Mahabharata · Chapter 8.96

athābravīccakradharo'pi pārthaṃ dṛṣṭvā ratheṣūnpratihanyamānān /
amūmuṣatpaśyata eva te'dya hyastrāṇi karṇo'stragaṇaiḥ kirīṭin //

sa pārtha kiṃ muhyasi vetsi caiva tā-- ndṛṣṭvā sametānnadataḥ kurūstvam /
karṇaṃ puraskṛtya vidurhi sarve tavāstramastrairvinihanyamānam //

yayā dhṛtyā tāmasaṃ jaghnivāṃstvaṃ tatsaṃyuge tāmasāṃścātighorān /
dambhodbhavaṃ cāsuramāhave tvaṃ darpotsiktaṃ vīryavantaṃ kirīṭin / tayā dhṛtyā tvaṃ jahi karṇamadya pārthāhave tyaktumastraṃ samarthaḥ //

anena cāśu kṣuraneminādya mayā visṛṣṭena sudarśanena /
chindhyasya mūrdhānamareḥ prasahya vajreṇa śakro namucerivāreḥ //

kirātarūpī bhagavānyayā ca tvayā mahātmā paritoṣito'bhūt /
sa tāṃ punarvīra dhṛtiṃ gṛhītvā sahānubandhaṃ jahi sūtaputram //

tato mahīṃ sāgaramekhalāṃ tvaṃ sapattagā grāmavatīṃ samṛddhām /
prayaccha rājñe nihatārisaṅghāṃ yaśaśca pārthātulamāpnuhi tvam //

karṇaṃ puraskṛtya nadantiṃ sarve tavāstramagryaṃ pratihatya vīrāḥ /
kuru prayatnaṃ bharatapravīra dravantyamī sṛñjayāḥ somakāśca / dṛṣṭvātha karṇaṃ samare prahṛṣṭaṃ tvāṃ cāpi dṛṣṭvā parihīyamānam //
sañjaya uvāca /

sañcodito bhīmajanārdanābhyāṃ smṛtvā tadātmānamavetya sarvam /
ihātmanaścāgamane viditvā prayojanaṃ keśavamityuvāca //

prāduṣkarobhyeṣa mahāstramugraṃ śivāya lokasya vadhāya sauteḥ /
tanme'nujānātu bhavānsurāśca brahmā śivo brahmavidaśca sarve //

iti smoktvā pāṇḍavaḥ savyasācī namaskṛtvā brahmaṇe so'mitātmā /
anuttamaṃ brāhmamasahyamastraṃ prāduścakre manasā yadvidheyam //

tato diśaśca pradiśaśca sarvāḥ samāvṛṇotsāyakairbhūritejāḥ /
gāṇḍīvamuktairbhujagairivograi-- rdivākarāṃśupratimairjvaladbhiḥ //

sṛṣṭāstu bāṇā bharatarṣabheṇa śataṃ śataṃ bhīmamukhāḥ sutīkṣṇāḥ /
prācchādayankarṇarathaṃ kṣaṇena yugāntakālārkakaraprakāśāḥ //

vaikartanenāśu tadājimadhye sahasraśo bāṇagaṇā visṛṣṭāḥ /
te cākṣayāḥ pāṇḍavamabhyupeyuḥ parjanyasṛṣṭā iva vāridhārāḥ //

tataḥ sa kṛṣṇaṃ ca kirīṭinaṃ ca vṛkodaraṃ cāpratimaprabhāvaḥ /
tribhistribhirbhīmabalo nihatya nanāda ghoraṃ mahatā svanena //

tataḥ sa bāṇābhihataḥ kirīṭī bhīmaṃ tathā prekṣya janārdanaṃ ca /
amṛṣyamāṇaḥ punareva pārthaḥ śarāndaśāṣṭau samamudvavarṣa //

sa ketumekena śareṇa viddhvā śalyaṃ caturbhistribhireva karṇam /
tataḥ sumuktairdaśabhirjaghāna senāpatiṃ kāñcanavarmanadvam //

sa rājaputro viśirā vibāhu-- rvivājisūto vidhanurviketuḥ /
atho rathāgrādapatatprarugṇaḥ paraśvathaiḥ sāla ivāvakṛttaḥ //

punaśca karṇaṃ tribhiraṣṭabhiśca dvābhyāṃ caturbhirdaśabhiśca viddhā /
catuśśataṃ dviradānāṃ nipātya rathāñjaghānāṣṭarathānkirīṭi / sahasramaśvāṃśca punaśca sādī-- naṣṭau sahasrāṇi ca pattivīrān //

dṛṣṭvā tu mukhyāvatividhyamānau vareṣubhiḥ śūravarāvarighnau /
karṇaṃ ca pārthaṃ ca niyamya vāhā- nsarve variṣṭhāśca tato'vatasthuḥ //

pracchādayāmāsa tataḥ pṛṣatkaiḥ saghoṣamācchidya ca gāṇḍivajyām /
asminkṣaṇe phalgunaṃ sūtaputraḥ samācinotkṣudrakāṇāṃ śatena //

nirmuktasarpapratimaiśca tīkṣṇai-- stailapraghautaiḥ khagapatravājaiḥ /
ṣaṣṭyā bibhedāśu ca vāsudevaṃ tadantare prātvaransomakāśca //

tato navajyāṃ sudṛḍhāṃ kirīṭi svabāhuvikṣepasahāṃ pragṛhya /
samādadhe gāṇḍive kṣiprakārī nimeṣamātreṇa mahādhanuṣmān //

jyāchedanaṃ jyāvidhānaṃ ca tasya naivāvabudhyatsūtaputro laghutvāt /
pārthasya saṅkhye dviṣatāṃ nihantu-- stadadbhutaṃ tatra babhūva rājan //

pārtho'pi tāṃ jyāmavadhāya tūrṇaṃ śarāsanajyāmādhirathervihatya /
susaṃrabdhaḥ karṇaśaraiḥ kṣatāṅgo raṇe yodhāṃstāvakānpratyagṛhṇāt //

naivāpatpakṣigaṇo'ntarikṣe pārthena cāstreṇa kṛte'ndhakāre //

śalyaṃ tu pārtho daśabhirnimeṣā-- dbhṛśaṃ tanutre prahasannavidhyat /
tataḥ karṇaṃ dvādaśabhiḥ pṛṣatkai-- rviddhvā punaḥ saptabhirapyavidhyat //

sa pārthabāṇāsanaveganunnai-- rdṛḍhāhataḥ patribhirugravegaiḥ /
vibhinnagātraḥ kṣatajokṣitāṅgaḥ karṇo babhau rudra ivāntakāle //

tatastribhistaṃ tridaśādhipopamaṃ śarairbibhedādhirathirdhanañjayam /
śarāṃśca pañca jvalanānivoragā-- npraveśayāmāsa jighāṃsuracyute //

suvarṇacitraṃ puruṣottamasya varmātha bhittvābhyapatansupuṅkhāḥ /
vegena gāṃ te viviśuśca rāja-- nsnātvā karṇā'bhimukhāḥ pratīyuḥ //

tānpañcabhallairdaśabhiḥ sumuktai-- stridhātridhaikaikamathoccakarta /
dhanañjayaste nyapatanpṛthivyāṃ yathā'hayastārkṣyamukhena kṛttāḥ //

tataḥ prajajvāla kirīṭamālī krodhena kakṣaṃ pradahannivāgniḥ /
sa karṇamākarṇavikṛṣṭasṛṣṭaiḥ śaraiḥ śarīrāntakarairjvaladbhiḥ / marmasvavidhyatsa cacāla duḥkhā-- ddhairyāttuṃ tasthāvatimātradhairyaḥ //

prāduścakārātha śarānmahātmā dehaṃ vicinvanniva sūtajasya /
śarāstu te kāñcanacitrapuṅkhāḥ sampetururvyāṃ śataśo mahāntaḥ //

tataḥ śaraughaiḥ pradiśo diśaśca raviprabhāḥ karṇarathaśca rājan /
adṛśya āsītkupite dhanañjaye tuṣāranīhāravṛto giriryathā //

sacakrarakṣā api pṛṣṭhagopāḥ karṇasya ye cāpi puraḥsarāśca /
bhītā dravanti sma nihanyamānā maheṣubhiḥ pārthakarapraṇunnaiḥ //

tato'rjuno vai bharatapravīro mahānubhāvaḥ samare nihantā /
suyodhanenānumatānvinighna-- nsamucchritānsarathānsārabhūtān //

gāṇḍīvadhanvā dviguṇaṃ sahasraṃ kurupravīrānṛṣabhaḥ kurūṇām /
kṣaṇena sarvānsarathānsasūtā-- nnināya rājankṣayamekavīraḥ //

atho palāyanta vihāya karṇaṃ tavātmajā ye kuravaśca śiṣṭāḥ /
etānavākīrya śarakṣatāṃśca vilapyamānāṃstanayānvimṛdgan //

sarve praṇeśuḥ kuravo vibhagnāḥ pārtheṣubhiḥ samparitapyamānāḥ /
suyodhanenātha punarvariṣṭhāḥ pracoditāḥ karṇarathānuyāne //

bhoḥ kṣatriyāḥ śūratamāstu sarve kṣatre ca dharme niratāḥ stha yūyam /
na yuktarūpaṃ bhavatāṃ samīpā-- tpalāyanaṃ karṇamatiprahāya //

tavātmajenāpi tathocyamānā naivāvatiṣṭhanta bhayādvivarṇāḥ /
kṣaṇena naṣṭāḥ pradiśo diśaśca sarve tataḥ prekṣya diśo viśūnyāḥ //

bhayāvadīrṇaḥ kurubhirvihīnaḥ pārtheṣubhiḥ samparitapyamānaḥ /
na vivyadhe bhārata tatra karṇaḥ
pratīpamevārjunamabhyadhāvat //