Mahabharata · Chapter 8.12

bhīmasenaṃ tato drauṇī rājanvivyādha patriṇā /
parayā tvarayā yukto darśayannastralāghavam //

athainaṃ punarājaghne navatyā niśitaiḥ śaraiḥ /
sarvamarmāṇi samprekṣya marmajño laghuhastavat //

bhīmasenaḥ samākīrṇo drauṇinā niśitaiḥ śaraiḥ /
rarāja samare rājanraśmivāniva bhāskaraḥ //

tataḥ śarasahasreṇa suprayuktena pāṇḍavaḥ /
droṇaputramavacchādya siṃhanādamamuñcata //

śaraiḥ sarāṃstato drauṇiḥ saṃvārya yudhi pāṇḍavam /
lalāṭe'bhyāhanadrājannārācena smayanniva //

lalāṭasthaṃ tato bāṇaṃ dhārayāmāsa pāṇḍavaḥ /
yathā śṛṅgaṃ vane dṛptaḥ khaṅgo dhārayate nṛpa //

tato drauṇiṃ raṇe bhīmo yatamānaṃ parākramī /
tribhirvivyādha nārācairlalāṭe vismayanniva //

lalāṭasthaistato bāṇairbrāhmaṇo'sau vyaśobhata /
prāvṛṣīva yathā siktastriśṛṅgaḥ parvatottamaḥ //

tataḥ śaraśatairdrauṇirardayāmāsa pāṇḍavam /
na cainaṃ kampayāmāsa mātariśveva parvatam //

tathaiva pāṇṇḍavo yuddhe drauṇiṃ śaraśataiḥ śitaiḥ /
nākampayata saṃhṛṣṭo vāryodha iva parvatam //

tāvanyonyaṃ śarairghoraiśchādayānau mahārathau /
rathavaryagatau vīrau śuśubhāte balotkaṭau //

ādityāviva sandīptau lokakṣayakarāvubhau /
svaraśmibhirivānyonyaṃ tāpayantau śarottamaiḥ //

tataḥ pravikṛte yatnaṃ kurvāṇau tau mahāraṇe /
kṛtapratikṛte yattau śarasaṅghairabhītavat //

vyāghrāviva ca saṅgrāme ceratustau narottamau /
śaradaṃṣṭrau durādharṣau cāpavakrau bhayaṅkarau //

abhūtāṃ tāvadṛśyau ca śarajālaiḥ samantataḥ /
meghajālairiva cchanau gagane candrabhāskarau //

cakāśete muhūrtena tatastāvapyarindamau /
vimuktāvabhrajālena aṅgārakabudhāviva //

atha tatraiva saṅgrame vartamāne sudāruṇe /
apasavyaṃ tataścakre drauṇistatra vṛkodaram //

kirañcharaśatairugrairdhārābhiriva parvatam /
na tu tanmamṛṣe bhīmaḥ śatrorvijalakṣaṇam //

praticakre tato rājanpāṇḍavo'pyapasavyataḥ /
maṇḍalānāṃ vibhāgena gatapratyāgatena ca //

babhūva tumulaṃ yuddhaṃ tayoḥ puruṣasiṃhayoḥ /
caritvā vividhānmārgānmaṇḍalasthānameva ca //

śaraiḥ pūrṇāyatotsṛṣṭairanyonyamabhijaghnatuḥ /
anyonyasya vadhe caiva cakraturyatnamuttamam //

īṣaturvirathaṃ caiva kartumanyonyamāhave /
tato drauṇirmahāstrāṇi prāduścakre mahārathaḥ //

tānyastraireva samare pratijaghne'tha pāṇḍavaḥ /
tato ghoraṃ mahārāja astrayuddhamavartata //

grahayudvaṃ yathā ghoraṃ prajāsaṃharaṇe hyabhūt /
te vāṇāḥ samasajjanta muktāstābhyāṃ tu bhārata //

dyotagranto diśaḥ sarvāstava sainyaṃ samantataḥ /
bāṇasaṅghairvṛtaṃ ghoramākāśaṃ samapadyata //

ulkāpātāvṛtaṃ yuddhaṃ prajānāṃ sankṣaye nṛpa /
bāṇābhighātātsañjajñe tatra bhārata pāvakaḥ //

savisphuliṅgo dīptārciryo'dahadvāhinīdvayam /
tatra siddhā mahārāja sampatanto'bruvanvacaḥ //

yuddhānāmati sarveṣāṃ yuddhametaditi prabho /
sarvayuddhāni caitasya kalāṃ nārhanti ṣoḍaśīm //

nedṛśaṃ ca punaryuddhaṃ bhaviṣyati kadācana /
aho jñānena sampannāvubha brāhmaṇakṣatriyau //

aho śauryeṇa sampannāvubhau cograparākramau /
aho bhīmabalo bhīma etasya ca kṛtāstratā //

aho vīryasya sāratvamaho sauṣṭhavametayoḥ /
sthitāvetau hi samare kālāntakayamopamau //

rudrau dvāvi sambhūtau yathā dvāviva bhāskarau /
yamau vā puruṣavyāghrau ghorarūpāvubhau raṇe //

iti vācaḥ sma śrūyante siddhānāṃ vai muhurmuhuḥ /
siṃhanādaśca sañjajñe sametānāṃ divaukasām //

adbhutaṃ cāpyacintyaṃ ca dṛṣṭvā karma tayo raṇe /
sidvacāraṇasaṅghānāṃ vismayaḥ samapadyata //

praśaṃsanti tadā devāḥ sidvāśca paramarṣayaḥ /
sādhu drauṇe mahābāho sādhu bhīmeti cābruvan //

tau śūrau samare rājanparasparakṛtāgasau /
parasparamudīkṣetāṃ krodhādudvṛtya cakṣuṣī //

krodharaktekṣaṇau tau tu krodhātprasphuritādharau /
krodhātsandaṣṭadaśanau tathaiva daśanacchadau //

anyonyaṃ chādayantau sma śaravṛṣṭyā mahārathau /
śarāmbudhāro samare śastravidyutprakāśinau //

tāvanyanyaṃ dhvajaṃ vidvvā sārathiṃ ca mahāraṇe /
anyonyasya hayānvidvā bibhidāte parasparam //

tataḥ kruddhau mahārāja bāṇau gṛhya mahāhave /
ubhau cikṣipatustūrmamanyonyasya vadhaiṣiṇau //

tau sāyakau mahārāja dyotamānau camūmukhe /
ājaghnatuḥ samāsādya vajravegau durāsadau //

tau parasparavegācca śarābhyāṃ ca bhṛśāhatau /
nipetaturmahāvīryau rathopasthe tayostadā //

tatastu sārathirjñātvā droṇaputramacetanam /
apovāha raṇādrājansarvasainyasya paśyataḥ //

tathaiva pāṇḍavaṃ rājanvihvalantaṃ muhurmuhuḥ / apovāha rathenājau viśokaḥ śatrutāpanam // *iti śrīmanmahābhārate karṇaparvaṇi ṣoḍaśadivasayuddhe dvādaśo'dhyāyaḥ // 12 // *.jha / pantake etadanantaraṃ sthitāḥ saptādhyāyā etatpāṭhe krameṇa 52-53-54-55-56-59-60 tamādhyāyatayā vartante /