Mahabharata · Chapter 9.44

sa śaptā tena kruddhena viśvāmitreṇa dhīmatā /
tasmiṃstīrthavare śubhraṃ śoṇitaṃ samupāvahat //

athājagmustato rājanrākṣasāstatra bhārata /
tatra te śoṇitaṃ sarve pibantaḥ sukhamāsate //

tṛptāśca subhṛśaṃ tena sukhitā vigatajvarāḥ /
nṛtyantaśca hasantaśca yathā svargajitastathā //

kasyacittvatha kālasya ṛṣayaḥ sutapodhanāḥ /
tīrthayātrāṃ samājagmuḥ sarasvatyāṃ mahīpate //

teṣu sarveṣu tīrtheṣu svāplutya munipuṅgavāḥ /
prāpya prītiṃ parāṃ cāpi tapolupdhā viśāradāḥ //

prayayurhi tato rājanyena tīrthamasṛgvaham /
athāgamya mahābhāgāstattīrthaṃ dāruṇaṃ tadā //

dṛṣṭvā toyaṃ sarasvatyāḥ śoṇitena pariplutam /
pīyamānaṃ ca rakṣobhirbahubhirnṛpasattama //

tāndṛṣṭvā rākṣasānrājanmunayaḥ saṃśitavratāḥ /
paritrāṇe sarasvatyāḥ paraṃ yatnaṃ pracakrire //

te tu sarve mahābhāgāḥ samāgamya mahāvratāḥ /
āhūya saritāṃ śreṣṭhāmidaṃ vacanamabruvan //

kāraṇaṃ brūhi kalyāṇi kimarthaṃ te hṛdo hyayam /
evamagrāhyatāṃ yātaḥ śrutvā'dhyāsyāmahe vayam //

tataḥ sā sarvamācaṣṭa yathāvṛttaṃ pravepatī /
duḥkhitāmatha tāṃ dṛṣṭvā ūcuste vai tapodhanāḥ //

kāraṇaṃ śrutamasmābhiḥ śāpaścaiva śruto'naghe /
kariṣyanti tu yatprāptaṃ sarva eva tapodhanāḥ //

evamuktvā saricchreṣṭhāmūcuste'tha parasparam /
vimocayāmahe sarve śāpādetāṃ sarasvatīm //

te sarve brāhmaṇā rājaṃstapobhirniyamaistathā /
upavāsaiśca vividhairyamaiḥ kaṣṭavrataistathā //

ārādhya paśubhartāraṃ mahādevaṃ jagatpatim /
mokṣayāmāsustāṃ devīṃ saricchreṣṭhāṃ sarasvatīm //

teṣāṃ tu sā prabhāveṇa prakṛtisthā sarasvatī / prasannasalilā jajñe yathā pūrvaṃ tathaiva hi /
nirmuktā ca saricchreṣṭhā vibabhau sā yathā purā //

dṛṣṭvā toyaṃ sarasvatyā munibhistaistathā kṛtam /
tāneva śaraṇaṃ jagmū rākṣasāḥ kṣudhitāstathā //

kṛtvāñjaliṃ tato rājanrākṣasāḥ kṣudhayā'rditāḥ /
ūcustānvai munīnsarvānkṛpāyuktānpunaḥpunaḥ //

vayaṃ ca kṣudhitāścaiva dharmāddhīnāśca śāśvatāt /
na ca naḥ kāmakāro'yaṃ yadvayaṃ pāpakāriṇā //

yuṣmākaṃ cāprasādena duṣkṛtena ca karmaṇā / pakṣo'yaṃ vardhate'smākaṃ yataḥ smo brahmarākṣasāḥ /
yoṣitāṃ caiva pāpena yonidoṣakṛtena ca //

evaṃ hi vaiśyaśūdrāṇāṃ kṣatriyāṇāṃ tathaiva ca /
ye brāhmaṇānpradviṣanti te bhavantīha rākṣasāḥ //

śaktimanto'pi ye kecidāśritānāṃ ca rakṣaṇam /
na kurvanti manuṣyāste sambhavantīha rākṣasāḥ //

ācāryamṛtvijaṃ caiva guruṃ vṛdvajanaṃ tathā /
praṇino ye'vamanyante te bhavantīha rākṣasāḥ //

tatkurudhvamihāsmākaṃ tāraṇaṃ dvijasattamāḥ /
śaktā bhavantaḥ sarveṣāṃ lokānāmapi tāraṇe //

teṣāṃ tu vacanaṃ śrutvā tuṣṭuvustāṃ mahānadīm /
mokṣārthaṃ rakṣasāṃ teṣāmūcuḥ prayatamānasāḥ //
ṛṣaya ūcuḥ /

kṣutaṃ kīṭāvapannaṃ ca yaccocchiṣṭācitaṃ bhavet /
sakeśamavadhūtaṃ ca ruditopahataṃ ca yat //

śvabhiḥ saṃsṛṣṭamannaṃ ca bhāgo'sau rakṣasāmiha / tasmājjñātvā sadā vidvānetānyatnādvivarjayet /
rākṣasānnamasau bhuṅkte yo bhuṅkte hyannamīdṛśam //

śodhayitvā tatastīrthamṛṣayaste tapodhanāḥ /
mokṣārthaṃ rākṣasānāṃ ca nadīṃ tāṃ pratyacodayan //

maharṣīṇāṃ mataṃ jñātvā tataḥ sā saritāṃ varā /
aruṇāmānayāmāsa svāṃ tanuṃ puruṣarṣabha //

tasyānterākṣasāḥ snātvā tanūstyaktvā divaṃ gatāḥ /
aruṇāyāṃ mahārāja brahmavadhyāpahā hi sā //

etamarthamabhijñāya devarājaḥ śatakratuḥ /
tasmiṃstīrthe vare snātvā vimuktaḥ pāpmanā kila //
janamejaya uvāca /

kimarthaṃ bhagavāñśakro brahmavadhyāmavāptavān /
kathamasmiṃśca tīrthe vai āplutyākalmaṣo'bhavat //
vaiśampāyana uvāca /

śṛṇuṣvaitadupākhyānaṃ yathāvṛttaṃ janeśvara /
yathā bibheda samayaṃ namucervāsavaḥ purā //

jamucirvāsavādbhītaḥ sūryaraśmiṃ samāviśat /
tenendraḥ sakhyamakarotsamayaṃ cedamabravīt //

na cārdreṇa na śuṣkeṇa na rātrau nāpi cāhani /
vadhiṣyāmyasuraśreṣṭha sakhe satyena te śape //

evaṃ sa kṛtvā samayaṃ dṛṣṭvā nīhāsmīśvaraḥ /
cicchedāsya śiro rājannapāṃ phenena vāsavaḥ //

tacchiro namuceśchinnaṃ pṛṣṭhataḥ śakramanviyāt /
bhobho mitraha pāpeti bruvāṇaṃ śakramantikāt //

evaṃ sa śirasā tena codyamānaḥ punaḥ punaḥ /
pitāmahāya santapta etamarthaṃ nyavedayat //

tamabravīllokagururaruṇāyāṃ yathāvidhi /
iṣṭvopaspṛśa devendra tīrthe pāpabhayāpahe //

[eṣā puṇyajalā śakra kṛtā munibhireva tu /
nigūḍhamasyāgamanamihāsītpūrvameva tu //

tato'bhyetyāruṇāṃ devīṃ plāvayāmāsa vāriṇā /
sarasvatyāruṇāyāśca puṇyo'yaṃ saṅgamo mahān //

iha tvaṃ yaja devendra dada dānānyanekaśaḥ / atrāplutya sughorāttvaṃ pātakādvipramokṣyase // ]

ityuktaḥ sa sarasvatyāḥ kuñje vai janamejaya /
iṣṭvā yathāvadbalabhidaruṇāyāmupāspṛśat //

sa muktaḥ pāpmanā tena brahmavadhyākṛtena ca /
jagāma saṃhṛṣṭamanāstridivaṃ tridaśeśvaraḥ //

śirastaccāpi namucestatraivāplutya bhārata /
lokānkāmadudhātprāptamakṣayānrājasattama //
vaiśapāyana uvāca /

tatrāpyupaspṛśya balo mahātmā dattvā ca dānāni pṛthagvidhāni /
avāpya dharmaṃ paramāryakarmā jagāma somasya mahatsutīrtham //

yatrāyajadrājasūyena somaḥ sākṣātpurā vidhivatpārthivendra /
atrirdhīmānbrahmaputro babhūva hotā yasminkratumukhye mahātmā //

yasyānte'bhūtsumahaddānavānāṃ daiteyānāṃ rākṣasānāṃ ca devaiḥ /
saṅgrāmo vai tārakākhyaḥ sutīvro yatra skandastārakākhyaṃ jaghāna //

saināpatyaṃ labdhavāndaivatānāṃ mahāseno yatra daityāntakartā /
sākṣāccaivaṃ nyavasatkārtikeyaḥ sadā kumāro yatra sa plukṣarājaḥ //