Mahabharata · Chapter 8.33

mā sūtaputra manyeta sauvarṇaṃ hastiṣaṅgavam /
prayacchasi mudhaiva tvaṃ drakṣyasyadya dhanañjayam //

mā sūtaputra dānena sauvarṇaṃ hastiṣaṅgavam /
prayaccha puruṣāyādya drakṣyasi tvaṃ dhanañjayam //

balena mattastyajasi vasu vaiśravaṇo yathā /
ayatnenaiva rādheya draṣṭāsyadya dhanañjayam //

purā sṛjasi yaccāpi vittaṃ bahu ca mūḍhavat /
apātradānādye doṣāstānmohānnāvabudhyase //

yatpravedayase vittaṃ bahu tena khalu tvayā /
śakyaṃ bahuvidhairyajñairyaṣṭuṃ sūta yajasva taiḥ //

yacca prārthayase hantuṃ kṛṣṇau mohādvṛthaiva tat /
na hi śuśruma sammarde kroṣṭrā siṃhau nipātitau //

aprārthitaṃ prārthayase suhṛdo na hi santi te /
ye tvāṃ nivārayantyāśu prapatantaṃ hutāśane //

kāryākāryaṃ na jānīṣe kālapakko'syasaṃśayam /
bahvabaddhamakarṇīyaṃ ko hi brūyājjijīviṣuḥ //

samudrataraṇaṃ dorbhyāṃ kaṇṭhe baddhvā yathā śilām /
giryagrādvā nipatanaṃ tādṛktva cikīrṣitam //

sahitaḥ sarvayodhaistvaṃ vyūḍhānīkaiḥ surakṣitaḥ /
dhanañjayena yudhyasva śreyaścetprāptumicchasi //

hitārthaṃ dhārtarāṣṭrasya bravīmi tvāṃ na hiṃsayā /
śraddhasvedaṃ mayā proktaṃ yadi te'sti jijīviṣā //
karṇa uvāca /

svabāhuvīryamāśritya prārthayāmyarjunaṃ raṇe /
tvaṃ tu mitramukhaḥ śatrurmāṃ bhīṣayitumicchasi //

na māmasmādabhiprāyātkaścidadya nivartayet /
apīndro vajramudyamya kimu martyaḥ kathañcana //
sañjaya uvāca /

iti karṇasya vākyānte śalyaḥ prāhottaraṃ vacaḥ /
cukopayiṣuratyarthaṃ karṇaṃ madreśvaraḥ punaḥ //

yadā vai tvāṃ phalgunabāhuvegā-- jjyācoditā vegavanto'gnikalpāḥ /
anvetāraḥ kaṅkapatrāḥ śitāgrā-- styakṣyatyeṣā svāṃ tadā karṇa buddhiḥ //

yadā dirvya dhanurādāya pārthaḥ pratāpayanpṛtanāṃ savyasācī /
tvāṃ mardayiṣyatyasukhaiḥ pṛṣatkai-- stadāpṛcchāṃ tyakṣyase pāṇḍavasya //

bālaścandraṃ māturaṅke śayāno yathā kaścitprārthayate'pahartum /
tadvanmohāddayotāmānaṃ rathasthaṃ jetuṃ pārthaṃ kāṅkṣase sūtaputra //

harādastraṃ tīkṣṇadhāraṃ yathā'dya sarvāṇi gātrāṇi nikarṣasi tvam /
sutīkṣṇaśastropamakarmaṇeha yuyutsase phalgunenādya karṇa //

hanyādasiṃ tīkṣṇadhāraṃ yathā'taḥ sutejanaṃ nihitaṃ vai pṛthivyām /
tathā khanasyadya śitānpṛṣatkā-- nyathārthayasyarjuneneha yuddham //

triśūlamāśliṣya sutīkṣṇadhāraṃ sarvāṇi gātrāṇi vigharṣasi tvam /
sutīkṣṇadhāropamakarmaṇā tvaṃ yuyutsase yo'rjunenādya karṇa //

kruddhaṃ siṃhaṃ kesariṇaṃ bṛhantaṃ bālo mūḍhaḥ kṣudramṛgastarasvī /
samāhvayedvṛṣṭamupetya yoddhuṃ tathā tvamadyāhvayase hi pārtham //

mā sūtaputrāhvaya rājaputraṃ mahāvīryaṃ kesariṇaṃ yathaiva /
vane śṛgālaḥ piśitena tṛptaḥ pārthaṃ samāsādya vinaṅkṣyasi tvam //

īṣādantaṃ mahānāgaṃ prabhinnakaraṭāmukham /
śaśako hayase yudve karṇa pārthaṃ dhanañjayam //

vilasthaṃ kṛṣṇasarpaṃ tvaṃ jālyātkāṣṭhena vidhyasi /
mahāviṣaṃ pūrṇakopaṃ yatpārthaṃ yodvumicchasi //

siṃhaṃ kesariṇaṃ kruddhamabhikramyābhinardase /
śṛgāla iva mūḍhastvaṃ nṛsiṃhaṃ karṇa pāṇḍavam //

suparṇaṃ patagaśreṣṭhaṃ vainateyaṃ tarasvinam /
svagevāhvayase pārthaṃ tathā karṇaṃ dhanañjayam //

sarvāmbhasāṃ nidhiṃ bhīmaṃ mūrtimantaṃ jhaṣākulam /
candrodaye vivardhantamapluvastvaṃ titīrṣasi //

ṛṣabhaṃ dundubhigrīvaṃ tīkṣṇaśṛṅgaṃ prahāriṇam /
vatsa āhvayase yudve karṇa pārthaṃ dhanañjayam //

mahāmeghaṃ mahāghoṣaṃ darduraḥ pratinardasi /
bāṇatoyapradaṃ kāle naraparjanyamarjunam //

yathā ca śvā gṛhasthastu vyāghraṃ vanagataṃ bhaṣet /
tathā tvaṃ bhaṣase karṇa naravyāghraṃ dhanañjayam //

śṛgālo hi vane karṇa śaśaiḥ parivṛto vasan /
manyate siṃhamātmānaṃ yāvatsiṃhaṃ na paśyati //

tathā tvamapi rādheya siṃhamātmānamicchasi /
apaśyañśatrudamanaṃ narasiṃhaṃ raṇe'rjunam //

vyāghraṃ tvaṃ manyase'tmānaṃ yāvatkṛṣṇau na paśyasi /
samāsthitāvekarathe sūryācandramasāviva //

yāvadgrāṇḍīvaghoṣaṃ tvaṃ na śṛṇoṣi mahāhave /
tāvadeva tvayā karṇa śakyaṃ vaktuṃ yathecchasi //

rathaśaṅkhadhanuḥśabdairnādayantaṃ diśo daśa /
nardantamiva śārdūlaṃ dṛṣṭvā kroṣṭā bhaviṣyasi //

nityameva śṛgālastvaṃ nityaṃ siṃho dhanañjayaḥ /
vīrapradveṣaṇānmūḍha tasmātkroṣṭeva lakṣyase //

yathā'khuḥ syādviḍālaśca śvā vyāghraśca balābale /
yathā śṛgālaḥ siṃhaśca yathā ca śaśakuñjarau //

yathā'nṛtaṃ ca satyaṃ ca yathā cāpi viṣāmṛte /
tathā tvamapi pārthaśca prakhyātāvātmakarmabhiḥ //