Mahabharata · Chapter 8.47

kṣatriyāste mahārāja parasparavadhaiṣiṇaḥ /
anyonyaṃ samare jaghnuḥ kṛtavairā mahaujasaḥ //

rathaughāśca hayaughāśca naraughāśca samantataḥ /
gajaughāśca mahārāja saṃsaktāśca parasparam //

gadānāṃ parighāṇāṃ ca śaktīnāṃ ca parasparam /
prāsānāṃ bhiṇḍipālānāṃ musuṇṭhīnāṃ ca sarvaśaḥ //

sampātaṃ cānupaśyāma saṅgrāme bhṛśadāruṇe /
śalabhā iva sampetuḥ śaravṛṣṭyaḥ samantataḥ //

nāgānnāgāḥ samāsādya vyadhamanta parasparam /
hayā hayāṃśca samare rathino rathinastathā //

pattayaḥ pattisaṅghāṃśca hayasaṅghāṃśca pattayaḥ / pattayo rathamātaṅgānrathā hastyaśvameva ca /
nāgāśca samare tryaṅgaṃ mamṛduḥ śīghragā nṛpa //

vadhyatāṃ tatra śūrāṇāṃ krośatāṃ ca parasparam /
ghoramāyodhanaṃ jajñe paśūnāṃ ghātane yathā //

rudhireṇa samāstīrṇā babhau bhārata medinī /
śakragopagaṇākīrṇā prāvṛṣīva vasundharā //

yathā vā vāsasī śukle mahārajanarañjite /
bibhratī yuvatī śyāmā tadvadāsīdvasundharā //

badvacūḍāmaṇidharaiḥ śirobhiścārukuṇḍalaiḥ /
ujjhitairvṛṣabhākṣāṇāṃ bhrājate sma vasundharā //

śaśaśoṇitadigdheva śātakumbhamayīva ca / bhūrbabhau bharataśreṣṭha śāntārcirbhirivānalaiḥ //

chinnānāṃ cottamāṅgānāṃ bāhūnāṃ corubhiḥ saha /
kuṇḍalānāṃ pinaddhānāṃ bhūṣaṇānāṃ ca bhārata //

niṣkāṇāṃ hemasūtrāṇāṃ śarīrāṇāṃ ca dhanvinām / carmaṇāṃ sapatākānāṃ saṅghāstatrāpatanbhuvi /

agamyakalpā pṛthivī sarvato bhṛśakardamā // gajā gajānsamāsādya viṣāṇairārdayannṛpa /
viṣāṇāgrahatāstatra bhrājante dviradottamāḥ / rudhireṇāvasiktāṅgā gairikaprasravā iva / prāvṛṭ्kāle mahārāja meghā iva savidyutaḥ //

syandamānā yathā bhānti parvatā dhātumaṇḍitāḥ /
tathā rejū raṇe nāgā rudhireṇa samāplutāḥ //

tomarānsādibhirmuktānpratimānasthitānbahūn /
hastairuddhṛtya tānnāgā babhañjuścāpare raṇe //

nārācaiśchinnavarmāṇo bhrājante sma gajottamāḥ /
himāgame yathā rājanvyabhrā iva mahīdharāḥ //

śaraiḥ kanakapuṅkhaiśca citā rerjurgajottamāḥ /
ulkābhiḥ sampradīptāgrāḥ parvatā iva bhārata //

kecidabhyāhatā nāgairnāgā nagavaropamāḥ /
na celuḥ samarāttasmācchinnapakṣā ivādrayaḥ //

apare prādravannāgāḥ śarārtā vraṇapīḍitāḥ /
pratimānaiśca kumbhaiśca petururvyāṃ mahāhave //

niṣeduḥ siṃhavaccānye nadanto bhairavānravān /
vemuśca bahavo rājaṃścukruśuścāpare gajāḥ //

hayāśca nihatā bāṇairhemabhāṇḍavibhūṣitāḥ /
niṣeduścaiva mamluśca babhramuśca diśo daśa //

apare kliśyamānāśca vyaveṣṭanta mahītale /
bhāvānbahuvidhāṃścakrustāḍitāḥ śaratomaraiḥ //

narāstu nihatā bhūmau kūjantastatra māripa /
dṛṣṭvā ca bāndhavānanye pitṝnanye pitāmahān //

dhāvamānānparāṃścānye dṛṣṭvānye tatra bhārata /
khyātāni gotranāmāni śaśaṃsuritaretaram //

teṣāṃ chinnā mahārāja bhujāḥ kanakabhūṣaṇāḥ /
udveṣṭante viveṣṭante bhramanti hyutpatanti ca //

nipatanti tathaivānye sphuranti ca sahasraśaḥ /
vegāṃścānye rame cakruḥ pañcāsyā iva pannagāḥ //

te bhujā bhogibhogābhāścandanāktā viśāmpate /
lohitārdrā bhṛśaṃ rejustapanīyadhvajā iva //

vartamāne tathā ghore saṅkule sarvato diśam /
avijñātāḥ sma yudhyante vinighnantaḥ parasparam //

bhaumena rajasākīrṇe śastrasampātasaṅkule /
naiva sve na pare rājanvyajñāyanta tamovṛtāḥ //

tathā tadabhavadyuddhaṃ ghorarūpaṃ bhayānakam /
lohitodā mahānadyaḥ prasasrustatra cāsakṛt //

śīrṣapāṣāṇasañchannāḥ keśaśaivalaśādvalāḥ /
asthimīnasamākīrṇā dhanuḥśaragadoḍupāḥ //

māṃsaśoṇitapaṅkinyo ghorarūpāḥ sudāruṇāḥ /
nadīḥ pravartayāmāsuḥ soṇitaughavivardhinīḥ //

bhīruvitrāsakāriṇyaḥ śūrāṇāṃ harṣavardhanāḥ /
tā nadyo ghorarūpāstu nayantyo yamasādanam //

avagāḍhānmajjayantyaḥ kṣatrasyājanayanbhayam /
kravyādānāṃ naravyāghra nardatāṃ tatratatra ha //

ghoramāyodhanaṃ jajñe pretarājapuropamam /
utthitānyagaṇeyāni kabandhāni samantataḥ //

nṛtyanti vai bhūtagaṇāḥ sutṛptā māṃsaśoṇitaiḥ /
pītvā ca śoṇitaṃ tatra vasāṃ bhuktvā ca bhārata //

medomajjāvasāmattāstṛptā māṃsasya caiva ha /
dhāvamānāḥ sma dṛśyante kākagṛghrabakāstathā //

śūrāstu samare rājanbhayaṃ tyaktvā sudustyajam /
yodhavratasamākhyātāścakruḥ karmāṇyabhītavat //

śaraśaktisamākīrṇe kravyādagaṇasaṅkule /
vyacaranta raṇe śūrāḥ khyāpayantaḥ svapauruṣam //

anyonyaṃ śrāvayanti sma nāmagotrāṇi bhārata /
pitṛnāmāni ca raṇe gotranāmāni vā vibho //

śrāvayāṇāśca bahavastatra yodhā viśāmpate /
anyonyamavamṛdrantaḥ śaktitomarapaṭṭasaiḥ //

vartamāne tathā yuddhe ghorarūpe sudāruṇe /
vyaṣīdatkauravī senā bhinnā nauriva sāgare //