Mahabharata · Chapter 7.71

puṇyamākhyānamāyuṣyaṃ śrutvā ṣoḍaśarājakam /
avyāharannarapatistūṣṇīmāsītsa sṛñjayaḥ //

tamabravīttadā dīnaṃ nārado bhagavānṛṣiḥ /
kaccinmayā vyāhṛtaṃ yaddhṛdaye tatsthitaṃ tava //

āhosvidantato naṣṭaṃ śrāddhaṃ śūdrīpatāviva /
sa evamuktaḥ pratyāha prāñjaliḥ sṛñjayastadā //

putraśokāpahaṃ śrutvā dhanyamākhyānamuttamam /
rājarṣīṇāṃ purāṇānāṃ yajvanāṃ dakṣiṇāvatām //

vismayena hṛte śoke tamasīvārkatejasā /
vipāpmā'smyavyathopeto brūhi kiṃ karavāṇyaham //
nārada uvāca /

diṣṭyāpahataśokastvaṃ vṛṇīṣveha yadicchasi /
tatte sampatsyate sarvaṃ na mṛṣāvādino vayam //
sṛñjaya uvāca /

pāvito'hamanenaiva prasanno yadbhavānmam /
prasanno yasya bhagavānna tasyāstīha durlabham //
nārada uvāca /

punardadāmi te putraṃ dasyubhirnihataṃ vṛthā /
uddhṛtya narakātkaṣṭātpaśuvatprokṣitaṃ yathā //
vyāsa uvāca /

prādurāsīttataḥ putraḥ sṛñjayasyādbhutaprabhaḥ /
prasannenarṣiṇā dattaḥ kuberatanayopamaḥ //

tataḥ saṅgamya putreṇa prītimānabhavannṛpaḥ /
īje ca kratubhiḥ puṇyaiḥ samāptavaradakṣiṇaiḥ //

akṛtārthaśca bhītaśca na ca sannāhakovidaḥ /
ayajvācānapatyaśca tato'sau jīvitaḥ punaḥ //

śūro vīraḥ kṛtārthaśca pramathyārīnsahasraśaḥ /
abhimanyurgataḥ svargaṃ saṅgrāme'bhimukhāhataḥ //

brahmacaryeṇa yām̐llokānprajayā ca śrutena ca /
iṣṭaiśca kratubhiryānti tāṃste putro'kṣayāngataḥ //

vidvāṃsaḥ karmabhiḥ puṇyaiḥ svargamīhanti nityaśaḥ /
na tu svargādayaṃ lokaḥ kāmyate svargavāsibhiḥ //

tasmātsvargagataṃ putramarjunasya hataṃ raṇe /
na cehānayituṃ śakyaṃ kiñcidaprāpyamīhitam //

yāṃ yogino dhyānaviviktadarśanāḥ prayānti yāṃ cottamayajvino janāḥ /
tapobhiriddhairanuyānti yāṃ tathā tāmakṣayāṃ te tanayo gato gatim //

antātpunarbhāvagato virājate rājeva vīro hyamṛtātmaraśmibhiḥ /
tāmaindavīmātmatanuṃ dvijocitāṃ gato'bhimanyurna sa śokamarhati //

evaṃ jñātvā sthiro bhūtvā mā śuco dhairyamāpnuhi /
jīvanhi puruṣaḥ śocyo na tu svargagato'nagha //

śocato hi mahārāja aghamevābhivardhate /
tasmācchokaṃ parityajya śreyase prayatedbudhaḥ //

praharṣaṃ prītimānandaṃ priyamutsiktacittatām /
etadāhurbudhāḥ śaucamaśaucaṃ śoka ucyate //

evaṃ vidvansamuttiṣṭha prayato bhava mā śucaḥ /
śrutaste sambhavo mṛtyostapāṃsyanupamāni ca //

sarvabhūtasamatvaṃ ca brahmaṇā cāpi coditam /
sṛñjayasya tu putro'sau mṛtaḥ sañjīvitaḥ śrutaḥ //

evaṃ vidvanmahārāja mā śucaḥ sādhayāmyaham /
etāvaduktvā bhagavāṃstatraivāntaradhīyata //

vāgīśāne bhagavati vyāse vyabhranabhaḥprabhe /
gate matimatāṃ śreṣṭhe samāśvāsya yudhiṣṭhiram //

pūrveṣāṃ pārthivendrāṇaāṃ mahendrapratimaujasām /
nyāyādhigatavittānāṃ tāṃ śrutvā yajñasampadam //

sampūjya manasā vidvānviśoko'bhūdyudhiṣṭhiraḥ /
punaścācintayaddīnaḥ kiṃsvidvakṣye dhanañjayam //