Mahabharata · Chapter 8.95

tau śaṅkhabherīninade samṛddhe samīyatuḥ śvetahayau narāgryau /
vaikartanaḥ sūtaputro'rjunaśca durmantrite te sasutasya rājan //

āśīviṣāvagnimivotsṛjantau tathā mukhābhyāmabhiniḥ śvasantau /
yaśasvinau jajvalaturmṛdhe tadā ghṛtāvasiktāviva havyavāhau //

yathā gajau haimavatau prabhinnau pravṛddhadantāviva vāsitārthe /
tathā samājagmaturugravīryau dhanañjayaścādhirathiśca vīrau //

balāhakeneva mahābalāhako yadṛcchayā vā giriṇā yathā giriḥ /
tathā dhanurjyātalaneminiḥsvanau samīyatustāviṣuvarṣavarṣiṇau //

śarāstraśaktyṛṣṭigadāsisarpau roṣānilodvūtamahormimālau /
yathā'calau dvau calatastathā tau yathā'rṇavau cāśu caturyugānte //

pravṛddhaśṛṅgadrumavīrudoṣadhī pravṛdvanānāvidhanirjharaughau /
yathā'calau vā calitau mahājalai-- stathā mahāstrairitaretaraṃ hataḥ //

sa sannipāto rathayormahānabhū-- tsureśavairocanayoryathā purā /
śarairvinunnāśvaniyantṛdehayoḥ suduḥsahāstraiḥ paribhinnadehayoḥ //

prabhūtapadmotpalamatsyakacchapau mahāhadau pakṣigaṇānunāditau /
susannikṛṣṭāvaniloddhatau yathā tathā rathau tau dhvajinau samīyatuḥ //

ubhau mahendrasya samānavikramā-- vubhau mahendrapratimau mahārathau /
mahendravajrapratimaiśca sāyakai-- rmahendravṛtrāviva samprajaghnatuḥ //

sanāgapattyaśvarathe ubhe bale vicitravarmābharaṇāmbarāyudhe /
cakampatuśconnadatuśca vismayā-- ddharā viyaccārjunakarṇasaṅgame //

bhujāḥ savastrāṅgulayaḥ samucchritāḥ sasiṃhanādairhṛṣitairdidṛkṣubhiḥ /
yadā'rjunaṃ matta iva dvipo dvipaṃ samabhyayādādhirathirjighāṃsayā //

udakrośansomakāstatra pārthaṃ tvarasva yāhyarjuna bhindhi karṇam /
chindhyasya mūrdhānamalaṃ cireṇa śraddhāṃ ca rājyādvṛtarāṣṭrasūnoḥ //

tathā'smākaṃ bahavastatra yodhāḥ karṇaṃ tathā yāhi yāhītyavocan /
jahyarjunaṃ karṇa tataḥ sudīnāḥ punarvanaṃ yāntvacirāya pārthāḥ //

karṇo'tha pūrvaṃ daśabhiḥ pṛṣatkai-- rgāṇḍīvadhanvānamavidhyadāśu /
jaghāna taṃ cāpi tataḥ kirīṭī śaraistadāṣṭādaśabhiḥ sumuktaiḥ //

punaśca karṇastvarito'pi pārthaṃ ratheṣubhistaṃ daśabhirjaghāna /
taṃ cāpi pārtho daśabhiḥ śitāgraiḥ kakṣyāntare tīkṣṇamukhairavidhyat //

karṇastato bhārata sāmparāye ghore'tivelaṃ raṇasaṃvimardī /
jaghāna pārthaṃ navabhiḥ śitāgraiḥ kakṣyānte nāgamiva prabhinnam //

tato'parābhyāṃ yudhi sūtaputro dvābhyāṃ kṣurābhyāṃ harimāśukārī /
samājaghāna tvarayā mahātmā yathā surendraṃ namuciḥ prasahya //

taṃ pāṇ़ḍavaḥ pañcabhirāyasāgrai-- rākarṇapūrṇairnijaghāna karṇam /
te śoṇitaṃ tasya papustadānīṃ kālasya dūtā iva pārthabāṇāḥ //

karṇo'pi pārthaṃ saha vāsudevaṃ samācinodbhārata vatsadantaiḥ /
parasparaṃ tau viśikhaiḥ pramuktai-- statakṣatuḥ sūtaputro'rjunaśca //

parasparaṃ chidradidṛkṣayā ca subhīmamabhyāyayatuḥ praruṣṭau //

tato'stramāgneyamamitratāpanaṃ mumoca karṇāya sureśvarātmajaḥ /
dhanañjayātsaṃyugamūrdhni niḥsṛtaṃ tadā prajajvāla tadastramuttamam //

samīkṣya karṇo jvalanāstramudyataṃ sa vāruṇaṃ tatpraśamārthamāhave /
samutsṛjatsūtaputraḥ pratāpavān sa tena vahniṃ śamayāñcakāra //

valāhakāstreṇa diśastarasvī cakāra sarvāstimireṇa saṃvṛtāḥ /
apāvahanmeghagaṇāṃstatastān samīraṇāstreṇa samīritena //

tataḥ so'straṃ dayitaṃ devarājñaḥ prāduścakre vajramamitratāpanaḥ /
gāṇḍīvajyā vimṛśaṃścātimanyu-- rdhanañjayaḥ śatrusaṅghapramāthī //

nārācanālīkavarāhakarṇā gāṇḍīvataḥ prādurāsansutīkṣṇāḥ /
sahasraśo vajrasamānavegā-- ste sarvataḥ paryadhāvanta ghorāḥ //

pārtheṣavaḥ karṇarathaṃ vilagnā adhomukhāḥ pakṣigaṇā dinānte /
niśāniketārthamivāśu vṛkṣaṃ jagrāha tānsūtaputraḥ pṛṣatkaiḥ //

kṣiptāṃstathā pāṇḍavabāṇasaṅghā-- namṛṣyamāṇasya dhanañjayasya /
raṇājire tvantakatulyakarmā vaikartano roṣaparītacetāḥ //

jyotiṣprabhāṃ yadvadupāgataḥ sa-- ndivākaro nāśayate kṣaṇena /
pārthasya tānbāṇagaṇānsamagrā-- nvyanāśayadyudhyata eva karṇaḥ //

roṣātpradīptaḥ sumahāvimarde bhīmastato'krudhyadadīnasatvaḥ /
pāṇiṃ svapāṇau sa viniṣpiṣya roṣā-- damarṣito vākyamuvāca pārtham //

tvāṃ sūtaputro nu kathaṃ kirīṭi-- nratheṣubhirhanti śitāgradhāraiḥ /
dhṛtyā hi bhūtāni yayā'jayastvaṃ grāsaṃ dadatkhāṇḍave pāvakāya //

dhṛtyā tayā sūtaputraṃ jahi tva-- mahaṃ vainaṃ gadayā pothayiṣye /
sametya pārthaṃ sunṛśaṃsavādī jīvannāyaṃ yāsyati kālapakvaḥ //