Mahabharata · Chapter 8.85

tamāyāntaṃ mahāvegairaśvaiḥ kapivaradhvajam /
yuddhāyābhyadravandīrāḥ kurūṇāṃ navatīṃ rathāḥ //

kṛtvā saṃśaptakā ghoraṃ śapathaṃ pāralaukikam /
parivavrurnaravyāghrā naravyāghraṃ raṇe'rjunam //

kṛṣṇaḥ śvetānmahāvegānaśvānkāñcanabhūṣaṇān /
muktājālapraticchannānpraiṣītkarṇarathaṃ prati //

prekṣya karṇarathaṃ yāntamarighnaṃ taṃ dhanañjayam /
bāṇavarṣairabhighnantaḥ saṃśaptakagaṇā yayuḥ //

tvaramāṇāṃstu tānsarvānsasūteṣvasanadhvajān /
jaghāna navatiṃ vīrānarjuno niśitaiḥ śaraiḥ //

te'patanta hatā bāṇairnānārūpaiḥ kirīṭinā /
vimānebhyaḥ sukṛtinaḥ svargātpuṇyakṣaye yathā //

tataḥ sarathanāgāśvāḥ kuravaḥ kurusattamam /
nirbhayā bharataśreṣṭhamabhyavartanta phalgunam //

tadāyastamanuṣyāśvamudīrṇavaravāraṇam /
putrāṇāṃ te mahāsainyaṃ samarautsīddhanañjayam //

śaktyṛṣṭitomaraprāsairgadānistriṃśasāyakaiḥ /
prācchādayanmaheṣvāsāḥ kuravaḥ kurunandanam //

tāmantarikṣe vitatāṃ śastravṛṣṭiṃ samantataḥ /
vyadhamatpāṇḍavo bāṇaistamaḥ sūrya ivāṃśubhiḥ //

tato mlecchāḥ sthitā mattaistrayodaśaśatairgajaiḥ /
pārśvato vyahananpārthaṃ tava putrasya śāsanāt //

karṇinālīkanārācaistomaraprāsaśaktibhiḥ /
karpaṇairbhiṇḍipālaiśca rathasthaṃ pārthamārdayan //

tāṃ śastravṛṣṭimatulāṃ dvipasthaiḥ preṣitāṃ prabhuḥ /
ciccheda niśitairbhallairardhacandraiśca phalgunaḥ //

atha tāndviradānsarvānnānāliṅgaiḥ śarottamaiḥ /
sapatākadhvajārohāngirīnvajrairivābhinat //

te hemapuṅkhairiṣubhirarditā hemamālinaḥ /
hatāḥ peturmahānāgāḥ sāgrijvālā ivādrayaḥ //

tato gāṇḍīvanirghoṣo mahānāsīdviśāmpate /
stanatāṃ kūjatāṃ caiva manuṣyagajavājinām //

kuñcarāśca hatā rājandadruvuste samantataḥ /
aśvāśca paryadhāvanta hatārohā diśo daśa //

rathā hīnā nahārāja rathibhirvājibhistathā /
gandharvanagarākārā dṛśyante sma sahasraśaḥ //

aśvārohā mahārāja dhāvamānā itastataḥ /
tatratatraiva dṛśyante nihatāḥ pārthasāyakaiḥ //

tasminkṣaṇe pāṇḍavasya bāhvorbalamadṛśyata /
yatsādino vāraṇāṃśca rathāṃścaiko'jayadyudhi //

asaṃyuktāśca te rājanparivṛttā raṇaṃ prati /
narā nāgā rathāścaiva nadanto'rjunamabhyayuḥ //

tatastryeṅgeṇa mahatā balena bharatarṣabha /
dṛṣṭvā parivṛtaṃ rājanbhīmasenaḥ kirīṭinam //

hatāvaśeṣānutsṛjya tvadīyānkaticidrathān /
javenābhyadravadbhīmo dhanañjayarathaṃ prati //

tatastatprādravatsainyaṃ hatabhūyiṣṭhamāturam /
dṛṣṭvā'rjunaṃ tadā bhīmamāgataṃ bhrātaraṃ prati //

hatāvaśiṣṭāṃsturagānarjunena mahābalaḥ /
bhīmo vyadhamadaśrānto gadāpāṇirmahāhave //

gadāpāṇiṃ tadā dṛṣṭvā bhīmaṃ bhārata bhāratāḥ /
menire tamanuprāptaṃ daṇḍapāṇimivāntakam //

kālarātrimivātyugrāṃ naranāgāśvabhojanām /
prākārāṭṭapuradvāradāraṇīmatidāruṇām //

gadāṃ turaganāśāya tvaranbhīmo vyavāsṛjat /
sā jaghāna bahūnaśvānaśvārohāṃśca māriṣa //

kāṃsyāyasatanutrāṃśca narānaśvāṃśca pāṇḍavaḥ /
pothayāmāsa gadayā saśabdaṃ te'patanhatāḥ //

dantairdaśanto vasudhāṃ śerate kṣatajokṣitāḥ /
bhagnamūrdhāsthicaraṇāḥ kravyādagaṇabhojanāḥ //

asṛṅmāṃsavasābhiśca tṛptimabhyāgatā gadā /
asthīnyapyaśnatī tasthau kālarātrīva durdṛśā //

sahasrāṇi daśāśvānāṃ hatvā pattīṃśca bhūyasaḥ /
bhīmo'bhyadhāvatsaṅkruddho gadāpāṇiritastataḥ //

gadāpāṇiṃ tato bhīmaṃ dṛṣṭvā bhārata tāvakāḥ /
menire samanuprāptaṃ kāladaṇ़ḍodyataṃ yamam //

sa matta iva mātaṅgaḥ saṅkruddhaḥ pāṇḍunandanaḥ /
praviveśa gajānīkaṃ makaraḥ sāgaraṃ yathā //

vigāhya ca gajānīkaṃ pragṛhya mahatīṃ gadām /
kṣaṇena bhīmaḥ saṅkruddhastanninye yamasādanam //

gajānsakaṅkaṭānmattānsārohānsapatākinaḥ /
patataḥ samapaśyāma sapakṣānparvatāniva //

hatvā tu tadgajānīkaṃ bhīmaseno mahābalaḥ /
punaḥ svarathamāsthāya pṛṣṭhato'rjunamabhyayāt //

tataḥ parāṅmukhībhūtaṃ nirutsāhaṃ balaṃ tava /
tadānīṃ tu mahārāja prāyaśaḥ śastraveṣṭitam //

vilambamānaṃ tatsainyabhapragalbhamavasthitam /
dṛṣṭvā prācchādayadbāṇairarjunaḥ śastravṛṣṭibhiḥ //

narāśvarathamātaṅgā yudhi gāṇḍīvadhanvanā /
śaravrātaiścitā rejuḥ kadambā iva kesaraiḥ //

tataḥ kuruṇāmabhavadārtanādo mahānnṛpa /
narāśvanāgāsuhanāndṛṣṭvā bāṇānkirīṭinaḥ //

hāhākṛtaṃ bhṛśaṃ trastaṃ līyamānaṃ parasparam /
alātacakravatsainyaṃ tadā babhrāma tāvakam //

tato'rjunaśaradhvastaṃ kurūṇāṃ sumahadbalam /
na hyatrāsīdanirbhinno rathaḥ sādī hayo gajaḥ //

ādīptamiva tatsainyaṃ śaraiśchinnatanucchadam /
āsītsvaśoṇitaklinnaṃ raudraṃ naṣṭaṃ viśāmpate //

tatsainyaṃ hatabhūyiṣṭhamāhataṃ niśitaiḥ śaraiḥ /
na jahau samaraṃ prāpya phalgunaṃ śatrutāpanam //

tatrādbhutamapaśyāma kauravāṇāṃ parākramam /
vadhyamāno'pi yatpārthaṃ na jahau bharatarṣabha //

taṃ dṛṣṭvā vikramaṃ tasya kuravaḥ savyasācinaḥ /
nirāśāḥ samapadyanta sarve karṇasya jīvite //

aviṣahyaṃ tu pārthasya śarasaṃsparśamāhave /
matvā nyavartankuravo jitā gāṇḍīvadhanvanā //

te hitvā samare pārthaṃ vadhyamānāśca sāyakaiḥ /
pradudruvurdiśo bhītāścukruśuścāpi sūtajam //

tānvidrāvayate pārthaḥ kirañśaraśatānbahūn /
harṣayanpāṇḍavīṃ senāṃ rājānaṃ ca yudhiṣṭhiram //

putrāstava mahārāja jagmuḥ karṇarathaṃ prati /
agādhe majjatāṃ teṣāṃ dvīpaḥ karṇo'bhavattadā //

kuravo hi mahārāja nirviṣāḥ pannagā iva /
karṇamevopalīyanta bhayādgāṇḍīvaghanvanaḥ //

yathā sarvāṇi bhūtāni mṛtyorbhītāni māriṣa /
upalīyanti santrāsāddharmaṃ lokaparāyaṇam //

tathā karṇaṃ maheṣvāsaṃ putrāstava narādhipa /
upālīyanta santrāsātpāṇḍavasya mahātmanaḥ //

tāñśoṇitapariklinnānviṣamasthāñśarāturān /
mā bhaiṣṭetyabravītkarṇo bhītānāviṣṭacetasaḥ //

sambhagnaṃ hi balaṃ dṛṣṭvā balātpārthena tāvakam /
dhanurvisphārayankarṇastasthau śatrujighāṃsayā //

tānpradrutānkurūndṛṣṭvā karṇaḥ śastrabhṛtāṃ varaḥ /
sañcintayitvā pārthasya vadhe dadhre manaḥ śvasan //

visphārya sumahaccāpaṃ tataścādhirathirvṛṣaḥ /
pāñcālānpunarādhāvatpaśyataḥ savyasācinaḥ //

tataḥ kṣaṇena kṣitipāḥ kṣatajapratimekṣaṇāḥ /
śaraughaiśchādayāmāsurmahāmeghā ivācalam //

tataḥ śarasahasrāṇi karṇamuktāni māriṣa /
pāñcālānāṃ haratprāṇāṃstamāṃsīva tamonudaḥ //

mahadāsīttadā yuddhaṃ pāñcālānāṃ mahāmate /
vadhyatāṃ sūtaputreṇa mitrārthe mitragṛddhinā //