Mahabharata · Chapter 8.67

drauṇistu rathavaṃśena mahatā parivāritaḥ /
apatatsahasā rājanyatra pārtho vyavasthitaḥ //

tamāpatantaṃ sahasā śūraḥ śaurisahāyavān /
dadhāra samare pārtho veleva makarālayam //

tataḥ kruddho mahārāja droṇaputraḥ pratāpavān /
arjunaṃ vāsudevaṃ ca cchādayāmāsa sāyakaiḥ //

avacchannau tataḥ kṛṣṇau dṛṣṭvā tatra mahārathāḥ /
vismayaṃ paramaṃ gatvā praikṣanta kuravastadā //

arjunastu tato divyamastraṃ cakre hasanniva /
tadastraṃ vārayāmāsa brāhmaṇo yudhi bhārata //

yadyaddhi vyākṣipadyuddhe phalguno'straṃ jighāṃsayā /
tattadastrairmaheṣvāso droṇaputro jaghāna ha //

astrayuddhe mahārāja vartamāne mahābhaye /
apaśyāma raṇe drauṇiṃ vyāttānanamivāntakam //

sa diśaḥ pradiśaścaiva cchādayitvā hyajihmagaiḥ /
vāsudevaṃ tribhirbāṇairavidhyaddakṣiṇe bhuje //

tato'rjuno rathānsarvānhatvā tasya padānugān / cakāra samare bhūmiṃ śoṇitaughapariplutām /
[sarbalokavahāṃ raudrāṃ paralokavahāṃ nadīm] //

sarathā rathinaḥ petuḥ pārthacāpacyutaiḥ śaraiḥ //

[drauṇerapahatānsaṅkhe dadṛśu sa ca tāṃ tathā /
prāvartayanmahāghorāṃ nadīṃ paravahāṃ tadā //

tayostu vyākule yuddhe drauṇeḥ pārthasya dāruṇe /
amaryādaṃ yodhayantaḥ paryadhāvanta pṛṣṭhataḥ //

rathairhatāśvasūtaiśca hatārohaiśca vājibhiḥ /
dviradaiśca hatārohairmahāmātrairhatadvipaiḥ //

pārthena samare rājankṛto ghoro janakṣayaḥ / nihatā rathinaḥ petuḥ pārthacāpacyutaiḥ śaraiḥ // ]

hayāśca paryadhāvanta muktayoktrāstatastataḥ /
taddṛṣṭvā karma pārthasya drauṇirāhavaśobhinaḥ //

arjunaṃ jayatāṃ śreṣṭhaṃ tvarito'bhyetya vīryavān /
vidhunvāno mahaccāpaṃ kārtasvaravibhūṣitam //

avākirattato draumiḥ samantānniśitaiḥ śaraiḥ /
bhūyo'rjunaṃ mahārāja drauṇirāyamya patriṇā //

vakṣodeśe bhṛśaṃ pārthaṃ tāḍayāmāsa nirdayam /
so'tividdho raṇe tena droṇaputreṇa bhārata //

gāṇḍīvadhanvā prasabhaṃ śaravarṣairudāradhīḥ /
sañchādya samare drauṇiṃ cicchedāsya ca kārmukam //

sa cchinnadhanvā paridhaṃ vajrasparśasamaṃ yudhi /
ādāya cikṣepa tadā droṇaputraḥ kirīṭine //

tamāpantataṃ parighaṃ jāmbūnadapariṣkṛtam /
ciccheda sahasā rājanprahasanniva pāṇḍavaḥ //

sa papāta tadā bhūmau nikṛttaḥ pārthasāyakaiḥ /
vikīrṇaḥ parvato rājanyathā vajreṇa tāḍitaḥ //

tataḥ kruddho mahārāja droṇaputro mahārathaḥ /
aindreṇa cāstravegena bībhatsuṃ samavākirat //

tasyendrajālāvatataṃ samīkṣya pārtho rājangāṇḍivamādade saḥ /
aindraṃ jālaṃ pratyaharattarasvī varāstramādāya mahendrasṛṣṭam //

vidārya tajjālamathendramuktaṃ pārthastato drauṇirathaṃ kṣaṇena /
pracchādayāmāsa tato'bhyupetya drauṇistadā pārthaśarābhibhūtaḥ //

vigāhya tāṃ pāṇḍavabāṇavṛṣṭiṃ śaraiḥ paraṃ nāma tataḥ prakāśya /
śatena kṛṣṇaṃ sahasābhyaviddhyā-- ttribhiḥ śatairarjunaṃ kṣudrakāṇām //

tato'rjunaḥ sāyakānāṃ śatena guroḥ sutaṃ marmasu nirbibheda /
aśvāṃśca sūtaṃ ca tathā dhanurjyā-- mavākiratpaśyatāṃ tāvakānām //

sa viddhvā marmasu drauṇiṃ pāṇḍavaḥ paravīrahā /
sārathiṃ cāsya bhallena rathanīḍādapātayat //

sa saṅgṛhya svayaṃ vāhānkṛṣṇau prācchadayaccharaiḥ /
tatrādbhutamaparaśyāma drauṇerāśu parākramam //

saṃyacchaṃsturagānyacca phalgunaṃ cāpyayodhayat /
tadasya samare rājansarvabhūtānyapūjayan //

tenāsya samare yodhāstuṣṭuvuḥ sarva eva te /
yadā nijagṛhe pārtho droṇaputreṇa dhanvinā //

tadā prahasya bībhasturdroṇaputrasya saṃyuge /
kṣipraṃ raśmīnathāśvānāṃ kṣurapraiścicchide jayaḥ //

prādravaṃsturagāstasya śaravegaprapīḍitāḥ /
tato'bhūnninado ghorastava sainyasya bhārata //

pāṇḍavāstu jayaṃ labdhvā tava sainyaṃ samādravan /
samantānniśitānbāṇānvimuñcanto jayaiṣiṇaḥ //

tāvakī caturaṅgaiṣā pāṇḍavaistu mahācamūḥ /
punaḥpunaratho vīraiḥ prabhagnā jitakāśibhiḥ //

paśyatāṃ te mahārāja putrāṇāṃ citrayodhinām /
śakuneḥ saubaleyasya karṇasya ca viśāmpate //

vāryamāṇā mahāsenā putraistava janeśvara /
na cātiṣṭhata saṅgrāme pīḍyamānā samantataḥ //

tato yodhairmahārāja palāyadbhiḥ samantataḥ /
abhavadyvākulaṃ bhītaṃ putrāṇāṃ te mahadbalam //

tiṣṭhatiṣṭheti satataṃ sūtaputrasya jalpataḥ /
nāvatiṣṭhati sā senā vadhyamānā mahātmabhiḥ //

athotkruṣṭaṃ mahārāja pāṇḍavairjitakāśibhiḥ /
dhārtarāṣṭrabalaṃ dṛṣṭvā vidrutaṃ vai samantataḥ //

tato duryodhanaḥ karṇamabravītpraṇayādiva /
paśya karṇa mahāsenāṃ pāṇḍavairarditāṃ bhṛśam //

tvayi tiṣṭhati santrāsātsamantātprapalāyate /
etajjñatvā mahābāho kuru prāptamarindama //

sahasrāṇi ca yodhānāṃ tvāmeva puruṣottama /
krośante samare vīra drāvyamāṇāni pāṇḍavaiḥ //
sañjaya uvāca /

etacchrutvā tu rādheyo duryodhanavaco mahat /
madrarājamidaṃ vākyamabravītprahasanniva //

paśya me bhujayorvīryamastrāṇāṃ ca janeśvara /
adya hanmi raṇe sarvānpāñcālānpāṇḍubhiḥ saha //

vāhayāśvānnaravyāghra madrādhipa na saṃśayaḥ /
evamuktvā mahārāja sūtaputraḥ pratāpavān //

pragṛhya vijayaṃ vīro dhanuḥśreṣṭhaṃ purātanam /
sajyaṃ kṛtvā mahārāja sammṛjya ca punaḥ punaḥ //

sannivārya ca tānyodhānsatyena śapathena ca /
prāyojayadameyātmā bhārgavāstraṃ mahābalaḥ //

tasmādrājansahasrāṇi prayutānyarbudāni ca /
koṭiśaśca śarāstīkṣṇā niragacchanmahāmṛdhe //

jvalitaistaiḥ śarairghoraiḥ kaṅkabarhiṇavājitaiḥ /
sañcannā pāṇḍavī senā na prājñāyata kiñcana //

hāhākāro mahānāsītpāṇḍavānāṃ viśāmpate /
pīḍitānāṃ balavatā bhārgavāstreṇa saṃyuge //

nipatadbhirgajai rājannaśvaiścāpi sahasraśaḥ /
rathaiścāpi naravyāghra naraiścaiva samantataḥ //

prākampata mahī rājannihataistaiḥ samantataḥ /
vyākulaṃ sarvamabhavatpāṇḍavānāṃ mahadbalam //

karṇastveko yudhāṃ śreṣṭho vidhūma iva pāvakaḥ /
dahañśatrūnnaravyāghraḥ śuśubhe sa parantapaḥ //

te vadhyamānāḥ karṇena pāñcālāścedibhiḥ saha /
tatra tatra vyamuhyanta vanadāhe yathā dvipāḥ //

cukruśuśca naravyāghra yathāprāṇaṃ narottamāḥ /
teṣāṃ tu krośatāṃ dīnaṃ bhītānāṃ raṇamūrdhani //

dhāvatāṃ ca tato rājaṃstrastānāṃ ca samantataḥ /
ārtanādo babhūvātra bhūtānāmiva sampluve //

vadhyamānāṃstu tāndṛṣṭvā sūtaputreṇa māriṣa //
vitresuḥ sarvabhūtāni tiryagyonigatānyapi //

te vadhyamātāḥ samare sūtaputreṇa sṛñjayāḥ / arjunaṃ vāsudevaṃ ca krośanti ca muhurmuhuḥ /
pretarājapure yadvatpretarājaṃ vicetasaḥ //

śrutvā tu ninadaṃ teṣāṃ vadhyatāṃ karṇasāyakaiḥ / athābravīdvāsudevaṃ kuntīputro dhaṉañjayaḥ /
bhārgavāstraṃ mahāghoraṃ dṛṣṭvā tatra samīritam //

paśya kṛṣṇa mahābāho bhārgavāstrasya vikramam /
naitadastraṃ hi samare śakyaṃ hantuṃ kathañcana //

sūtaputraṃ ca saṃrabdhaṃ paśya kṛṣṇa mahāraṇe /
antakapratimaṃ vīrye kurvāṇaṃ karma dāruṇam //

abhīkṣṇaṃ codayannaśvānprekṣate māṃ muhurmuhuḥ /
naca śakṣyāmi karṇasya saṃyuge'haṃ palāyitum //

jīvanprāpnoti puruṣaḥ saṅkhye jayaparājayau /
mṛtasya tu hṛpīkeśa bhaṅga eva kuto jayaḥ //

eṣa karṇo raṇe bhāti madhyāhna iva bhāskaraḥ /
nivartaya rathaṃ kṛṣṇa jīvanbhadrāṇi paśyati //