Mahabharata · Chapter 8.28

imaṃ cāpyaparaṃ bhūya iti hāsaṃ nibodha me /
piturmama sakāśe vai brāhmaṇaḥ prāha dharmavit //

śrutvā caitadvacaścitraṃ hetukāryārthatattvavit /
kuru śalya viniścitya mā bhūdatra vicāraṇā //

bhārgavāṇāṃ kule jāto jamadagnirmahātapāḥ /
tasya rāmeti vikhyātaḥ putrastejoguṇānvitaḥ //

sa tīvraṃ tapa āsthāya samprasāditavānbhavam /
astrahetoḥ prasannātmā niyataḥ saṃyatendriyaḥ //

tasmai tuṣṭo mahādevo bhaktyā ca praśamena ca / hṛdgataṃ cāsya vijñāya darśayāmāsa śaṅkaraḥ /
pratyakṣeṇa mahādevaḥ svāṃ tanuṃ sarvaśaṅkaraḥ //
śaṅkara uvāca /

rāma tuṣṭo'smi bhadraṃ te viditaṃ tava cepsitam /
kuruṣva pūtamātmānaṃ sarvametadavāpsyasi //

dāsyāmi te tadā'strāṇi yadā pūto bhaviṣyasi /
apātramasamarthaṃ ca dahantyastrāṇi bhārgava //

ityukto jāmadagnyastu devadevena śūlinā /
pratyuvāca mahātmānaṃ śirasā'vanataḥ prabhum //

yadā jānāsi deveśa pātraṃ māmastradhāraṇe /
tadā śuśrūṣate'strāṇi bhavānme dātumarhati //

tataḥ sa tapasā caiva vratena niyamena ca /
pūjopahārabalibhirhomamantrapuraskṛtaiḥ //

samārādhitavāñśarvaṃ bahuvarṣagaṇāṃstadā /
prasannaśca mahādevo bhārgavasya mahātmanaḥ //

asakṛccābravīttasya guṇāndevyāḥ sakāśataḥ /
bhaktimāneṣa satataṃ mayi rāmo dṛḍhavrataḥ //

evamasya guṇānprīto bahuśo kathayadvibhuḥ /
devatānāṃ pitṝṇāṃ ca samakṣamarisūdana //

etasminneva kāle tu daityā hyāsanmahābalāḥ /
taistadā darpamohādvai abādhyanta divaukasaḥ //

tataḥ sambhūya vibudhāstānhantuṃ kṛtaniścayāḥ /
cakruḥ śatruvadhe yatnaṃ daityāñcetumaśaknuvan //

abhigamya tato devā maheśvaramumāpatim /
prāsādayaṃstadā bhaktyā jahi śatrugaṇāniti //

pratijñāya tato devo devatānāṃ ripukṣayam /
rāmaṃ bhārgavamāhūya so'bhyabhāṣata śaṅkaraḥ //

ripūnbhārgava devānāṃ jahi sarvānsamāgatān /
lokānāṃ hitakāmārthaṃ matpriyārthaṃ tathaiva ca //
paraśurāma uvāca /

kā śaktirmama deveśa akṛtāstrasya saṃyuge /
nihantuṃ dānavānsarvānkṛtāstrānyuddhadurmadān //
īśvara uvāca /

gaccha tvaṃ madanujñānānnihaniṣyasi śātravān /
vijitya ca ripūnsarvānguṇānprāpsyasi puṣkalān //
duryodhana uvāca /

etacchrutvā tu vacanaṃ pratigṛhya ca sarvaśaḥ /
rāmaḥ kṛtasvastyayanaḥ prayayau dānavānprati //

tato'jayaddevaśatrūnmahādarpabalānvitān /
vajrāśanisamasparśaiḥ prahāraireva bhārgavaḥ //

sa dānavaiḥ kṣatatanurjāmadagnyo nṛpottama /
saṃspṛṣṭaḥ sthāṇunā sadyo nirvraṇaḥ samapadyata //

prītaśca bhagavāndevaḥ karmaṇā tena tasya vai /
varānprādādbahuvidhānbhārgavāya mahātmane //

uktaśca prītiyuktena devadevena śūlinā //

nipātāttava śastrāṇāṃ śarīre yā'bhavadrujā / tayā te mānuṣaṃ karma vyapohaṃ bhṛgunandana /
gṛhāṇāstrāṇi divyāni matsakāśādyathepsitaṃ //

tato'strāṇi samagrāṇi varāṃśca manasepsitān / labdhvā bahuvidhānrāmaḥ praṇamyaśirasā śivam /
anujñāṃ prāpya deveśājjagāma sa mahātapāḥ //

evametatpurāvṛttaṃ tathā kathitavānṛṣiḥ //

bhārgavo'pi dadau sarvaṃ dhanurvedaṃ mahātmane /
karṇāya puruṣavyāghraḥ suprītenāntarātmanā //

vṛjinaṃ na bhavetkiñcidasya karṇasya pārthiva /
sūtena vardhito nityaṃ na sūto nṛpa eva saḥ //

viśuddhayoniṃ vijñāya divyānyastrāṇyadādbhṛguḥ / nāpi sūtakule jātaṃ manye karṇaṃ kathañcana /
devaputramadaṃ manye kṣatriyāṇāṃ kulodbhavam //

visṛṣṭamavibodhārthaṃ kulasyenti matirmama /
sarvathā na hyaso śalya karṇaḥ sūtakulodbhavaḥ //

sakuṇḍalaṃ sakavacaṃ dīrghabāhumarindamam /
kathamādityasaṅkāśaṃ mṛgī siṃhaṃ prasūyate //

paśya hyasya bhujau pīnau nāgarājakaropamau /
vakṣaḥ paśya viśālaṃ ca sarvaśastrasahaṃ raṇe //

na tveva prākṛtaḥ kaścitkarṇo vaikartano vṛṣā /
mahātmāhyeṣa rājendra rāmaśiṣyaḥ pratāpavān //