Mahabharata · Chapter 8.65

tataḥ śvetāśvasaṃyukte nārāyaṇasamāhite /
tiṣṭhanrathavare śrīmānarjunaḥ samapadyata //

tadbalaṃ nṛpatiśreṣṭha tāvakaṃ vijayo raṇe /
vyakṣobhayadudīrṇāśvaṃ mahodadhimivānilaḥ //

duryodhanastava sutaḥ pramatte śvetavāhane /
abhyetya sahasā kruddhaḥ sainyārdhenābhisaṃvṛtaḥ //

paryavārayadāyāntaṃ yudhiṣṭhiramamarṣaṇam /
kṣuraprāṇāṃ trisaptatyā tato'vidhyata pāṇḍavam //

akrudhyata bhṛśaṃ tatra kuntīputro yudhiṣṭhiraḥ /
sa bhallāṃstriṃśatastūrṇaṃ tava putre nyaveśayat //

tato dhāvanta kauravyā jighṛkṣanto yudhiṣṭhiram //

duṣṭabhāvānparāñjñātvā samavetā mahārathāḥ /
ājagmustaṃ parīpsantaḥ kuntīputraṃ yudhiṣṭhiram //
sañjaya uvāca /

yudhiṣṭhiraścitrasenaṃ śaravarṣairavākirat /
citrasenastu kaunteyaṃ saṅkruddhaḥ samavārayat //

muhūrtādvimukhīkṛtya citrasenaṃ sa dharmarāṭ /
tāvakaṃ sainyamabhyaghnatsamantānniśitaiḥ śaraiḥ //

tāvakā hi mābāho duryodhanapurogamāḥ /
yudhiṣṭhiraṃ jighṛkṣantaḥ sarvasainyaṃ samākṣipan //

dṛṣṭaprabhāvāṃstānmatvā samavetānmahārathān /
ājagmuḥ samparīpsantaḥ pāṇḍaveyaṃ yudhiṣṭhiram //

nakulaḥ sahadevaśca dhṛṣṭadyumnaśca pārṣataḥ /
akṣauhiṇyā parivṛtāste'bhyadhāvanyudhiṣṭiram //

bhīmasenaśca nārācairmṛdraṃstava mahārathān /
abhyadhāvadabhiprepsū rājānaṃ śatrubhirvṛtam //

tāṃstu sarvānmaheṣvāsānkarṇo vaikartano vṛṣā /
śaravarṣeṇa mahatā pratyavārayadāgatān //

śaraughānvisṛjantaste preyantaśca kuñjarān /
na śekuryatnavanto'pi rādheyaṃ prativīkṣitum //

tāṃśca sarvānmaheṣvāsānsarvaśastraviśāradān /
mahatā śaravarṣeṇa rādheyaḥ pratyavārayat //

duryodhanaṃ ca viṃśatyā nārācānāṃ kṛtī balī /
avidhyattūrṇamabhyetya sahadevo mahīpatim //

sa viddhaḥ sahadevena rarāja balasannidhau /
prabhinna iva mātaṅgo rudhireṇa pariplutaḥ //

dṛṣṭvā tava sutaṃ tatra gāḍhaviddhaṃ sutejanaiḥ /
abhyadhāvaddṛḍhaṃ kruddho rādheyo rathināṃ varaḥ //

duryodhanaṃ tathā dṛṣṭvā śīghramastramudīrya saḥ /
avadhītpāṇḍavānīkaṃ pāñcālāṃścaiva māriṣa //

tato yaudhiṣṭhiraṃ sainyaṃ vadhyamānaṃ mahātmanā /
sahasā prādrāvadrājanmūtaputraśarārditam //

vividhā viśikhāstatra sampatanti parasparam /
bhallāḥ puṅkhasamāśliṣṭāḥ sūtaputradhanuścyutāḥ //

antarikṣe śaraughāṇāṃ patatāṃ ca parasparam /
saṅgharpeṇa mahārāja pāvakaḥ samajāyata //

takato daśadiśaḥ karṇaḥ śalabhairiva yāyibhiḥ /
abhyaghnaṃstarasā rājañśaraiḥ paraśarīragaiḥ //

raktacandanasandigdhau maṇihemavibhūṣitau /
bāhū vyatyakṣipatkarṇaḥ paramāstraṃ vidarśayan //

tataḥ sarvā diśo rājansāyakairvipramohayan /
apīḍayadbhṛśaṃ karṇo dharmarājaṃ yudhiṣṭhiram //

tataḥ kruddho mahārāja dharmaputro yudhiṣṭhiraḥ /
niśitairiṣubhiḥ karṇaṃ pañcāśadbhiḥ samārpayat //

[bāṇāndhakāramabhavattadyuddhaṃ ghoradarśanam /
hāhākāro mahānāsīttāvakānāṃ viśāmpate //

vadhyamāne tadā sainye dharmaputreṇa māriṣa / sāyakairvividhaistīkṣṇaiḥ kaṅkapatraiḥ śilāśitaiḥ /
bhallairanekairvividhaiḥ śaktyṛṣṭimusalairapi //

yatra yatra sa dharmātmā duṣṭāṃ dṛṣṭiṃ vyasarjayat /
tatra tatra vyaśīryanta tāvakā bharatarṣabha //

karṇo'pi bhṛśasaṅkudro dharmarājaṃ yudhiṣṭhiram /
nārācairardhacandraiśca vatsadantaiśca saṃyuge //

amarṣī krodhanaścaiva roṣaprasphuritānanaḥ /
sāyakairaprameyātmā yudhiṣṭhiramabhidravat //

yudhiṣṭhiraścāpi sa taṃ svarṇapuṅkhaiḥ śitaiḥ śaraiḥ // ]

prahasanniva taṃ karṇaḥ kaṅkapatraiḥ śilāśitaiḥ /
urasyavidhyadrājānaṃ kuntīputraṃ yudhiṣṭhiram //

sa pīḍito bhṛśaṃ tena dharmarājo yudhiṣṭhiraḥ /
upaviśya rathopasthe sūtaṃ yāhītyanodayat //

akrośanta tataḥ sarve dhārtarāṣṭrāḥ sarājakāḥ /
gṛhṇīdhvamiti rājānamabhyadhāvanta sarvaśaḥ //

tataḥ śatāḥ saptadaśa kekayānāṃ prahāriṇām /
pañcālaiḥ sahitā rājandhārtarāṣṭrānnyavārayan //

tasminsutumule yuddhe vartamāne janakṣaye /
duryodhanaśca bhīmaśca sameyātāṃ mahābalau //