāvrate //

tapaḥ paramakaṃ prāptaṃ na tu lokāstvayā jitāḥ /
tannāradavacaḥ śrutvā sā'bravīdṛṣisaṃsadi //

tapaso'rdhaṃ prayacchāmi pāṇigrāhasya sattamāḥ /
ityukte'syāstu jagrāha pāṇiṃ gālavasambhavaḥ //

ṛṣiḥ prāk śṛṅgavānnāma samayaṃ cemamabravīt /
samayena tavādyāhaṃ pāṇiṃ sprakṣyāmi śobhane //

yadyekarātraṃ vastavyaṃ tvayā saha mayeti ha /
tatheti sā pratiśrutya tasmai pāṇiṃ dadau tadā //

yathādṛṣṭena vidhinā hutvā cāgniṃ vidhānataḥ /
cakre ca pāṇigrahaṇaṃ tasyodvāhaṃ ca gālaviḥ //

sā rātrāvabhavadrājaṃstaruṇī varavarṇinī /
divyābharaṇavastrā ca divyagandhānulepanā //

tāṃ dṛṣṭvā gālaviḥ prīto dīpayantīmiva śriyā /
uvāsa ca kṣapāmekāṃ prabhāte sā'bravīcca tam //

yastvayā samayo vipra kṛto me tapatāṃ vara /
tenoṣitā'smi bhadraṃ te svasti te'stu vrajāmyaham //

sā tu dhyātvā'bravīdbhūyo yo'smiṃstīrthe samāhitaḥ /
vasate rajanīmekāṃ tarpayitvā divaukasaḥ //

catvāriṃśatamaṣṭau ca dvau cāṣṭau samyagācaret /
yo brahmacaryaṃ varṣāṇi phalaṃ tasya labheta saḥ //

evamuktvā tataḥ sādhvī dehaṃ tyaktvā divaṃ gatā /
ṛṣirapyabhavaddīnastasyā rūpaṃ vicintayan //

samayena tapo'rdhaṃ ca kṛcchrātpratigṛhītavān / sādhayitvā tadā'tmānaṃ tasyāḥ sa gatimāptavān /
duḥkhito bharataśreṣṭha tasyā rūpabalātkṛtaḥ //

etatte vṛdvakanyāyā vyākhyātaṃ caritaṃ mahat /
tathaiva brahmacaryaṃ ca svargasya ca gatiḥ śubhā //

tatrasthaścāpi śuśrāva hataṃ śalyaṃ halāyudhaḥ //

tatrāpi dattvā dānāni dvijātibhyaḥ parantapaḥ /
śuśoca śalyaṃ saṅgrāme nihataṃ pāṇḍavaistadā //

samantapañcakadvārāttato niṣkramya mādhavaḥ /
papraccharṣigaṇārāmaḥ kurukṣetrasya yatphalam //

te pṛṣṭā yadusiṃhena kurukṣetraphalaṃ vibho samācakhyurmahātmānastasmai sarvaṃ yathātatham //