Mahabharata · Chapter 8.18

śvetāśvo'pi mahārāja vyadhamattāvakaṃ balam /
yathā vāyuḥ samāsādya tūlarāśiṃ samantataḥ //

pratyudyayustrigartāstaṃ śibayaḥ kauravaiḥ saha /
vasātayo'tha sālvāśca gopālāśca yaśasvinaḥ //

satyadevaḥ satyakīrtirmitradevaḥ śrutañjayaḥ /
sauśrutiścandradevaśca mitravarmā ca bhārata //

trigartarājaḥ samare bhrātṛbhiḥ parivāritaḥ /
putraiścaiva maheṣvāsairnānāśastraviśāradaiḥ //

vyasṛjanta śastrātānkiranto'rjunamāhave /
abhyavartanta sahasā vāryoghā iva sāgaram //

te tvarjunaṃ samāsādya yodhāḥ śatasahasraśaḥ /
agacchanvilayaṃ sarve tārkṣyaṃ dṛṣṭveva pannagāḥ //

te hanyamānāḥ samare na jahuḥ pāṇḍavaṃ raṇe /
hanyamānā mahārāja śalabhā iva pāvakam //

satyadevastribhirbāṇairvivyādha yudhi pāṇḍavam /
mitradevastriṣaṣṭyā tu candradevastu saptabhiḥ //

mitravarmā trisaptatyā sauśrutiścāpi saptabhiḥ /
śrutañjayastu viṃśatyā suśarmā navabhiḥ śaraiḥ //

sa vidvo bahubhiḥ saṅkhye prativivyādha tānnṛpān /
sauśrutiṃ saptabhirvidvvā candradevaṃ tribhiḥ śaraiḥ //

śrutañjayaṃ ca viṃśatyā candradevaṃ tathā'ṣṭabhiḥ /
mitradevaṃ śatenaiva satyadevaṃ tribhiḥ śaraiḥ //

navabhirmitravarmāṇaṃ suśarmāṇaṃ tathā'ṣṭabhiḥ /
śrutañjayaṃ ca rājānaṃ hatvā tatra śilāśitaiḥ //

sauśruteḥ saśirastrāṇaṃ śiraḥ kāyādapāharat /
tvaritaścandradevaṃ ca śarairninye yamakṣayam //

tathetarānmahārāja yatamānānmahārathān /
pañcabhiḥ pañcabhirbāṇairekaikaṃ pratyavārayat //

satyadevastu saṅkrudvastomaraṃ vyasṛjanmahat /
samuddiśya raṇe kṛṣṇaṃ siṃhanādaṃ nanāda ca //

sa nirbhidya bhujaṃ savyaṃ mādhavasya mahātmanaḥ /
ayasmayaḥ svarṇadaṇḍo jagāma dharaṇīṃ tadā //

mādhavasya tu viddhasya tomareṇa mahāraṇe /
pratodaḥ prāpatadvastādraśmayaśca viśāmpate //

vāsudevaṃ vibhinnāṅgaṃ dṛṣṭvā pārtho dhanañjayaḥ /
krodhamāhārayattīvraṃ kṛṣṇaṃ cedamuvāca ha //

prāpayāśvānmahābāho satyadevaṃ prati prabho /
yāvadenaṃ śaraistīkṣṇairnayāmi yamasādanam //

pratodaṃ gṛhya so'nyattu raśmīnsaṅgṛhya ca drutam /
vāhayāmāsa tānaśvānsatyadevarathaṃ prati //

viṣvaksenaṃ sunirvidvaṃ dṛṣṭvā pārtho dhanañjayaḥ /
satyadevaṃ śaraistīkṣṇairvārayitvā mahārathaḥ //

tataḥ suniśitairbhallai rājñastasya mahacchiraḥ /
kumḍalopacitaṃ kāyāccakarta pṛtanāntare //

tannikṛtya śitairbāṇairbhitravarmāṇamākṣipat /
vatsadantena tīkṣṇena sārathiṃ cāsya māriṣa //

tataḥ śaraśatairbhūyaḥ saṃśaptakagaṇānbalī /
pātayāmāsa saṅkrudvaḥ śataśo'tha sahasraśaḥ //

tato rajatapuṅkhena rājañśīrṣaṃ mahātmanaḥ / mitradevasya ciccheda kṣurapreṇa mahārathaḥ /
suśarmāṇaṃ susaṅkruddho jatrudeśe samāhanat //

tataḥ saṃśaptakāḥ sarve parivārya dhanañjayam /
śastraughairmamṛduḥ krudvā nādayanto diśo daśa //

abhyarditastu tajjiṣṇuḥ śakratulyaparākramaḥ /
aindramastramameyātmā prāduścakre mahārathaḥ //

tataḥ śarasahasrāṇi prādurāsanviśāmpate /
kārmukātpāṇḍuputrasya pārthasyāmitatejasaḥ //

tatastu cchidyamānānāṃ dhvajānāṃ dhanuṣāṃ tathā /
rathānāṃ sapatākānāṃ tūṇīrāṇāṃ yugaiḥ saha //

akṣāṇāmatha cakrāṇāṃ yoktrāṇāṃ raśmibhiḥ saha /
kūbarāṇāṃ varūthānāṃ pṛṣatkānāṃ ca saṃyuge //

aśvānāṃ patatāṃ cāpi prāsānāmṛṣṭibhiḥ saha /
gadānāṃ parighānāṃ ca śaktitomarapaṭṭasaiḥ //

śataghnīnāṃ sacakrāṇāṃ bhujānāṃ corubhiḥ saha /
kaṇṭhasūtrāṅgadānāṃ ca keyūrāṇāṃ ca māriṣa //

hārāṇāmatha niṣkāṇāṃ tanutrāṇāṃ ca bhārata / chatrāṇāṃ vyajanānāṃ ca śirasāṃ kumuṭaiḥ saha /
rāśayaścātra dṛśyante patitānāṃ mahītale //

sakuṇḍalāni svakṣīmi pūrṇacandranibhāni ca /
śirāṃsyurvyāmadṛśyanta tārājālamivāmbare //

susragvīṇi suvāsāṃsi candanenokṣitāni ca /
śarīrāṇi vyadṛśyanta nihatānāṃ mahītale //

rudrasyākrīḍasadṛśaṃ ghoramāyodhanaṃ tadā //

nihatai rājaputraiśca kṣatriyaiśca mahābalaiḥ /
arjunena mahārāja tatratatra mahāraṇe //

hastibhiḥ patitaiścaiva turaṅgaiścābhavanmahī /
agamyarūpā samare viśīrṇairiva parvataiḥ //

nāsīdrathapathastasya pāṇḍavasya mahātmanaḥ /
nighnataḥ śātravānbhallairhastyaśvaṃ cāsyato mahat //

svānugā iva sīdanti rathacakrāṇi māriṣa /
caratastasya saṅgrāme tasmiṃllohitakardame //

sīdamānāni cakrāṇi samuhūsturagā bhṛśam /
śrameṇa mahatā yuktā manomārutaraṃhasaḥ //

vadhyamānaṃ tu tatsainyaṃ pāṇḍuputreṇa dhanvinā /
prāyaśo vimukhaṃ sarvaṃ nāvatiṣṭhata bhārata //

tāñjitvā samare jiṣṇuḥ saṃśaptakagaṇānbahūn /
virarāja tadā pārtho vidhūmo'gniriva jvalan //