Mahabharata · Chapter 8.68

tato janārdanaḥ śrutvā tasya vākyaṃ viśāmpate /
rathenāpayayau kṣipraṃ saṅgrāmāditi bhārata //

pratyanīkamavasthāpya bhīmaṃ bhīmaparākramam /
alaṃ viṣahituṃ hyeṣa kurūṇāṃ samprapaśyatām //

karṇaṃ ca samare rājangrāhayiṣyañśramaṃ prati / viśvamārthaṃ ca kauravya pārthasya ca mahātmanaḥ /
apayāto raṇādvīro rājānaṃ draṣṭumeva ca //

arjunaṃ cābravītkṛṣṇo bhṛśaṃ rājā parikṣataḥ /
tamāśvāsya kuruśreṣṭha tataḥ karṇaṃ haniṣyasi //

tato dhanañjayaḥ śrutvā rājānaṃ śalyapīḍitam / yāhiyāhiti bahuśo vāsudevamacodayat /
rājānaṃ prati vārṣṇeya dūyate me dṛḍhaṃ manaḥ //

sa codyamānaḥ pārthena keśighno vṛṣṇinandanaḥ /
rathenāpayayau kṣipraṃ saṅgrāmāddhoradarśanāt //

gacchanneva tu kaunteyo dharmarājadidṛkṣayā /
sainyamālokayāmāsa nāpaśyattatra cāgrajam //

yuddhaṃ kṛtvā tu kaunteyo droṇaputreṇa bhārata /
duḥsahaṃ vajriṇā saṅkhye parājitya guroḥ sutam //

drauṇiṃ parājitya tatogradhanvā kṛtvā mahadduṣkaraṃ śūrakarma /
ālokayāmāsa tataḥ svasainyaṃ dhanañjayaḥ śatrubhirapradhṛṣyaḥ //

saṃyudhyamānānpṛtanāmukhasthā-- ñśūraḥ śūrānharṣayansavyasācī /
pūrvāpadānaiḥ prathitaiḥ praśaṃsa-- nsthitāṃścakārātmarathānanīke //

apaśyamānastu kirīṭamālī yudhiṣṭhiraṃ bhrātaramājamīḍham /
uvāca bhīmaṃ tarasābhyupetya rājñaḥ pravṛttistviha kutra ceti //
bhīmasena uvāca /

apayāta ito rājā dharmaputro yudhiṣṭhiraḥ /
karṇabāṇābhitaptāṅgo yadi jīvetkathañcana //
arjuna uvāca /

tasmādbhavāñśīghramitaḥ prayātu jñātuṃ pravṛttiṃ puruṣarṣabhasya /
nūnaṃ sa viddho'tibhṛśaṃ pṛṣatkaiḥ karṇena rājā śibiraṃ gato'sau //

yaḥ samprahārairyudhi sampravṛtte droṇena viddho'tibhṛśaṃ tarasvī /
tasthau sa tatrāpi jayapratīkṣo droṇena yāvanna hataḥ kilāsīt //

sa saṃśayaṃ gamitaḥ pāṇḍavāgryaḥ saṅkhye'dya karṇena mahānubhāvaḥ /
jñātuṃ prayāhyāśu tamadya bhīma sthāsyāmyahaṃ śatrugaṇānnirudhya //
bhīmasena uvāca /

tvameva jānīhi mahānubhāva rājñaḥ pravṛttiṃ bharatarṣabhasya /
ahaṃ hi yadyarjuna yāmyamitrā vadanti māṃ bhīta iti pravīrāḥ //

tato'bravīdarjuno bhīmasenaṃ saṃśaptakāḥ pratyanīkasthitā me /
etānahatvādya mayā na śakya-- mitopayātuṃ ripusaṅkhamadhyāt //

athābravīdarjunaṃ bhīmasenaḥ svavīryamāsādya kurupravīra /
saṃśaptakānpratiyotsyāmi saṅkhye sarvānahaṃ yāhi dhanañjaya tvam //

tadbhīmasenasya vaco niśamya dhanañjayo bhrāturamitramadhye /
draṣṭuṃ kuruśreṣṭhamabhiprayāsya-- nprovāca vṛṣṇipravaraṃ tadānīm //
arjuna uvāca /

rājānaṃ prati vārṣṇeya dūyate me dṛḍhaṃ manaḥ / codayāśvānhṛṣīkeśa vihāyaitadbalārṇavam /
ajātaśatruṃ rājānaṃ draṣṭumicchāmi keśava //
sañjaya uvāca /

taṃ ratha codayāmāsa bībhatsorvacanāddhariḥ //

tato hayānsarvadāśārhamukhyaḥ pracodayanbhīmamuvāca cedam /
naitaccitraṃ tava karmādya bhīma yāsyāvahe jahi pārthārisaṅghān //

tato yayau hṛṣīkeśo yatra rājā yudhiṣṭhiraḥ /
śīghrācchīghrataro rājanvājibhirgaruḍopamaiḥ //

pratyanīke tvavasthāpya bhīmasenamarindamam /
sandiśya cainaṃ rājendra yuddhaṃ prati vṛkodaram //

tatastu gatvā puruṣapravīrau rājānamāsādya śayānamekam /
rathādubhau pratyavaruhya tasmā-- dvavandaturdharmarājasya pādau //

ityevamupasaṅgṛhya ubhau tu pāñjalī sthitau / śastrakṣatau mahārāja rudhireṇa samukṣitau /
nihatya vāhinīṃ tubhyamapayātau raṇājirāt //

taṃ dṛṣṭvā puruṣavyāghraṃ kṣemiṇaṃ puruṣarṣabham /
mudābhyanandatāṃ kṛṣṇāvaśvināviva vāsavam //

tāvabhyanandadrājāpi vivasvānaśvināviva /
hate mahāsure jambhe śakraviṣṇū yathā guruḥ //

manyamāno hataṃ karṇaṃ prītaḥ parapurañjayaḥ / sa bhūtvā puruṣavyāghro rājā tatra yudhiṣṭhiraḥ /
harṣagadgadayā vācā prītaḥ prāha parantapaḥ //