Mahabharata · Chapter 7.81

tataḥ pārthaḥ prasannātmā prāñjalirvṛṣabhadhvajam /
dadarśotphullanayanaḥ samastaṃ tejasāṃ nidhim //

taṃ copahāraṃ sukṛtaṃ naiśaṃ naityakamātmanā /
dadarśa tryambakābhyāśe vāsudevaniveditam //

tato'bhipūjya manasā kṛṣṇaṃ śarvaṃ ca pāṇḍavaḥ /
icchāmyahaṃ divyamastramityabhāṣata śaṅkaram //

tataḥ pārthasya vijñāya varārthe vacanaṃ tadā /
vāsudevārjunau devaḥ smayamāno'bhyabhāṣata //

svāgataṃ vāṃ naraśreṣṭhau vijñātaṃ manasepsitam /
yena kāmena samprāptau bhavaddhyāṃ taṃ dadāmyaham //

saro'mṛtamayaṃ divyamabhyāśe śatrusūdanau /
tatra me taddhanurdivyaṃ śaraśca nihitaḥ purā //

yena devārayaḥ sarve mayā yudhi nipātitāḥ /
tata ānīyatāṃ kṛṣṇau saśaraṃ dhanuruttamam //

tathetyuktvā tu tau vīrau sarvapāriṣadaiḥ saha /
prasthitau tatsaro divyaṃ divyaiśvaryaśatairyutam //

nirdiṣṭaṃ yadvṛṣāṅkeṇa puṇyaṃ sarvārthasādhakam /
tau jagmaturasambhrāntau naranārāyaṇāvṛṣī //

tatastau tatsaro gatvā sūryamaṇḍalasannibham /
nāgamantarjale ghoraṃ dadṛśāte'rjunācyutau //

dvitīyaṃ cāparaṃ nāgaṃ sahasraśirasaṃ varam /
vamantaṃ vipulā jvālā dadṛśāte'gnivarcasam //

tataḥ kṛṣṇaśca pārthaśca saṃspṛśyāmbhaḥ kṛtāñjalī /
tau nāgāvupatasthāte namasyantau vṛṣadhvajam //

gṛṇantau vedavidvāṃsau tadbrahma śatarudriyam /
aprameyapramāṇaṃ tau gatvā sarvātmanā bhavam //

tatastau rudramāhātmyāddhitvā rūpaṃ mahoragau /
dhanurbāṇaśca śatrughnaṃ taddvandvaṃ samapadyata //

tau tajjagṛhatuḥ prītau dhanurbāṇaṃ ca suprabham /
ājahūturmahātmānau dadatuśca mahātmane //

tataḥ pāśvādvṝṣāṅkasya brahmacārī nyavartata / piṅgākṣastapasaḥ kṣetraṃ balavānnīlalohitaḥ /

sa tadgṛhya dhanuḥśreṣṭhaṃ tasthau sthānaṃ samāhitaḥ /
vicakarṣātha vidhivatsaśaraṃ dhanuruttamam //

tasya maurvī ca muṣṭiṃ ca sthānaṃ cālakṣya pāṇḍavaḥ /
śrutvā mantraṃ bhavaproktaṃ jagrāhācintyavikramaḥ //

sa sarasyeva taṃ bāṇaṃ mumocātibalaḥ prabhuḥ /
cikṣepa ca punarvīrastasminsarasi taddhanuḥ //

tataḥ prītaṃ bhavaṃ jñātvā smṛtimānarjunastadā / varamāraṇyake dattaṃ darśanaṃ śaṅkarasya ca /
manasā cintayāmāsa tanme sampadyatāṃ bhava //

tasya tanmatamājñāya prītaḥ prādādvaraṃ bhavaḥ /
tacca pāśupataṃ ghoraṃ pratijñāyāśca pāraṇam //

tataḥ pāśupataṃ divyamavāpya punarīśvarāt /
saṃhṛṣṭaromā durdharṣaḥ kṛtaṃ kāryamamanyata //

tato'rjunahṛṣīkaiśau punaḥ punararindamau /
vavandatuśca saṃhṛṣṭau śirobhyāṃ taṃ maheśvaram //

anujñātau kṣaṇe tasminbhavenārjunakeśavau /
prāptau svaśibiraṃ vīrau mudā paramayā yutau //

tathā bhavenānumatau mahāsuranighātinā /
idrāvīṣṇū yathā prītau jambhasya vadhakāṅkṣiṇau //