મહાભારત · અધ્યાય 7.75

પ્રતિજ્ઞાતે તુ પાર્થેન સિન્ધુરાજવધે તદા ।
વાસુદેવો મહાબાહુર્ધનઞ્જયમભાષત ॥

ભ્રાતૄણાં મતમજ્ઞાય ત્વયા વાચા પ્રતિશ્રુતમ્ ।
સૈન્ધવં ચાસ્મિ હન્તેતિ તત્સાહસમિદં કૃતમ્ ॥

અસમ્મન્ત્ર્ય મયા સાર્ધમતિભારોઽયમુદ્યતઃ ।
કથં તુ સર્વલોકસ્ય નાવહાસ્યા ભવેમહિ ॥

ધાર્તરાષ્ટ્રસ્ય શિબિરે યે તુ પ્રણિહિતાશ્ચરાઃ ।
ત ઇમે શીઘ્રમાગમ્ય પ્રવૃત્તિં વેદયન્તિ નઃ ॥

ત્વયા વૈ સમ્પ્રતિજ્ઞાતે સિન્ધુરાજવધે પ્રભો ।
સિંહનાદઃ સવાદિત્રઃ સુમહાનિહ તૈઃ શ્રુતઃ ॥

તેન શબ્દેન વિત્રસ્તા ધાર્તરાષ્ટ્રાઃ સસૈન્ધવાઃ ।
નાકસ્માત્સિંહનાદોઽયમિતિ મત્વા વ્યવસ્થિતાઃ ॥

સુમહાઞ્શબ્દસમ્પાતઃ કૌરવાણાં મહાભુજ ।
આસીન્નાગાશ્વપત્તીનાં રથઘોષશ્ચ ભૈરવઃ ॥

અભિમન્યોર્વધં શ્રુત્વા ધ્રુવમાર્તો ધનઞ્જયઃ ।
રાત્રૌ નિર્યાસ્યતિ ક્રોધાતિતિ મત્ત્વા વ્યવસ્થિતાઃ ॥

તૈશ્ચારેભ્ય ઇયં કૃત્સ્ના શ્રુતા સત્યવતસ્તવ ।
પ્રતિજ્ઞા સિન્ધુરાજસ્ય વધે રાજીવલોચન ॥

તતો વિમનસઃ સર્વે ત્રસ્તાઃ ક્ષુદ્રમૃગા ઇવ ।
આસન્સુયોધનામાત્યાઃ સ ચ રાજા જયદ્રથઃ ॥

અથોત્થાય સહામાત્યૈર્દીનઃ સ્વશિવિરાત્કિલ ।
અયાત્સૌવીરસિન્ધૂનામીશ્વરો રાજસંસદમ્ ॥

સ મન્ત્રકાલે સમ્મન્ત્ર્ય સર્વાં નૈશ્રેયસીં ક્રિયામ્ ।
સુયોધનમિદં વાક્યમબ્રવીદ્રાજસંસદિ ॥

મામસૌ પુત્રહન્તેતિ શ્વોઽભિયાતા ધનઞ્જયઃ ।
પ્રતિજ્ઞાતો હિ સેનાયા મધ્યે તેન વધો મમ ॥

તાં ન દેવા ન ગન્ધર્વા નાસુરોરગરાક્ષસાઃ ।
ઉત્સહન્તેઽન્યથા કર્તું પ્રતિજ્ઞાં સવ્યસાચિનઃ ॥

તે માં રક્ષત સઙ્ગ્રામે મા વો મૂર્ધ્નિ ધનઞ્જયઃ ।
પદં કૃત્વાઽપ્નુયાલ્લક્ષ્યં યુક્તં પ્રતિવિધીયતામ્ ॥

અથ રક્ષા ન મે સમ્યક્ક્રિયતે કુરુનન્દન ।
અનુજાનીહિ માં રાજન્ગમિષ્યામિ ગૃહાન્પ્રતિ ॥

એવમુક્તસ્ત્વવાક્શીર્ષો વિમનાઃ સસુયોધનઃ ।
શ્રુત્વા તં સમયં તસ્ય ધ્યાનમેવાન્વપદ્યત ॥

તમાર્તમભિસમ્પ્રેક્ષ્ય રાજા કિલ સ સૈન્ધવઃ ।
મૃદુ ચાત્મહિતં ચૈવ સાપેક્ષમિદમુક્તવાન્ ॥

નેહ પશ્યામિ ભવતાં તથાવીર્યં ધનુર્ધરમ્ ।
યોઽર્જુનસ્યાસ્ત્રમસ્ત્રેણ પ્રતિહન્યાન્મહાહવે ॥

વાસુદેવસહાયસ્ય ગાણ્ડીવં ધુન્વતો ધનુઃ ।
કોઽર્જુનસ્યાગ્રતસ્તિષ્ઠેત્સાક્ષાદપિ શતક્રતુઃ ॥

મહેશ્વરોઽપિ પાર્થેન શ્રૂયતે યોધિનઃ પુરા ।
પદાતિના મહાવીર્યો ગિરૌ હિમવતિ પ્રભુઃ ॥

દાનવાનાં સહસ્રાણિ હિરણ્યપુરવાસિનામ્ ।
જઘાનૈકરથેનૈવ દેવરાજપ્રચોદિતઃ ॥

સમાયુક્તો હિ કૌન્તેયો બાસુદેવેન ધીમતા ।
સામરાનપિ લોકાંસ્ત્રીન્હન્યાદિતિ મતિર્મમ ॥

સોઽહમિચ્છામ્યનુજ્ઞાતું રક્ષિતું વા મહાત્મના ।
દ્રોણેન સહપુત્રેણ વીરેણ યદિ મન્યસે ॥
શ્રીભગવાનુવાચ ।

સ રાજ્ઞા સ્વયમાચાર્યો ભૃશમત્રાર્થિતોઽર્જુન ।
સંવિધાનં ચ વિહિતં રથાશ્ચ કિલ સજ્જિતાઃ ॥

કર્ણો ભૂરિશ્રવા દ્રૌણિર્વૃષસેનશ્ચ દુર્જયઃ ।
કૃપશ્ચ મદ્રરાજશ્ચ ષડેતેઽસ્ય પુરોગમાઃ ॥

શકટઃ પદ્મકશ્ચાર્ધો વ્યૂહો દ્રોણેન નિર્મિતઃ ।
પદ્મકર્ણિકમધ્યસ્થઃ સૂચી પાર્શ્વે જયદ્રથઃ ॥

સ્થાસ્યતે રક્ષિતે વીરૈઃ સિન્ધુરાટ્ સ સુદુર્મદઃ ।
ધનુષ્યસ્ત્રે ચ વીર્યે ચ પ્રાણે ચૈવ તથૌરસે ॥

અવિષહ્યતમા હ્યેતે નિશ્ચિતાઃ પાર્થ ષડ્રથાઃ ।
એતાનજિત્વા સગણાન્નૈવ પ્રાપ્યો જયદ્રથઃ ॥

તેષામેકૈકશો વીર્યં ષણ્ણાં ત્વમનુચિન્તય ।
સહિતા હિ નરવ્યાઘ્ર ન શક્યા જેતુમઞ્જસા ॥

ભૂયસ્તુ મન્ત્રયિષ્યામિ નીતિમાત્મહિતાય વૈ ।
મન્ત્રજ્ઞૈઃ સચિવૈઃ સાર્ધં સુહૃદ્ભિઃ કાર્યસિદ્ધયે ॥