Mahabharata · Chapter 8.10

tataḥ karṇo maheṣvāsaḥ pāṇḍavānāmanīkinīm /
jaghāna samare śūraḥ sannataparvabhiḥ //

tathaiva pāṇḍavā rājaṃstava putrasya vāhinīm /
karṇasya pramukhe kruddhā nijaghnuste mahārathāḥ //

karṇo'pi rājansamare vyahanatpāṇḍavīṃ camūm /
nārācairarkaraśmyābhaiḥ karmāraparimārjitaiḥ //

tatra bhārata karṇena nārācaistāḍitā gajāḥ /
neduḥ seduśca mamluśca babhrumuśca diśo daśa //

vadhyamāne bale tasminsūtaputreṇa māriṣa /
nakulo'bhyadravattūrṇaṃ sūtaputraṃ mahāraṇe //

bhīmasenastathā drauṇiṃ kurvāṇaṃ karma duṣkaram /
vindānuvindau kaikeyau sātyakiḥ samavārayat //

śrutakarmāṇamāyāntaṃ citraseno mahīpatiḥ /
prativindhyastathā citraṃ citraketanakārmukam //

duryodhanastu rājānaṃ dharmaputraṃ yudhiṣṭhiram /
saṃśaptakagaṇā hṛṣṭā hyabhyadhāvandhanañjayam //

dhṛṣṭadyumnaḥ kṛpaṃ cāpi tasminvīravarakṣaye /
śikhaṇḍī kṛtavarmāṇaṃ samāsādayadacyutam //

śrutakīrtistathā śalyaṃ mādrīputraḥ sutaṃ tava /
duḥśāsanaṃ mahārāja sahadevaḥ pratāpavān //

kaikeyau sātyakiṃ yuddhe śaravarṣeṇa bhāsvatā /
sātyakiḥ kekayau cāpi cchādayāmāsa bhārata //

tāvenaṃ bhrātarau vīrau jaghnaturhṛdaye bhṛśam /
viṣāṇābhyāṃ yathā nāgau pratināgaṃ mahāvane //

śarasambinnavarmāṇau tāvubhau bhrātarau raṇe /
sātyakiṃ satyakarmāṇaṃ rājanvivyadhatuḥ śaraiḥ //

tau sātyakirmahārāja prahasansarvatodiśaḥ /
chādayañcharavarṣeṇa vārayāmāsa bhārata //

vāryamāṇau tatastau hi śaineyaśaravṛṣṭibhiḥ /
śaineyasya rathaṃ tūrṇaṃ chādayāmāsatuḥ śaraiḥ //

tayostu dhanuṣī citre chittvā śaurirmahāyaśāḥ /
atha tau sāyakaistīkṣṇairvārayāmāsa sātyakiḥ //

athānye dhanuṣī citre pragṛhya ca mahāśarān /
sātyakiṃ chādayantau tau ceraturlaghu suṣṭhu ca //

tābhyāṃ muktā mahābāṇāḥ kaṅkabarhiṇavāsasaḥ /
dyotayanto diśaḥ sarvāḥ sampetuḥ svarṇabhūṣaṇāḥ //

bāṇāndhakāramabhavattayo rājanmahāmṛdhe /
anyonyasya dhanuścaiva cicchiduste mahārathāḥ //

tataḥ kruddho mahārāja sātvato yuddhadurmadaḥ /
dhanuranyatsamādāya sajyaṃ kṛtvā ca saṃyuge //

kṣurapreṇa sutīkṣṇena hyanuvindaśiro'harat /
apatattacchiro rājankuṇ़ḍalopacitaṃ mahat //

śambarasya śiro yadvannihatasya mahāraṇe /
śocayankekayānsarvāñjagāmāśu vasundharām //

taṃ dṛṣṭvā nihataṃ śūraṃ bhrātā tasya mahārathaḥ /
sajyamanyaddhanuḥ kṛtvā śaineyaṃ paryavārayat //

sa ṣaṣṭyā sātyakiṃ vidvvā svarṇapuṅkhaiḥ śilāśitaiḥ /
nanāda balavannādaṃ tiṣṭhatiṣṭheti cābravīt //

sātyakiṃ ca tatastūrṇaṃ kekayānāṃ mahārathaḥ /
śarairanekasāhasrairbāhvorurasi cārpayat //

sa śaraiḥ kṣatasarvāṅgaḥ sātyakiḥ satyavikramaḥ /
rarāja samare rājansapuṣpa iva kiṃśukaḥ //

sātyakiḥ samare vidvaḥ kaikeyena mahātmanā /
kaikeyaṃ pañcaviṃśatyā vivyādha prahasanniva //

tāvanyonyasya samare sañchidya dhanuṣī śubhe /
hatvā ca sārathī tūrṇaṃ hayāṃśca rathināṃ varau //

virathāvasiyuddhāya samājagmaturāhave /
śatacandracite gṛhya carmaṇī subhujau tathā //

virocetāṃ mahāraṅge nistriṃśabaradhāriṇau /
yathā devāsure yuddhe jambhaśakrau mahābalau //

maṇḍalāni tatastau tu vicantau mahāraṇe /
anyonyamabhitastūrṇaṃ samājagmaturāhave //

anyonyasya vadhe caiva cakraturyatnamuttamam /
kaikeyasya dvidhā carma tataściccheda sātvataḥ //

sātyakestu tathaivāsau carma ciccheda pārthivaḥ / carma cchittvā tu kaikeyastārāgaṇaśatairvṛtam /
cacāra maṇḍalānyeva gatapratyāgatāni ca //

taṃ carantaṃ mahāraṅge nistriṃśavaradhāriṇam /
apahastena ciccheda śaineyastvarayā'nvitaḥ //

savarmā kekayo rājandvidhā cchinno mahāraṇe /
nipapāta maheṣvāso vajrāhata ivātvalaḥ //

taṃ nihatya raṇe śūraḥ śaineyo rathasattamaḥ /
yudhāmanyurathaṃ tūrṇamāruroha parantapaḥ //

tato'nyaṃ rathamāsthāya vidhivatkalpitaṃ punaḥ /
kekayānāṃ mahatsainyaṃ vyadhamatsātyakiḥ śaraiḥ //

sā vadhyamānā samare kekayānāṃ mahācamūḥ /
tamutsṛjya raṇe śatruṃ pradudrāva diśo daśa //