Mahabharata · Chapter 7.67

sāṅkṛtiṃ rantidevaṃ ca mṛtaṃ sṛñjaya śuśruma /
yasya dviśatasāhasrā āsansūdā mahātmanaḥ //

gṛhānabhyāgatānviprānatithīnpariveṣakāḥ /
pakvampakvaṃ divārātraṃ varānnamamṛtopamam //

nyāyenādhigataṃ vittaṃ brāhmaṇebhyo hyamanyata /
vedānadhītya dharmeṇa yaścakre dviṣato vaśe //

upasthitāśca paśavaḥ svayaṃ yaṃ śaṃsitavratam /
bahavaḥ svargamicchanto vidhivatsatrayājinam //

nadī mahānasādyasya pravṛtaktā carmarāśitaḥ /
tasmāccarmaṇvatī nāma khyātā puṇyā saridvarā //

brāhmaṇebhyo dadanniṣkānsauvarṇānsa prabhāvataḥ /
tubhyaṃ niṣkaṃ tubhyaṃ niṣkamiti ha sma prabhāṣate //

tubhyantubhyamiti prādānniṣkānniṣkānsahasraśaḥ /
tata punaḥ samāśvāsya niṣkāneva prayacchati //

alpaṃ dattaṃ mayā'dyeti niṣkakoṭiṃ sahasraśaḥ /
ekāhnā tāmyati tataḥ kvādya viprā iti bruvan //

dvijapāṇiviyogena duḥkhaṃ me śāśvataṃ mahat /
bhaviṣyati na sandeha evaṃ rājā'dadadvasu //

sahasraśaśca sauvarṇānvṛṣabhāngośatānugān /
sāṣṭaṃ śataṃ suvarṇānāṃ niṣkamāhurdhanaṃ tathā //

adhyardhamāsamadadadbrāhmaṇebhyaḥ śataṃ samāḥ /
agnihotropakaraṇaṃ yajñopakaraṇaṃ ca yat //

ṛṣibhyaḥ karakānkumbhānsthālīḥ piṭharameva ca /
śayanāsanāyānāni prāsādāṃśca gṛhāṇi ca //

vṛkṣāṃśca vividhāndadyādannāni ca dhanāni ca /
sarvaṃ sauvarṇamevāsīdrantidevasya dhīmataḥ //

tatrāsya gāthā gāyanti ye purāṇavido janāḥ /
rantidevasya tāṃ dṛṣṭvā samṛddhimatimānuṣīm //

naitādṛśaṃ dṛṣṭapūrvaṃ kuberasadaneṣvapi /
dhanaṃ ca pūryamāṇaṃ naḥ kiṃ punarmanujeṣviti //

vyaktaṃ vasvokasāreyamityucustatra vismitāḥ /
sāṅkṛte rantidevasya yāṃ rātrimatithirvaset //

ālabhyanta tadā gāvaḥ sahasrāṇyekaviṃśatiḥ /
tatra sma sūdāḥ krośanti sumṛṣṭamaṇikuṇḍalāḥ //

sūpaṃ bhūyiṣṭhamaśnīdhvaṃ nādya māṃsaṃ yathā purā /
rantidevasya yatkiñcitsauvarṇamabhavattadā //

tatsarvaṃ vitate yajñe brāhmaṇebhyo hyamanyata /
pratyakṣaṃ tasya havyāni pratigṛhṇanti devatāḥ //

kavyāni pitaraḥ kāle sarvakāmāndvijottamāḥ /
sa cenmamāra sṛñjaya caturbhadratarastvayā //

putrātpuṇḍatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //