Mahabharata · Chapter 8.48

vartamāne tathā yuddhe kṣatriyāṇāṃ nimajjane /
gāṇḍīvasya mahāghoṣaḥ śrūyate yudhi māriṣa //

saṃśaptakānāmakarotkadanaṃ yatra pāṇḍavaḥ /
kosalānāṃ tathā rājannārāyaṇabalasya ca //

saṃśaptakāstu samare śaravṛṣṭiḥ samantataḥ /
apātayanpārthamūrdhni jayagṛddhāḥ pramanyavaḥ //

tāṃ śastravṛṣṭimāyāntīmurasā dhārayanprabhuḥ /
vyagāhata parānpārtho vinighnanrathināṃ varān //

vikṣobhya tu rathānīkaṃ kaṅkapatraiḥ śilāśitaiḥ /
āsasāda tataḥ pārthaḥ suśarmāṇaṃ mahāratham //

sa tasya śaravarṣāṇi vavarṣa rathināṃ varaḥ /
tathā saṃśaptakāścaiva pārthasya samare sthitāḥ //

suśarmā tu tataḥ pārthaṃ viddhvā daśabhirāśugaiḥ /
janārdanaṃ tribhirbāṇairahanaddakṣiṇe bhuje //

tato'pareṇa bhallena ketuṃ pārthasya māriṣa /
vivyādha samare rājansuśarmā krodhamūrcchitaḥ //

sa vānaravaro rājanviśvakarmakṛto mahān /
nanāda sumahānādaṃ nṛtyanniva vibhīṣayan //

kapestu ninadaṃ śrutvā santrastā tava vāhinī /
bhayaṃ vipulamāsādya niśceṣṭā samapadyata //

tataḥ sā śuśubhe senā niśceṣṭā'vasthitā nṛpa /
nānāpuṣpasamākīrṇaṃ yathā citrīkṛtaṃ vanam //

pratilabhya tataḥ sañjñāṃ yodhāste kurusattama /
arjunaṃ siṣicurbāṇaiḥ parvataṃ jaladā iva //

sañchādya samare pārthaṃ parivavruḥ samantataḥ / te hayānrathacakre tu ratheṣāṃ cāpi māriṣa /
grahītuṃ pracakramuścaiva krodhāviṣṭāḥ samantataḥ //

nigṛhya tu rathaṃ tasya yodhāste tu sahasraśaḥ /
rathabandhaṃ pracakrurhi pāṇḍavasyāmitaujasaḥ //

rathamāruruhuḥ kecitkṛṣṇapārthau jighṛkṣavaḥ /
saṃśaptakānāṃ yodhāste siṃhanādāṃśca nedire //

apare jagṛhuścaiva keśavasya mahābhujau /
pārthaṃ caike mahārāja rathasthaṃ jagṛhurmudā //

acyutaḥ sa mahābāhurvidhunvanraṇamūrdhani /
pātayāmāsa tānsarvānduṣṭahastīva hastipān //

sa rathastairgṛhītastu pāṇḍavasya mahātmanaḥ /
spandituṃ nāśakadrājaṃstadadbhutamivābhavat //

tataḥ pārtho mahābāhuḥ saṃvṛtaḥ stairmahārathaiḥ /
nigṛhītaṃ rathaṃ dṛṣṭvā tāṃścāpyādravato bahūn //

rathārūḍhāṃśca subahūnpadā'kṣipya nyapātayat /
apātayadasambhrāntaḥ śarairāsannayodhibhiḥ //

tāṃstāpayitvā samare pārthaḥ parapurañjayaḥ /
smayanniva mahābāhuḥ keśavaṃ vākyamabravīt //

paśya kṛṣṇa mahābāho saṃśaptakagaṇānbahūn /
kurvato'sukaraṃ karma mumūrṣūnkālacoditān //

rathabandhamimaṃ prāpya pṛthivyāṃ nāsti kaścana /
yaḥ saheta pumām̐lloke madanyaḥ kṣatriyarṣabhaḥ //

paśyaitatānadya samare matprayuktaiḥ sutejanaiḥ /
pātyamānānraṇe kṛṣṇa śarairāśīviṣopamaiḥ //

ityevamuktvā bībhatsuḥ śaṅkhapravaramuttamam /
vyanādayadameyātmā devadattaṃ mahāmṛdhe //

devadattasvanaṃ śrutvā keśavo'pi mahāyaśāḥ /
pāñcajanyasvanaṃ cakre pūrayanniva rodasī //

tayoḥ śaṅkhasvanaṃ śrutvā saṃśaptakavarūthinī /
sañcacāla mahārāja vitrastā cādravadbhṛśam //

nāgamastraṃ tataḥ pārthaḥ prāduścakre hasanniva /
pādabandhaṃ sa teṣāṃ vai cakre tena mahāstravit //

yānuddiśya raṇe pārthaḥ pādabandhaṃ cakāra ha /
te baddhāḥ pādabandhena yodhāḥ saṃśaptakāstadā //

nirviceṣṭāstadā'bhūvanpāṇḍavasyāstratejasā / nirviceṣṭāṃstato yodhānavadhītpāṇḍunandanaḥ /
yathendraḥ samare daityāṃstārakasya vadhe purā //

te vadhyamānāḥ samare mumucustaṃ rathottamam /
āyudhāni ca sarvāṇi visraṣṭumupacakramuḥ //

tataḥ suśarmā rājendra gṛhītāṃ vīkṣya vāhinīm /
sauparṇamastraṃ tvaritaḥ prāduścakre mahārathaḥ //

tataḥ suparṇāḥ sampeturbhakṣayanto bhujaṅgamān /
tato vidudruvurnāgāstāndṛṣṭvā khecarānnṛpa //

tadvimuktaṃ balaṃ reje pādabandhādviśāmpate /
meghabandhādyathā mukto bhāskarastāpayanprajāḥ //

vipramuktāḥ svakā yodhāḥ phalgunasya rathaṃ prati /
sasṛjuḥ śarasaṅghāṃśca śastrasaṅghāṃśca māriṣa //

tāṃ mahāstramayīṃ vṛṣṭiṃ śaraiḥ sañchidya bhārata /
avadhītsatato yodhānvāsaviḥ paravīrahā //

suśarmā tu tato rājanbāṇena nataparvaṇā /
arjunaṃ hṛdaye viddhvā vivyādhānyaistrisaptabhiḥ //

sa gāḍhaviddho vyathito rathopastha upāviśatat /
tata uccukruśuḥ sarve hataḥ pārtha iti bruvan //

tataḥ śaṅkhaninādāśca bherīśabdāśca puṣkalāḥ /
nānāvāditraninadāḥ siṃhanādāśca jajñire //

pratilabhya tataḥ sañjñāṃ śvetāśvaḥ kṛṣṇasārathiḥ / so'tividdho maheṣvāsaḥ śarairāśīvipopamaiḥ /
suśarmāṇaṃ mahārāja krodhāviṣṭo mahārathaḥ //

tataḥ śaraśataiḥ pārthaḥ sañchādyainaṃ kṣaṇādraṇe /
diśastu vārayāmāsa bāṇaistatra mahāstravit //

vimukhīkṛtya samare suśarmāṇaṃ dhanañjayaḥ /
aindramastramameyātmā prāduścakre hasanniva //

tato bāṇasahasrāṇi tadutsṛṣṭāni māriṣa /
sarvadikṣu vyadṛśyanta sūdayanti rathadvipān //

hayānpattīṃśca samare śastraiḥ śatasahasraśaḥ /
rarāja samare rājañśakro nighnannivāsurān //

vadhyamāne tataḥ sainye bhayaṃ sumahadāviśat /
saṃśaptakagaṇānāṃ ca gopālānāṃ ca bhārata //

na hi tatra pumānkaścidyo'rjunaṃ pratibudhyate /
paśyatāṃ tatra vīrāṇāmahanyata balaṃ tava //

hanyamānaṃ ca tadabhūnniśceṣṭaṃ ca parākrame //

ayutaṃ tatra yodhānāṃ hatvā pāṇḍusuto raṇe /
vyabhrājata mahārāja vidhūmo'gniriva jvalan //

caturdaśasahasrāṇi yāni dṛṣṭani bhārata /
rathānāmayutaṃ caiva trisahasrāśca dantinaḥ //

tataḥ saṃśaptakā bhūyaḥ parivavrurdhanañjayam /
martavyamiti niścitya jayaṃ vāpyanivartanam //

tatra yuddhaṃ mahaccāsīttāvakānāṃ viśāmpate / śūreṇa balinā sārdhaṃ pāṇḍavena kirīṭinā /
jitvā tānnyahanatpārthaḥ śatrūñśakra ivāsurān //