Mahabharata · Chapter 8.11

śrutakarmā tato rājaṃścitrasenaṃ mahīpatim /
ājaghne samare kruddhaḥ pañcāśadbhiḥ śilīmukhaiḥ //

citrasenastu taṃ rājannavabhirnataparvabhiḥ /
śrutakarmāṇamāhatya sūtaṃ vivyādha pañcabhiḥ //

śrutakarmā tataḥ kruddhaścitrasenaṃ camūmukhe /
nārācena sutīkṣṇena marmadeśe samārpayat //

so'tividdho mahārāja nārācena mahātmanā /
mūrcchāmabhiyayau vīraḥ kaśmalaṃ cāviveśa ha //

etasminnantare cainaṃ śrutakīrtirmahāyaśāḥ /
navatyā jagatīpālaṃ chādayāmāsa patribhiḥ //

pratilabhya tataḥ sañjñāṃ citraseno mahārathaḥ /
dhanuściccheda bhallena taṃ ca vivyādha saptabhiḥ //

so'nyatkārmukamādāya vegaghnaṃ rukmabhūṣitam /
citrarūpadharaṃ cakre citrasenaṃ śarormibhiḥ //

sa śaraiścitrito rājā citramālyadharo yuvā /
aśobhata mahāraṅge śvāvicchalalo yathā //

śrutakarmāṇamatha vai nārācena stanāntare /
bibheda tarasā śūrastiṣṭhatiṣṭheti cābravīt //

śrutakarmāṇi samare nārācena samarpitaḥ /
susrāva rudhiraṃ tatra gairikāmbu yathā'calaḥ //

tataḥ sa rudhirāktāṅgo rudhireṇa kṛtacchaviḥ /
rarāja samare vīraḥ sapuṣpa iva kiṃśukaḥ //

śrutakarmā tato rājañśatruṇā samabhidrutaḥ /
śatrusaṃvāraṇaṃ kruddho dvidhā ciccheda kārmukam //

athainaṃ chinnadhanvānaṃ nārācānāṃ śataistribhiḥ /
chādayansamare rājanvivyādha ca supatribhiḥ //

tato'pareṇa bhallena tīkṣṇena niśitena ca /
jahāra saśirastrāṇaṃ śirastasya mahātmanaḥ //

tacchiro nyapatadbhūmau citrasenasya dīptimat /
yadṛcchayā yathā candraścyutaḥ svargānmahītalam //

rājānaṃ nihataṃ dṛṣṭvā te'bhisāraṃ tu māriṣa /
abhyadravanta vegena citrasenasya sainikāḥ //

tataḥ kruddho maheṣvāsastatsainyaṃ prādravaccharaiḥ /
antakāle yathā kruddhaḥ sarvabhūtāni pretarāṭ //

te vadhyamānāḥ samare tava pautreṇa dhanvinā /
vyadravanta diśastūrṇaṃ dāvadagdhā iva dvipāḥ //

tāṃstu vidravato dṛṣṭvā nirutsāhāndviṣajjaye /
drāvayanniṣubhistīkṣṇaiḥ śrutakarmā vyarocata //

prativindhyastataścitraṃ bhittvā pañcabhirāśugaiḥ /
sārathiṃ ca tribhirvidvvā dhvajamekeṣuṇāpi ca //

taṃ citro navabhirbhallairbāhvorurasi cārpayat /
svarṇapuṅkhaiḥ prasannāgnaiḥ kaṅkabarhiṇavājitaiḥ //

prativindhyo dhanuśchittvā tasya bārata sāyakeḥ /
pañcabhirniśitairbāṇairathainaṃ sa hi jaghnivān //

tataḥ śaktiṃ mahārāja svarṇaghaṇṭāṃ durāsadām /
prāhiṇotprativindhyāya vicinvantīmasūniva //

tāmāpatantī sahasā śaktimulkāmivāmbare /
dvidhā ciccheda samare prativindhyo hasanniva //

sā papāta dvidhā chinnā prativindhyaśaraiḥ śitaiḥ /
yugānte sarvabhūtāni trāsayantī yathā'śaniḥ //

śaktiṃ tāṃ prahatāṃ dṛṣṭvā citro gṛhya mahāgadām /
prativindhyāya cikṣepa rukmajālavibhūṣitām //

sā jaghāna hayāṃstasya sārathiṃ ca mahāraṇe /
rathaṃ pramṛdya vegena dharamīmanvapadyata //

etasminneva kāle tu rathādāplutya bhārata /
śaktiṃ cikṣepa citrāya svarṇadaṇḍāmalaṅkṛtām //

tāmāpatantīṃ jagrāha citro rājanmahāmanāḥ /
tatastāmeva cikṣepa prativindhyāya pārthivaḥ //

samāsādya raṇe śūraṃ prativindhyaṃ mahāprabhā / nirbhidya dakṣiṇaṃ bāhuṃ nipapāta mahītale /
patitā'bhāsayaścaiva taṃ deśamaśaniryathā //

prativindhyastato rājaṃstomaraṃ hemabhūṣitam /
preṣayāmāsa saṅkruddhaścitrasya vadhakāṅkṣayā //

sa tasya gātrāvaraṇaṃ bhittvā hṛdayameva ca /
jagāma dharaṇīṃ tūrṇaṃ mahoraga ivāśayam //

sa papāta tadā rājā tomareṇa samāhataḥ /
prasārya vipulau bāhū pīnau pighasannibhau //

citraṃ samprekṣya nihataṃ tāvakā raṇaśobhinaḥ /
abhyadravanta vegena prativindhyaṃ samantataḥ //

sṛjanto vividhānbāṇāñśataghnīśca sakiṅkiṇīḥ /
tamavacchādayāmāsuḥ sūryamabhragaṇā iva //

tānvidhamya mahābāhuḥ śarajālena saṃyuge /
vyadrāvayattava camūṃ vajrahasta ivāsurīm //

te vadhyamānāḥ samare tāvakāḥ pāṇḍavairnṛpa /
viprakīryanta sahasā vātanunnā ghanā iva //

vipradrute bale tasminvadhyamāne samantataḥ /
drauṇireko'bhyayāttūrṇaṃ bhīmasenaṃ mahābalam //

taḥ samāgamo ghoro babhūva sahasā tayoḥ /
yathā daivāsure yuddhe vṛtravāsavayoriva //