Mahabharata · Chapter 8.3

ākhyātā māmakāstāta nihatā yudhi pāṇḍavaiḥ /
hatāṃśca pāṇḍaveyānāṃ māmakairbrūhi sañjaya //
sañjaya uvāca /

kṛtino yudhi vikrāntā mahāsatvā mahābalāḥ /
sānubandhāḥ sahāmātyā gāṅgeyena nipātitāḥ //

nārāyaṇā vallavāśca rāmāśca śataśo pare /
anuraktāśca vīreṇa bhīṣmeṇa yudhi pātitāḥ //

samaḥ kirīṭinā saṅkhye vīryeṇa ca balena ca /
satyajitsatyasandhena droṇena nihato yudhi //

pāñcālānāṃ maheṣvāsāḥ sarve yudvaviśāradāḥ /
droṇena saha saṅgamya gatā vaivasvatakṣayam //

tathā virāṭadrupadau vṛdvau sahasutau nṛpau /
parākramantau mitrārthe droṇena nihatau raṇe //

yo bāla eva samare sammitaḥ savyasācinā /
keśavena ca durdharṣo baladevena cābhibhūḥ //

pareṣāṃ kadanaṃ kṛtvā mahadraṇaviśāradaḥ / parivārya madāmātraiḥ ṣaḍbhiḥ paramakai rathaiḥ /
aśaknuvadbhirbībhatsumabhimanyurnipātitaḥ //

kṛtaṃ taṃ virathaṃ vīraṃ kṣatradharme vyavasthitam /
dauḥśāsanirmahārāja saubhadraṃ hatavānraṇe //

paṭaccaranihantā ca mahatyā senayā vṛtaḥ /
ambaṣṭhasya sutaḥ śrīmānmitrahetoḥ parākraman //

āsādya lakṣmaṇaṃ vīraṃ duryodhanasutaṃ raṇe /
sumahatkadanaṃ kṛtvā gato vaivasvatakṣayam //

bṛhantaḥ sumaheṣvāsaḥ kṛtāstro yudvadurmadaḥ /
duḥśāsanena vikramya gamito yamasādanam //

maṇimāndaṇḍadhāraśca rājānau yuddhadurmadau /
parākramantau mitrārthe droṇena yudhi pātitau //

aṃśumānbhojarājastu sahasainyo mahārathaḥ /
bhāradvājena vikramya gamito yamasādanam //

sāmudraścitrasenaśca saha putreṇa bhārata /
samudrasenena balādgamito yamasādanam //

anūpavāsī nīlaśca vyādhradattaśca vīryavān /
aśvatthāmnā vikarṇena gamitau yamasādanam //

citrāyudhaścitrayodhī kṛtvā ca kadanaṃ mahat / citramārgeṇa vikramya vikarṇena hato mṛdhe /

vṛkodarasamo yuddhe vṛtaḥ kekayajo yudhi /
kekayena ca vikramya bhrātā bhrātrā nipātitaḥ //

janamejayo gadāyodhī pārvatīyaḥ pratāpavān /
durmukhena mahārāja tava putreṇa pātitaḥ //

rocamānau naravyāghrau rocamānau grahāviva /
drauṇena yugapadrājandivaṃ samprātitau śaraiḥ //

nṛpāśca pratiyudhyantaḥ parākrāntā viśāmpate /
kṛtvā nasukaraṃ karma gatā vaivasvatakṣayam //

purujitkṛntibhojaśca mātulau savyasācinaḥ /
sangrāmanirjitām̐llokāngamitau droṇasāyakaiḥ //

abhibhūḥ kāśirājaśca kāśikairbahubhirvṛtaḥ /
vasudānasya putreṇa tyājito dehamāhave //

amitaujā yudhāmanyuruttamaujāśca vīryavān /
nihatya śataśaḥ sūrānasmadīyairnipātitāḥ //

mitravarmā ca pāñcālyaḥ kṣatradharmā ca bhārata /
droṇena parameṣvāsau gamitau yamasādanam //

śikhaṇḍitanayo yuddhe kṣatradevo yudhāmpatiḥ /
lakṣmaṇena hato rājaṃstava pautreṇa bhārata //

sucitraścitravarmā ca pitāputrau mahārathau /
pracarantau mahāvīrau droṇena nihatau raṇe //

vārdhakṣemirmahārāja samudra iva parvaṇi /
āyudhakṣayamāsādya praśāntiṃ paramāṃ gataḥ //

senābindusutaḥ śreṣṭhaḥ śāstravānpraharanyudhi /
bāhlikena mahārāja kauravendreṇa pātitaḥ //

dhṛṣṭaketurmahārāja cedīnāṃ pravaro rathaḥ /
kṛtvā nasukaraṃ karma gato vaivasvatakṣayam //

tathā satyadhṛtirvīraḥ kṛtvā kadanamāhave /
pāṇḍavārthe parākrānto gamito yamasādanam //

putrastu śiśupālasya suketuḥ pṛthivīpatiḥ /
nihatya śātravānsaṅkhye droṇena nihato yudhi //

tathā satyadhṛtirvīro madirāśvaśca vīryavān /
sūryadattaśca vikrānto nihato droṇasāyakaiḥ //

mātsyādavarajaḥ śrīmāñśatānīko nipātitaḥ / śreṇimāṃśca mahārāja yudhyamānaḥ parākramī /
kṛtvā nasukaraṃ karma gato vaivasvatakṣayam //

tathaiva yudhi vikrānto māgadhaḥ paramāstravit /
bhīṣmeṇa nihato rājañśete'dya paravīrahā //

virāṭaputraḥ śaṅkhastu uttaraśca mahārathaḥ /
kurvantau sumahatkarma gatau vaivasvatakṣayam //

vasudānaśca kadanaṃ kurvāṇo'tīva saṃyuge /
bhāradvājena vikramya gamito yamasādanam //

ete cānye ca bahavaḥ pāṇḍavānāṃ mahārathāḥ /
hatā droṇena vikramya yanmāṃ tvaṃ paripṛcchasi //