Mahabharata · Chapter 8.98

athābravīdvāsudevo mahātmā rādheya diṣṭyā smarasīha dharmam /
dharme hi baddhā satataṃ hi pārthā-- stebhyastato vṛddhisau dadāti //

dharmādapetāḥ paripanthinaste tasmādgatā vai kuravo vināśam /
prāyeṇa nīcā vyasaneṣu magnā nindanti daivaṃ na tu duṣkṛtaṃ svam //

kṛṣṇāṃ sabhāṃ karṇa yadekavastrā-- mānītavāṃstvaṃ ca suyodhanaśca /
duḥśāsanaḥ śakuniḥ saubalaśca / dharmastadā te rucito na kasmāt //

yadā sabhāyāṃ rājānamanakṣajñaṃ yudhiṣṭhiram /
ānīya jitavanto vai kva te dharmastadā gataḥ //

vanavāse vyatīte ca karṇa varṣe trayodaśe /
na prayacchasi yadrājyaṃ kva te dharmastadā gataḥ //

yadbhīmasenaṃ sarpaiśca viṣayuktaiśca bhojanaiḥ /
ācarattvanmate rājā kva te dharmastadā gataḥ //

yadvāraṇāvate pārthānsuptāñjatugṛhe tadā /
hantukāmāstadā yūyaṃ kva te dharmastadā gataḥ //

yadā rajasvalāṃ kṛṣṇāṃ duḥśāsanavaśe sthitām /
sabhāyāṃ prāhasaḥ karṇa kva te dharmastadā gataḥ //

yadanāryaiḥ purā kṛṣṇāṃ kliśyamānāmanāgasam /
upaprekṣasi rādheya kva te dharmastadā gataḥ //

vinaṣṭāḥ pāṇḍavāḥ kṛṣṇe śāśvataṃ narakaṃ gatāḥ / patimanyaṃ vṛṇīṣveti vadaṃstvaṃ gajagāminīm /
upaprekṣasi rādheya kva te dharmastadā gataḥ //

rājyalubdhaḥ punaḥ karṇa samāhvayasi pāṇḍavān /
yadā śakunimāśritya kva te dharmastadā gataḥ //

yadā'bhimanyuṃ bahavo yuddhe jaghnurmahārathāḥ /
parivārya raṇe bālaṃ kva te dharmastadā gataḥ //

[yadyeṣa dharmastatra na vidyate hi kiṃ sarvathā tāluviśoṣaṇena /
adyeha dharmyāṇi vidhatsva sūta tathāpi jīvanna vimokṣyase hi //

nalo hyakṣairnirjitaḥ puṣkareṇa punaryaśo rājyamavāpa vīryāt /
prāptāstathā pāṇḍavā bāhuvīryā-- tsarvaiḥ sametāḥ parivṛttalobhāḥ //

nihatya śatrūnsamare pravṛddhā-- nsasomakā rājyamavāpnuyuste /
tathā gatā dhārtarāṣṭrā vināśaṃ dharmābhiguptaiḥ satataṃ nṛsiṃhaiḥ] //
sañjaya uvāca /

evamuktastadā karṇo vāsudevena bhārata /
lajjayāvanato bhūtvā nottaraṃ kiñciduktavān //

krodhātprasphuramāṇauṣṭho dhanurudyamya bhārata /
yodhayāmāsa vai pārthaṃ mahāvegaparākramaḥ //

tato'bravīdvāsudevaḥ phalgunaṃ puruṣarṣabham /
divyāstreṇaiva nirbhidya pātayasva mahābala //

evamuktastu devena krodhamāgāttadā'rjunaḥ /
manyumabhyāviśaddhoraṃ smṛtvā tattu dhanañjayaḥ //

tasya kruddhasya sarvebhyaḥ srotobhyastejaso'rciṣaḥ /
prādurāsaṃstadā rājaṃstadadbhutamivābhavat //

tatsamīkṣya tataḥ karṇo brahmāstreṇa dhanañjayam /
abhyavarṣatpunaryatnamakarodrathasarjane //

brahmāstreṇava taṃ pārtho kavarṣa śaravṛṣṭibhiḥ /
tadastramastreṇāvārya prajahāra ca pāṇḍavaḥ //

tato'nyadastraṃ kaunteyo dayitaṃ jātavedasaḥ /
mumoca karṇamuddiśya tatprajajvāla tejasā //

vāruṇena tataḥ karṇaḥ śamayāmāsa pāvakram /
jīmūtaiśca diśaḥ sarvāścakre timiradurdināḥ //

pāṇḍaveyastvasambhrānto vāyavyāstreṇa vīryavān /
apovāha tadā'bhrāṇi rādheyasya prapaśyataḥ //

[tataḥ śaraṃ mahāghoraṃ jvalantimiva pāvakam /
ādade pāṇḍuputrasya sūtaputro jighāṃsayā //

yojyamāne tatastasminbāṇe dhanuṣi pūjite /
cacāla pṛthivī rājansaśailavanakānanā //

vavau saśarkaro vāyurdiśaśca rajasā vṛtāḥ /
hāhākāraśca saṃvajñe surāṇāṃ divi bhārata //

tamiguṃ sandhitaṃ dṛṣṭvā sūtaputreṇa māriṣa /
viṣādaṃ paramaṃ jagmuḥ pāṇḍavā dīnacetasaḥ //

sa sāyakaḥ karṇabhujapramuktaḥ śakrāśanigrakhyaruciḥ śitāgraḥ /
mulāntaraṃ prāpya dhanañjayasya viveśa valmīkamivoramottamaḥ //

sa rāḍhaviddhaḥ samare mahātmā vidhūrṇamānaḥ ślathahastagāṇḍivaḥ /
cacāla vībhatsuramitramardanaḥ kṣiteḥ prakampe ca yathā'calottamaḥ //

tadantaraṃ prāpya vṛṣo mahāratho rathāṅgasurvīgatamujjihīrṣuḥ /
rathādavaplutya nigṛhya dorbhyāṃ śaśāka daivānna mahābalo'pi //

tataḥ kirīṭi pratilabhya sañjñāṃ jagrāha bāṇaṃ yamadaṇḍakalpam /
tato'rjunaḥ prāñjalikaṃ mahātmā tato'bravīdvāsudevo'pi pārtham //

chindhyasya mūrdhānamareḥ śareṇa na yāvadārohati vai rathaṃ vṛṣaḥ /
tathaiva sampūjya sa tadvacaḥ prabho-- stataḥ śaraṃ prajvalitaṃ pragṛhya / jaghāna kakṣāmamalārkavarṇāṃ mahārathe rathacakre vimagne //

taṃ hastikakṣāpravaraṃ suketuṃ suvarṇamuktāmaṇivajrajuṣṭam /
kalāprakṛṣṭottamaśilpiyatnaiḥ kṛtaṃ surūpaṃ tapanīyacitram //

jayāspadaṃ tava sainyasya nitya--- mamitravitrāsanamīḍyarūpam /
vikhyātamādityasutasya loke tviṣā samaṃ pāvakabhānucandraiḥ //

tataḥ kṣurapreṇa susaṃśitena suvarṇapuṅkhena hutāgnivarcasā /
śriyā jvalantaṃ dhvajamunmamātha mahārathasyādhiratheḥ kirīṭī //

yaśaśca darpaśca tathā priyāṇi sarvāṇi kāryāṇi ca tena ketunā /
sākaṃ kurūṇāṃ hṛdayāni cāpatan babhūva hāheti ca niḥsvano mahān //

dvaṣṭvā dhvajaṃ pātitamāśukāriṇā kurupravīreṇa nikṛttamāhave /
nāśaṃsire sūtaputrasya sarve jayaṃ tadā bhārata ye tvadīyāḥ //

atha tvarankarṇavadhāya pārtho mahedravajrānaladaṇḍasannibham /
ādatta cāthāñjalikaṃ niṣaṅgā-- tsahasraraśmeriva raśmimuttamam //

marmacchidaṃ śoṇitamāṃsadigdhaṃ vaiśvānarārkapratimaṃ mahārham /
narāśvanāgāsuharaṃ tryaratniṃ ṣaḍvājamañjogatimugravegam //

sahasranetrāśanitulyavīryaṃ kālānalaṃ vyāttamivātighoram /
pinākanārāyaṇacakrasannibhaṃ bhayaṅkaraṃ prāṇabhṛtāṃ vināśanam //

jagrāha pārthaḥ sa śaraṃ prahṛṣṭo yo devasaṅghairapi durnivāryaḥ /
sampūjito yaḥ satataṃ mahātmā devāsurānyo vijayenmaheṣuḥ //

taṃ vai pramṛṣṭaṃ prasamīkṣya yuddhe cacāla sarvaṃ sacarācaraṃ jagat /
kṛtsnaṃ jagatsvastyṛṣayo'bhicakru-- stamudyataṃ prekṣya mahāhaveṣum //

tatastu taṃ vai śaramaprameyaṃ gāṇḍīvadhanvā dhanuṣi vyayojayat /
yuktvā mahāstreṇa pareṇa cāpaṃ vikṛṣya gāṇḍīvamuvāca satvaram //

ayaṃ hāstraprahito mahāśaraḥ śarīrahṛccāsuharaśca durhṛdaḥ /
tapo'sti taptaṃ guravaśca toṣitā mayā yadīṣṭaṃ suhutaṃ yadi śrutam //

anena satyena nihantvayaṃ śaraḥ susaṃhitaḥ karṇamariṃ mamorjitam /
ityūcivāṃstaṃ pramumoca bāṇaṃ dhanañjayaḥ karṇavadhāya ghoram //

kṛtyā hyatharvāṅgirasī pracoditā yathā tathā tvaṃ jahi śātravaṃ mama /
bruvankirīṭī tamatiprahṛṣṭo-- 'sṛjaddevānāṃ jayahetuṃ maheṣum //

jighāṃsurarkendusamaprabhāvaḥ karṇaṃ vaśī pāṇḍavaḥ kṣiprakārī /
tato vimukto balinā maheṣuḥ prajvālayāmāsa nabho diśaśca //

sainyānyanekāni ca vipramohya gāṇḍīvamuktena tato mahātmā /
tenārjunastanmahanīyamasya śiro'haratsūtaputrasya rājan //

śarottamenāñjalikena rājaṃ-- stadā mahāstrapratimantritena /
pārtho'parāhṇe śira uccakarta vaikartanasyātha mahendrasūnuḥ / chinnaṃ papātāñjalikena tūrṇaṃ kāyaśca paścāddharaṇīṃ jagāma //

tadudyatādityasamānatejasaṃ śarannabhomadhyagabhāskaropamam /
varāṅgamurvyāmapataccamumūkhe divākaro'stādiva raktamaṇḍalaḥ //

tato'sya dehaṃ satataṃ sukhaidhitaṃ surūpamatyarthasukhaṃ sugandhi ca /
pareṇa kṛcchreṇa śiraḥ samatyaja-- dgṛhaṃ mahardhīnnivasanniveśvaraḥ //

śarairvibhinnaṃ vyasu tatsuvarcasaḥ papāta karṇasya śarīmucchritam /
sravadvraṇaṃ gairikatoyavisravaṃ gireryathā vajrahataṃ mahāśiraḥ //

dehācca karṇasya nipātitasya tejaḥ sūryaṃ khaṃ vitatyāviveśa /
tadadbhutaṃ sarvamanuṣyayodhāḥ sandṛṣṭavanto nihate sma karṇe //

tataḥ śaṅkhānpāṇḍavā dadhmuruccai-- rdṛṣṭvā karṇaṃ pātitaṃ phalgunena /
tathaiva kṛṣṇaśca dhanañjayaśca haṣṭau yamau dadhmaturvārijātau //

taṃ somakāḥ prekṣya hataṃ śayānaṃ sainyaiḥ sārdhaṃ siṃhanādānpracakruḥ /
tūryāṇi sañjaghnuratīva hṛṣṭā vāsāṃsi caivādudhuvurbhujāṃśca //

saṃvardhayantaśca narendra yodhāḥ pārthaṃ samājagmuratīva hṛṣṭāḥ /
balānvitāścāpare hyapyanṛtya-- nnanyonyamāśliṣya nadanta ūcuḥ //

dṛṣṭvā tu karṇaṃ bhuvi vā vipannaṃ kṛttaṃ rathātsāyakairarjunasya /
mahānilenādrimivāpavidvaṃ yajñāvasāne'gnimiva praśāntam //

tadānanaṃ sūryasutasya rāja-- nvibhrājate padmivāvanālam /
rarāja karṇasya śiro nikṛtta-- mastangataṃ bhāskarasyeva bimbam //

śarairācitasarvāṅgaḥ śoṇitaughapariplutaḥ /
rarāja dehaḥ karṇasya svaraśmibhirivāṃśumān //

pratāpya senāmāmitrīṃ dīptaiḥ śaragabhastibhiḥ /
balinārjunakālena nīto'staṃ karṇabhāskaraḥ //

astaṃ gacchanyathā'dityaḥ prabhāmādāya gacchati /
tathā jīvitamāhāya karṇasyeṣurjagāma saḥ //

aparāhṇe'parāhṇasya sūtaputrasya māriṣa /
chinnamañjalikenājau sotsedhamapatacchiraḥ //

uparyupari sainyānāṃ vinighnannitarāñjanān /
śiraḥ karṇasya so'tsedhamiṣuḥ sopyaharaddrutam //

karṇaṃ tu śūraṃ patitaṃ pṛthivyāṃ śarācitaṃ śoṇitadigdhagātram /
dṛṣṭvā śayānaṃ bhuvi madrarāja-- śchinnadhvajenātha yayau rathena //

hate karṇe kuravaḥ prādravanta bhayārditā gāḍhaviddhāśca saṅkhye /
avekṣamāṇā muhurarjunasya dhvajaṃ mahāntaṃ vapuṣā jvalantam //

tacchiro bharataśreṣṭha śobhayāmāsa medinīm /
yadṛcchayeva patitaṃ maṇḍalaṃ cāṇḍadīdhiteḥ //

taṃ dṛṣṭvā samaravimarda labdhanidraṃ daṣṭoṣṭhaṃ rudhirapīratakātarākṣam /
rādheyaṃ rathavarapṛṣṭhasanniṣaṇṇaṃ hīnāṃśurdivasakaro muhūrtamāsīt //

niḥśabdatūryaṃ hatayodhamukhyaṃ praśāntadarpaṃ dhṛtarāṣṭrasainyam /
na śobhate sūryasutena hīnaṃ vṛndaṃ grahāṇāmiva candrahīnam //

sahasranetrapratimānakarmaṇaḥ sahasrapatrapratimānanaṃ śubham /
sahasraraśmirdivasakṣaye yathā tathā'patatkarṇaśiro vasundharām //

vyūḍhoraskaṃ kamalavadanaṃ taptahemāvabhāsaṃ karṇaṃ dṛṣṭvā bhuvi nipatitaṃ pārthabāṇābhitaptam /
pāṃsugrastaṃ malinamasakṛtputramanvīkṣamāṇo mandammandaṃ vrajati savitā mandiraṃ mandaraśmiḥ //