Mahabharata · Chapter 8.45

tānabhidravato dṛṣṭvā pāṇḍavāṃstāvakaṃ balam /

antamadya gamiṣyāmi tasya duḥkhasya pārṣata //

hantāsmyadya raṇe karṇaṃ sa vā māṃ nihaniṣyati /
saṅgrāme'dya sughore'sminsatyametadbravīmi vaḥ //

rājānamadya bhavatāṃ nyāsabhūtaṃ dadāni vai /
tasya saṃrakṣaṇe sarve yatadhvaṃ vigatajvarāḥ //

evamuktvā mahābāhuḥ prāyādādhirathiṃ prati /
siṃhanādena mahatā sarvāḥ sannādayandiśaḥ //

dṛṣṭvā tvaritamāyāntaṃ bhīmaṃ yuddhābhinandinam /
sūtaputramathovāca madrāṇāmīśvaro vibhuḥ //
śalya uvāca /

paśya karṇa mahābāhuṃ saṅkruddhaṃ pāṇḍunandanam /
dīrghakālārjitaṃ krodhaṃ moktukāmaṃ tvayi dhruvam //

īdṛśaṃ nāsya rūpaṃ me dṛṣṭapūrvaṃ kadācana /
abhimanyau hate karṇa rākṣase ca ghaṭotkace //

trailokyasya samastasya śaktaḥ kruddho nivāraṇe /
bibharti sadṛśaṃ rūpaṃ yugāntāgnisamaprabham //
sañjaya uvāca /

iti bruvati rādheyaṃ madrāṇāmīśvare nṛpa /
abhyavartata vai karṇaṃ krodhadīptato vṛkodaraḥ //

athāgataṃ tu samprekṣya bhīmaṃ yuddhābhinandinam /
abravīdvacanaṃ śalyaṃ rādheyaḥ prahasanniva //

yaduktaṃ vacanaṃ me'dya tvayā madrajaneśvara /
bhīmasenaṃ prati vibho tatsatyaṃ nātra saṃśayaḥ //

eṣa śūraśca vīraśca krodhanaśca vṛkodaraḥ /
nirapekṣaḥ śarīre ca prāṇataśca balādhikaḥ //

ajñātavāsaṃ vasatā virāṭanagare tadā / draupadyāḥ priyakāmena kevalaṃ bāhusaṃśrayāt /
gūḍhabhāvaṃ samāśritya kīcakaḥ sagaṇo hataḥ //

so'dya saṅgrāmaśirasi sannadvaḥ krodhamūrcchitaḥ /
kiṃ karodyatadaṇḍena mṛtyunāpi vrajedraṇam //

cirakālābhilaṣito mamāyaṃ tu manorathaḥ /
arjunaṃ samare hanyāṃ māṃ vā hanyādvanañjayaḥ //

sa me kadācidadyaiva bhavedbhīmasamāgamāt //

nihate bhīmasene vā yadi vā virathīkṛte / abhiyāsyati māṃ pārthastanme sādhu bhaviṣyati /
atra yanmanyase prāptaṃ tacchīghraṃ sampradhāraya //
sañjaya uvāca /

etacchrutvā tu vacanaṃ rādheyasyāmitaujasaḥ /
uvāca vacanaṃ śalyaḥ sūtaputraṃ tathāgatam //

abhiyāhi mahābāho bhīmasenaṃ mahābalam /
nirapekṣaśca yudhyasva śaktiṃ svāṃ sampradarśayan //

yaste kāmo'bhilaṣitaścirātprabhṛti hṛdgatataḥ /
sa vai sampatsyate karṇa satyametadbravīmi te //

evamukte tataḥ karṇaḥ śalyaṃ punarabhāṣata /
hantā'hamenaṃ saṃrabdhaṃ māṃ vā hantā vṛkodaraḥ //

evamuktvā mahārāja rādheyo rathināṃ varaḥ /
yuddhe manaḥ samādhāya yāhi yāhītyacodayat //

tataḥ prāyādrathenāśu śalyastatra viśāmpate /
yatra bhīmo maheṣvāso vyadrāvayata vāhinīm //

tatastūryaninādaśca bherīṇāṃ ca mahāsvanaḥ /
udatiṣṭhacca rājendra karṇabhīmasamāgame //

bhīmaseno'thatha saṅkruddhastasya sainyaṃ durāsadam /
nārācairvimalaistīkṣṇairdiśaḥ prādrāvayadbalī //

sa sannipātastatumulo ghorarūpo viśāmpate /
āsīdraudro mahārāja karṇapāṇḍavayormṛdhe //

tato muhūrtādrājendra nātikṛcchrāddhasanniva /
bhīmaseno mahābāhuḥ karṇaṃ prepsurabhidravat //

samāpatantaṃ samprekṣya karṇo vaikartano vṛṣā / ājaghāna susaṅkruddho nārācena stanāntare /
punaścainamameyātmā śaravarṣairavākirat //

sa vidvaḥ sūtaputreṇa cchādayāmāsa patribhiḥ /
vivyādha niśitaiḥ karṇaṃ navabhirnataparvabhiḥ //

tasya karṇo dhanurmadhye dvidhā ciccheda patribhiḥ //

athainaṃ chinnadhanvānaṃ pratatyavidhyatstanāntare /
nārācena sutīkṣṇena sarvāvaraṇabhedinā //

so'nyatkārmukamādāya sūtataputraṃ vṛkodaraḥ / rājanmarmasu marmajño vivyādha niśitaiḥ śaraiḥ /
nanāda balavannādaṃ kampayanniva rodasī //

tataṃ karṇaḥ pañcaviṃśatyā nārācānāṃ samārpayat /
madotkaṭaṃ vane dṛptatamulkābhiriva kuñjaram //

tataḥ sāyakabhinnāṅgaḥ pāṇḍavaḥ krodhamūrcchitaḥ /
saṃrambhāmarṣatāmrākṣaḥ sūtaputravadhepsayā //

sa kārmuke mahāvegaṃ bhārasādhanamuttamam /
girīṇāmapi bhettāraṃ sāyakaṃ samayojayat //

vikṛṣya balavaccāpamākarṇādatimārutiḥ /
taṃ mumoca maheṣvāsaḥ kruddhaḥ karṇajighāṃsayā //

sa visṛṣṭo balavatā bāṇo vajrāśanisvanaḥ /
adārayadraṇe karṇaṃ vajravego yathā'calam //

sa bhīmasenābhihataḥ sūtaputraḥ kurūdvaha / niṣasāda rathopasthe visañjñaḥ pṛtanāpatiḥ /
rudhireṇāvasiktāṅgo gatāsuvadarindamaḥ //

etasminnantare dṛṣṭvā madrarājo vṛkodaram /
jighāṃsuṃ chettumāyāntaṃ sādhayannidamabravīt //

bhīmasena mahābāho yatattatvāṃ vakṣyāmi tacchṛṇu /
vacanaṃ hetusampannaṃ śrutvā caitattathā kuru //

arjunena pratijñāto vadhaḥ karṇasya śuṣmiṇaḥ /
tāṃ tathā kuru bhadraṃ te pratijñāṃ savyasācinaḥ //
bhīmasena uvāca /

dṛḍhavratatvaṃ pārthasya jānāmi nṛpasattama /
rājñastu dharṣaṇaṃ pāpaḥ kṛtavānmama sannidhau //

tataḥ kopābhibhūtena śeṣaṃ na gaṇitaṃ mayā / patite cāpi rādheye na me manyuḥ śamaṃ gataḥ) /
jihvodvaraṇamevāsya prāptakālaṃ mataṃ mama //

anena sunṛśaṃsena samaveteṣu rājasu / asmākaṃ śṛṇvatāṃ śalya yāni vākyāni mātula /
asaheyāni nīcāni bahūni śrāvitāni bho //

nūnaṃ caitatpratijñātaṃ dūrasthasyāpi pārthiva / chedanaṃ cāsya jihvāyāstadaivākāṅkṣitaṃ mayā /
rājñastu priyakāmena kālo'yaṃ paripālitaḥ //

bhavatā tu yadukto'smi vākyaṃ hetvarthasaṃhitam /
tadgṛhītaṃ mahārāta kaṭukasthamivauṣadham //

hīnapratijño bībhatsurna hi jīveta karhicit /
asminvinaṣṭe naṣṭāḥ smaḥ sarva eva sakeśavāḥ //

adya caiva nṛśaṃsātmā pāpaḥ pāpakṛtāṃ varaḥ /
gamiṣyatati parībhāvaṃ dṛṣṭamātraḥ kirīṭinā //

yudhiṣṭhirasya kopena pūrvaṃ dagdho nṛśaṃsakṛt /
tvayā saṃrakṣitatastatvadya matsamīpādupāgataḥ //
sañjaya uvāca /

evaṃ madrādhipaḥ śrutvā visañjñaṃ sūtanandanam /
apovāha rathenājau karṇamāhavaśobhinam //

parājite tataḥ karṇe dhārtarāṣṭrī mahācamūḥ /
vyapāyātsarvato bhagnā hāhābhūtā samantataḥ //