Mahabharata · Chapter 7.65
śaśibinduṃ ca rājānaṃ mṛtaṃ sṛñjaya śuśruma /
ya īje vividhairyajñaiḥ śrīmānsatyaparākramaḥ //
tasya bhāryāsahasrāṇāṃ śatamāsīnmahātmanaḥ /
ekaikasyāṃ ca bhāryāyāṃ sahasraṃ tanayābhavan //
te kumārāḥ parākrāntāḥ sarve niyutayājinaḥ /
rājānaḥ kratubhirmukhyairījānā vedapāragāḥ //
hiraṇyakavacāḥ sarve sarve cottamadhanvinaḥ /
sarve'śvamedhairījānāḥ kumārāḥ śāśibindavāḥ //
tānaśvamedhe rājendro brāhmaṇebhyodadatpitā /
śataṃśataṃ rathagajā ekaikaṃ pṛṣṭhato'nvayuḥ //
rājaputraṃ tadā kanyāstapanīyasvalaṅkṛtāḥ /
kanyāṅkanyāṃ śataṃ nāgā nāgenāge śataṃ rathāḥ //
ratherathe śataṃ cāśvā balino hemamālinaḥ /
aśveaśve gosahasraṃ gavāṃ pañcāśadāvikāḥ //
etaddhanamaparyāptamaśvamedhe mahāmasve /
śaśibindurmahābhāgo brāhmaṇebhyo hyamanyata //
vārkṣāśca yūpā yāvanta aśvamedhe mahāmakhe /
te tathaiva punaścānye tāvantaḥ kāñcanābhavan //
bhakṣyānnapānanicayāḥ parvatāḥ krośamucchritāḥ /
tasyāśvamedhe nirvṛtte rājñaḥ śiṣṭāstrayodaśa //
tuṣṭapuṣṭajanākīrṇāṃ śāntavighnāmanāmayām /
śaśibindurimāṃ bhūmiṃ ciraṃ bhuktvā divaṃ gataḥ //
sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0