Mahabharata · Chapter 8.97

tato'payātāḥ śarapātamātra-- mavasthitā vai kuravo narendra /
vidyutprakāśaṃ dadṛśuḥ samantā-- dvanañjayāstraṃ samudīryamāṇam //

tato'grasatsūtaputro'rjunasya viyadgataṃ ghorataraṃ śaraistat /
kruddhena pārthena śaraṃ visṛṣṭaṃ vadhāya karṇasya mahāvimarde //

[udīryamāṇaṃ sma kurūndahantaṃ suvarṇapuṅkhairviśikhairmamarda /
karṇastvamogheṣvasanaṃ dṛḍhajyaṃ visphārayitvā visṛjañcharoghān // ]

rāmādupāttena mahāmahimnā hyātharvaṇenārivināśanena /
tadarjunāstraṃ vyadhamaddahantaṃ pārthaṃ ca bāṇairniśitairavidhyat //

tato vimardaḥ sumahānbabhūva tatrārjunasyādhiratheśca rājan /
anyonyamāsādayatoḥ pṛṣatkai-- rviṣāṇaghātairdvipayorivājau //

tato'strasaṅghātasamāvṛtaṃ tadā babhūva rājaṃstumulaṃ raṇājiram /
yatkarṇapārthau śaravṛṣṭisaṅghai-- rnirantaraṃ cakraturambaraṃ tadā //

[tato jālaṃ bāṇamayaṃ mahāntaṃ sarve'drākṣuḥ kuravaḥ somakāśca /
nānyaṃ ca bhūtaṃ dadṛśustadā te bāṇāndhakāre tumule'tha kiñcit //

tau sandadhānāvaniśaṃ ca rājan / samasyantau cāpi śarānanekān /
sandarśayetāṃ yudhi mārgānvicitrā-- ndhanurdharau tau vividhaiḥ kṛtāstraiḥ //

tayorevaṃ yudhyatorājimadhye sūtātmajo'bhūdadhikaḥ kadācit /
pārthaḥ kadācittvadhikaḥ kirīṭi vīryāstramāyābalapauruṣeṇa //

dṛṣṭvā tayostaṃ yudhi samprahāraṃ parasparasyāntaramīkṣamāṇayoḥ /
ghoraṃ tayordurviṣahaṃ raṇe'nyai-- ryodhāḥ sarve vismayamabhyagacchan //

tato bhūtānyantarikṣasthitāni tau karṇapārthau praśaśaṃsurnarendra /
bhoḥ karṇa sādhvarjuna sādhu ceti viyatsu vāṇī śrūyate sarvatopi //

tasminvimarde rathavājināgai-- stadā'bhighātairdalite hi bhūtale /
tatastu pātālatale śayāno nāgo'śvasenaḥ kṛtavairo'rjunena //

rājaṃstadā khāṇḍavadāhamukto viveśa kopādvasudhātale yaḥ /
athotpapātordhvagatirjavena sandṛśya karṇārjunayorvimardam //

ayaṃ hi kālosya durātmano vai pārthasya vairapratiyātanāya /
sañcintya tūrṇaṃ praviveśa caiva karṇasya rājanśararūpadhārī //

tatostrasaṅghātasamākulaṃ tadā babhūva janyaṃ vitatāṃśujālam /
tatkarṇapārtho śarasaṅghavṛṣṭibhi-- rnirantaraṃ cakraturambaraṃ tadā //

tadbāṇajālaikamayaṃ mahāntaṃ sarve'trasankuravaḥ somakāśca /
nānyatkiñciddadṛśuḥ sampatadvai bāṇāndhakāre tumule'timātram //

tatastau puruṣavyāghrau sarvalokadhanurdharau /
tyaktaprāṇau raṇe vīro yuddhaśramamupāgatau //

samutkṣepairvīkṣamāṇau siktau candanavāriṇā / savālavyajanairdivyairdivisthairapsarogaṇaiḥ /
śakrasūryakarābjābhyāṃ pramārjitamukhāvubhau //

karṇo'tha pārthaṃ na viśeṣayadyadā bhṛśaṃ ca pārthena śarābhitaptaḥ /
tatastu vīraḥ śaravikṣatāṅgo dadhre mano hyekaśayasya tasya // ]

tato ripughnaṃ samadhatta karṇaḥ susañcitaṃ sarpamukhaṃ jvalantam /
raudraṃ śaraṃ sannatamugradhautaṃ pārthārthamityeva cirābhiguptam //

sadārcitaṃ candanacūrṇaśāyitaṃ suvarṇatūṇīraśayaṃ mahārciṣam /
ākarṇapūrṇaṃ vicakarṣa karṇo vimoktukāmaḥ śaramugravegam //

pradīptamairāvatavaṃśasambhavaṃ śiro jihīrṣuryudhi savyasācinaḥ /
tataḥ prajajvāla diśo nabhaśca ulkāśca ghorāḥ śataśaḥ prapetuḥ //

tasmiṃstu nāge dhanuṣi prayukte hāhākṛtā lokapālāḥ saśakrāḥ //

sa sūtaputrastamapāṅgadeśe avāṅmukhaṃ sandhayati sma roṣāt /
na taṃ sma jānāti mahānubhāva-- mapāṅgadeśe'bhiniviṣṭamājau //

[na cāpi taṃ bubudhe sūtaputro bāṇe praviṣṭaṃ yogabalena nāgam /
daśaśatanayano'hiṃ dṛśya bāṇe praviṣṭaṃ nihata iti suto me srastagātro babhūva / jalajakusumayoniḥ śreṣṭhabhāvo jitātmā tridaśapatimavocanmā vyathiṣṭhā jaye śrīḥ //

tato'bravīnmadrarājo mahātmā dṛṣṭvā karṇaṃ prahiteṣu tamugram /
grīvāyataḥ karṇa na saṃhito'yaṃ samīkṣya sandhatsva śaraṃ paraghnam //

athābravītkrodhasaṃraktanetro madrādhipaṃ sūtaputro manasvī /
na sandhatte dviḥ śaraṃ śalya karṇo na mādṛśā jihmayudvā bhavanti //

itīdamuktvā visasarja taṃ śaraṃ prayatnato varṣagaṇābhipūjitam /
hatosi re phalguna ityadhikṣipa-- nnuvāca coccairniramūrjitāṃ vṛṣaḥ //

sa sāyakaḥ karṇabhujaprasṛṣṭo hutāśanārkapratimaḥ sughoraḥ /
guṇacyutaḥ karṇadhanuḥpramukto viyadgataḥ prājvaladantarikṣe //

tamāpatantaṃ jvalitaṃ nirīkṣya viyadgataṃ vṛṣṇikulapravīraḥ /
rathasya cakraṃ sahasā nipīḍya pañcāṅgulaṃ majjayati sma vīraḥ //

tato'ntarikṣe sumahānninādaḥ sampūjanārthaṃ madhusūdanasya /
[divyāśca vācaḥ sahasā babhūvu-- rdivyāni puṣpāṇyatha siṃhanādāḥ / tasmiṃstathā vai dharaṇīṃ nimagne rathe prayatnānmadhusūdanasya // ]

tataḥ kirīṭaṃ bahuratnacitraṃ jaghāna nāgo'rjunamūrdhato balāt /
gireḥ sujātāṅkurapuṣpitadrumaṃ mahendravajraṃ śikharaṃ yathottamam //

tataḥ kirīṭaṃ tapanīyacitraṃ pārthottamāṅgādaharattarasvī /
taddhemajālāvanataṃ sughoraṃ samprajvalattannipapāta bhūmau //

tato'rjunasyottamagātrabhūṣaṇaṃ suvarṇamuktāmaṇivajracitritam /
dharāviyaddyosalileṣu viśrutaṃ balaṃ nisargottamamanyudhiḥ sadā //

śareṇa mūrdhni prajahāra sūtajo divākarendujvalanagrahatviṣam /
suvarṇamuktāmaṇivajrabhūṣaṇaṃ purandarārthaṃ tapasā prayatnataḥ //

svayaṃ kṛtaṃ yadvidhinā svayambhuvā mahārharūpaṃ dviṣatāṃ bhayaṅkaram /
nijaghnate devaripūnsureśvaraḥ svayaṃ dadau yaddhi mudā'rjunāya //

haripracetoharivittagoptṛbhiḥ pinākapāśāśanidaṇḍadhāribhiḥ /
surottamairapyaviṣahyamardituṃ prasahya nāgena jahāra tadvṛṣā //

taduttameṣūnmathitaṃ viṣāhinā pradīptamarciṣmadatīva sundaram /
papāta pārthasya kirīṭamuttamaṃ divākarostādiva parvatājjvalan //

mahīviyaddyosalilāni vāyunā prasahya rugṇāni vighūrṇitāni vā /
itīva śabdaṃ bhuvaneṣu tattathā janā vyavasyanti diśaśca vihvalāḥ //

vinā kirīṭaṃ* śuśubhe sa pārthaḥ śyāmo yuvā śaila triśṛṅgaiḥ //

tataḥ samudgrathya sitena vāsasā svamūrdhajanāvyathitastadā'rjunaḥ /
babhau susampūrṇamarīcinendunā śirogatenodayaparvato yathā //

sa cāpi rādheyabhujapramukto hutāśanārkapratimadyutirmahān /
mahoragaḥ kṛtavairo'rjunena kirīṭamāhṛtya samutpapāta //

tamutpatantaṃ dvipadāṃ variṣṭho dṛṣṭvā vacaḥ pārthamuvāca kṛṣṇaḥ /
mahoragaṃ pāṇḍava paśyapaśya prayojitaṃ tvannidhanārthamugram //

sa evamukto madhusūdanena gāṇḍīvadhanvā harimugravācā /
uvāca ko nveṣa mamādya nāgaḥ kṣayāya nāgādgaruḍasya vakram //
kṛṣṇa uvāca /

yo'sau tvayā khāṇḍave citrabhānuṃ santarpayāṇena dhanurdhareṇa /
viyadgato jananīguptadeho matvaikarūpaṃ nihatā'sya mātā //

sa eṣa tadvairamanusmaranvai tvāṃ prārthayatyātmavadhāya nūnam /
nabhaścutāṃ prajvalitāmivolkāṃ paśyainamāyāntamamitrasāha //
sañjaya uvāca /

tataḥ sa jiṣṇuḥ parivṛtya roṣā-- cciccheda ṣaḍbhirniśitaiḥ sudhāraiḥ /
nāgaṃ viyattiryagivotpatataṃ sa cchinnagātro nipapāta bhūmau //

[gate ca tasminbhujage kirīṭinā svayaṃ vibhuḥ pārthiva bhūtalādatha /
samujjahārāśu punaḥ patantaṃ rathaṃ bhujābhyāṃ puruṣottamastataḥ // ]

tasminmuhūrte daśabhiḥ pṛṣatkaiḥ silāśitairbarhiṇabarhavājitaiḥ /
vivyādha karṇaḥ puruṣapravīro dhanañjayaṃ tiryagavekṣamāṇaḥ //

tato'rjuno dvādaśabhiḥ sumuktai-- rvarāhakarṇairjiśitaiḥ samarpya /
nārācamāśīviṣatulyavega-- mākarṇapūrṇāyatamutsasarja //

sa citravarmeṣuvaro vidārya prāṇānnirasyanniva sādhumuktaḥ /
karṇasya pītvā rudhiraṃ viveśa vasundharāṃ śoṇitadigdhavājaḥ //

tato vṛṣo bāṇanipātakopito mahorago daṇḍavighaṭṭito yathā /
tadā'śukārī vyasṛjaccharottamān mahāviṣaḥ sarpa ivottamaṃ viṣam //

janārdanaṃ dvādaśabhiḥ parābhina-- nnavairnavatyā ca śaraistathā'rjunam /
śareṇa ghoreṇa punaśca pāṇḍavaṃ vidārya karṇo vyanadajjahāsa ca //

tamasya harṣaṃ mamṛṣe na pāṇḍavo bibheda marmāṇi tato'sya marmavit /
paraḥśataiḥ patribhirindravikrama-- stathā yathendro balamojasā raṇe //

tataḥ śarāṇāṃ navatiṃ tadā'rjunaḥ sasarja karṇe'ntakadaṇḍasannibhām /
taiḥ patribhirviddhatanuḥ sa vivyathe tathā yathā vajravidārito'calaḥ //

maṇipravekottamavajrahāṭakai-- ralaṅkṛtaṃ cāsya varāṅgabhūṣaṇam /
praviddhamurvyāṃ nipapāta patribhi-- rdhanañjayenottamakuṇḍalepi ca //

mahādhanaṃ śilpivaraiḥ prayatnataḥ kṛtaṃ yadasyottamavarma bhāsvaram /
sudīrghakālena tato'sya pāṇḍavaḥ kṣaṇena bāṇairbahudhā vyaśātayat //

tasyeṣubhiḥ khaṇḍitakuṇḍalo'ntaḥ parikṣataścābhyadhikaṃ tadānīm /
sa lohitāṅgaśravaṇaścakāśe salohitāṅgaśravaṇo yathā divi //

sa taṃ vivarmāṇamathottameṣubhiḥ śitaiścaturbhiḥ kupitaḥ parābhinat /
sa vivyathe'tyarthamaripratāḍito yathā'turaḥ pittakaphānilajvaraiḥ //

mahādhanurmaṇḍalaniḥsṛtaiḥ śitaiḥ kriyāprayatnaprahitairbalena ca /
tatakṣa karṇaṃ bahubhiḥ śarottamai-- rbibheda marmasvapi cārjunastvaran //

dṛḍhāhataḥ patribhirugravegaiḥ pārthena karṇo vividhaiḥ śitāgraiḥ /
babhau girirgairikadhāturaktaḥ kṣaranprapātairiva raktamambhaḥ //

[tato'rjunaḥ karṇamavakragairnavaiḥ suvarṇapuṅkhaiḥ sudṛḍhairayasmayaiḥ /
yamāgnidaṇḍapratimaiḥ stanāntare parābhinatkrauñcamivādrimagnijaḥ //

tataḥ śarāvāpamapāsya sūtajo dhanuśca tacchakraśarāsanopamam /
tato rathasthaḥ sa mumoha ca skhalan / praśīrṇamuṣṭiḥ subhṛśāhataḥ prabho //

na cārjunastaṃ vyasane tadeṣivā-- nnihantumāryaḥ puruṣavrate sthitaḥ /
tatastamindrāvarajaḥ susambhramā-- duvāca kiṃ pāṇ़ḍava he pramādyase //

naivāhitānāṃ satataṃ vipaścitaḥ kṣaṇaṃ pratīkṣantyapi durbalīyasām /
viśeṣato'rīnvyasaneṣu paṇḍito nihatya dharmaṃ ca yaśaśca vindate //

tadekavīraṃ tava cāhitaṃ sadā tvarasva karṇaṃ sahasā'bhimarditum /
purā samarthaḥ samupaiti sūtajo bhindhi tvamenaṃ namuciṃ yathā hariḥ //

tatastadevetyabhipūjya satvaraṃ janārdanaṃ karṇamavidhyadarjunaḥ /
śarottamaiḥ sarvakurūttamastvaraṃ-- stathā yathā śambarahā purā balim // ]

sāśvaṃ tu karṇaṃ sarathaṃ kirīṭi samācinodbhārata vatsadantaiḥ /
pracchādayāmāsa diśaśca bāṇaiḥ sarvaprayatnāttapanīyapuṅkhaiḥ //

savatsadantaiḥ pṛthupīnavakṣāḥ samācitaḥ so'dhirathirvibhāti /
supuṣpitāśokapalāśaśālmali-- ryathā'calaścandanakānanāyutaḥ //

śaraiḥ śarīre bahubhiḥ samarpitai-- rvibhāti karṇaḥ samare viśāmpate /
mahīruhairācitasānukandaro yathā girīndraḥ sphuṭakarṇikāravān //

sa vāṇasaṅghānbahudhā vyavāsṛjan vibhāti karṇaḥ śarajālaraśmivān /
sa lohito raktagabhastimaṇḍalo divākaro'stābhimukho yathā tathā //

bāhvantarādādhirathervimuktān bāṇānmahāhīniva dīpyamānān /
vyadhvaṃsayannarjunabāhumuktāḥ śarāḥ samāsādya diśaḥ śitāgrāḥ //

[tataḥ sa karṇaḥ samavāpya dhairyaṃ bāṇānvimuñcankupitāhikalpān /
vivyādha pārthaṃ daśabhiḥ pṛṣatkaiḥ kṛṣṇaṃ ca ṣa़ḍbhiḥ kupitāhikalpaiḥ //

tataḥ kirīṭi bhṛśamugraniḥsvanaṃ mahāśaraṃ sarpaviṣānalopamam /
ayasmāyaṃ raudramahāstrasambhṛtaṃ mahāhave kṣeptumanā mahāmatiḥ // ]

kālo hyadṛśyo nṛpa vipraśāpā-- nnidarśayankarṇavadhaṃ bruvāṇaḥ /
bhūmistu cakraṃ grasatītyavoca-- tkarṇasya tasminvadhakāla āgate //

na cāsya ghoraṃ pratibhāti cāstraṃ yadbhārgavo'smai pradadau mahātmā /
cakraṃ ca vāmaṃ grasate bhūmirasya prāpte tasminvadhakāle nṛvīra //

tato ratho ghūrṇitavānnarendra śāpāttadā brāhmaṇasattamasya /
prāptaṃ vadhaṃ śaṃsati cāpyathāstraṃ praṇaśyamānaṃ dvijamukhyaśāpāt //

[tataścakramapatattasya bhūmau sa vihvalaḥ samare sūtaputraḥ /
savedikaścaitya ivātimātraḥ supuṣpito bhūmitale nimagnaḥ] //

magne rathe brāhmaṇaśāpamūḍho hyastraṃ ca taṃ moghamiṣu ca sarpam /
amṛṣyamāṇo vyasanāni tāni hastau vidhunvanvijagarha dharmam //

dharmapradhānaṃ kila pāti dharma ityabruvandharmavidaḥ sadaiva /
vayaṃ ca dharme prayatāma nityaṃ cartuṃ yathāśakti yathāśrutaṃ ca / sa cāpi nighnāti na pāti bhaktān manye na nityaṃ paripāti dharmaḥ //

evaṃ bruvanpraskhalitāśvasūto vicālyamāno'rjunabāṇapātaiḥ /
marmābhighātācchithilaḥ kriyāsu punaḥ punardharmamasau jagarha //

tataḥ śarairbhīmatarairavidhyattribhirāhave /
haste kṛṣṇaṃ tathā pārthamabhyavidhyacca saptabhiḥ //

tato'rjunaḥ saptadaśa tigmavegānajihmagān /
indrāśanisamānghorānasṛjatpāvakopamān //

nirbhidya te bhīmavegā hyapatanpṛthivītale /
kampitātmā tataḥ karṇaḥ śaktyā ceṣṭāmadarśayat //

balenātha sa saṃstabhya brahmāstraṃ samudairayat /
aindraṃ tato'rjunaścāpi taṃ dṛṣṭvā'bhyupamantrayat //

gāṇḍīvaṃ jyāṃ ca bāṇāṃśca so'numantrya parantapaḥ /
vyasṛjaccharavarṣāṇi varṣāṇīva purandaraḥ //

tatastejomayā bāṇā rathātpārthasya niḥsṛtāḥ / prādurāsanmahāvīryāḥ karṇasya rathamantikāt /

sa karṇo'grasadasyāstraṃ kurvanmokṣaṃ mahārathaḥ // tato'bravīdvṛṣṇivīrastasminnastre vināśite /
visṛjāstraṃ paraṃ pārtha rādheyo grasate śarān //

tato brahmāstramatyugraṃ sammantrya samayojayat /
chādayitvā tato bāṇaiḥ karṇaṃ pratyasyadarjunaḥ //

tataḥ karṇaḥ śitairbāṇairjyāṃ ciccheda sutejanaiḥ /
[dvitīyāṃ ca tṛtīyāṃ ca caturthī pañcamīṃ tathā //

ṣaṣṭhīmathāsya ciccheda saptamīṃ ca tathā'ṣṭamīm / navamīṃ daśamīṃ cāsya tathā caikādaśīṃ vṛṣaḥ /
jyāśataṃ śatasandhānaḥ sa karṇo nāvabudhyate // ]

tato jyāṃ vinidhāyānyāmabhimantrya ca pāṇḍavaḥ /
śarairavākiratkarṇaṃ dīpyamānairivāhibhiḥ //

tasya jyācchedanaṃ karṇo jyāvadhānaṃ ca saṃyuge /
nānvabudhyata śīghratvāttadadbhutamivābhavat //

astrairastrāṇi saṃvārya pranighnansavyasācinaḥ /
cakre cāpyadhikaṃ pārthātsvavīryamatidarśayan //

tataḥ karṇo'rjunaṃ dṛṣṭvā svasyāstreṇa ca pīḍitam /
abhyasetyabravītpārthamātiṣṭhāstraṃ vrajeti ca //

tato'gnisadṛśaṃ ghoraṃ śaraṃ sarpaviṣopamam / aśmasāramaṃ divyamabhimantryaṃ parantapaḥ /
raudramastraṃ samādhāya kṣeptukāmaḥ kirīṭine //

tato'grasanmahī cakraṃ rādheyasya tadā nṛpa //

[tato'vatīrya rādheyo rathādāśu samudyataḥ /
cakraṃ bhujābhyāmālambya samutkṣeptumiyeṣa saḥ //

saptadvīpā vasumatī saśailavanakānanā /
gīrṇacakrā samutkṣiptā karṇena caturaṅgulam //

grastacakrastu rādheyaḥ krodhādaśrūṇyavartayat /
arjunaṃ vīkṣya saṃrabdhamidaṃ vacanamabravīt //

bhobho pārtha maheṣvāsa muhurtaṃ paripālaya /
yāvaccakramidaṃ grastamuddharāmi mahītalāt //

savyaṃ cakraṃ mahīgrastaṃ dṛṣṭvā daivādidaṃ mama /
pārtha kāpuruṣācīrṇamabhisandhiṃ visarjaya //

na tvaṃ kāpuruṣācīrṇaṃ mārgamāsthātumarhasi / khyātastvamasi kaunteya viśiṣṭo raṇakarmasu /
viśiṣṭatarameva tvaṃ kartumarhasi pāṇḍava //

prakīrṇakeśe vimukhe brāhmaṇe'tha kṛtāñjalau /
śaraṇāgate nyastaśastreyācamāne tathā'rjuna //

abāṇe bhraṣṭakavace bhraṣṭabhagnāyudhe tathā /
na vimuñcanti śastrāṇi śūrāḥ sādhuvrate sthitāḥ //

tvaṃ ca śūratamo loke sādhuvṛttaśca pāṇḍava /
abhijño yuddhadharmāṇāṃ tasmātkṣama muhūrtakam //

divyāstravidameyātmā kārtavīryasamo yudhi /
yāvaccakramidaṃ grastamudvarāmi mahābhuja //

na māṃ rathastho bhūmiṣṭhaṃ vikalaṃ hantumarhasi /
na vāsudevāttvatto vā pāṇḍaveya bibhemyaham //

tvaṃ hi kṣatriyadāyādo mahālakulavivardhanaḥ /
atastvāṃ prabavīmyeṣa muhūrtaṃ kṣama pāṇ़ḍava //

[vinā kirīṭaṃ śaṃśubhe sa pārthaḥ / śyāmo yuvā nīla ivoccaśṛṅgaḥ /
tataḥ samudgrathya sitena vāsasā svamūrdhajānavyathitastadā'rjunaḥ / vibhāsitaḥ sūryamarīcinā dṛḍhaṃ śirogatenodayaparvato yathā //

gokarṇā sumukhī kṛtena iṣuṇā goputrasampreṣitā gośabdātmajabhūṣaṇaṃ suvihitaṃ suvyaktago'suprabhaṃ
dṛṣṭvā gogatakaṃ jahāra mukuṭaṃ gośabdagopūri vai gokarṇāsanamardanaśca na yayāvaprāpya mṛtyorvaśaṃ

sa sāyakaḥ karṇabhujaprasṛṣṭo hutāśanārkapratimo mahārhaḥ /
mahoragaḥ kṛtavairo'rjunena kirīṭamāhatya tato vyatīyāt //

taṃ cāpi dagdhvā tapanīyacitraṃ kirīṭamākṛṣya tadarjunasya /
iyeṣa gantuṃ punareva tūṇaṃ dṛṣṭaśca karṇena tato'bravīttam //

muktastvayā'haṃ tvasamīkṣya karṇa śiro hṛtaṃ yanna mayā'rjunasya /
samīkṣya māṃ muñca raṇe tvamāśu hantā'smi śatruṃ tava cātmanaśca //

sa evamukto yudhi sūtaputra-- stambravītko bhavānugrarūpaḥ /
nāgo'bravīdvidvi kṛtāgasaṃ māṃ pārthena māturvadhajātavairam //

yadi svayaṃ vajradharo'sya goptā tathāpi yātā pitṛrājaveśmani /
karṇa uvāca /
na nāga karṇo'dya raṇe parasya balaṃ samāsthāya jayaṃ bubhūṣet //

na sandadhyāṃ dviḥ śaraṃ caiva nāga yadyarjunānāṃ śatameva hanyām /
tamāha karṇaḥ punareva nāgaṃ tadā'jimadhye ravisūnusattamaḥ //

vyālāstrasargottamayatnamanyubhi-- rhantā'smi pārthaṃ susukhī vraja tvam /
ityevamukto yudhi nāgarājaḥ karṇena roṣādasahaṃstasya vākyam //

svayaṃ prāyātpārthavadhāya rājan kṛtvā svarūpaṃ vijighāṃsurugraḥ /
tataḥ kṛṣṇaḥ pārthamuvāca saṅkhye mahoragaṃ kṛtavairaṃ jahi tvam //

sa evamukto madhusūdanena gāṇḍīvadhanvā ripuvīryasāhaḥ /
uvāca ko hyeṣa mamādya nāgaḥ svayaṃ ya āyādgaruḍasya vaktram // ]