Mahabharata · Chapter 8.66

karṇo'pi śarajālena kekayānāṃ mahārathān /
vyadhamatparameṣvāsānagrānīke vyavasthitān //

teṣāṃ prayatamānānāṃ rādheyasya nivāraṇe /
rathānpañcaśatānkarṇaḥ prāhiṇodyamasādanam //

aviṣahyatamaṃ dṛṣṭvā rādheyaṃ yudhi yodhinaḥ /
bhīmasenamupāgacchankarṇabāṇaprapīḍitāḥ //

rathānīkaṃ vidāryaiva śarai rājannanekadhā /
karṇa ekarathenaiva yudhiṣṭhiramupādravat //

senāniveśaṃ gacchantaṃ mārgaṇairbhṛśapīḍitam /
yamayormadhyagaṃ vīraṃ śanairyāntaṃ vicetasam //

sa samāsādya rājānaṃ duryodhanahitepsayā /
sūtaputrastribhistīkṣṇairvivyādha parameṣubhiḥ //

tathaiva rājā rādheyaṃ pratyavidhyatstanāntare /
śaraistribhiśca yantāraṃ caturbhiścaturo hayān //

cakrarakṣau nṛpasutau mādrīputrau parantapau /
tāvapyadhāvatāṃ karṇaṃ rājānaṃ mā vadhīditi //

tau pṛthakśaravarṣābhyāṃ rādheyaṃ samavarṣatām /
nakulaḥ sahadevaśca paramaṃ yatnamāsthitau //

tathaiva tau pratyavidhyatsūtaputraḥ pratāpavān /
bhallābhyāṃ śitadhārābhyāṃ mahātmānāvarindamau //

dantavarṇāṃstu rādheyo nijaghāna manojavān /
yudhiṣṭhirasya saṅgrāme kālavālānhayottamān //

tato'pareṇa bhallena śirastrāṇamapātayat /
kaunteyasya maheṣvāsaḥ prahasanniva sūtajaḥ //

tathaiva nakulasyāpi hayānhatvā mahārathaḥ / tato'pareṇa bhallena bhṛśaṃ tīkṣṇena bhārata /
dhanuściccheda vīrasya mādrīputrasya dhīmataḥ //

tau hatāśvau hatarathau pāṇḍavau bhṛśavikṣatau /
bhrātarāvāruruhatuḥ sahadevarathaṃ tadā //

tau dṛṣṭvā mātulastatra virathau paravīrahā /
abhyabhāṣata rādheyaṃ madrarājo'nukampayā //

mārgitavyastvayā karṇa kuntīputro dhanañjayaḥ /
atastvaṃ dharmarājena kimarthamiha yudhyase //

[kṣīṇaśastrāstrākavacaḥ kṣīṇabāṇo vibāṇadhiḥ / śrāntasārathivāhaśca cchanno'strairaribhistathā /
pārthamāsādya rādheya upahāsyo bhaviṣyasi // ]

tathāpi karṇaḥ saṃrabdho yudhiṣṭhiramapīḍayat /
śaraistīkṣṇairmahāvīryairmādrīputrau ca pāṇḍavau //

tataḥ śalyaḥ prahasyedaṃ karṇaṃ punaruvāca ha /
rathasthamatisaṃrabdhaṃ yudhiṣṭhiravadhe sthitam //

yadarthaṃ dhārtarāṣṭreṇa satataṃ mānito bhavān / taṃ pārtha jahi rādheya kiṃ te hatvā yudhiṣṭhiram /
hate yasmindhruvaṃ pārthaḥ sarvāñjeṣyati no rathān //

tasminhi dhārtarāṣṭrasya nihate tu dhruvo jayaḥ / dhvajo'sau dṛśyate tasya rocamānoṃ'śumāniva /
sāro hyeṣa mahābāho kiṃ te hatvā yudhiṣṭhiram //

śaṅkhayordhmātayoḥ śabdaḥ sumahāneṣa kṛṣṇayoḥ /
śrūyate cāpaghoṣaśca prāvṛṣīvāmbudasya ha //

asau nighnanrathodārānarjunaḥ śaravṛṣṭibhiḥ /
sarvāṃ grasati naḥ senāṃ karṇa paśyainamāhave //

pṛṣṭharakṣau ca śūrasya yudhāmanyūttamaujasau //

uttaraṃ cāsya vai śūraścakraṃ rakṣati sāntyakiḥ /
dhṛṣṭadyumnastathā cāsya cakraṃ rakṣati dakṣiṇam //

bhīmasenaśca vai rājñā dhārtarāṣṭreṇa yudhyate / yathā na hanyāttaṃ bhīmaḥ sarveṣāṃ no'dya paśyatām /
kuru rādheya vai rājā yathā mucyeta tattathā //

xxxx bhīmasenena grastamāhavaśobhinā /
yadi nāmādya mucyeta vismayaḥ sumahānbhavet //

paritrāhyenamabhyetya saṃśayaṃ paramaṃ gatam /
kiṃ nu mādrīsutau hatvā rājānaṃ vā yudhiṣṭhiram //

iti śalyavacaḥ śrutvā rādheyaḥ pṛthivīpate /
dṛṣṭvā duryodhanaṃ caiva bhīmagrastaṃ mahāhave //

rājagṛdhnurbhṛśaṃ caiva śalyavākyapracoditaḥ /
ajātaśatrumutsṛjya mādrīputrau ca pāṇḍavau //

tava putraṃ paritrātumabhyadhāvata vīryavān /
madrarājapraṇuditairaśvairākāśagairiva //

gate karṇe tu kaunteyaḥ pāṇḍuputro yudhiṣṭhiraḥ /
apāyājjavanairaśvaiḥ sahadevasya māriṣa //

[tābhyāṃ sa sahitastūrṇaṃ vrīḍanniva nareśvaraḥ] /
prāpya senāniveśaṃ svaṃ mārgaṇairbhṛśavikṣataḥ //

avatīrya rathāttūrṇamāviśacchayanaṃ śubham /
apetaśalyo rājā tu hṛcchalyenābhipīḍitaḥ //

so'bravīddhātarau rājā mādrīputrau mahārathau /
gacchanta tvaritau vīrau yatra bhīmo vyavasthitaḥ //

tataste pāṇḍavāḥ sarve samābhāṣya parasparam / anīkaṃ bhīmasenasya pāṇḍavāvabhyagacchatām /
jīmūta iva nardaṃstu yudhyate sa vṛkodaraḥ //

tato'nyaṃ rathamāsthāya nakulo rathapuṅgavaḥ /
sahadevaśca tejasvī bhrātarau śatrukarśanau //

turagairagryaraṃhobhiryatra bhīmastarasvinau /
anīkaiḥ sahitau tatra bhrātarau samavasthitau //