Mahabharata · Chapter 9.17

śalye'tha nihate rājanmadrarājapadānugāḥ /
rathāḥ saptaśatā vīrā dudruvurmahato balāt //

duryodhanastu dviradamāruhyācalasannibham / chatreṇa dhriyamāṇena vījyamānaśca cāmaraiḥ /
na gantavyaṃ na gantavyamiti madrānavārayat //

duryodhanena te vīrā vāryamāṇāḥ punaḥ punaḥ /
yudhiṣṭhiraṃ jighāṃsantaḥ pāṇḍūnāṃ prāviśanbalam //

te tu śūrā mahārāja kṛtacittāśca yodhane /
dhanuḥśabdaṃ mahatkṛtvā sahāyudhyanta pāṇḍavaiḥ //

śrutvā ca nihataṃ śalyaṃ dharmaputraṃ ca pīḍitam /
madrarājapriye yuktairmadrakāṇāṃ mahārathaiḥ //

ājagāma tataḥ pārtho gāṇḍīvaṃ vikṣipandhanuḥ /
pūrayanrathaghoṣeṇa diśaḥ sarvā mahārathaḥ //

tato'rjunaśca bhīmaśca mādrīputrau ca pāṇḍavau /
sātyakiśca naravyāghro draupadeyāśca sarvaśaḥ //

dhṛṣṭadyumnaḥ śikhaṇḍī ca pāñcālāḥ saha somakaiḥ /
yudhiṣṭhiraṃ parīpsantaḥ samantātparyavārayan //

te samantātparivṛtāḥ pāṇḍavaiḥ puruṣarṣabhaiḥ / kṣobhayanti sma tāṃ senāṃ makarāḥ sāgaraṃ yathā /
vṛkṣāniva mahāvātāḥ kampayanti sma tāvakāḥ //

purovātena gaṅgeva--kṣobhyamāṇā mahānadī /
akṣobhyata tadā rājanpāṇḍūnāṃ dhvajinī tataḥ //

praskandya senāṃ mahatīṃ mahātmāno mahārathāḥ / bahavaścukruśustatra kva sa rājā yudhiṣṭhiraḥ /
bhrātaro vā'sya te śūrā dṛśyante neha kecana //

dhṛṣṭadyumno'tha śaineyo draupadeyāśca sarvaśaḥ /
pāñcālāśca mahāvīryāḥ śikhaṇḍī ca mahārathaḥ //

evaṃ tānvādinaḥ śūrāndraupadeyā mahārathāḥ /
abhyaghnanyuyudhānaśca madrarājapadānugān //

cakrairvimathitaiḥ kecitkecicchinnairmahādhvajaiḥ /
sampradṛśyanta samare tāvakā nihatāḥ paraiḥ //

ālokya pāṇḍavānyuddhe yodhā rājansamantataḥ /
vāryamāṇā yayurvegātputreṇa tava bhārata //

duryodhanaśca tānvīrānvārayāmāsa sāntvayan /
na cāsya śāsanaṃ kecittatra cakrurmahārathāḥ //

tato gāndhārarājasya putraḥ śakunirabravīt /
duryodhanaṃ mahārāja vacanaṃ vacanakṣamam //

kiṃ naḥ samprekṣamāṇānāṃ madrāṇāṃ hanyate balam /
na yuktametatsamare tvayi tiṣṭhati bhārata //

sahitairnāma yoddhavyamityeṣa samayaḥ kṛtaḥ /
atha kasmātsmaranneva ghnato marṣayase nṛpa //
duryodhana uvāca /

vāryamāṇā mayā pūrvaṃ naite cakrurvaco mama /
ete vinihatāḥ sarve praskannāḥ pāṇḍuvāhinīm //
śakuniruvāca /

na bhartuḥ śāsanaṃ vīrā raṇe kurvantyamarṣitāḥ /
alaṃ krodvumathaiteṣāṃ nāyaṃ kāla upekṣitum //

yāmaḥ sarve'tra sambhūya savājirathakuñjarāḥ /
paritrātuṃ maheṣvāsānmadrarājapadānugān //

anyonyaṃ parirakṣāmo yatnena mahatā nṛpa /
evaṃ sarve'nusañcintya prayayuryatra sainikāḥ //
sañjaya uvāca /

evamuktastadā rājā balena mahatā vṛtaḥ /
prayayau siṃhanādena kampayanniva medinīm //

hata vidhyata gṛhṇīta praharadhvaṃ nikṛntata /
ityāsīttumulaḥ śabdastava sainyasya bhārata //

pāṇḍavāstu raṇe dṛṣṭvā madrarājapadānugān /
sahitānabhyavartantaṃ gulmamāsthāya madhyamam //

te muhūrtādraṇe vīrā hastāhasti viśāmpate /
nihatāḥ pratyadṛśyanta madrarājapadānugāḥ //

tato naḥ samprayātānāṃ hatā madrāstarasvinaḥ /
hṛṣṭāḥ kilakilāśabdamakurvansahitāḥ pare //

athotthitāni ruṇḍāni samadṛśyanta sarvaśaḥ /
papāta mahatī colkā madhyenādityamaṇḍalam //

rathairbhagnayugākṣaiśca nihataiśca mahārathaiḥ /
aśvairnipātitaiścaiva sañchannā'bhūdvasundharā //

vātāyamānaisturagairyugāsaktaistatastataḥ /
akṛṣyanta mahārāja yodhāstatra raṇājire //

bhagnacakrānrathānkecidaharaṃsturagā raṇe / rathārdhaṃ kecidādāya diśo daśa vibabhramuḥ /
tatratatra vyadṛśyanta yoktraiḥ śliṣṭāḥ sma vājinaḥ //

rathinaḥ patamānāśca dṛśyante sma narottamāḥ /
gaganātpracyutāḥ siddhāḥ puṇyānāmiva saṅkṣaye //

nihateṣu ca śūreṣu madrarājānugeṣu vai /
asmānāpatataścāpi dṛṣṭvā pārthā mahārathāḥ //

abhyavartanta vegena jayagṛddhāḥ prahāriṇaḥ /
bāṇaśabdaravānkṛtvā vimiśrāñśaṅkhaniḥsvanaiḥ //

asmāṃstu punarāsādya labdhalakṣāḥ prahāriṇaḥ /
śarāsanāni dhunvānāḥ siṃhanādānpracukruśuḥ //

tato hatamabhiprekṣya madrarājabalaṃ mahat / madrarājaṃ ca samare dṛṣṭvā śūraṃ nipātitam /
duryodhanabalaṃ sarvaṃ punarāsītparāṅmukham //

vadhyamānaṃ mahārāja pāṇḍavairjitakāśibhiḥ /
diśo bheje'tha sambhrāntaṃ trāsitaṃ dṛḍhadhanvibhiḥ //