Mahabharata · Chapter 7.70

rāmo mahātapāḥ śūro vīro lokanamaskṛtaḥ /
jāmadagnyo'pyatiyaśā avitṛpto mariṣyati //

yaścāstramanuparyeti bhūmiṃ kurvanvipāṃsulām /
nacāsīdvikriyā yasya prāpya śriyamanuttamām //

jāmadagnyo na te rājankaccicchrotramupāgataḥ /
yenaikena purā rājankruddhena hatabandhunā //

bhṛgubhistāmbhamānena trāhi rāmeti visvaram /
triḥsaptakṛtvo bhūmiryatkṛtā niḥkṣatriyā purā //

yaḥ kṣatriyaiḥ parāmṛṣṭe vatse pitari cābruvan /
tato'vadhītkārtavīryamajitaṃ samare paraiḥ //

kṣatriyāṇāṃ catuḥṣaṣṭimayutāni sahasraśaḥ /
tadā mṛtyoḥ sametāni ekena dhanuṣā'jayat //

brahmadviṣāṃ cātha tasminhasrāṇi caturdaśa /
punaranyānnijagrāha dantakūre jaghāna ha //

sahasraṃ musalenāhansahasramasinā'vadhīt /
udbandhanātsahasraṃ ca sahasramudake kṛtam //

dantānbhaṅktvā sahasrasya bhinnakarṇāṃstathā'karot /
tataḥ saptasahasrāṇāṃ kuṭudhṛpamapāyayat //

śiṣṭānvadhvā ca hatvā vai teṣāṃ mṛrdhni vibhidya ca / guṇāvatīmuttareṇa khāṇḍavāddakṣiṇena ca /
giryante śatasāhasrā haihayāḥ samare hatāḥ //

sarathāśvagajā vīrā nihatāstatra śerate /
piturvadhāmarṣitena jāmadagnyena dhīmatā //

nijaghne daśasāhasrānrāmaḥ paraśunā tadā /
na hyamṛṣyata tā vāco yāstairbhṛśamudīritāḥ //

bhṛgau rāmābhidhāveti yadākrandandvijottamāḥ /
tataḥ kāśmīradaradānkuntikṣudrakamālavān //

aṅgavaṅgakaliṅgāṃśca videhāṃstāmraliptakān /
rakṣovāhānvītihotrāṃstrigartānmārtikāvatān //

śibīnanyāṃśca rājanyāndeśāndeśānsahasraśaḥ /
nijaghāna śitairbāṇairjāmadagnyaḥ pratāpavān //

koṭīśatasahasrāṇi kṣatriyāṇāṃ sahasraśaḥ /
indragopakavarṇasya bandhujīvanibhasya ca //

rudhirasya parīvāhaiḥ pūrayitvā sarāṃsi ca /
sarvānaṣṭādaśa dvīpānvaśamānīya bhārgavaḥ //

īje kratuśataiḥ puṇyaiḥ samāptavaradakṣiṇaiḥ /
vedīmaṣṭanalotsedhāṃ sauvarṇāṃ vidhinirmitām //

sarvaratnaśataiḥ pūrṇāṃ patākāśatamālinīm /
grāmyāraṇyaiḥ paśugaṇaiḥ sampūrṇāṃ ca mahīmimām //

rāmasya jāmadagnyasya pratijagrāha kaśyapaḥ /
tataḥ śatasahasrāṇi dvipendrānhemabhūṣaṇān //

nirdasyuṃ pṛthivīṃ kṛtvā śiṣṭeṣṭajanasaṅkulām /
kaśyapāya dadau rāmo hayamedhe mahāmakhe //

triḥsaptakṛtvaḥ pṛthivīṃ kṛtvā niḥkṣatriyāṃ prabhuḥ /
iṣṭvā kratuśatairvīro brāhmaṇebhyo hyamanyata //

saptadvīpāṃ vasumatīṃ mārīco'gṛhṇata dvijaḥ /
rāmaṃ provāca nirgaccha vasudhāto mamājñayā //

sa kaśyapasya vacanātprotsārya saritāmpatim /
iṣupāte yudhāṃ śreṣṭhaḥ kurvanbrāhmaṇaśāsanam //

adhyāvasadgiriśreṣṭhaṃ mahendraṃ parvatottamam /
evaṃ guṇaśatairyukto bhṛgūṇāṃ kīrtivardhanaḥ //

jāmadagnyo hyatiyaśā mariṣyati mahādyutiḥ /
tvayā caturbhadrataraḥ puṇyātpuṇyatarastava //

ayajvānamadakṣiṇyaṃ mā putramanutapyathāḥ / ete caturbhadratarāstvayā bhadraśatādhikāḥ /
mṛtā naravaraśreṣṭha mariṣyanti ca sṛñjaya //