Mahabharata · Chapter 9.16

taṃ bhīmasenaśca śineśca naptā mādyāśca putrau puruṣapravīrau /
samāgataṃ bhīmabalena rājñā paryāpuranyonyamathāhvayanta //

tatastu śūrāḥ samare narendra nareśvaraṃ prāpya yudhāṃ variṣṭham /
āvārya cainaṃ samare nṛvīrā jaghnuḥ śitaiḥ patribhirugravegaiḥ //

saṃrakṣito bhīmasenena rājā mādrīsutābhyāmatha mādhavena /
madrādhipaṃ patribhirugravegaiḥ stanāntare dharmasuto nijaghne //

tato raṇe tāvakānāṃ rathaughāḥ samīkṣya madrādhipatiṃ śarārtam /
paryāvavruḥ pravarāḥ sarvayodhā duryodhanasyānumate purastāt //

tato drutaṃ madrajanādhipo raṇe yudhiṣṭhiraṃ saptabhirabhyavidvyat /
taṃ cāpi pārthau navabhiḥ pṛṣatkai-- rvivyādha rājaṃstumule mahātmā //

ākarṇapūrṇāyatasamprayuktaiḥ śaraistadā saṃyati tailadhautaiḥ /
anyonyamācchādayatāṃ mahārathau madrādhipaścāpi yudhiṣṭhiraśca //

tatastu tūrṇaṃ samare mahārathau parasparasyāntaramīkṣamāṇau /
śarairbhṛśaṃ vivyadhaturnṛpottamau mahabalau śatrubhirapradhṛṣyau //

tayordhanurjyātalaniḥsvano mahā-- nmahendravajrāśanitulyaniḥ svanaḥ /
parasparaṃ bāṇagaṇairmahātmanoḥ pravarṣatormadrapapāṇḍuvīrayoḥ //

tau ceraturvyāghraśiśuprakāśau mahāvaneṣvāmiṣagṛdvināviva /
viṣāṇinau nāgavarāvivobhau tatakṣatuḥ saṃyati jātadarpau //

tatastu madrādhipatirmahātmā yudhiṣṭhiraṃ bhīmabalaṃ prasahya /
vivyādha vīraṃ hṛdaye'tivegaṃ śareṇa sūryāgnisamaprabheṇa //

tato'tividdho'tha yudhiṣṭhiro'pi susamprayuktena śareṇa rājan /
jaghāna madrādhipatiṃ mahātmā mudaṃ ca lebhe vṛṣabhaḥ kurūṇām //

tato muhūrtādiva pārthivendro labdhvā sañjñāṃ krodhasaṃraktanetraḥ /
śareṇa pārthaṃ tvarito jaghāna sahasranetrapratimaprabhāvaḥ //

tvaraṃstato dharmasuto mahātmā śalyasya kopānnavabhiḥ pṛṣatkaiḥ /
bhittvā hyurastapanīyaṃ ca varma jaghāna ṣaḍbhistvaparaiḥ pṛṣatkaiḥ //

tatastu madrādhipatiḥ prakṛṣṭaṃ dhanurvikṛṣya vyasṛjatpṛṣatkān /
dvābhyāṃ śarābhyāṃ ca tathaiva rājña-- ściccheda cāpaṃ kurupuṅgavasya //

navaṃ tato'nyatsamare pragṛhya rājā dhanurdhorataraṃ mahātmā /
śalyaṃ tu vivyādha śaraiḥ samantā-- dyathā mahendro namuciṃ śitāgraiḥ //

tatastu śalyo navabhiḥ pṛṣatkai-- rbhīmasya rājñaśca yudhiṣṭhirasya /
nikṛtya raukme paṭuvarmaṇī tayo-- rvidāsyāmāsa bhujau mahātmā //

tato'pareṇa jvalanārkatejasā kṣureṇa rājño dhanurunmamātha /
kṛpaśca tasyaiva jaghāna sūtaṃ ṣaḍbhiḥ śaraiḥ so'bhimukhaḥ papāta //

madrādhipaścāpi yudhiṣṭhirasya śaraiścaturbhirnijaghāna vāhān /
vāhāṃśca hatvā vyakaronmahātmā yodhakṣayaṃ dharmasutasya rājñaḥ //

yadadbhutaṃ karma na śakyamanyaiḥ suduḥsahaṃ tatkṛtavantamekam /
śalyo narendraḥ saviṣaṇṇabhāvā-- dvicintayāmāsa mṛdaṅgaketuḥ //

kimetadindrāvarajasya vākyaṃ moghaṃ bhavatyadya vidherbalena /
jahīti śalyaṃ hyavadattadā'jau na lokanāthasya vaco'nyathā syāt //

tathā kṛte rājani bhīmaseno madrādhipasyātha tato mahātmā /
chittvā dhanurvegavatā śareṇa dvābhyāmavidhyatsubhṛśaṃ narendram //

tathāpareṇāsya jahāra yantuḥ kāyācchiraḥ saṃhananīyamadhyāt /
jaghāna cāśvāṃścaturaḥ suśīghraṃ tathā bhṛśaṃ kupito bhīmasenaḥ //

tamagraṇīḥ sarvadhanurdharāṇā-- mekaṃ carantaṃ samare'tivegam /
bhīmaḥ śatena vyakiraccharāṇāṃ mādrīputraḥ sahadevastathaiva //

taiḥ sāyakairmohitaṃ vīkṣya śalyaṃ bhīmaḥ śarairasya cakarta varma /
sa bhīmasenena nikṛttavarmā madrādhipaścarma sahasratāram //

pragṛhya khaṅgaṃ ca rathānmahātmā praskandya kuntīsutamabhyadhāvat /
chittvā ratheṣāṃ nakulasya so'tha yudhiṣṭhiraṃ bhīmabalo'bhyadhāvat //

taṃ cāpi rājānamathotpatantaṃ kruddhaṃ yathaivāntakamāpatantam /
dhṛṣṭadyumno draupadeyāḥ śikhaṇḍī śineśca naptā sahasā parīyuḥ //

athāsya carmāpratimaṃ nyakṛnta-- dbhīmo mahātmā navabhiḥ pṛṣatkaiḥ /
khaṅgaṃ ca bhallairnicakarta muṣṭau nadanprahṛṣṭastava sainyamadhye //

tatkarma bhīmasya samīkṣya hṛṣṭā-- ste pāṇḍavānāṃ pravarā rathaughāḥ /
nādaṃ ca cakrurbhṛśamutsmayantaḥ śaṅkhāṃśca dadhmuḥ śaśisannikāśān //

tenātha śabdena vibhīṣaṇena tathā'bhitaptaṃ balamapradhṛṣyam /
svedābhibhūtaṃ rudhirokṣitāṅgaṃ visañjñakalpaṃ ca tadā viṣaṇṇam //

sa madrarājaḥ sahasā vikīrṇo bhīmāgragaiḥ pāṇḍavayodhamukhyaiḥ /
yudhiṣṭhirasyābhimukhaṃ javena siṃho yathā mṛgahetoḥ prayātaḥ //

sa dharmarājo nihatāśvasūtaḥ krodhena dīpto jvalanaprakāśaḥ /
dṛṣṭvā ca madrādhipatiṃ sma tūrṇaṃ samabhyadhāvattamariṃ balena //

govindavākyaṃ tvaritaṃ vicintya dadhre matiṃ śalyavināśanāya /
sa dharmarājo nihatāśvasūto rathe tiṣṭhañśaktimathānvakarṣat //

taccaxx śalyasya niśāmya karma tamātmano bhāgamathāvaśiṣṭam /
kṛtvā manaḥ śalyavadhe mahātmā yathoktamindrāvarajasya cakre //

sa dharmarājo maṇihemadaṇḍāṃ jagrāha śaktiṃ kanakaprakāśām /
netre ca dīpte sahasā vivṛtya madrādhipaṃ kruddhamanā niraikṣat //

nirīkṣito dharmasutena rājñā ṣūtātmanā nirhṛtakalmaṣeṇa /
āsīnna yadbhasmasānmadrarāja-- stadadbhutaṃ me pratibhāti rājan //

tatastu śaktiṃ racirogradaṇḍāṃ maṇipravekojjvalitāṃ pradīptām /
cikṣepa vegātsubhṛśaṃ mahātmā madrādhipāya pravaraḥ kurūṇām //

dīptāmathaināṃ prahitāṃ balena savisphuliṅgāṃ sahasāpatantīm /
praikṣanta sarve kuravaḥ sametā divo yugānte mahatīmivolkām //

tāṃ kālarātrīmiva pāśahastāṃ yamasya dhātrīmiva cograrūpām /
sa brahmadaṇḍapratimāmamodhāṃ sasarja yatto yudhi dharmarājaḥ //

gandhasragagryāsanapānabhojanai-- rabhyarcitāṃ pāṇḍusutaiḥ prayatnāt /
sāṃvartakāgnipratimāṃ jvalantīṃ kṛtyāmatharvāṅgirasīmivogrām //

īśānahetoḥ pratinirmitāṃ tāṃ tvaṣṭrā ripūṇāmasudehabhakṣyām /
bhūmyantarikṣadyujalāśrayāṇi prasahya bhūtāni nihantumīśām //

ghaṇ़ṭāpatākāṃ maṇivajrabhūṣāṃ vaidūryacitrāṃ tapanīyadaṇḍām /
tvaṣṭrā prayatnānniyamena klṛptāṃ
brahmadviṣāmantakarīmamāghām //

balaprayatnādanirodhavegāṃ mantraiśca ghorairapi pūrayitvā /
sasarja mārgeṇa ca tāṃ khagānāṃ vadhāya madrādhipatestadānīm //

hato hyasāvityabhigarjamāno rudro'ndhakāyāntakaraṃ yatheṣum /
prasārya bāhuṃ sudṛḍhaṃ supāṇiṃ krodhena nṛtyanniva dharmarājaḥ //

sphuratprabhāmaṇḍalinoṃśujālai-- rdharmātmano madravināśakāle /
puratrayaprotsaraṇe purastā-- nmāheśvaraṃ rūpamabhūttadānīm //

āvartanākuñcitabāhudaṇḍaḥ sandhyāvihārī tanuvṛttamadhyaḥ /
viśālavakṣā bhagavānharo yathā sudurnirīkṣyo'bhavadarjunāgrajaḥ //

tāṃ sarvaśaktyā prahitāṃ suśaktiṃ yudhiṣṭhireṇāprativāryavīryām /
pratigrahāyābhinananda śalyaḥ samyagghutāmagnirivājyadhārām //

sā tasya varmābhividārya śubhra-- muro viśālaṃ ca tathaiva bhittvā /
viveśa gāṃ toyamivāprasaktā yaśo viśālaṃ nṛpaterharantī //

nāsākṣikarṇāsyaviniḥ sṛtena prasyandatā ca vraṇasambhavena /
saṃsiktagātro rudhireṇa so'bhū-- tkrauñco yathā skandahato mahādriḥ //

prasārya bāhū ca rathādgato gāṃ sañchinnavarmā kurunandanena /
mahendravāhapratimo mahātmā vajrāhataṃ śṛṅgamivācalasya //

tato nipatitaḥ so'bhūdindradhvaja ivocchritaḥ / bāhū prasāryābhimukho dharmarājasya madrarāṭ /
sa tathā bhinnasarvāṅgo rudhireṇa samukṣitaḥ //

pratyudgata iva premṇā bhūmyā sa narapuṅgavaḥ /
priyayā kāntayā kāntaḥ patamāna ivorasi //

ciraṃ bhuktvā vasumatīṃ priyāṃ kāntāmiva prabhuḥ /
sarvairaṅgaiḥ samāśliṣya prasupta iva cābhavat //

dharmye dharmātmanā yudve nihato dharmasūnunā /
samyaksphīta ivotsṛṣṭaḥ praśānto'gnirivādhvare //

śaktyā vibhinnahṛdayaṃ vipraviddhāyudhadhvajam /
saṃśāntamapi madreśaṃ lakṣmīrnaiva vimuñcati //

tato yudhiṣṭhiraścāpamādāyendradhanuṣprabham / vyadhamaddviṣataḥ saṅkhye khagarāḍiva pannagān /
dehānsuniśitairbhallai ripūṇāṃ nāśayankṣaṇāt //

tataḥ pārthasya bāṇaughairāvṛtāḥ sainikāstava / nimīlitākṣāḥ kṣiṇvanti bhṛśamanyonyakarśitāḥ /
kṣaranto rudhiraṃ dehairviśastrāyudhajīvitāḥ //

tataḥ śalye nipatite madrarājānujo yuvā /
bhrātustulyo guṇaiḥ sarvai rathī pāṇḍavamabhyayāt //

vivyādha ca naraśreṣṭho nārācairbahubhistvaran /
hatasyāpacitiṃ bhrātuścikīṣuryuddhadurmadaḥ //

taṃ vivyādhāśugaiḥ ṣa़ḍ्bhirdharmarājastvaranniva /
kārmukaṃ cāsya ciccheda kṣurābhyāṃ dhvajameva ca //

tato'sya dīpyamānena sudṛḍhena śitena ca /
pramukhe vartamānasya bhallenāpāharacchiraḥ //

sakuṇḍalaṃ taddadṛśe patamānaṃ śiro rathāt /
puṇyakṣayamanuprāpya patansvargādiva cyutaḥ //

tasyāpakṛttaśīrṣaṃ tu śarīraṃ patitaṃ rathāt /
rudhireṇāvasiktāṅgaṃ dṛṣṭvā sainyamabhajyata //

vicitrakavace tasminhate madranṛpānuje /
hāhākāraṃ prakurvāṇāḥ kuravo'bhipradudruvuḥ //

śalyānujaṃ hataṃ dṛṣṭvā tāvakāstyaktajīvitāḥ /
vitresuḥ pāṇḍavabhayātpravidhvastāstadā bhṛśam //

tāṃstathā bhajyamānāṃstu kauravānbharatarṣabha /
śinernaptā'kiranbāṇairabhyavartata sātyakiḥ //

tamāyāntaṃ maheṣvāsaṃ duṣprasahyaṃ durāsadam /
hārdikyastvarito rājanpratyagṛhṇādabhītavat //

tau sametau mahātmānau vārṣṇeyau varavājinau /
hārdikyaḥ sātyakiścaiva siṃhāviva balotkaṭau //

iṣubhirvimalābhāsaiśchādayantau parasparam /
arcirbhiriva sūryasya divākarasamaprabhau //

cāpamārgabalodvūtānmārgaṇānvṛṣṇisiṃhayoḥ /
ākāśagānapaśyāma pataṅgāniva śīghragān //

sātyakiṃ daśabhirviddhvā hayāṃścāsya tribhiḥ śaraiḥ /
cāpamekena ciccheda hārdikyo nataparvaṇā //

tannikṛttaṃ dhanuḥśreṣṭhamapāsya śinipuṅgavaḥ /
anyadādatta vegena dhanurjaladaniḥsvanam //

tadādāya dhanuḥśreṣṭhaṃ variṣṭhaḥ sarvadhanvinām /
hārdikyaṃ daśabhirbāṇaiḥ pratyavidhyatstanāntare //

tato yugaṃ ratheṣāṃ ca cchittvā bhallaiḥ susaṃyataiḥ /
aśvāṃstasyāvadhīttūrṇamubhau ca pārṣṇisārathī //

hārdikyaṃ virathaṃ dṛṣṭvā kṛpaḥ śāradvataḥ prabho /
apovāha tataḥ kṣipraṃ rathamāropya vīryavān //

madrarāje hate rājanvirathe kṛtavarmaṇi /
duryodhanabalaṃ sarvaṃ punarāsītparāṅmukham //

sva pare nānvabudhyanta sainyena rajasā vṛte /
balaṃ tu hatabhūyiṣṭhaṃ trastamāsītparāṅmukham //

tato muhūrtātte'paśyanrajo bhaumaṃ samutthitam /
vividhaiḥ śoṇitasrāvaiḥ praśāntaṃ puruṣarṣabha //

tato duryodhano dṛṣṭvā bhagnaṃ svabalamantikāt /
javenāpatataḥ pārthānekaḥ sarvānavārayat //

pāṇḍavānsarathāndṛṣṭvā dhṛṣṭadyumnaṃ ca pārṣatam /
ānarttaṃ ca durādharṣaṃ śitairbāṇairavārayat //

taṃ pare nābhyavartanta martyā mṛtyumivāgatam /
athānyaṃ rathamāsthāya hārdikyo'pi nyavartata //

tato yudhiṣṭhiro rājā tvaramāṇo mahārathaḥ / caturbhirnijaghānāśvānpatribhiḥ kṛtavarmaṇaḥ /
vivyādha gautamaṃ cāpi ṣa़ḍ्bhirbhallaiḥ sutejanaiḥ //

aśvatthāmāḥ tato rājñā hatāśvaṃ virathīkṛtam /
tamapovāha hārdikyaṃ svarathena yudhiṣṭhirāt //

tataḥ śāradvataḥ ṣaḍbhiḥ pratyavidhyadyudhiṣṭhiram /
vivyādha cāśvānniśitaistasyāṣṭābhiḥ śilīmukhaiḥ //

evametanmahārāja yuddhaśeṣamavartata /
tava durmantrite rājansahaputrasya bhārata //

tasminmaheṣvāsadhare viśaste saṅgrāmamadhye kurupuṅgavena /
pārthāḥ sametāḥ paramaprahṛṣṭāḥ śaṅkhānpradadhmurhatamīkṣya śalyam //

yudhiṣṭhiraṃ ca praśaśaṃsurājau purā surā vṛtravadhe yathendram /
cakruśca nānāvidhavādyaśabdā-- nninādayanto vasudhāṃ samantāt //