Mahabharata · Chapter 8.70

taddharmaśīlasya vaco niśamya rājñaḥ kruddhasyātiratho mahātmā /
uvāca durmarṣamadīnasatvo yudhiṣṭhiraṃ jiṣṇuranantavīryaḥ //

droṇaṃ hataṃ pārtha karṇo viditvā bhinnāṃ nāvavimāvatyagādhe kurūṇām /
sammuhyamānāndhārtarāṣṭrānviditvā nirutsāhāṃśca vijaye pareṣām //

sodaryavattvarito'mitaujā uttārayiṣyandhṛtarāṣṭrasya putrān /
raṇe rathenādhirathirmahātmā tato hi māṃ tvaritaḥ so'bhyadhāvat //

saṃśaptakairyudhyamānasya me'dya senāgrayāyī kurusainyasya rājan /
āśīviṣābhānvikirañśaraughā-- ndrauṇiḥ purastātsahasādhyatiṣṭhat //

sa me dṛṣṭvā śūratamo dhvajāgraṃ samādiśadrathasaṅghānanekān /
teṣāmahaṃ pañcaśataṃ nihatya āsādayaṃ droṇaputraṃ nadantam //

sa droṇaputraḥ sadṛśaṃ mahātmā māmapyarautsīttadanīkamadhye /
kirañśaraughānbahurūpānvicitrā-- nsvātīgataḥ śukra ivātivarṣan //

sa me rānsarvataḥ kaṅkapatrā-- navāsṛjadvai pṛthivīprakāśān /
nivārya tūrṇaṃ paramājimadhye tato'pi māṃ bāṇagaṇaiḥ samārpayat //

ākarṣaṇaṃ vāpi vikṛṣya muktaṃ na dṛśyate tasya mahārathasya /
na sandadhānaḥ kuta ādadāno na vyākṣipanna vikarṣanvimuñcan //

savyena vā yadi vā dakṣiṇena na jñāyate katareṇāsyatīti /
ācāryavatsamare paryavarta-- nmahaccitraṃ darśayansarvataḥ sma //

dṛṣṭvīviṣaṃ cāsuharaṃ pareṣāṃ sarvā diśaḥ pūrayānaṃ śaraudhaiḥ /
alātacakrapratimaṃ mahātmanaḥ sadā nataṃ kārmukaṃ brahmabandhoḥ //

tato'parānbāṇagaṇānanekā-- nākarṇapūrṇāyatavipramuktān /
sasarja śīghrāstrabalena vīra-- stoyaṃ yathā prāvṛṣi kālameghaḥ //

āvidhyanmāṃ pañcabhidroṇaputraḥ śitaiḥ śaraiḥ pañcabhirvāsudevam /
abhyaghnaṃ bāṇaistamahaṃ sudhārai-- rnimeṣamātreṇa suvarṇapuṅkhaiḥ //

sa nirviddho viratho droṇaputro rathānīkaṃ cādhiratherviveśa /
mayābhibhūtānsvarathaprabarhā-- nastraṃ ca paśyanrudhirapradigdham //

tato'bhibhūtaṃ yudhi vīkṣya sainyaṃ vidhvastayodhaṃ drutanāgayūtham /
pañcāśatā rathamukhyaiḥ sametaḥ karṇastvarannabhyapatatpramāthī //

tānsūdayitvā'hamapāsya karṇaṃ draṣṭuṃ bhavantaṃ tvarayopayātaḥ /
sarve pāñcālā hyudvijante sma karṇaṃ dṛṣṭvā gāvaḥ kesariṇaṃ yathaiva //

mṛtyorāsyaṃ vyāttamivābhipadya prabhadrakāḥ karṇamāsādya sarve /
yāsyāmi tāṃstārayiṣyanbalaughā-- ddiṣṭyā bhavānsvastimānpārtha dṛṣṭaḥ //

haniṣye'haṃ bhārata sūtaputra-- masminsaṅgrāme yadi dṛśyate'dya /
āyāhi paśyādya yuyutsamānau māṃ sūtaputraṃ ca dhṛtau raṇāya //

mahājhaṣasyeva mukhaṃ prapannāḥ prabhadrakāḥ karṇamukhaṃ prapannāḥ /
ṣaṭ्sāhasrā bhārata rājaputrāḥ svargāya lokāya raṇe nimagnāḥ //

tānadya yāsyāmi raṇādvimoktuṃ sarvātmanā sūtaputraṃ ca hantum //

atha pravīreṇa mahānubhāva dviṣatsainyaṃ nirdahanvistareṇa /
sametyāhaṃ sūtaputreṇa saṅkhye
vajrīva vṛtreṇa narendramukhya //

evaṃ gate kiñca mayā'dya śakyaṃ kāryaṃ kartuṃ nigrahe sūtajasya /
tathaiva rājñaśca suyodhanasya ye cāpi māṃ yoddhukāmāḥ sametāḥ //

karṇaṃ na cedadya nihanmi rāja-- nsabāndhavaṃ yudhyamānaṃ prasahya /
pratiśrutyā'kurvatāṃ yā gatirvai kaṣṭāṃ yāyāṃ tāmahaṃ rājasiṃha //

āmantraye tvāṃ brūhi raṇe jayaṃ me purā bhīmaṃ dhārtarāṣṭrā grasanti /
sautiṃ haniṣyāmi narendrasiṃha sainyaṃ tathā śatrugaṇāṃśca sarvān //