Mahabharata · Chapter 7.66
gayaṃ cādhūrtarajasaṃ mṛtaṃ sṛñjaya śuśruma /
ye vai varṣaśata rājā hutaśiṣṭāśano'bhavat //
tasmai hyagnirvaraṃ prādāttato vavre varaṃ gayaḥ /
tapasā brahmacaryeṇa vratena niyamena ca //
gurūṇāṃ ca prasādena vedānicchāmi veditum /
svadharmeṇāvihiṃsyānyāndhanamicchāmi cākṣayam //
vipreṣu dadataścaiva śraddhā bhavatu nityaśaḥ /
kanyāsu ca savarṇāsu suprajastvaṃ ca me bhavet //
annamojo maho mahyaṃ dharme me ramatāṃ manaḥ /
avighnaṃ cāstu me nityaṃ dharmakāryeṣu pāvaka //
tathā bhiṣyatītyuktvā tatraivāntaradhīyata /
gayo hyavāpya tatsarvaṃ dharmeṇārādhayañjagat //
sa darśapūrṇamāsābhyāṃ kāleṣvāgrayaṇena ca /
cāturmāsyaiśca vividhairyajñaiścāvāptadakṣiṇaiḥ //
ayajacchraddhayā rājā parisaṃvatsarāñśatam /
gavāṃ śatasahasrāṇi śatamaśvaśatāni ca //
śataṃ niṣkasahasrāṇi gavāṃ cāpyayutāni ṣaṭ /
utthāyotthāya samprādātparisaṃvatsarāñśatam //
nakṣatreṣu ca sarveṣu dadannakṣatradakṣiṇāḥ /
īje ca vividhairyajñairyathā somo'ṅgirā yathā //
sauvarṇāṃ pṛthivīṃ kṛtvā ya imāṃ pramiśarkarām /
viprebhyaḥ prādadadrājā so'śvamedhe mahāmakhe //
jāmbūnadamayā yūpāḥ sarve ratnaparicchadāḥ /
gayasyāsansamṛddhāstu sarvabhūtamanoharāḥ //
sarvakāmasamṛddhaṃ ca prādādannaṃ gayastadā /
brāhmamebhyaḥ prahṛṣṭebhyaḥ sarvabhūtebhya eva ca //
sasamudravanadvīpanadīnadavaneṣu ca /
nagareṣu ca rāṣṭreṣu divi vyomni ca ye'vasan //
bhūtagrāmāśca vividhāḥ santṛptā yajñasampadā /
gayasya sadṛśo yajño nāstyanya iti te'bruvan //
ṣaṭ्triṃśadyojanāyāmā triṃśadyojanamāyatā /
paścātpuraścaturviṃśadvedī hyāsīddhiraṇmayī //
gayasya yajamānasya muktāvajramaṇistṛtā /
prādātsa brāhmaṇebhyo'tha vāsāṃsyābharaṇāni ca //
yathoktā dakṣiṇāścānyā viprebhyo bhūridakṣiṇaḥ /
yatra bhojanaśiṣṭasya parvatāḥ pañcaviṃśatiḥ //
kulyāśca kṣīravāhinyo rasānāṃ cāpabhavaṃstadā /
vastrābharaṇagandhānāṃ śārayaśca pṛthagvidhāḥ //
yasya prabhāvācca gayastriṣu lokeṣu viśrutaḥ /
vaṭaścākṣayyakaraṇaḥ puṇyaṃ brahmasaraśca tat //
sa cenmamāra s̤añjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0