Mahabharata · Chapter 7.8

tathā droṇamabhighnantaṃ sāśvasūtarathadvipān /
vyathitāḥ pāṇḍavā dṛṣṭvā na cainaṃ paryavārayan //

tato yudhiṣṭhiro rājā dhṛṣṭadyumnadhanañjayau /
abravītsarvato yattaiḥ kumbhayonirnivāryatām //

tatrainamarjunaścaiva dhṛṣṭadyumnaśca pārṣataḥ / ye cānye pārthivā rājanpāṇḍavasyānusainikāḥ /
pratyagṛhṇaṃstatastatra samāgacchanmahārathāḥ //

kekayā bhīmasenaśca saubhadro'tha ghaṭotkacaḥ /
yudhiṣṭhiro yamau mātsyo drudaścātmajaiḥ saha //

draupadeyāśca saṃhṛṣṭā dhṛṣṭaketuḥ sasātyakiḥ /
cekitānaśca saṅkruddho yuyutsuśca mahārathaḥ //

ye cānye pārthivā rājanpāṇḍavasyānuyāyinaḥ /
kulavīryānurūpāṇi cakruḥ karmāṇyanekaśaḥ //

sambhidyamānāṃ tāṃ dṛṣṭvā pāṇḍavairvāhinīṃ raṇe /
vyāvṛtya cakṣuṣī kopādbhāradvājo'nvavaikṣata //

sa tīvraṃ kopamāsthāya rathe samaradurjayaḥ /
vyadhamatpāṇḍavānīkaṃ mahābhrāṇīva mārutaḥ //

rathānaśvānnarānnāgānabhidhāvannitastataḥ /
cacāronmattavaddroṇo vṛddho'pi taruṇo yathā //

tasya śoṇitadigdhāṅgāḥ śoṇāste vātaraṃhasaḥ /
ājāneyā hayā rājannaviśrāntāḥ sukhaṃ yayuḥ //

tamantakamiva kruddhamāpatantaṃ yatavratam /
dṛṣṭvā samprādravanyodhāḥ pāṇḍavasya tatastataḥ //

teṣāṃ prādravatāṃ bhīmaḥ punarāvartatāmapi //
paśyatāṃ tiṣṭhatāṃ cāsīcchabdaḥ paramadāruṇaḥ //

śūrāṇāṃ harṣajanano bhīrūṇāṃ bhayavardhanaḥ /
dyāvāpṛthivyorvivaraṃ pūrayāmāsa sarvataḥ //

tataḥ punarapi droṇo nāma viśrāvayanyudhi /
akarodraudramātmānaṃ kirañcharaśataiḥ parān //

sa tathā teṣvanīkeṣu pāṇḍuputrasya māriṣa /
kālavadvyacaraddroṇo yuveva sthaviro balī //

utkṛtya ca śirāṃsyugro bāhūnapi subhūṣaṇān /
kṛtvā śūnyānrathopasthānudakrośanmahāravān //

tasya harṣapraṇādena bāṇavarṣeṇa ca prabho /
prākampanta raṇe yodhā gāvaḥ śītārditā iva //

droṇasya rathaghoṣeṇa maurvīniṣpeṣaṇena ca /
dhanuḥśabdena cākāśe śabdaḥ samabhavanmahān //

athāsya dhanuṣo bāṇā nissarantaḥ sahasraśaḥ / vyāpya sarvā diśaḥ peturnāgāśvarathapattiṣu /

taṃ kārmukamahāvegamastrajvalitapāvakam /
droṇamāsādayāñcakruḥ pāñcālāḥ pāṇḍavaiḥ saha //

sanāgarathapattyaśvānprāhiṇodyamasādanam /
acirādakaroddoṇo mahīṃ śoṇitakardamām //

tanvatā paramāstrāṇi śarānsatatamasyatā /
droṇena vihitaṃ dikṣu śarajālamadṛśyata //

padātiṣu rathāśveṣu vāraṇeṣu ca sarvaśaḥ /
tasya vidyudivābhreṣu caranketuradṛśyata //

sakekayānāṃ pravarāṃśca pañca pāñcālarājaṃ ca śaraiḥ pramathya /
yudhiṣṭhirānīkamadīnasatvo droṇo'bhyayātkārmukabāṇapāṇiḥ //

taṃ bhīmasenaśca dhanañjayaśca śineśca naptā drupadātmajaśca /
śaibyātmajaḥ kāśipatiḥ śibiśca dṛṣṭvā nadanto vyakirañcharaughaiḥ //

teṣāṃ śarā droṇaśarairnikṛttā bhūmāvadṛśyanta vivartamānāḥ /
śreṇīkṛtāḥ saṃyati moghavegā dvīpe nadīnāmiva kāśarohāḥ //

te droṇabāṇāsanavipramuktāḥ patatriṇaḥ kāñcanacitrapuṅkhāḥ /
bhittvā śarīrāṇi gajāśvayūnāṃ jagmurmahīṃ śoṇitadigdhavājāḥ //

sā yodhasaṅghaiśca rathaiśca bhūmiḥ śarairvibhinnairgajavājibhiśca /
pracchādyamānā patitairbabhūva samāvṛtā dyauriva kālameghaiḥ //

śaineyabhīmārjunavāhinīśaṃ saubhradrapāñcālasakāśirājam /
anyāṃśca vīrānsamare mamarda droṇaḥ sutānāṃ tava bhūtikāmaḥ //

etāni cānyāni ca kauravendra karmāṇi kṛtvā samare mahātmā /
pratāpya lokāniva kālasūryo droṇo gataḥ svargamito hi rājan //

evaṃ rukmarathaḥ śūro hatvā śatasahasraśaḥ /
pāṇ़ḍavānāṃ raṇe yodhānpārṣatena nipātitaḥ //

akṣauhiṇīmabhyadhikāṃ śūrāṇāmanivartinām /
nihatya paścāddhṛtimānagacchatparamāṃ gatim //

pāṇḍavaiḥ sahapāñcālairaśivaiḥ krūrakarmabhiḥ /
hato rukmaratho rājankṛtvā karma suduṣkaram //

tato ninādo bhūtānāmākāśe samajāyata /
sainyānāṃ ca tato rājannācārye nihate yudhi //

dyāṃ dharāṃ khaṃ diśo vāpi pradiśarścānunādayan /
aho dhigiti bhūtānāṃ śabdaḥ samabhāvadbhṛśam //

devatāḥ pitaraścaiva pūrve ye cāsya bāndhavāḥ /
dadṛśurnihataṃ tatra bhāradvājaṃ mahāratham //

pāṇḍavāstu jayaṃ labdhvā siṃhanādānpracakrire /
siṃhanādena mahatā samakampata medinī //

vicitrajāmbūnadabhūṣitadhvajaṃ mahārathaṃ rukmarathaṃ nipātitam / //