Mahabharata · Chapter 8.57

pāṇḍye hate kimakarodarjuno jayatāṃvaraḥ /
ekavīreṇa karṇena drāvite ca yudhiṣṭhire //

samāptavidyo balavānyukto vīraśca pāṇḍavaḥ /
sarvabhūteṣvanujñātaḥ śaṅkareṇa mahātmanā //

tasmānmahadbhayaṃ tīvramamitraghnāddhanañjayāt /
sa yattatrākarotpārthastanmamācakṣva sañjaya //
sañjaya uvāca /

hate pāṇḍye'rjunaṃ kṛṣṇastvarannāha vaco hitam /
hataṃ paśya svarājānamapayātāṃśca pāṇḍavān //

karṇaṃ paśya mahāraṅge jvalantamiva pāvakam /
asau bhīmo maheṣvāsaḥ prativṛtto raṇaṃ prati //

ta ime nānuvartante dhṛṣṭadyumnapurogamāḥ /
pāñcālāḥ sṛñjayāścaiva pāṇḍavānāṃ camūmukham //

nivṛttaiśca punaḥ pārthairbhagnaṃ śatrubalaṃ mahat /
kauravāndravato hyeṣa karṇo vārayate bhṛśam //

antakapratimo vege śakratulyaparākramaḥ /
asau gacchati kaunteya drauṇiḥ śastrabhṛtāṃ varaḥ //

tameṣa pradrutaḥ saṅkhye dhṛṣṭadyumno mahārathaḥ /
aśvatthāmnā hatāḥ saṅkhye sarve kaunteya sṛñjayāḥ //

rathāśvanaranāgānāṃ kṛtaṃ ca kadanaṃ mahat /
ityetatsarvamācaṣṭa vāsudevaḥ kirīṭine //

etacchrutvā ca dṛṣṭvā ca bhrātṛṇāṃ vyasanaṃ mahat /
vāhayāśvānhṛṣīkeśa kṣipramityāha pāṇḍavaḥ //

tataḥ prāyāddhṛṣīkeśo rathenāpratimo yudhi /
tato reṇuḥ samabhavatpunastatra mahāraṇe //

tato rājanmahānāsītsaṅgāmo romaharṣaṇaḥ / siṃhanādaravāścātra prādurāsansamāgame /
ubhayoḥ senayo rājanmṛtyuṃ kṛtvā nivartanam //

tataḥ hunaḥ samājagmurabhītāḥ kurusṛñjayāḥ /
yudhiṣaramukhāḥ pārthā vaikartanamukhā vayam //

tataḥ pravavṛte yūddhaṃ ghorarūpaṃ viśāmpate /
karṇasya pāṇḍavānāṃ ca yamarāṣṭravivardhanam //

tasminpravṛtte saṅgrāme tumule romaharṣaṇe /
saṃśaptakeṣu vīreṣu kiñciccheṣeṣu bhārata //

dhṛṣṭadyumno mahārāja sahitaḥ sarvarājabhiḥ /
karṇamevābhidudrāva pāṇḍavāśca mahārathāḥ //

āgacchamānāṃstāndṛṣṭvā saṅgrame vijayaiṣiṇaḥ /
dadhāraiko raṇe kārṇo jalaughāniva parvataḥ //

samāsādya tu te karṇaṃ vyaśīryanta mahārathāḥ /
yathā'calaṃ samāsādya vāryodhāḥ sarvatodiśam //

tayorāsīnmahārāja saṅgrāmo ghoradarśanaḥ /
pravṛddhayormahāraṅge balinorvijigīṣatoḥ //

dhṛṣṭadyumnastu rādheyaṃ śareṇānataparvaṇā /
chādayāmāsa saṅkruddhastiṣṭhatiṣṭheti cābravīt //

vijayaṃ tu dhanuḥ śreṣṭhaṃ vidhṛnvāno mahārathaḥ /
pārṣatasya dhanuśchittvā śarāṃścāśīviṣopamān //

vavarṣa śaravarṣāṇi toyavarṣānivāmbudaḥ /
chādayāmāsa saṅkruddhaḥ pārṣataṃ navabhiḥ śaraiḥ //

te hemavikṛtaṃ varma bhittvā tasya mahātmanaḥ /
śoṇitāktā vyarājanta śakragopā ivānagha //

tadapāsya dhanuśchinnaṃ dhṛṣṭadyumnaḥ pratāpavān / tato'nyaddhanurādāya sāravadbhārasādhanam /
karṇaṃ vivyādha saptatyā śaraiḥ sannataparvabhiḥ //

tathaiva rājankarṇo'pi pārṣataṃ śatrutāpanam /
droṇaśatruṃ maheṣvāso vivyādha niśitaiḥ śaraiḥ //

punaranyaṃ mahārāja śaraṃ kanakabhūṣaṇam /
preṣayāmāsa samare mṛtyudaṇḍamivāparam //

tamāpatantaṃ sahasā ghorarūpaṃ viśāmpate /
ciccheda śatadhā rājanpārṣataḥ kṛtahastavat //

dṛṣṭavānpatitaṃ bhūmau śaraṃ karṇo viśāmpate //

pārṣataḥ śaravarṣeṇa samantātparyavārayat /
vivyādha cainaṃ tvarito nārācaiḥ saptabhistadā //

taṃ pratyavidhyaddaśabhiḥ śarairhemavibhūṣitaiḥ /
tayoryuddhaṃ samabhavaddṛṣṭiśrotramanoharam //

āsīddhoraṃ ca citraṃ ca prekṣaṇīyaṃ ca sarvaśaḥ //

sarveṣāṃ tatra bhūtānāṃ romaharṣo vyajāyata /
dṛṣṭvā tatsamare karma karṇapārṣatayornṛpa //

etasminnantare drauṇirabhyayāttaṃ mahāratham /
pārṣataṃ śatrudamanaṃ śatruvīryāsunāśanam //

sa dṛṣṭvā samare yāntamabhītaṃ ca mahāratham /
abhyabhāṣata saṅkruddhaḥ pārṣataṃ śatrutāpanam //

rathaṃ rathena sampīḍya pārṣatasya tu brāhmaṇaḥ //

tiṣṭhatiṣṭheti brahmaghna na me jīvanvimokṣyase / ityuktvā subhṛśaṃ vīraḥ śīghrakṛnniśitaiḥ śaraiḥ /
chādayāmāsa samare yatamāno mahārathaḥ //

yatnataḥ parayā śaktyā dhṛṣṭadyumnaṃ mahāratham /
yodhayāmāsa samare kruddharūpo viśāmpate //

tayostu sannipāte hi ghorarūpo viśāmpate //

yathā hi samare drauṇiḥ pārṣataṃ dṛśyata māriṣa /
nātihṛṣṭamanā hyāsīnmanvāno mṛtyumātmanaḥ //

sa jñātvā pituratyantarairiṇaṃ tu mahāhave / ātmānaṃ samare jñātvā'śastravadhyaṃ mahābalaḥ /
javenābhiyayau drauṇiṃ kālaḥ kālakṣaye yathā //

drauṇistu dṛṣṭvā rājendra dhṛṣṭadyumnamavasthitam /
krodhena niḥśvasanvīraḥ pārṣadaṃ samabhidravat //

tāvanyonyaṃ tu dṛṣṭvaiva saṃrambhaṃ jagmatuḥ param /
pragṛhya mahatī cāpe śarāsanasamanvite //

athābravīnmahārāja droṇaputraḥ pratāpavān /
dhṛṣṭadyumnaṃ samīpasthaṃ tvaramāṇo viśāmpate //

pāñcālāpaśadādya tvāṃ preṣayāmi yamakṣayam /
pāpaṃ hi yattvayā karma kṛtaṃ tātaṃ ghnatā raṇe //

adya tvaṃ prāpsyase tadvai yathā hyakuśalastathā / arakṣyamāṇaḥ pārthena yadi tiṣṭhasi saṃyuge /
nāpakrāmasi vā mohātsatyametadbravīmi te //