Mahabharata · Chapter 8.36

madrādhipasyādhirathirmahātmā vaco niśamyāpriyamapratītaḥ /
uvāca śalyaṃ viditaṃ mamaita-- dyathāvidhāvarjunavāsudevau //

śaure rathaṃ vāhayato'rjunasya balaṃ mahāstrāṇi ca pāṇḍavasya /
ahaṃ vijānāmi yathāvadadya parokṣabhūtaṃ tava tattu śalya //

tau cāpyahaṃ śastrabhṛtāṃ variṣṭhau vyapetabhīryodhayiṣyāmi kṛṣṇau /
santāpayatyabhyadhikaṃ hi rāmā-- cchāpo'dya māṃ brāhmaṇasattamācca //

purā mahendrādrivare samudre tapasvinaṃ rāmamupetya śalya /
astrārthinaṃ mā'dya śiṣyaṃ gṛhāṇe-- tyathā'bruvaṃ brāhmaṇacchadmanā ca //

tatrāvasaṃ brāhmaṇa ityavipro brahmāstralobhādanṛtena cāham /
tajjāmadagnyena paraṃ mahāstraṃ samantrayuktaṃ vihitaṃ mamāsīt //

astraṃ yadā tadviditaṃ mamāsī-- ttadā'bravīdbrāhmaṇo māṃ maharṣiḥ /
āpadgatenāstramidaṃ prayojyaṃ tvayā raṇe gacchatā sādhayeti //

tatrāpi me devarājena vighno hitārthinā phalgunasyaiva śalya /
kṛto vibhedena mamorumetya praviśya kīṭasya tanuṃ virūpām //

mamorumetya prabibheda kīṭaḥ supte gurau tatra śiro nidhāya /
ūruprabhedācca mahānbabhūva śarīrato me ghanaśoṇitaughaḥ //

gurorbhayāccāpi na celivānahaṃ tato vibuddho dadṛśe sa vipraḥ /
sa dhairyayuktaṃ prasamīkṣya māṃ vai na tvaṃ vipraḥ ko'si satyaṃ vadeti //

tasmai tadā'tmānamahaṃ yathāva-- dākhyātavānsūta ityeva śalya /
sa māṃ niśāmyātha mahātapasvī saṃśaptavānroṣaparītacetāḥ //

sūta tvayā hyāptamidaṃ tavāstraṃ na karmakāle pratibhāsyatīti /
anyatra tu syāttava mṛtyukālā-- dabrāhmaṇe brahma na hi dhruvaṃ syāt //

tadadya paryāptamatīva me'stra-- mupasthite'smiṃstumule vimarde //

śalyogradhanvānamahaṃ variṣṭhaṃ tarasvinaṃ bhīmamasahyavīryam /
satyapratijñaṃ yudhi pāṇḍaveyaṃ dhanañjayaṃ mṛtyumukhaṃ nayiṣye //

astraṃ tato'nyatpratipannamadya yena kṣepsye samare śatrupūgān /
pratāpinaṃ balavantaṃ kṛtāstraṃ tamugradhanvānamamitaujasaṃ ca / krūraṃ śūraṃ raudramamitrasāhaṃ dhanañjayaṃ saṃyuge'haṃ haniṣye //

apāmpatirvegavānaprameyo nimajjayiṣyanbahulāḥ prajā iva /
mahāravaṃ yaḥ kurute samudro veleva taṃ vārayāmyaprameyam //

pramuñcantaṃ bāṇasaṅghānameyā-- nmarmacchido vīrahaṇaḥ supatrān /
kuntīputraṃ pratiyotsyāmi yuddhe jyāṃ karṣatāmuttamaṃ martyaloke //

evaṃ balenātibalaṃ mahāstraṃ samudrakalpaṃ sudurāpamugram /
śaraughiṇaṃ pārthivānmajjayantaṃ veleva pārthamiṣubhirvārayiṣye //

kṛtī kṛtāstro dṛḍhahastayodhī divyāstravicchvetahayaḥ pramāthī /
surāsurānyudhi vai yo jayeta tenādya me paśya yudvaṃ sughoram //

abhīrmānī pāṇḍavo yudvakāmo hyamānuṣairasyati māṃ mahāstraiḥ /
tasyāstramastrairabhibhūya saṅkhye bāṇottamaiḥ pātayiṣyāmi pārtham //

sahasraraśmipratimaṃ jvalantaṃ diśaśca sarvāḥ pratapantamugram /
tamonudaṃ megha ivātimātraṃ dhanañjayaṃ chādayiṣyāmi bāṇaiḥ //

vaiśvānaraṃ dhūmaketuṃ jvalantaṃ tejasvinaṃ naravīrāndahantam /
parjanyabhūtaḥ śaravarṣairyathā'gniṃ tathā pārthaṃ śamayiṣyāmi yuddhe //

āśīviṣaṃ dṛṣṭihaṇaṃ sughoraṃ sutīkṣṇadaṃṣṭraṃ jvalanaprabhavām /
krodhātpradīptānalavaddahantaṃ kuntīputraṃ śamayiṣyāmi bhallaiḥ //

pravāhiṇaṃ balavantaṃ mahaujasaṃ prabhañjanaṃ mātariśvānamugram /
yuddhe sahiṣye himavānivācalo dhanañjayaṃ kruddhamamṛṣyamāṇam /

viśāradaṃ rathamārgeṣu śaktaṃ dhuryaṃ nityaṃ samareṣu pravīram /
loke varaṃ sarvadhanurdharāṇāṃ dhanañjayaṃ saṃyuge'haṃ haniṣye //

adyāhave yasya na tulyamanyaṃ manye manuṣyaṃ dhanurādadānam /
sarvāmimāṃ yaḥ pṛthivīṃ saheta tathāpi tenādya raṇe sameṣye //

yaḥ sarvabhūtāni sadaivatāni prasthe'jayatkhāṇḍave savyasācī
ko jīvitaṃ rakṣamāṇo hi tena yuyutsate'strairmānuṣo māmṛte'nyaḥ //

mānī kṛtāstraḥ kṛtahastayodhī divyāstravicchvetahayaḥ pramāthī /
tasyāhamadyātirathasya kāyā-- cchiro hariṣyāmi śitaiḥ pṛṣatkaiḥ /

yotsyāmyenaṃ śalya dhanañjayaṃ vai mṛtyuṃ puraskṛtya raṇe jayaṃ vā /
anyo hi na hyekarathena martyo yudhyeta yaḥ pāṇḍavamindrakalpam

tasyāhave pauruṣaṃ pāṇḍavasya brūyāṃ pṛṣṭaḥ samitau kṣatriyāṇām
kiṃ tvaṃ mūrkhaḥ prahasanmūḍhacetā ākhyāsi me pauruṣaṃ phalgunasya //

atyapriyo yaḥ puruṣo niṣṭhuro hi kṣudraḥ kṣeptā kṣamiṇaścākṣamāvān /
hanyāmahaṃ tvādṛśānāṃ śatāni kṣamāmyahaṃ kṣamiṇāṃ kāla eṣaḥ //

avocastvaṃ pāṇḍavārye priyāṇi pradharṣayanmāṃ mūḍhavatpāpakarman /
mayyārjave jihmamatiryatastvaṃ mitradrohī sāptapadaṃ hi mitram //

kālastvayaṃ pratyupayāti dāruṇo duryodhano yuddhamupāgamadyat /
tasyārthasiddhiṃ tvabhikāṅkṣamāṇa-- stamanveṣye yatra caikāntamasti //

tathāpyahaṃ pāṇḍavavāsudevau yotsye raṇe madvidhasyaiva karma /
na prākṛtaḥ sajjate vai kadāci-- dyaḥ pratyudīyātkṛṣṇadhanañjayau tau //

mitraṃ mindernandateḥ prīyatervā santrāyaterminutermodatervā /
duryodhane sarvamidaṃ mamāsti taccāpi sarvaṃ mama vetti rājā //

śatruḥ śadeḥ śāsatervā śyatervā śṛṇātervā śvasateḥ sīdatervā /
śrameḥ śuco bahuśaḥ sūdateśca prāyeṇa sarvaṃ tvayi tacca mahyam //

duryodhanārthaṃ tava ca priyārthaṃ yaśorthamātmārthamapīśvarārtham /
tasmādahaṃ pāṇḍavavāsudevau yotsye yatnātkarma ca paśya me'dya //

śalyādyāhaṃ saṅgataḥ pāṇḍavena mucyeyaṃ cejjīvamānaḥ kathañcit /
śaśvanmṛtyoḥ syāmanādhṛṣyarūpo vyaktaṃ tasmātsaṃyugādvipramuktāḥ //

astraṃ brāhmaṃ manasā sañjapanvai yadā'syate krodhitaḥ savyasācī /
tadāpi me naiva mucyeta pārtho na cetpatedviṣame me'dya cakram //

astrāṇi viddhvā samare gatāni brāhmāṇi divyānyatha mānuṣāṇi /
āsādayiṣyāmyahamugravīryaṃ nāgottamaṃ nāga iva prabhinnaḥ //

vaivasvatāddaṇḍahastādvaruṇādvāpi pāśinaḥ /
sagadādvā dhanapateḥ savajrādvā surādhipāt //

athānyasmādapi surādamitrādātatāyinaḥ /
iti śalya vijānīhi yathā nāhaṃ bibhemyuta //

tasmānna me bhayaṃ pārthānnāpi caiva janārdanāt /
saha yuddhaṃ hi me tābhyāṃ sāmparāye bhaviṣyati //

śvabhre te patatāṃ cakramiti māṃ brāhmaṇo'bravīt /
yudhyamānasya saṅgrāme prāptasyaikāyanaṃ bhayam //

tasmādbibhemi balavadbrāhmaṇavyāhṛtādaham /
ete hi somarājāna īśvarāḥ sukhaduḥkhayoḥ //

kadācibrāhmaṇasyātha yogyaheterahaṃ nṛpa /
ajānannakṣipaṃ bāṇaṃ ghorarūpaṃ bhayāvaham //

homadhenvāstato vatsaḥ pramatta iṣuṇā hataḥ /
caranvai vijane śalya tato'nu vyājahāra saḥ //

yasmādvatsastvayā cātra homadhenvā hato nṛpa /
tasmāttvamapi rādheya vākśalyaṃ mahadāpnuhi //

śvabhre te patitā cakraṃ yudhyamānasya śatruṇā /
prāpta ekāyane kāle mṛtyusādhāraṇe tvayi //

spardhase yena saṅgrāme yadarthaṃ ghaṭase'niśam /
tata eva dhruvaṃ mṛtyuṃ sūta prāpsyasi saṃyuge //

ahaṃ prasādayāñcakre brāhmaṇaṃ saṃśitavratam //

gavāṃ daśaśataṃ vittaṃ balīvardāṃśca ṣaṭ्śatam /
pracchannaṃ kāñcanaiḥ kāmaṃ brāhmaṇārthamahaṃ tadā //

dāsīśataṃ niṣkakaṇṭhaṃ śatamaśvatarīrathān /
kanyānāṃ niṣkakaṇṭhīnāṃ sahasraṃ samalankṛtam //

īṣādantānnāgaśatāndāsīdāsaśatāni ca /
dadmi tairdvijamukhyo me prasādaṃ na cakāra saḥ //

kṛṣṇānāṃ śvetavatsānāṃ gośatāni caturdaśa /
dadanhi na labhe tasmātprasādaṃ dvijasattamāt //

yatkiñcinmāmakaṃ vittaṃ tvadadhīnaṃ karomi tat / iti māṃ yācamānaṃ vai brāhmaṇaḥ pratyavārayat /
krodhadīptekṣaṇaḥ śaḷya nirdahanniva cakṣuṣā //

vyāhṛtaṃ yanmayā sūta tattathā na tadanyathā /
anṛtoktaṃ prajāṃ hanyāttataḥ pāpamavāpnuyām //

tasmāddharmābhirakṣārthaṃ nānṛtaṃ vaktumutsahe /
mā tvaṃ brahmagatiṃ hiṃsyāḥ prāyaścittaṃ kṛtaṃ tvayā //

madvākyaṃ nānṛtaṃ loke kaścitkuryātsamāpnuhi /
yanmayoktaṃ saroṣeṇa gaccha sūtaja māciram //

iti māmasakṛtkruddhaḥ sa uvāca dbijottamaḥ /
ete hi somarājāna īśvarāḥ sukhaduḥkhayoḥ //

nāhaṃ bibhemi bībhatsorna śalya madhusūdanām /
tasmādbibhemyahaṃ śāpāttena satyena te śape //

saha yuddhaṃ sametābhyāmadyedaṃ samupasthitam /
yudve'smiñjīvitaṃ me'dya śalya saṃśayamāgatam //

śakro'pyamararāṭ tābhyāmupagamyāhavaṃ saha /
saṃśayaṃ paramaṃ gacchetkathaṃ vā manyate bhavān //

ityevaṃ te mayā'khyātaṃ kṣiptena na suhṛttayā /
jānāmi tvā'dhikṣipantaṃ doṣamātmagataṃ śṛṇu //