Mahabharata · Chapter 8.89

sukalpitā haimavatā mahotkaṭā raṇābhikāmaiḥ kṛtibhiḥ samāsthitāḥ /
suvarṇajālairvitatā babhurgajā-- stathā yathā khe jaladāḥ savidyutaḥ //

kuṇindaputro daśabhirmahāyasaiḥ kṛpaṃ sasūtāśvamapīḍayadbhṛśam /
tataḥ śaradvatsutasāyakairhataḥ sahaiva nāgena papāta bhūtale //

kuṇindaputrāvarajastu tomarai-- rdivākarāṃśupratimairayasmayaiḥ /
jaghāna bhojasya hayānathāpatan kṣaṇādviśastāḥ kṛtavarmaṇe hayāḥ //

athāpare drauṇihatā mahādvipā-- strayaḥ sasarvāyudhayodhaketanāḥ /
nipetururvyāṃ vyasavo vicetanā-- stathā yathā vajrahatā mahācalāḥ //

kuṇindarājāvarajādanantaraḥ stanāntare patrivarairatāḍayat /
tavātmajaṃ tasya tavātmajaḥ śaraiḥ śitaiḥ śarīraṃ vyahanaddvipaṃ ca tam //

sa nāgarājaḥ saha rājasūnunā papāta raktaṃ bahu sarvataḥ kṣaran /
mahendravajraprahato'mbudāgame yathā jalaṃ gerikaparvatastathā //

kuṇindaputraprahito'paro dvipaḥ krāthaṃ sasūtāśvarathaṃ vyapothayat /
tato'patatkrāthasarābhighātitaḥ saheśvaro vajrahato yathā giriḥ //

rathī dvipasthena hato'pataccharaiḥ krāthādhipaḥ parvatajena durjayaḥ /
savājisūteṣvasanadhvajastathā yathā mahāvātahato mahādrumaḥ //

vṛko dvipasthaṃ girirājavāsinaṃ bhṛśaṃ śarairdvādaśabhiḥ parābhinat /
tato vṛkaṃ sāśvarathaṃ mahādvipo drutaṃ caturbhiraṇairvyapothayat //

sa pothito nāgaraveṇa vīryavā-- nparābhinaddvādaśabhiḥ śilīmukhaiḥ /
vṛkeṇa bāṇābhihato'patatkṣitau savāraṇo babhrusutena sārdham //

kuṇindarājasya suto'parastadā sa cāpi śūraḥ sahasā samarpitaḥ /
papāta bāṇaiḥ subalasya sūnunā viṣāṇapucchāparagātrapātinā //

gajena vāhāñśakuneḥ kuṇindajo nināya vaivasvatamandiraṃ raṇe /
rathaṃ ca sankṣubhya nanāda nardata-- stato'sya gāndhārapatiḥ śiro'harat //

tataḥ kuṇindeṣu gateṣu teṣu prahṛṣṭarūpāstava te mahārathāḥ /
bhṛśaṃ pradaradhmurlavaṇāmbusambhavā-- nvarāṃśca bāṇāsanapāṇayo'bhyayuḥ //

tathā'bhavadyuddhamatīva dāruṇaṃ punaḥ kurūṇāṃ saha pāṇḍusṛñjayaiḥ /
śarāsiśaktyṛṣṭigadāparaśvathai-- rnarāśvanāgāsuharaṃ bhṛśākulam //

rathāśvamātaṅgapadātayastataḥ parasparaṃ viprahatāḥ kṣitau patan /
yathā savidyuttaṭito jalapradāḥ samutthitairdigbhya ivogramāruteḥ //

tataḥ śatānīkahatā mahāgajā hayā rathāḥ pattigaṇāśca tāvakāḥ /
suparṇavātaprahatā yathoragā-- stathā gatā gāṃ vivaśā vicūrṇitāḥ //

tato'bhyaviddhyadbahubhiḥ śitaiḥ śaraiḥ sa vindaputro nakulātmajaṃ smayan /
tato'sya kopādvicakarta nākuliḥ śiraḥ kṣureṇāmbujasannibhānanam //

tataḥ śatānīkamavidhyadāyasai-- stribhiḥ śaraiḥ karṇasuto'rjunaṃ tribhiḥ /
tribhiśca bhīmaṃ nakulaṃ ca saptabhi-- rjanārdanaṃ dvādaśabhiśca sāyakaiḥ //

tadasya karmātimanuṣyakarmaṇaḥ samīkṣya hṛṣṭāḥ kuravo'bhyapūjayan /
parākramajñāstu dhanañjayasya ye huto'yamagnāviti te tu menire //