Mahabharata · Chapter 9.26

duryodhano mahārāja sudarśaścāpi te sutaḥ /
hataśeṣau tadā saṅkhye vājimadhye vyavasthitau //

tato duryodhanaṃ dṛṣṭvā vājimadhye vyavasthitam /
uvāca devakīputraḥ kuntīputraṃ dhanañjayam //

śatravo hatabhūyiṣṭhā jñātayaḥ paripālitāḥ /
gṛhītvā sañjayaṃ cāsau nivṛttaḥ śinipuṅgavaḥ //

pariśrāntaśca nakulaḥ sahadevaśca bhārata /
yodhayitvā raṇe pāpāndhārtarāṣṭrānsahānugān //

duryodhanamatikramya traya ete vyavasthintāḥ /
kṛpaśca kṛtavarmā ca drauṇiścaiva mahārathaḥ //

asau tiṣṭhati pāñcālyaḥ śriyā paramayā yutaḥ /
duryodhanabalaṃ hatvā saha sarvaiḥ prabhadrakaiḥ //

asau duryodhanaḥ pārtha vājimadhye vyavasthitaḥ /
chatreṇa dhriyāmaṇena prekṣamāṇo muhurmuhuḥ //

prativyūhya balaṃ sarvaṃ raṇamadhye vyavasthitaḥ /
enaṃ hatvā śitairbāṇaiḥ kṛtakṛtyo bhaviṣyasi //

gajānīkaṃ hataṃ dṛṣṭvā tvāṃ ca prāptamarindama /
yāvanna vidravantyete tāvajjahi suyodhansam //

yātu kaścittuṃ pāñcālyaṃ kṣipramāgamyatāmiti /
pariśrāntabalastāta naiṣa mucyeta kilbiṣī //

hatvā tava balaṃ sarvaṃ saṅgrame dhṛtarāṣṭrajaḥ /
jitānpāṇḍusutānpratvā rūpaṃ dhārayate mahat //

nihataṃ svabalaṃ dṛṣṭvā pīḍitaṃ cāpi pāṇḍavaiḥ /
dhruvameṣyati saṅgrame vadhāyaivātmano nṛpaḥ //

evamuktaḥ phalgunastu kṛṣṇaṃ vacanamabravīt / dhṛtarāṣṭrasutāḥ sarve hatā bhīmena mādhava /
yāvetāvāsthitau kṛṣṇa tāvadya nabhaviṣyataḥ //

hato bhīṣmo hato droṇaḥ karṇo vaikartano hataḥ /
madrarājo hataḥ śalyo hataḥ kṛṣṇa jayadrathaḥ //

hayāḥ pañcaśatāḥ śiṣṭāḥ śakuneḥ saubalasya ca / rathānāṃ tu śate śiṣṭe dve eva tu janārdana /
dantināṃ ca śataṃ sāgraṃ trisāhasrāḥ padātayaḥ //

aśvatthāmā kṛpaścaiva trigartādhipatistathā /
ulūkaḥ śakuniścaiva kṛtavarmā ca sātvataḥ //

etadbalamabhūccheṣaṃ dhārtarāṣṭrasya mādhava /
mokṣo na nūnaṃ kālāttu vidyate bhuvi kasyacit //

tathā vinihate sainye paśya duryodhanaṃ sthitam / adyāhnā hi mahārājo hatāmitro bhaviṣyati /
na hi me mokṣyate kaścitpareṣāmiha cintaye //

ye tvadya samaraṃ kṛṣṇa na hāsyanti madotkaṭāḥ /
tānvai sarvānhaniṣyāmi yadyapi syuramānuṣāḥ //

adya yuddhe samutpannaṃ dīrghaṃ rājñaḥ prajāgaram /
apaneṣyāmi gāndhāriṃ ghātayitvā śitaiḥ śaraiḥ //

nikṛtyā vai durācāro yāni ratnāni saubalaḥ /
sabhāyāmaharaddyūte punastānyāharāmyaham //

adya vetsyanti macchaktiṃ sarvā nāgapure striyaḥ /
śrutvā patīṃśca putrāṃśca pāṇḍavairnihatānyudhi //

samāptamadya vai karma sarvaṃ kṛṣṇa bhaviṣyati /
adya duryodhano dīptāṃ śriyaṃ prāṇāṃśca mokṣyati //

nāpayāti bhayātkṛṣṇa saṅgrāmādyadi cenmama /
nihataṃ viddhi vārṣṇeya dhārtarāṣṭraṃ subāliśam //

mama hyetadaparyāptaṃ vājibṛndamarindama /
soḍhuṃ jyātalanirghoṣaṃ yāhi yāvannihanmyaham //
sañjaya uvāca /

evamuktastu dāśārhaḥ pāṇḍavena yaśasvinā /
acodayaddhāyanrājanduryodhanabalaṃ prati //

tadanīkamabhiprekṣya trayaḥ sajjā mahārathāḥ / bhīmaseno'karjunaścaiva sahadevaśca māriṣa /
prayayuḥ siṃhanādena duryodhanajighāṃsayā //

tānprekṣya sahitānsarvāñjavenodyatakārmukān /
saubalo'bhyadravadyuddhe pāṇḍavānātatāyinaḥ //

sudarśanastva mato bhīmasenaṃ samabhyayāt /
suśarmā śakuniścaiva yuyudhāte kirīṭinā //

sahadevaṃ tava suto hayapṛṣṭhagato'bhyayāt //

tato hi yatnataḥ kṣipraṃ tavaṃ putro janādhipa /
prāsena sahadevasya śirasi prāharadbhṛśam //

sopāviśadrathopasthe tava sutreṇa tāḍitaḥ /
rudhirāplutasarvāṅga āśīviṣa iva śvasan //

pratilabhya tataḥ sañjñāṃ sahadevo viśāmpate /
duryodhanaṃ śaraistīkṣṇaiḥ saṅkruddhaḥ samavākirat //

pārtho'pi yudhi vikramya kuntīputro dhanañjayaḥ /
śūrāṇāmaśvapṛṣṭhebhyaḥ śirāṃsi nicakarta ha //

tadanīkaṃ tadā pārtho vyadhamadbahubhiḥ śaraiḥ /
pātayitvā hayānsarvāṃstrigartānāṃ rathānyayau //

tataste sahitā bhūtvā trigartānāṃ mahārathāḥ /
arjunaṃ vāsudevaṃ ca śaravarṣairavākiran //

satyakarmāṇamākṣipya kṣurapreṇa mahāyaśāḥ /
tato'sya syandanasyeṣāṃ cicchide pāṇḍunandanaḥ //

śilāśitena ca vibho kṣurapreṇa mahāyaśāḥ /
śiraściccheda sahasā taptakuṇḍalabhūṣaṇam //

satyeṣumatha cādatta yodhānāṃ miṣatāṃ tataḥ /
yathā siṃho vane rājanmṛgaṃ pari bubhukṣitaḥ //

taṃ nihatya tataḥ pārthaḥ suśarmāṇaṃ tribhiḥ śaraiḥ /
viddhvā tānahanatsarvānrathānrukmavibhūoṣitān //

tataḥ prāyāttvaranpārtho dīrghakālaṃ susaṃvṛtam /
muñjankrodhaviṣaṃ tīkṣṇaṃ prasthalādhipatiṃ prati //

tamarjunaḥ pṛṣatkānāṃ śatena bharatarṣabha /
pūrayitvā tato vāhānprāharattasya dhanvinaḥ //

tataḥ śaraṃ samādāya yamadaṇḍopamaṃ tadā /
suśarmāṇaṃ samuddiśya cikṣepāśu hasanniva //

sa śaraḥ preṣitastena krodhadīptena dhanvinā /
suśarmāṇaṃ samāsādya bibheda hṛdayaṃ raṇe //

sa gatāsurmahārāja papāta dharaṇītale /
nandayanpāṇḍavānsarvānvyathayaṃścāpi tāvakān //

suśarmāṇaṃ raṇe hatvā putrānasya mahārathān /
sapta cāṣṭau ca triṃśacca sāyakairanayatkṣayam //

tato'sya niśitairbāṇaiḥ sarvānhatvā padānugān /
abhyagādbhāratīṃ senāṃ hataśeṣāṃ mahārathaḥ //

bhīmastu samare kruddhaḥ putraṃ tava janādhipa /
sudarśanamadṛśyantaṃ śaraiścakre hasanniva //

tato'sya prahasankruddhaḥ śiraḥ kāyādapāharat /
kṣurapreṇa sutīkṣṇena sa hataḥ prāpatadbhuvi //

tasmiṃstu nihate vīre tatastasya padānugāḥ /
parivavrū rame bhīmaṃ kiranto vividhāñśarān //

tatastu niśitairbāṇaistavānīkaṃ vṛkodaraḥ /
indrāśanisamasparśaiḥ samantātparyavākirat //

tataḥ kṣaṇena tadbhīmo nyahanadbharatarṣabha //

teṣu tūtsādyamāneṣu senādhyakṣā mahārathāḥ /
bhīmasenaṃ samāsādya tato'yudhyanta bhārata //

sa tānsarvāñśarairghorairavākirata pāṇḍavaḥ / tathaiva tāvakā rājanpāṇḍaveyānmahārathān /
śaravarṣeṇa mahatā samantātparyavārayan //

vyākulaṃ tadabhūtsarvaṃ pāṇḍavānāṃ paraiḥ saha /
tāvakānāṃ ca samare pāṇḍaveṃyairyuyutsatām //

tatra yodhāstadā petuḥ parasparasamāhatāḥ /
ubhayoḥ senayo rājansaṃśocantaḥ sma bāndhavān //