Mahabharata · Chapter 7.91

duḥśasanabalaṃ hatvā savyasācī mahārathaḥ /
sindhurājaṃ parīpsanvai droṇānīkamupādravat //

sa tu droṇaṃ samāsādya vyūhasya pramukhe sthitam /
kṛtāñjaliridaṃ vākyaṃ kṛṣṇasyānumate'bravīt //

śivena dhyāhi māṃ brahmansvasti caiva vadasva me /
bhavatprasādādicchāmi praveṣṭaṃ durbhidāṃ camūm //

bhavānpitṛsamo mahyaṃ dharmarājasamo'pi ca /
dhaumyakṛṣṇasamaścaiva satyametadbravīmi te //

aśvatthāmā yathā tāta rakṣaṇīyastvayā'nagha /
tathā'hamapi te rakṣyaḥ sadaiva dvijasattama //

tava prasādādiccheyaṃ sindhurājānamāhave /
nihantuṃ dvipadāṃ śreṣṭha pratijñāṃ rakṣa me prabho //
sañjaya uvāca /

evamuktastadā'cāryaḥ pratyuvāca smayanniva /
māmajitvā na bībhatso śakyo jetuṃ jayadrathaḥ //

etāvaduktvā taṃ droṇaḥ śaravrātairavākirat /
sarathāśvadhvajaṃ tīkṣṇaiḥ prahasanvai sasārathim //

tato'rjunaḥ śaravrātāndroṇasyāvārya sāyakaiḥ /
droṇamabhyardayadbāṇairghorarūpairhattaraiḥ //

vivyādha ca raṇe droṇamanumānya viśāmpate /
kṣatradharmaṃ samāsthāya navabhiḥ sāyakaiḥ punaḥ //

tasyeṣūniṣubhiśchittvā droṇo vivyādha tāvubhau /
viṣāgnijvalitaprakhyairiṣubhiḥ kṛṣṇapāṇḍavau //

iyepa pāṇḍavastasya bāṇaiśchettuṃ śarāsanam /
tasya cintayatastveva phalgunasya mahātmanaḥ //

droṇaḥ śarairasambhrānto jyāṃ cicchedāśu vīryavān /
vivyādha ca hayānasya dhvajaṃ sārathimeva ca //

arjunaṃ ca śarairvīraḥ smayamāno'bhyavākirat /
etasminnantare pārthaḥ sajyaṃ kṛtvā mahaddhanuḥ //

viśeṣayiṣyannācāryaṃ sarvāstraviduṣāṃ varaḥ /
mumoca ṣaṭ्śatānbāṇāngṛhītvaikamiva drutam //

punaḥ saptaśatānanyānsahasraṃ cānivartinaḥ /
cikṣepāyutaśaścānyāṃste'ghnandroṇasya tāṃ camūm //

taiḥ samyagastairbalinā kṛtinā citrayodhinā /
manuṣyavājimātaṅgā viddhāḥ peturgatāsavaḥ //

visūtāśvadhvajāḥ petuḥ sañchinnāyudhajīvitāḥ /
rathino rathamukhyebhyaḥ sahasā śarapīḍitāḥ //

cūrṇitākṣiptadagdhānāṃ vajrānilahutāśanaiḥ /
tulyarūpā gajāḥ peturgiryagrāmbudaveśmanām //

peturaśvasahasrāṇi prahatānyarjuneṣubhiḥ /
haṃsā himavataḥ pṛṣṭhe vāriviprahatā iva //

rathāśvadvipapattyoghāḥ salilaughā ivādbhutāḥ /
yugāntādityaraśmyābhaiḥ pāṇḍavāstraśarairhatāḥ //

taṃ pāṇḍavādityaśarāṃśujālaṃ kurupravīrānyudhi niṣṭapantam /
sa droṇameghaḥ śaravṛṣṭivegaiḥ prācchādayanmegha ivārkaraśmīn //

athātyarthaṃ visṛṣṭena dviṣatāmasubhojinā /
ājaghne vakṣasi droṇo nārācena dhanañjayam //

sa vihvalitasarvāṅgaḥ kṣitikampe yathā'calaḥ /
dhairyamālambya bībhatsurdroṇaṃ vivyādha patribhiḥ //

droṇastu pañcabhirbāṇairvāsudevamatāḍayat /
arjunaṃ ca trisaptatyā dhvajaṃ cāsya tribhiḥ śaraiḥ //

viśeṣayiṣyañśiṣyaṃ ca droṇo rājanparākramī /
adṛśyamarjunaṃ cakre nimeṣāccharavṛṣṭibhiḥ //

prasaktānpatato'drākṣma bhāradvājasya sāyakān /
maṇḍalīkṛtamevāsya dhanuścādṛśyatādbhutam //

te'bhyayuḥ samare rājanvāsudevadhanañjayau /
droṇasṛṣṭāḥ subahavaḥ kaṅkapatraparicchadāḥ //

tatrādbhutamapaśyāma śilānāmiva sarpaṇam /
yaddroṇaṃ tarasā pārtho vṛddhaṃ bālo'pi nātarat //

cintayāmāsa vārṣṇeyo dṛṣṭvā droṇasya vikramam /
nātivartiṣyate hyonaṃ velāmiva mahārṇavaḥ //

tataḥ pārthaṃ samudvignaṃ lakṣya cintayate'cyutaḥ / droṇasya cāpi vikrāntaṃ dṛṣṭvā madhuniṣūdanaḥ /
ityabravīdvāsudevo dhanañjayamudāradhīḥ //

pārthapārtha mahābāho na naḥ kālātyayo bhavet /
droṇamutsṛjya gacchāmo brāhmaṇo'sau gataklamaḥ //
sañjaya uvāca /

pārthaścāpyabravītkṛṣṇaṃ yatheṣṭamiti keśavam //

tataḥ pradakṣiṇaṃ kṛtvā droṇaṃ prāyānmahābhujam /
parivṛttaśca bībhatsuragacchadvisṛjañśarān //

tato'bravītsvayaṃ droṇaḥ kvedaṃ pāṇḍava gamyate /
nanu nāma raṇe śatrumajitvā na nivartase //
arjuna uvāca /

gururbhavānna me śatruḥ śiṣyaḥ putrasamo'smi te /
na cāsti sa pumām̐lloke yastvāṃ yudhi parājayet //
sañjaya uvāca /

evaṃ bruvāṇo bībhatsurjayadrathavadhotsukaḥ /
tvarāyukto mahābāhustvatsainyaṃ samupādravat //

taṃ cakrarakṣau pāñcālyau yudhāmanyūttamaujasau /
anvayātāṃ mahātmānau viśantaṃ tāvakaṃ balam //

tato jayo mahārāja kṛtavarmā ca sātvataḥ /
kāmbhojaśca śrutāyuśca dhanañjayamavārayan //

teṣāṃ daśasahasrāṇi rathānāmanuyāyinām /
abhīṣāhāḥ śūrasenāḥ śibayo'tha vasātayaḥ //

māvellakā lalitthāśca kekayā madrakāstathā /
nārāyaṇāśca gopālāḥ kāmbhojānāṃ ca ye gaṇāḥ //

karṇena vijitāḥ pūrvaṃ saṅgrāme śūrasammatāḥ /
bhāradvājaṃ puraskṛtya hṛṣṭātmāno'rjunaṃ prati //

putraśokābhisantaptaṃ kruddhaṃ mṛtyumivāntakam /
tyajantaṃ tumule prāṇānsannaddhaṃ citrayodhinam //

gāhamānamanīkāni mātaṅgamiva yūthapam /
maheṣvāsaṃ parākrāntaṃ naravyāghramavārayan //

tataḥ pravavṛte yuddhaṃ tumulaṃ romaharṣaṇam /
anyonyaṃ vai prārthayatāṃ yodhānāmarjunasya ca //

jayadrathavadhaprepsumāyāntaṃ puruṣarṣabham /
nyavārayanta sahitāḥ kriyā vyādhimivotthitaṃ //