Mahabharata · Chapter 8.88

sa pītvā rudhiraṃ tasya caraṇau gṛhya bhārata /
ityuccairvacanaṃ prāha pratinṛtyanvṛkodaraḥ //

eṣa te rudhiraṃ tīvraṃ pibāmi puruṣādavat /
vadedānīṃ susaṃrabdhaḥ punargauriti gauriti //

ye cāsmānpratinṛtyanti tadā gauriti gauriti /
tānvayaṃ pratinṛtyāmaḥ punargauriti gauriti //

pramāṇakoṭyāṃ śayane kālakūṭakabhojanam /
daṃśanaṃ cāhibhistīkṣṇairdāhaṃ jatugṛhe ca yat //

dyūte ca doṣabhūyastvamaraṇye vasatiśca yā /
iṣvastrāṇi ca saṅgrāme anilānilaveśmasu //

duḥkhānyevābhijānīmo na sukhāni kadācana /
dhṛtarāṣṭrasya daurātmyātsaputrasya vayaṃ sadā //

ityuccairvacanaṃ procya jayaṃ prāpya vṛkodaraḥ /
punareva mahārāja tava sainyamabhidravat //

raktārdrapāṇistu tato mahātmā gadāpāṇiḥ kāla ivāntakāle /
vibhīṣayaṃstava putrasya sainya-- mitastato dhāvati vāhinīṃ te //

tataḥ kṣaṇādbhārata śūnyamāsī-- dāyodhanaṃ ghorataraṃ kurūṇām /
yatrājimadhye prāpibadbhīmaseno duḥśāsanasya rudhiraṃ krodhadīptaḥ //

sa hatvā samare rājanrājaputraṃ mahābalam /
pūrṇakāmo madodagraḥ siṃho rurumivotkaṭaḥ //

rudhirārdro mahārāja vyaśobhata parantapaḥ /
sapuṣpaḥ kiṃśuka iva raktaraktataro babhau //

rudhirākto ghoraveṣaḥ kruddho rājanvaco'bravīt /
brūhīdānīṃ pāpamate nṛśaṃsa patito hyasi //

duḥśāsane yādṛśaṃ saṃśrutaṃ na-- stadavāptaṃ pāṇḍavaiḥ sarvameva /
atraivamāpsyāmyaparaṃ dvitīyaṃ duryodhanaṃ yajñapaśuṃ viśasya //

śiro mṛditvā'sya punaśca śāntiṃ yāsyāmyahaṃ kauravāṇāṃ samakṣam /
yā sā'patiḥ sā sapatirhi jātā yāstāḥ sapatyo'patayastu jātāḥ //

paśyantu citraṃ vividhaṃ hi loke ye vai tilāḥ ṣaṇḍatilā babhūvuḥ /
te cetsaṃsiddhā nidhanaṃ gatāḥ pare kiṃ citrarūpaṃ bata jīvaloke //

etāvaduktvā vacanaṃ prahṛṣṭaḥ prākrośaduccai rudhirārdravakraḥ /
nanarta caivātibalo mahātmā vṛtraṃ nihatyeva sahasranetraḥ //

dṛṣṭvā tu nṛtyantamudagravīryaṃ kālaṃ yathā tvantakāle prajānām /
mahadbhayaṃ cādhirathiṃ viveśa jaye nirāśāśca sutāstvadīyāḥ //

duḥśāsane tu nihate putrāstava mahārathāḥ / mahatkrodhaviṣaṃ vīrā dhārayanto mahābalāḥ /
te tu rājanmahāvīryā bhīmaṃ prācchādayañcharaiḥ //

niṣaṅgī kavacī khaṅgī daṇḍadhāro dhanurdharaḥ /
alamburjalasandhaśca vātavegasuvarcasau //

ete sametya sahitā bhrātṛvyasanakarśitāḥ /
bhīmasenaṃ mahābāhuṃ pīḍayāmāsurañjasā //

sa vadhyamāno viśikhaiḥ samantāttairmahārathaiḥ /
bhīmaḥ krodhābhiraktākṣaḥ kruddhaḥ kāla ivābabhau //

tataḥ parivṛto rājannavabhiḥ śatrutāpanaiḥ /
duḥśāsanādavarajaiḥ putraistava vṛkodaraḥ //

tāṃstu bhallairmahāvegairnavabhirnava bhārata /
rukmāṅgadānrukmapuṅkhaiḥ pārtho ninye yamakṣayam //

hateṣu tava putreṣu balaṃ tadvipradudruve /
paśyataḥ sūtaputrasya pāṇḍavasya bhayārditam //

tataḥ karṇaṃ mahārāja praviveśa mahadbhayam /
dṛṣṭvā bhīmasya vikrāntamantakasya prajāsviva //

tasya tvākārabhāvajñaḥ śalyaḥ samitiśobhanaḥ /

uvāca vacanaṃ karṇaṃ prāptakālaṃ hitaṃ tadā //

ete dravanti rājāno bhīmasenabhayārditāḥ /
duryodhanaśca sammūḍho bhrātṛvyasanakarśitaḥ //

duḥśāsanasya rudhire pīyamāne mahātmanā /
vyāpannacetāḥ sahasā śokopahatacetanaḥ //

upāsate tvāmete hi parivārya mahārathāḥ /
kṛpaprabhṛtayaḥ karṇa hataśeṣāḥ sahodarāḥ //

pāṇḍavā labdhalakṣāśca dhanañjayapurogamāḥ /
tvāmevābhimukhāḥ śūrā yuddhāya samupasthitāḥ //

sa tvaṃ puruṣaśārdūla pauruṣe mahati sthitaḥ /
kṣatradharmaṃ puraskṛtya pratyudyāhi dhanañjayam //

bhāro hi dhārtarāṣṭreṇa tvayi sarvaḥ samāhitaḥ /
tamudvaha mahābāho yathāśakti yathābalam //

jaye syādvipulā kīrtirdhruvaḥ svargaḥ parājaye / vṛṣasenaśca rādheya saṅkruddhastanayastava /
tvayi mohaṃ samāpanne pāṇ़ḍavānabhidhāvati //
sañjaya uvāca /

etacchrutvā tu vacanaṃ śalyasyāmitatojasaḥ /
hṛdi mānuṣyakaṃ bhāvaṃ kṛtvā yudvāya susthiram //

tataḥ kruddho vṛṣaseno'bhyadhāva-- dbhīmaṃ samāyāntamamitrasāham /
bāṇaiḥ kirantaṃ pratiyāti cograṃ vyāttānanaṃ kālamivāpatantam //

tamabhyadhāvannakulaḥ pravīra-- mārādamitraṃ pratudanpṛṣatkaiḥ /
karṇasya putraṃ samare prahṛṣṭaṃ jiṣṇurjighāṃsurmaghaveva jambham //

tato dhvajaṃ sphāṭikahemacitraṃ ciccheda dhairyānnakulaḥ kṣureṇa /
karṇātmajasyeṣvasanaṃ ca citraṃ bhallena jāmbūnadacitranaddham //

athānyadādāya dhanuḥ sa śīghraṃ karṇātmajaḥ pāṇḍavamabhyavidhyat /
divyairastrairabhyavarṣattadainaṃ karṇasya putro nakulaṃ kṛtāstram //

tataḥ kruddho nakulaḥ karṇaputraṃ śarairmaholkābhirivābhyapīḍayat /
sa karṇaputro nakulasya rāja-- nsarvānastrānvārayaduttamāstraiḥ //

āsītsughoraṃ bharatapravīra yuddhaṃ tadā karṇajapāṇḍavābhyām //

vanāyujānsukumārānsuśubhrā-- nalaṅkṛtāñjātarūpeṇa citrān /
jaghāna cāśvānnakulasya vīro raṇājire sūtaputrasya putraḥ //

tato hatāśvādavaruhya yānā-- ccarmā'dade ruciraṃ barhicitram /
ākāśasaṅkāśamasiṃ pragṛhya prakāśamānaḥ khagavaccacāra //

tato'sya pakṣānanayadyamāya dvisāhasrānnakulaḥ kṣiprakārī /
te prāpatannasinā vai viśastā yathā'śvamedhe paśavaḥ śamitrā //

tatastato vijitā yuddhaśauṇḍā nānādeśyāḥ suhṛdaḥ satyasandhāḥ /
ekena śīghraṃ nakulena nunnāḥ sārepsunevottamacandanasya //

bhūmau carantaṃ nakulaṃ rathaughāḥ samantataḥ sāyakaiḥ pratyagṛhṇan /
sa tudyamāno nakulo vihaṅgai-- ścacāra saṅkhye dviṣato vinighnan //

taṃ karṇaputro'pi carantamājau narāśvamātaṅgarathapravīrān /
nighnantamaṣṭādaśabhiḥ pṛṣatkai-- rvivyādha vīraḥ sa cukopa viddhaḥ //

tato'bhyadhāvatsamare jighāṃsuḥ karṇātmajaṃ pāṇḍusuto nṛvīram /
tasyeṣubhirvadhamatsūtaputro mahāraṇe varma sahasrabhāram //

tasyātha kāṃsyaṃ suśitaṃ supīta-- masipravīraṃ gurubhārāsāham /
dviṣaccharīrāpaharaṃ sughora-- mādhūnvataḥ sarpamivāttakośam //

kṣipraṃ śaraiḥ ṣaṅbhiramitrasāha-- ścakarta khaṅgaṃ niśitaiḥ sudhāraiḥ /
punaśca pārthaṃ niśitaiḥ pṛṣatkaiḥ stanāntare kṣipramivātyavidhyat //

sa bhīmasenasya rathaṃ ca gatvā vavarṣa vai śaravarṣaṃ sughoram //

nakulamatha viditvā chinnabāṇāsanāsiṃ virathamaribhirārtaṃ karṇaputrāstramagnam /
pavanacalapatākā hlādino valgitāśvāḥ parapuruṣaniyuktāḥ svai rathaiḥ śīghramīyuḥ //

drupadasutavariṣṭhāḥ pañca śaineyaṣaṣṭhā drupadaduhitṛputrāḥ pañca cāmitrasāhāḥ /
dviradarathanarāśvānsūdayantastvadīyān bhagavata iva rudrāḥ saṅkhyayā hetimantaḥ //

atha tava rathamukhyāstānpratīyustvarantaḥ kṛpahṛdikasutau ca drauṇiduryodhanau ca /
śakuniśukavṛkāśca krāthadevāvṛdhau ca dviradajaladaghauṣaiḥ syandanaiḥ kārmukaiśca //

atha tava rathavaryāstāndaśaikapravīrā-- niṣubhiraśanikalpaistāḍayanto nyarundhan /
navajaladasavarṇairhastibhistānsma vavru-- rgiriśikharanikāśairbhīmavegaiḥ kuṇindāḥ //