Mahabharata · Chapter 8.50

drauṇiryudhiṣṭhiraṃ dṛṣṭvā śaineyenābhirakṣitam /
draupadeyaistathā śūrairabhyavartata hṛṣṭavat //

kiranniṣugaṇānghorānhemapuṅkhāñśilāśitān /
darśayanvividhānmārgāñśikṣayā laghuhastavān //

khaṃ purayañśaraistīkṣṇairvegavadbhiḥ samantataḥ /
yudhiṣṭhirasya samare diśaḥ sarvāḥ samāvṛṇot //

bhāradvājaśaraiśchannaṃ na prājñāyata kiñcana /
bāṇabhūtamabhūtsarvamāyodhanaśiro mahat //

bāṇajālaṃ diviṣṭhaṃ tatsvarṇapuṅkhavibhūṣitam /
śuśubhe bharataśreṣṭha vimānamiva viṣṭhitam //

tena cchanne raṇe rājanbāṇajālena bhāsvatā /
abhracchāyeva sajajñe hṛtaraśmistamonudaḥ //

tadadbhutamapaśyāma bāṇabhūte nabhasthale /
na sma sampatate bhūtaṃ drauṇerdṛṣṭvā parākramam //

sātyakiryatamānastu dharmarājastu pāṇ़ḍavaḥ /
tathetarāṇi sainyāni na sma cakruḥ parākramam //

lāghavaṃ droṇaputrasya dṛṣṭvā tatra mahārathāḥ /
vyasmayanta mahārāja na cainaṃ pratyudīkṣitum //

śekuste sarvarājānastapantamiva bhāskaram /
vadhyamāne tataḥ sainye draupadeyā mahārathāḥ //

sātyakirdharmarājaśca pāñcālāścāpi saṅgatāḥ /
tyaktvā mṛtyubhayaṃ ghoraṃ drauṇāyanibhupādravan //

sātyakiḥ saptaviṃśatyā drauṇiṃ viddhvā śilīmukhaiḥ /
punarvivyādha nārācaiḥ saptabhiḥ svarṇabhūṣitaiḥ //

yudhiṣṭhirastrisaptatyā prativindhyaśca saptabhiḥ / śrutakarmā tribhirvāṇaiḥ śrutakīrtiśca saptabhiḥ /

sutasomastu navabhiḥ śatānīkaśca saptabhiḥ /
anye ca vahavaḥ śūrā vivyadhustaṃ samantataḥ //

sa tu kruddhastato rājannāśīvipa iva śvasan /
sātyakiṃ pañcaviṃśatyā prāvidhyata śilīmukhaiḥ //

śrutakīrtiṃ ca navabhiḥ sutasomaṃ ca pañcabhiḥ /
aṣṭabhiḥ śrutakarmāṇaṃ pratibindhyaṃ tribhiḥ śaraiḥ //

śatānīkaṃ ca navabhirdharmaputraṃ ca pañcabhiḥ / tathetarāṃstataḥ śūrāndvābhyāṃ dvābhyāmatāḍayat /
śrutakīrtestathā cāpaṃ ciccheda niśitaiḥ śaraiḥ //

athānyadvanurādāya śrutakīrtirmahārathaḥ /
drauṇāyaniṃ tribhirvidvvā vivyādhānyaiḥ śitaiḥ śaraiḥ //

tato drauṇirmahārāja śaravarṣeṇa bhāriṣa /
chādayāmāsa tatsainyaṃ samantādbharatarṣabha //

tataḥ punarameyātmā dharmarājasya kārmukam /
drauṇiściccheda vihasanvivyādha ca śaraistribhiḥ //

tato dharmasuto rājanpragṛhyānyanmahaddhanuḥ /
droṇaputraṃ tripaṣṭaxx tatu bāhvorurasi cārpayayat //

sātyakistu tataḥ kruddho drauṇeḥ praharato raṇe /
ardhacandreṇatīkṣṇena dhanuśchittvā'nadadbhṛśam //

chinnadhanvā tato drauṇiḥ śaktyā śaktimatāṃ varaḥ /
sārathiṃ pātayāmāsa śaineyasya rathādrutam //

athānyadvanurādāya droṇaputraḥ pratāpavān /
śaineyaṃ śaravarṣeṇa cchādayāmāsa bhārata //

tasyāśvāḥ pradrutāḥ saṅkhye patite rathasārathau /
tatratatraiva dhāvantaḥ samadṛśyanta bhārata //

yudhiṣṭhirapurogāstu drauṇiṃ śastrabhṛtāṃ varam /
abhyavarṣanta vegena visṛjantaḥ śitāñcharān //

sahasā patatastānvai krudvarūpānparantapaḥ /
prahasanpratijagrāha droṇaputro mahāraṇe //

tataḥ śaraśatajvālaḥ senākakṣaṃ mahāraṇe /
drauṇirdadāha samare kakṣamagnirivotthitaḥ //

tadbalaṃ pāṇḍuputrasya droṇaputrapratāpitam /
cukṣubhe bharataśreṣṭha tasminneva camūmukhe //

tadbalaṃ pāṇḍaveyasya droṇaputraḥ śarārciṣā /
tāpayanbharataśreṣṭha gabhastibhirivāṃśumān //

tatpacyamānaṃ marṣeṇa brāhmaṇasya ca sāyakaiḥ /
kṣubhyate pāṇḍavaṃ sainyaṃ timineva nadīmukham //

dṛṣṭvā caiva mahārāja droṇaputraparākramam /
sarvānduryodhanaḥ pārthānhatānyudve'bhyamanyata //

yudhiṣṭhirastu tvarito drauṇiṃ pīḍya mahāratham /
abravīddroṇaputraṃ sa roṣāmarṣasamanvitaḥ //

jānāmi tvāṃ yudhi śreṣṭha vīryavantaṃ balānvitam /
kṛtāstraṃ kṛtinaṃ caiva tathā laghuparākramam //

balametadbhavānsarvaṃ pārṣate yadi darsayet /
tatastvāṃ balavantaṃ ca kṛtavidyaṃ ca vidmahe //

na hi vai pārpataṃ dṛṣṭvā samare śatrusūdanam /
bhavettava balaṃ kiñcidbravīmi tvāṃ na tu dvijam //

naiva nāma tava prītirnaiva nāma kṛtajñatā /
yatastvaṃ puruṣavyāghra māmevādya jighāṃsasi //

brāhmaṇena tapaḥ kāryaṃ śamaśca damaeva ca /
kṣatriyeṇa dhanurnābhyaṃ sa bhavānbrāhmaṇabruvaḥ //

miṣataste mahāvāho yudhi jeṣyāmi kauravān /
kuruṣva samare karma brahmabandhe yatheṣṭataḥ //

evamukto mahārāja droṇaputraḥ sayanniva /
yukta tattvaṃ ca sañcintya nottaraṃ kiñcidabravīt //

anuktvā ca tataḥ kiñciccharavarṣeṇa pāṇḍavam /
chādayāmāsa samare kruddho'ntaka iva prajāḥ //

sa cchādyamānastu tadā droṇaputreṇa māriṣa /
pārtho'payātaḥ śīghraṃ vai pragṛhya mahatīṃ camūm //

apayāte tatastasmindharmaputre yudhiṣṭhire /
droṇaputraḥ sthito rājanpratyādeśānmahātmanaḥ //

tato yudhiṣṭhiro rājaṃstyaktvā drauṇiṃ mahāhave /
prayayau tāvakaṃ sainyaṃ yuktaḥ krurāya karmaṇe //