Mahabharata · Chapter 8.69

[athopayātau pṛthulohitākṣau śarācitāṅgau rudhirapradigdhau /
samīkṣya senāgranarapravīrau yudhiṣṭhiro vākyamidaṃ babhāṣe // ]

tato yudhiṣṭhiro dṛṣṭvā sahitau keśavārjunau /
hatamādhirathiṃ mene saṅkhye gāṇḍīvadhanvanā //

tāvabhyanandatkaunteyaḥ sāmnā paramavalgunā /
smitapūrvamamitraghna pūjayanbharatarpabha //
yudhiṣṭhira uvāca /

svāgataṃ devakīputra svāgataṃ te dhanañjaya /
priyaṃ me darśanaṃ vāḍhaṃ yuvayornarasiṃhayoḥ //

ariṣṭayorakṣatayoḥ karṇaṃ hatvā mahāratham /
āśīvipasamaṃ yuddhe sarvaśastraviśāradam //

agragaṃ dhārtarāṣṭrāṇāṃ sarveṣāṃ śarma varma ca /
rakṣitaṃ vṛṣasenena supeṇena ca dhanvinā //

anujñātaṃ mahāvīryaṃ rāmeṇāstre sudurjayam /
agryaṃ sarvasya lokasya rathinaṃ lokaviśrutam //

trātāraṃ dhārtarāṣṭrāṇāṃ gantāraṃ vāhinīmukhe /
hantāraṃ parasainyānāmamitragaṇamardanam //

duryodhanahite yuktamasmadduḥkhāya codyatam /
apradhṛṣyaṃ mahāyuddhe devairapi savāsavaiḥ //

analānilayostulyaṃ tejasā ca balena ca /
pātālamiva gambhīraṃ suhṛdāṃ nandivardhanam //

antakaṃ mama mitrāṇāṃ hatvā karṇaṃ mahāmṛdhe /
diṣṭyā yuvāmanuprāptau hatvā'suramivāmarau //

tena yuddhamabhītena mayā'dyāpyacyutārjunau / kṛtaṃ ghoraṃ mahābāhū dhṛṣṭadyumnasya paśyataḥ /
antakeneva kruddhena prajāḥ sarvā jighāṃsatā //

tena ketuśca me cchinno hatau ca pārṣṇisārathī /
hatavāhaḥ kṛtaścāsmi yuyudhānasya paśyataḥ //

dhṛṣṭadyumnasya yamayorvīrasya ca śikhaṇḍinaḥ /
paśyatāṃ draupadeyānāṃ śatadrośca mahātmanaḥ //

etāñjitvā mahāvīryaḥ karṇaḥ śatrugaṇānbahūn /
jitavānmāṃ mahābāho yatamāno mahāraṇe //

anusṛtya ca māṃ yuddhe paruṣāṇyuktavānbahu /
tatra tatra yudhāṃ śreṣṭha paribhūya na saṃśayaḥ //

bhīmasenaprabhāvāttu yajjīvāmi dhanañjaya /
bahunātra kimuktena hate soḍhuṃ samutsahe //

trayodaśāhaṃ varṣāṇi yasmādbhīto dhanañjaya /
na sma nidrāṃ labhe rātrau na cāhani sukhaṃ kvacit //

tasya dveṣeṇa saṃyuktaḥ paridahye dhanañjaya /
ātmano maraṇaṃ jānanvādhrīṇasa iva dvijaḥ //

tasyāyamagamatkālaścintayānasya me ciram /
kathaṃ karṇo mayā śakyo yuddhe kṣapayituṃ bhavet //

jāgratsvapaṃśca kaunteya karṇameva smarāhyaham /
paśyāmi tatratatraiva karṇabhūtamidaṃ jagat //

yatra yatra hi gacchāmi karṇādbhīto dhanañjaya /
tatra tatra hi paśyāmi karṇamevāgrataḥ sthitam //

so'haṃ tenaiva vīreṇa samareṣvapalāyinā /
sahayaḥ sarathaḥ pārtha jitvā jīvanvisarjitaḥ //

ko nu me jīvitenārtho rājyenārtho bhavetpunaḥ /
mamaivaṃ vikṣatasyādya karṇenāhavaśobhinā //

na prāptapūrvaṃ yadbhīṣmātkṛpāddroṇācca saṃyuge /
tatprāptamadya me yuddhe sūtaputrānmahārathāt //

sa tvāṃ pṛcchāmi kaunteya yathā na kuśalastathā /
tanmamācakṣva kārtsnyena yathā karṇo hatastvayā //

śakratulyabalo yuddhe yamatulyaḥ parākrame /
rāmatulyastathāstreṣu sa kathaṃ te niṣūditaḥ //

mahārathasamākhyātaḥ sarvayuddhaviśāradaḥ /
dhanurdharāṇāṃ pravaraḥ sarveṣāṃ vai sadārjuna //

pūjito dhṛtarāṣṭreṇa saputreṇa viśāmpate /
tvadarthameva rādheyaḥ sa kathaṃ nihatastvayā //

dhārtarāṣṭrasya yoddhāraḥ sarva eva sadārjuna /
tava mṛtyuṃ raṇe karṇaṃ manyante puruṣarṣabha //

sa tvayā puruṣavyāghra kathaṃ yuddhe niṣūditaḥ /
tanmamācakṣva kaunteya yathā karṇo hatastvayā //

sotsedhamasya ca śiraḥ paśyatāṃ suhṛdāṃ hṛtam /
tvayā puruṣaśārdūla siṃheneva yathā ruroḥ //

sarvā diśaḥ paryapatattvadarthaṃ tvāṃ sūtaputraḥ samare parīpsan /
ditsannṛṇāṃ śakaṭaṃ ratnapūrṇaṃ kathaṃ tvayāsau nihato'dya karṇaḥ //

tvayā raṇe nihataḥ sūtaputraḥ
kaccitkṛtaṃ me paramaṃ tvayādya priyaṃ raṇe sūtaputraṃ nihatya //

sarvā diśaḥ paryapatattvadarthaṃ mudānvito garvitaḥ sūtaputraḥ /
sa śūramānī samare sametya kaccittvayā nihataḥ sūtaputraḥ //

rājyaṃ paraṃ hastigavāśvayuktaṃ rathaṃ ditsuryaḥ parebhyastvardarthe /
tvayā raṇe spardhate yaḥ sa pāpaḥ kaccittvayā nihataḥ pāpabuddhiḥ //

yo'sau nityaṃ śauryamadena matto vikatthate saṃsadi kauravāṇām /
prītyarthaṃ vai tāta suyodhanasya kaccitsa pāpo nihatastvayādya //

kaccitsamāgamya dhanuḥpramuktai-- stvatpreṣitairlohamayairvihangaiḥ /
śete bhinnaḥ pāṃsuṣu sūtaputraḥ kaccidbhagrau dhārtarāṣṭrasya bāhū //

yo'sau sadā ślāghate rājamadhye duryodhanaṃ harṣayandarpayuktaḥ /
hantā'smi sarvāniti pāṇḍuputrā-- nahaṃ hantā phalgunasyeti mohāt //

kaccidvaco'sya vitathaṃ tvayā kṛtaṃ yattatpriyāmavadattāta karṇaḥ /
sabhāmathye rūkṣamanekarūpaṃ dhikpāṇḍavānapatistvaṃ hi kṛṣṇe //

kaccidbhuvaṃ śatrurayaṃ mahātmā hyadhārayaddvādaśa yaḥ samāstu /
karṇo vrataṃ ghoramamitrasāho duryodhanasyārthaniviṣṭabuddhiḥ //

pādau na dhāve yāvadahaṃ na hanmi dhanañjayaṃ samareṣūgravegam /
kaccidraṇe phalguna taṃ nihatya kaccidvrataṃ tasya bhagnaṃ tvayā'dya //

yo'sau kṛṣṇāmabravīdduṣṭabuddhiḥ karṇaḥ sabhāyāṃ kuruvīramadhye /
kiṃ pāṇḍavāṃstvaṃ na jahāsi kṛṣṇe sudurbalānpatitānhīnasatvān //

yo'sau karṇaḥ pratyajānāttvadarthe nāhaṃ hatvā saha kṛṣṇena pārtham /
ihopayāteti sa pāpabuddhiḥ kaccicchete śarasambhinnagātraḥ //

kaccitsaṅgrāmo vidito vai tavāyaṃ samāgame sṛñjaya kauravāṇām /
yenāvasthāmīdṛśīṃ prāpito'haṃ kaccittvayā so'dya hato durātmā //

kaccittvayā tasya sumandabuddhe-- rgāṇḍīvamuktairviśikhairjvaladbhiḥ /
sakuṇḍalaṃ bhānumaduttamāṅgaṃ kāyātprakṛttaṃ yudhi savyasācin //

yattanmayā bāṇasamarpitena dhyāto'si karṇasya vadhāya vīra /
tanme tvayā kaccidamoghamadya dhyānaṃ kṛtaṃ karṇanipātanena //

yaddarpapūrṇaḥ sa suyodhano'smā-- ndidhakṣate karṇasamāśrayeṇa /
kaccittvayā so'dya samāśrayo'sya bhagnaḥ parākramya suyodhanasya //

yo naḥ purā ṣaṇḍhatilānavoca-- tsabhāmadhye kauravāṇāṃ samakṣam /
sa durmatiḥ kaccidupetya saṅkhye tvayā hataḥ sūtaputro'tyamarṣī //

yaḥ prāhiṇotsūtaputro durātmā kṛṣṇāṃ jitāṃ saubalehānayeti /
sa mandabuddhirnihataḥ prasahya vaikartanastvadya kaccinmahātman //

yaḥ śastrabhṛcchreṣṭhatamaṃ pṛthivyāṃ pitāmahaṃ vyākṣipadalpacetāḥ / saṅkhyāyamāno'rdharathaḥ sa kacci-- ttvayāṃ hato'dyādhirathirmahātman //

amarṣajaṃ nikṛtisamīraṇeritaṃ hṛdi sthitaṃ jvalanamimaṃ sadā mama /
hato mayā so'dya sametya karṇa iti bruvanpraśamayase'dya phalguna //