Mahabharata · Chapter 8.34

adhikṣiptastu rādheyaḥ śalyenāmitatejasā /
śalyamāha susaṅkruddho vākśalyamavadhārayan //
karṇa uvāca /

guṇānguṇavatāṃ śalya guṇavānvetti nāguṇaḥ /
tvaṃ tu nityaṃ guṇairhīnaḥ kiṃ jñāsyasi guṇāguṇān //

arjunasya mahāstrāṇi krodhaṃ vīryaṃ dhanuḥ śarān /
ahaṃ śalyābhijānāmi na tvaṃ jānāsi tattathā //

tathā kṛṣṇasya māhātmyamṛṣabhasya mahīkṣitām /
yathāhaṃ śalya jānāmi na tvaṃ jānāsi tattathā //

evamevātmano vīryamahaṃ vīryaṃ ca pāṇḍave /
jānaṃstāvāhvaye yuddhe śalya nāgniṃ pataṅgavat //

asti cā'yamiṣuḥ śalya supuṅkho raktabhojanaḥ /
ekastūṇīśayaḥ patrī sudhautaḥ samalaṅkṛtaḥ //

śete candanacūrṇena pūjito bahulāḥ samāḥ /
āheyo viṣavānugro narāśvadvipasaṅghahā //

ghorarūpo mahāraudrastanutrāsthividāraṇaḥ /
nirbhindyāṃ yena ruṣṭo'hamapi meruṃ mahāgirim //

tamahaṃ jātu nāsyeyamanyasminphalgunādṛte /
kṛṣṇādvā devakīputrātsatyaṃ cāpi śṛṇuṣva me //

tenāhamiṣuṇā śalya vāsudevadhanañjayau /
yotsye paramasaṃrabdhau tatkarma sadṛśaṃ mama //

sarveṣāṃ vṛṣṇivīrāṇāṃ kṛṣṇe lakṣmīḥ pratiṣṭhitā / sarveṣāṃ pāṇḍuputrāṇāṃ jayaḥ pārthe pratiṣṭhitaḥ /
ubhayaṃ tu samāsādya ko nivartitumarhati //

tāvetau puruṣavyāghrau sametau syandane sthitau /
māmekamabhisaṃyuddhau sujātaṃ paśya śalya me //

pitṛṣvasāmātulajau bhrātarāvaparājitau /
maṇī sūtra iva protau draṣṭāsi nihatau mayā //

arjune gāṇḍivaṃ kṛṣṇe cakraṃ tārkṣyakapidhvajau /
bhīrūṇāṃ trāsajananaṃ śalya harṣakaraṃ mama //

tvaṃ tu duṣprakṛtirmūḍho mahāyudveṣvakovidaḥ /
bhayāvadīrṇaḥ santrāsādabaddhaṃ bahuḥ bhāṣase //

saṃstauṣi tau tu kenāpi hetunā tvaṃ kudeśaja /
tau hatvā samare hantā tvāmadya saha bāndhavam //

pāpadeśaja durbuddhe kṣudra kṣatriyapāṃsana /
suhṛdrūpo ripuḥ kiṃ māṃ kṛṣṇābhyāṃ bhīṣayiṣyasi //

tau vā māmadya hantārau haniṣye vā'pi tāvaham /
nāhaṃ bibhemi kṛṣṇābhyāṃ vijānannātmano balam //

vāsudevasahasraṃ vā phalgunānāṃ śatāni vā /
ahameko haniṣyāmi joṣamāssva kudeśaja //

striyo bālāśca vṛdvāśca prāyaḥ krīḍāgatā janāḥ //

yā gāthāḥ sampragāyanti kurvato'dhyayanaṃ yathā /
tā gāthāḥ śṛṇu me śalya madrakeṣu durātmasu //

brāhmaṇaiḥ kathitāḥ pūrvaṃ yathāvadrājasannidhau /
śrutvā caikamanā mūḍha mama vā brūhi cottaram //

mitradhruṅmadrako nityaṃ yo no dveṣṭi sa madrakaḥ /
madrake saṅgataṃ nāsti kṣudravākye narādhame //

durātmā madrako nityaṃ nityamānṛtiko'nṛjuḥ /
yaccānyadapi daurātmyaṃ madrakeṣviti naḥ śrutam //

pitā putraśca mātā ca śvaśrūśvaśuramātulāḥ /
bhaginī duhitā bhrātā naptā'nye te ca bāndhavāḥ //

vayasyābhyāgatāścānye dāsīdāsāśca saṅgatāḥ /
pumbhirvimiśrā nāryaśca jñātājñātāḥ svayecchayā //

yeṣāṃ gṛheṣvaśiṣṭānāṃ saktumadyāśināṃ sadā /
pītvā śīdhu sagomāṃsaṃ krandanti ca hasanti ca //

gāyanti cāpyabaddhāni pravartante ca kāmataḥ /
kāmapralāpino'nyonyaṃ teṣu dharmaḥkathaṃ bhavet //

madrakeṣvavalipteṣu prakhyātāśubhakarmasu /
nāpi vairaṃ na sauhārdaṃ madrakeṇa samācaret //

madrake saṅgataṃ nāsti madrako hi sadā malaḥ /
madrakeṣu ca saṃsṛṣṭaṃ śaucaṃ gāndhārakeṣu ca //

rājayājakayājye hi yathā dattaṃ havirnaśet /
śūdrasaṃskārako vipro yathā yāti parābhavam //

yathā brahmadviṣo nityaṃ gacchantīha parābhavam /
yathaiva sangataṃ kṛtvā naraḥ patati madrakaiḥ //

bāleṣvapi sadā na sma dhanaṃ vṛścika te viṣam /
ātharvaṇena mantreṇa sarvaśāntiḥ kṛtā mayā //

iti vṛścikadaṣṭasya viṣavegahatasya ca /
kurvanti bheṣajaṃ prājñāḥ satyaṃ taccāpi dṛśyate //

evaṃ vidvañjoṣamāssva brūhi cātrottaraṃ vacaḥ /
vāsāṃsyutsṛjya nṛtyanti striyo madyavimohitāḥ //

maithune'saṅgatāścāpi yathākāmavarāśca tāḥ /
tāsāṃ putra kathaṃ dharmaṃ madrako vaktumarhati //

yāstiṣṭhantyaḥ pramehanti yathaivoṣṭradaśerakāḥ / tāsāṃ vibhraṣṭadharmāṇāṃ nirlajjānāṃ tatastataḥ /
tvaṃ putrastādṛśīnāṃ hi dharmaṃ vaktumihecchasi //

sauvīrakaṃ yācyamānā madrikā karṣati sphicau /
adātukāmā vacanamidaṃ vadati dāruṇam //

mā māṃ sauvīrakaṃ kaścidyācatāṃ dayitaṃ mama /
putraṃ dadyāṃ patiṃ dadyāṃ na tu dadyāṃ suvīrakam //

gauryo bṛhatyo nirhīkā madrikāḥ kampalāvṛtāḥ /
ghasmarā naṣṭaśaucāśca prāya ityanuśuśruma //

pamehitvā sphicau bhūmau gharṣantyo hīnaśodhanāḥ /
śuddhā nādbhirna mṛdbhiśca nityocchiṣṭā bhavanti hi //

evamādi mayā'nyairvā śakyaṃ vaktuṃ bhavedbahu /
ākeśāntānnakhāgrācca vaktavyeṣu kukarmasu //

madrakāḥ sindhusauvīrā dharmaṃ vidyuḥ kathaṃ tviha /
pāpadeśodbhavā mlecchā dharmāṇāmavicakṣaṇāḥ //

eṣa mukhyatamo dharmaḥ kṣatriyasyeti naḥ śrutam /
yadājau nihataḥ śete sadbhiḥ samabhipūjitaḥ //

āyudhānāṃ sāmparāye yanmuñceyamahaṃ tataḥ /
mamaiṣa prathamaḥ kalpo nidhane svargamicchataḥ //

soyaṃ priyasakhā cāsmi dhārtarāṣṭrasya dhīmataḥ /
tadarthe hi mama prāṇā yacca me vidyate vasu //

vyaktaṃ tvamapyupahitaḥ pāṇḍavaiḥ pāpadeśaja /
yathā cāmitravatsarvaṃ tvamasmāsu pravartase //

kāmaṃ na khalu śakyo'haṃ tvadvidhānāṃ śatairapi /
saṅgrāmādvimukhaḥ kartuṃ dharmajña iva nāstikaiḥ //

sāraṅga iva gharmārtaḥ kāmaṃ vilapa śuṣya ca /
nāhaṃ bhīṣayituṃ śakyaḥ kṣatradharme vyavasthitaḥ //

tanutyajāṃ nṛsiṃhānāmāhaveṣvanivartinām /
yā gatirguruṇā proktā premṇā rāmeṇa tāṃ smare //

sveṣāṃ trāṇārthamudyantaṃ vadhārthaṃ dviṣatāmapi /
viddhi māmāsthitaṃ vṛttaṃ paurūravasamuttamam //

na tadbhūtaṃ prapaśyāmi triṣu lokeṣu madrapa /
yo māmasmādabhiprāyādvārayediti me matiḥ //

evaṃ vidvañjoṣamāssva trāsātkiṃ bahu bhāṣase /
na tvāṃ hatvā pradāsyāmi kravyādbhyo madrakādham //

mitrapratīkṣayā śalya dhṛtarāṣṭrasya cobhayoḥ /
apavādatitikṣābhistribhiretairhi jīvasi //

punaścedīdṛśaṃ vākyaṃ madrarāja vadiṣyasi /
śiraste pātayiṣyāsi gadayā vajrakalpayā //

śrotārastvidamadyeha draṣṭāro vrā kudeśaja /
karṇaṃ vā jaghnatuḥ kṛṣṇau karṇo vā nijaghāna tau //

evamuktvā tu rādheyaḥ punareva viśāmpate /
abravīnmadrarājānaṃ yāhiyāhītyasambhramam //